Izayii 33 - LAWA A BOO SONBORE

Zɔ́ɔn wɔ n ka bɔ̀n nɛ

¹ Nsɛ mɛn bɛ́ basaã koe, n wɔ n ka bɔ̀n nɛ, nsɛ mɛn bɛ́ basaã tɔn nə n yɛ wa, nsɛ mɛn bɛ́ minin yiri siɛ̃ ǹ nə́ ǹ tɔn nə nsɛ yiri sã wa! Bɛ̀ n basaã kɔ n nya ǹ mɛn waáraa, ǹ tá re basaã koe n ne. Bɛ̀ n minin yiri sã n nya biikoo mɛn li, ǹ tá re n dɔ yiri siɛ̃.

² Dɛnaa Lawa, makara bɔ wɔ ganaa! Wɔ foo n doa nɛ n din ganaa. Baraabaraa baayɛlɛ, goã wɔ pàã lɛa, n wɔ kirisibaa koe pinaa.

³ Bɛ̀ tɔrɔn nə́ n lɛ ma, maǹ baa sii. Bɛ̀ n yoo n golee lon, maǹ pɛsɛ̃ paǹ yii li.

⁴ Maǹ ka gɔn màn goɛ ka bisin bɛ́ màn goɛ lɔn, Maǹ tele ka ganaa ka bisin kuru bɛ́ lɔn.

⁵ Dɛnaa Lawa a golebaa miã banban. A giala, a n màn tumaa mìi la. Á *Siɔn pã ka a peperebaa laanka a sonborebaa nɛ.

⁶ A n die goɛ̃ ǹ yii-nyɛɛ lɛa yǎa duduu. A din ni minin kirisibiɛ, a n yiridɛnaa lɛa, a n sii tumaa doɛ̃. Nyɛ́ɛ baa Dɛnaa Lawa yii-n nə naforo lɛa.

Dɛnaa Lawa a sii zɛnaa

⁷ Zeruzalɛmu minin nə́ ke n lɛ dii ziin la. Là nyantoro boo-dalin man wusii die ka wuu-n kɔsɛkɔsɛ.

⁸ Ziin la ǹ kooromaa nɛ. Min kɔn ba kiɛ̃ ǹ la wa. Lɛ kɔ kɔn la sàabaa, ǹ nə́ siéren kaa, ǹ ba min kɔn guguru koe wa.

⁹ Gána lɛ n gɛ̀ koa gɔ́ɔ̃ nɛ. A n bǎã gere lɛa. Sìi nə n kɔ Liban a kelen kɛn lɛ. Ǹ tumaa n laa nɛ. Saarɔn a wuru bǎãn kɛn man ka diə gole bɛ́ lɔn. Da ba Basan laanka Karmɛli kelen kɛn la wa.

¹⁰ Dɛnaa Lawa pɛ: «Kanna, man die sii zɛnɛɛ. Kanna, man die yui, ma maa golebaa nyaa.

¹¹ Ka bɛ siin mɛnɛn yɔrɔ boe, bɛn man ka buu gere bɛ́ lɔn. Ta ǹ nə́ yɔrɔ bɔ, maǹ ka làpaa bɛ́ lɔn. Ka dinin foo-yoo n die ka bɔ̀n biɛ ka tɛ bɛ́ lɔn.

¹² Tɛ á re tɔrɔ gialakunun kɛn kuĩ, ka laso bɛ́ lɔn. Ǹ tá re ǹ zuĩ tɛ-n ka nyan da gùrù bɛ́ lɔn.

¹³ Wɔlɔ sɔsɔɔdɛnan lɛn, ma sii mɛn zɛnaa, ka n too kɔ bɛ li. Wɔlɔ kunudɛnan lɛn, ka maa boo sii la dɔ̃.»

¹⁴ Siɔn kiwi, nyɛ́ɛ n zɛ̀rɛdɛnan ganaa. Min baraan gɔ̀nɔn nə bìn diɛ. Maǹ nɔ̀n diɛ: «Wɔ bii, die n boe la a n mɔrɔ tɛ baraa kɛ ganaa, hinlaa a diri tɛ girigiri kɛ la, a ná a nimi duduu wa?»

¹⁵ Min mɛn bɛ́ sii sonbore zɛnɛɛ, a n peperebaa boo diɛ, bɛa dɛnaa a lɛ koe kakaarɛbaa ǹ màn ganaa wa, a nə n dɔ̀ɔ̃ we lɛ pii wolen manɛ, bɛ̀ ǹ tá gɛ̀ dɛ boo diɛ, a nə n too tiɛ̃. A nə n yii tiɛ̃ màn mɛn bɛ́ toɛ, a yii nyan sii baraa yɛ wa.

¹⁶ Bɛa dɛnaa lɛ n die goɛ̃ yii-nyɛɛ la kelen mìi ni. A duru ǹ bǎã n die goɛ̃ ka para yala nɛ. Á re màn-bii yii, mu á re nyaabiɛ a ganaa wa.

Zeruzalɛmu á re foo doa ǹ bǎã biɛ

¹⁷ N tá re kii lɛ a siĩnbaa tumaa yii, n gána lɛ a golebaa tumaa yɛ.

¹⁸ Siin mɛnɛn nə goã nyɛ́ɛ diɛ n ganaa, n tá re n taasɛ ka bɛn nɛ, n nɔ̀n da n din la: «Min mɛnɛn nə goã nyin giɔ̀mɔ sii, bɛ̀ ǹ nimi, maǹ maa? Min mɛnɛn nə goã giɛ wɔ tamaa ǹ kungɔnɔn kɛn walan, bɛn maǹ maa?»

¹⁹ N yii a re miɛ tɔrɔ din gole-kɔle kɛ ganaa doo wa, ke bɔlɔ gɔgɔrɛ pii, min kɔn ná a miɛ wa.

²⁰ Siɔn, ga wɔa zɔ́n zɛnaa ǹ kiwi kɛ ganaa! N tá re Zeruzalɛmu yii, a n die goɛ̃ foo doa ǹ bǎã lɛa n wɔ lɛa, ka zìã á ke lɔn, bǎã goon ne. Ǹ ba re a dere ǹ kiɛn kɛn woɛ̃ doo wa, ǹ ba re a biɛn fore wa.

²¹ Dɛnaa Lawa n die a siĩnbaa nyɛɛ wɔ-n walan lɛn, bɛa bǎã lɛ n die kɔ̀ dadaran, laanka mu zii dadaran bǎã biɛ. Ziabaa ǹ mu la ǹ goo ba re boe walan wa, mu la ǹ goo dadaran ba re kiɛ̃ a-n wa.

²² Dɛnaa Lawa n wɔ nyɛɛnaan-bɔle lɛa. A din nə wɔa kiri-kuruli lɛa. Dɛnaa Lawa n wɔa kii lɛa. A din nə wɔ kirisibiɛ.

²³ Zɔ́ɔn biɛn kɛn paraamaa bie wa. Mu la ǹ goo a bàbàla gole ke a bii ni, ǹ ba boe la ǹ bɛ kũ ǹ golee-n wa. Bɛ lɛ taman yii, naforo gigiã á re n gii. Bɔlɔkan dinin tá re die a kokoo ǹ bǎã nɛ.

²⁴ Zeruzalɛmu kiwi, min kɔn ba re pii mà asɛ a lon wa. Zaman mɛn bɛ́ giã-n walan, ǹ tá re a sii baraan toɛ nɛ.