Izayii 36 - LAWA A BOO SONBORE

Asiiriin kii n yui Zeruzalɛmu gialaa

¹ Ezekiasi a kiibaa lɛ̀ fulusiibaa ǹ wɔ li, Asiiriin kii Sanankeribu yoo ka zia nɛ Zudaa gána a kiwi tamaa wolen kɛn tumaa gialaa, á ǹ kũ.

² Asiiriin kii nə́ n toa Lakiisi, á sɔraasin goledɛnaa dia kɔnlɛ ka a sɔraasi kuru ni kii Ezekiasi li Zeruzalɛmu. Sɔraasin goledɛnaa lɛ n golee-n kunu mu dɔǹ kaaraa kɛa mu a baa si ǹ zii ganaa, gàra-wɔlen wuru zii la.

³ Ilkia a nɛgiĩ Eliyakimu na á goã kiã lɛa kii a kion. Á soo kiwi lɛ nɛ kun ka sɛ́wɔ-kiɛ̃li Sebunaa nɛ, ka Asaafu a nɛgiĩ Zoa nɛ, sɛ́wɔn-tamaali lɛa, ǹ nə́ woo n da lɛ.

⁴ Asiiriin sɔraasin goledɛnaa lɛ pɛ ǹ nɛ: – Ka wo kii gole Asiiriin kii a boo kɛ pɛ Ezekiasi ni: «N foo n doa-n wàa ganaa?

⁵ Ma n taasɛ mà boo kooro laanka foo tãbaa á boe la a ziabaa ǹ yiri bǎã saa? N foo n doa-n die ganaa kəni, n tá n gòãn dii masɛ ganaa?

⁶ Á ke, ma nə n foo doɛ Ezipti ganaa, bɛa làpaa yɔyɔrɛɛ ke, min gɔn foɛ̃ bɛ̀ n nə́ n gɔn da a ganaa. Die nə n foo doɛ bɛ ganaa. *Faarahɔn, Eziptin kii lɛ n ka làpaa yɔyɔrɛɛ bɛ́ lɔn a foo doama-a wolen tumaa gɔn, foo na a ba n doɛ a ganaa wa.

⁷ Kɔntan, n tá re ma lɛ sii n pɛ mà ka foo n doa-n Dɛnaa Lawa, kaa Lawa ganaa. A da yaa dɔn n din Ezekiasi-n n ná a guguru kɔ ǹ bǎã laanka a wúlu bɔ ǹ bǎãn ziziɛ̃. Ń pɛ Zudaa laanka Zeruzalɛmu minin manɛ, mà ǹ Dɛnaa Lawa guguru kɔ Zeruzalɛmu a *wúlu bɔ ǹ bǎã kɛ dinsɔɔ̃ nɛ.

⁸ «Haya kəni! Bǐɛ̃ kɔ n nə n lɛ kɔ maa dɛnaagiĩ Asiiriin kii lɛ la. Ma yɔrɔ boemaa nɛ ma á boe la ma sùi duu paa (2 000) kɔ n la, bɛ̀ n tá re ǹ dabaa a wolen yii, ǹ dii ǹ la.

⁹ N ba boe la dinin, n maa dɛnaagiĩ a dí-nyali dadaran kɛn kiɛɛrɛdɛnaa goon din da wusoo a kio-n ganaa wa, ma nə n foo doɛ Eziptin kii ganaa, màn mɛn bɛ́ toɛ n ziabaa ǹ wotoron yɛ ka sùin ni!

¹⁰ Ma n taasɛ mà maa dɛnaagiĩ na á daa gána lɛ nɛ á n die ziziɛ̃ bɛ̀ Dɛnaa Lawa na a zii kɔ la wa? A dinmaa na á lɛ kɔ la.»

¹¹ Eliyakimu laanka Sebunaa ka Zoa tɔn pɛ Asiiriin sɔraasin goledɛnaa lɛ nɛ: «Wɔ nə n nyankoe, boo da wɔ nɛ ka Aaramu bɔlɔ nɛ. Taãn nɛ, wɔ á bɛa bɔlɔ lɛ miɛ. N nyan boo da wɔ-n ka *Ebrəə bɔlɔ-n wa. Minin kɛn bii-a kungɔnɔn la, bɛn manə n too koe wɔa boon ganaa.»

¹² Sɛnɛ, sɔraasin goledɛnaa lɛ nə ǹ lɛ si á pɛ: «Maa dɛnaagiĩ a boo lɛ nə nsɛ laanka n kii dinsɔɔ̃ wɔ lɛa? Haayii! Min mɛn tumaa bɛ́ kiwi lɛ a kungɔnɔn la, a nə ǹ dɔn wɔ lɛa. Kànaa ka boɛɛn nɛ, ka á re kaa bù bii, ka kaa mɔn mi mu lɛa kɔnlɛ ka ǹ dɔn nɛ.»

¹³ Bɛ kio, Asiiriin sɔraasin goledɛnaa lɛ yoo lon á pɛ ka lɛn gole ne, Ebrə́ bɔlɔ nɛ: – Ka n too kɔ kii gole, Asiiriin kii a boo li:

¹⁴ «Ka nyan toa Ezekiasi ka yiri sã wa. A re boe la a ka kirisibaa wa.

¹⁵ A n pii ka nɛ mà ka n foo doa Dɛnaa Lawa ganaa, mà á re ka kirisibiɛ sonbore. A n pii ka nɛ mà kiwi lɛ a re n we Asiiriin kii gɔn wa.

¹⁶ Ka nyan nə n too kɔ Ezekiasi lon wa. Sɛnɛ, masɛ Asiiriin kii bɛ́ ǹ mɛn pii ka nɛ, ka n too kɔ bɛ li. Ka toa yii-nyɛɛ goã wɔ bii, ka n dinin kɔ ma la. Ka bɛ nɛ, didie tumaa á re a rezɛ̃ nɛ bii ka a gɔ́rɔ da nɛ nɛ, a na a mu dɔǹ mu mi.

¹⁷ Bɛ kio, ma á re miɛ ka nyɛɛnɛ ma wo ka nɛ gána kɔsɔ nɛ, ka kaa wɔ kɛ bɛ́ lɔn, gána mɛn bɛ́ *belee laanka *rezɛ̃ da n bǐɛ̃ koe a nɛ, buuru laanka duvɛ̃ ná a nɛ.

¹⁸ Ka nyan toa Ezekiasi ka yiri sã a n pii ka nɛ, mà Dɛnaa Lawa á re ka kirisibiɛ wa. Tɔrɔ kɔsɔn kɛn dìn nə́ ma kurəə ǹ gánan kuĩ ganaa?

¹⁹ Amaati laanka Arpaadin dìn kɛn man nə́ boo wàa la ǹ nə́ zɛnaa? Sefaravayimu wɔn dɔn man nə́ wàa zɛnaa? Ǹ nə́ boo la ǹ nə́ ma kurəə Samarii kiwi kuĩ ganaa?

²⁰ Dìn lɛn tumaa bii, n kɔn yɛ á ma kurəə a gána kuĩ ganaa wa. Dɛnaa Lawa n die siɛ lɔn kəni, a boo la a ma kurəə Zeruzalɛmu kuĩ ganaa?»

²¹ Min mɛn tumaa bɛ́ bǎã lɛ nɛ, n kɔn nə n lɛ bũ wa. Ǹ na a lɛ si ka boo goon din ni wa. A giala, kii Ezekiasi na á wɔ ǹ too ne mà ǹ nyan a lɛ si wa.

²² Bɛ kio, Ilkia a nɛgiĩ Eliyakimu ke kiã lɛa kii a kion, ka sɛ́wɔ-kiɛ̃li Sebunaa laanka Asaafu a nɛgiĩ Zoa nɛ, ke sɛ́wɔ-tamaali lɛa, bɛn nə́ ǹ mɔnaan tɔtoɛ̃, ǹ nə́ n bɔyaa ǹ nə́ woo Ezekiasi li, ǹ nə́ woo Asiiriin sɔraasin goledɛnaa a lɛn su lɛ pɛ nɛ.