Izayii 37 - LAWA A BOO SONBORE

Ezekiasi n nɔ̀n diɛ Izayii la

¹ Kii Ezekiasi bɛa boon kɛn ma lɔn, a ná a mɔnaan tɔtoɛ̃, á gɛ̀ koa ǹ mɔnaan wɔ, á kiɛ̃ á wɔ Dɛnaa Lawa a kion.

² A din biikoo goon kɛ lɛ nɛ, á kii kion a kiã Eliyakimu laanka sɛ́wɔ-kiɛ̃li Sebunaa ka Lawa a wúlu-bɔlen min golen dia Amɔsi a nɛgiĩ Izayii li, ǹ dɔn tumaa n ka gɛ̀ koa ǹ mɔnaan nɛ ǹ ganaa.

³ Ǹ nə́ pɛ Lawa a dia dí-a wole lɛ-n kɛnɛn: – Ezekiasi a boo á ke: «Pelo á lɛawaa kɛ n foo ziziɛ̃ ǹ lɛawaa lɛa. Dɔlɔ lɛawaa nɛ, sìi lɛawaa nɛ. Ká ǹ bɛ pii lɔn, nɛnyaan lɛ a yɛ dɔ, sɛnɛ, pàã ba ǹ dan lon á yii wa.

⁴ Asiiriin kii na á sɔraasin goledɛnaa dia die sɔ koe Lawa yiikoonaa ganaa. Toa bɛ̀ Dɛnaa Lawa too n sɔ kɔ kɛ miɛ, a dɔlɔ bɔ a ganaa a da ǹ boon kɛn lɛa! Nsɛ Izayii, Dɛnaa Lawa, n Lawa nyankɔ n zaman kɛa lɛa, ǹ mɛnɛn lɛn yii goã koo.»

⁵ Kii Ezekiasi a dí-nyalin lɛn nə́ woo n bɔlɔ pɛ, Izayii ni.

⁶ Izayii pɛ ǹ nɛ: – Ka wo Dɛnaa Lawa a boo kɛ pɛ kaa dɛnaagiĩ Ezekiasi ni: «Ń Asiiriin sɔraasin goledɛnaa lɛ ma sɔ koe ma ganaa. N boo mɛn ma, nyɛ́ɛ nyan nə n kũ wa.

⁷ Ǹ kii á re boo goon miɛ. Á ke ma á re a yiri bɔyɛɛ, ma dia a gána nɛ. Walan kəni, ǹ tá re dii ka gɔya sa nɛ.»

Asiiriin kii n sɔ koe Zeruzalɛmu ganaa

⁸ Asiiriin sɔraasin goledɛnaa lɛ ma, mà a kii lɛ soo Lakiisi. A na á goã zia biɛ kɔn ka Libnaa kiwi ni. Sɔraasin goledɛnaa lɛ kiɛ̃ á woo yaa walan.

⁹ Ǹ nə́ daa pɛ Asiiriin kii lɛ nɛ mà Etiopiin kii Tirakaa zii saa a n die a gialaa. A bɛ́ á bɛa boo lɛ ma, á dia dí-a wolen dia Ezekiasi la.

¹⁰ Á pɛ ǹ nɛ mà ǹ pɛ Zudaan kii Ezekiasi ni: «N nə n foo doa n Lawa mɛn ganaa bɛ nyan nə n yiri sã a ń pii n ni mà Zeruzalɛmu ba re n we Asiiriin kii gɔn wa.

¹¹ Asiiriin kiin nə gánan mɛnɛn ziziɛ̃ lenlen, á ke ń bɛ boo ma! Ma n taasɛ mà n tá re n boe a nɛ?

¹² KIIN mɛnɛn nə goã ma nyɛɛnɛ ǹ nə́ gánan kɛn yu, Goozan nɛ, Karan nɛ, Resɛfu ni, ka Edɛn tɔrɔn kɛn nɛ Telasaara, bɛa gánan lɛn dìn nə boo la ǹ nə́ ǹ si wa.

¹³ KIIN kɛn man maa? Amaati wɔ nɛ, Arpaadi wɔ nɛ, Layiiri wɔ nɛ, Sefaravayimu kiwi wɔ nɛ Enaa wɔ nɛ ka Iva wɔ nɛ.»

Kii Ezekiasi a Lawa nyankɔ

¹⁴ Asiirii minin lɛn nə da ka sɛ́wɔ mɛn lɛ nɛ, Ezekiasi saa á pɛ. Bɛ kio, á tɔn woo Dɛnaa Lawa a kion, á bũ Dɛnaa Lawa yɔrɔ-a.

¹⁵ Bɛ kio, Ezekiasi Dɛnaa Lawa nyankɔ á pɛ:

¹⁶ «Dɛnaa Lawa Pàãyiidɛnaa, Izirayeli a Lawa, nsɛ mɛn bɛ́ giã-n lon màn yiikoonaa tumaa mìi la, n dinsɔɔ̃ n kanaa a gánan tumaa a Lawa lɛa, n din ni n lon laanka tán zɛnaa.

¹⁷ Dɛnaa Lawa, n para kanaa n nə n too kɔ taãn-taãnɛ! Dɛnaa Lawa, n yii bũ n ga gongon! Senankeribu a dia dí-a wolen nə sɔ mɛn kɔ n ganaa, Lawa Yiikoonaa, n too kɔ bɛ li.

¹⁸ Dɛnaa Lawa, taãn nɛ, Asiirii kiin lɛn nə́ tɔrɔn tumaa lɛ naa, ǹ nə́ ǹ gánan ziziɛ̃.

¹⁹ Ǹ nə́ ǹ dìn zũ tɛ-n, a gialaa, ǹ bie Lawa lɛa wa. Màn nyínin manɛ, gɔn hinlaa kɔlɔ lɛa, minbuiin nɛ a màn zɛnaa lɛa, ǹ nə́ ǹ ziziɛ̃.

²⁰ Sɛnɛ, nsɛ Dɛnaa Lawa, wɔa Lawa, wɔ kirisibaa Senankeribu ganaa, a gɔn nyan dɔ wɔ-a wa. Ka bɛ nɛ Dɛnaa Lawa, kanaa a gánan tumaa á re doɛ̃ mà n dinsɔɔ̃ n Lawa lɛa.»

Izayii n Dɛnaa Lawa a boo a binyəə koe

²¹ Bɛ lɛ nɛ, Amɔsi a nɛgiĩ Izayii tɔn boo kɛ dia Ezekiasi la: – Dɛnaa Lawa, Izirayeli a Lawa bɛ́ màn mɛn pii, á ke: «N Lawa nyan ke ń kɔ, ń mà a kasɛn kirisibaa Asiiriin kii Senankeribu ganaa, bɛa binyəə á ke.

²² Á ke, Dɛnaa Lawa n kɛ pii Senankeribu a paǹ li: N tìĩ bɔ *Siɔn kiwi ni, a n yaa we n ganaa. Zeruzalɛmu kiwi nə n mìi papasɛ n ganaa.

²³ Ma nə ń sɔ kɔ die ganaa? Ma nə ń die piɛ̃ bɔ? N yii na á wɔ n boo da die ganaa? Ma nə n ga die ganaa ka din koa nɛ? Masɛ din Izirayeli a Lawa sonbore kɛ nɛ!

²⁴ Ma nə ń sɔ kɔ masɛ Dɛnaa ganaa, n dí-nyalin barka nɛ. Ma nə ń pɛ: Masɛ Senankeribu, maa ziabaa ǹ wotoron kɛn pàã nɛ, má dii kele sasan mìi ni, yǎa Liban kele baã bii, má a *sɛdrə da sonboren kuru, ka a siprɛsi da sonboren ne. A kele lɛ a mɛn mìi la bɛ́ lon, á la ǹ miãn tumaa nɛ, ma gɔn dɔ bɛ ganaa, kɔnlɛ ka a daã sonbore kɛ nɛ.

²⁵ Má tùn fɔ̃ a nɛ, má ǹ mu mi. Tà gòãn mɛnɛn bɛ́ die Niili ganaa, bɛ̀ má n gòã da Ezipti a tán la, man bɛn tumaa piɛ̃ ka daɛ̃.

²⁶ Senankeribu, n ba bɛ doɛ̃ wa? Haalɛ bibi, masɛ din ni ma siin kɛn lɛn yɔrɔ bɔ. Ma din ni má ǹ yɔrɔ bɔ á biikoo ná a kànaa wa. Sisia kəni, man die ǹ zɛnɛɛ. Man má n koa, máa n basaã kɔ kiwin kɛn manɛ tamaa nɛ, ǹ kɛbɔlɔn baa.

²⁷ Min mɛnɛn nə goã a nɛ, bɛn nə boo màn kɔn la ǹ nə́ zɛnaa wa. Nyɛ́ɛ nə́ ǹ gù dɛ, sìi nə́ n kɔ ǹ lɛ. Maǹ nə́ n baa ka wuru gɔ́ɔ̃ nɛ ǹ buu bɛ́ lɔn, ka tɔɔn buu sɔ̃ ǹ bǎã bɛ́ lɔn, ka kala la ǹ buu bɛ́ lɔn, ka wuru gɔ́ɔ̃ nɛ ǹ màn bɛ́ lɔn a ná a tɔn ma wa.

²⁸ Ma tá n giã tán biikoo doɛ̃, n soo laanka n wɔ kion biikoo ne, hinlaa bɛ̀ n foo yoo masɛ li.

²⁹ Hiĩ, n foo bɛ́ á yoo masɛ li, n tɔ ziziɛ̃ ǹ boo mɛn da, á kaa ma too ne. Bɛ lɛ nɛ, man die fɔlɔ biɛ diɛ n nyin ni, ma karfɔ wɔ n lɛ-n. N kɔ zii mɛn lɛ n daa kànaa, man die wusii ma n da bɛ lɛ la, n wo piɛ.

³⁰ «Ezekiasi, kɛ n die sii a kɔnboe biɛ n wɔ lɛa: Miɛla a lɛ̀ kɛ nɛ, *belee nàn mɛn mɛnaa tán á bɔ a din li, ka ǹ die bɛ lɛ bii. Lɛ̀ boe, ka ǹ die a pere bii. Sɛnɛ, a lɛ̀ sɔɔbaa ǹ wɔ li, ka á re belee diɛ, ka kuru, ka *rezɛ̃ da zumu ka a nɛ bii.

³¹ Zudaa gána minin mɛnɛn yii goã koo, bɛn tá re goɛ̃ ka dan bɛ́ lɔn. Ǹ tá re gòon diin boe, ǹ wɔ tán. Ǹ gùrùn tá re nɛ koe.

³² Hiĩ, min mɛnɛn yii goã koo, bɛn tá re soe Zeruzalɛmu. Min mɛnɛn nə n si gɛ̀ la, bɛn tá re golee lon Siɔn kele la. Dɛnaa Lawa Pàãyiidɛnaa a miãgoã-bɔ kɛ bɛ́ re diɛ sii mɛn zɛnaa ganaa, bɛ n ka kɛ nɛ.»

³³ Dɛnaa Lawa bɛ́ boo mɛn diɛ Asiiriin kii wɔ paǹ li, bɛ á ke: A re we kiwi kɛ-n wa, a re kiɛ goon din zuĩ a-n wa. A re yɔ boe a ganaa wa. A re goóron koɛ a din siã a yoo a gialaa wa. A re tii diɛ kɔn la a ganaa wa.

³⁴ A kɔ zii mɛn lɛ á daa kànaa, a n die wusii a kɔ a din lɛ lɛ, a woo. A re we Zeruzalɛmu wa. Masɛ Dɛnaa Lawa a da ǹ boo ne.

³⁵ Man kiwi kɛ tamɛɛ, ma a kirisibaa. Man bɛ zɛnɛɛ ma din a lɛa ka maa dí-nyali Davida nɛ.

Senankeribu a gɛ̀

³⁶ Dɛnaa Lawa a lon a dia dí-a wole soo, á min duu paabiɛ ka pɔkiwisi ka sooro (185 000) dɛ Asiirii minin giã ǹ bǎã nɛ. A lɛawaa baayɛlɛ, sɔraasin lɛn nə́ yoo. Á ke, bɛ̀ geren nə́ ke tán bǎã yii ni.

³⁷ Bɛ lɛ na á toa Asiiriin kii Senankeribu na a zìãn tumaa fore, á n bɔyaa á woo Ninivu, á giã walan.

³⁸ Ǹ kɔn pinaa, a toa a n nyankɔ we a dì Nisirɔki a kion, a nɛgiĩ Adramelɛki laanka Saresɛɛrɛ dɛ ka gɔya sa nɛ á gã. Ǹ nə́ baa si ǹ nə́ woo Araraa gána nɛ. A nɛgiĩ kɔsɔ Asaradɔn kii baa a bǎã nɛ.