Izayii 3 - LAWA A BOO SONBORE

Dɛnaa Lawa nə́ n bɔ Zudaa gána li

¹ Á ke, Dɛnaa Lawa Pàãyiidɛnaa n die Zeruzalɛmu laanka Zudaa a dɔmalɛ tumaa lɛ diɛ, a ǹ màn-bii laanka ǹ mi ǹ mu tumaa gɔsɛ ǹ gɔn.

² Foo taãnaan laanka sɔraasin ni, kiri-wɔlen laanka Lawa a boo gii-dalin ni, wɔ-kulin ni ka min golen ne,

³ sɔraasi posooro mìilandɛnaa nɛ, ka kiãn nɛ, yiri kɔ ma la wolen ne, kɔ́lɔnbaalin ni, ka dagòãdɛnan nɛ.

⁴ Dɛnaa Lawa n pii: «Man die nɛnyaanan koɛ ǹ mìilandɛnan lɛa, ǹ nə ǹ nyɛɛnaan bɔ, a kɔnpɛ ka ǹ dinin giã ǹ gɔn nɛ.»

⁵ Minin man die boe kɔn yii ni, ǹ kakaarɛ kɔ kɔ ǹ ganaa. Nɛ tenən man die yui min zizin gialaa, min kooron nə sìi da min yii guguru-an ganaa.

⁶ Min tá re ǹ dɔɔ̃n kuĩ ǹ di a kion, a pɛ nɛ: «Mɔnaa bɛ́ nsɛ lon, wɔa kiã baa, n giã kɛbɔlɔn kɛn mìi la!»

⁷ Sɛnɛ, ǹ dɔɔ̃n lɛ á re a lɛ sii, a pɛ nɛ: «Maa boe sii kɔn la ma zɛnaa kaa lɛa wa. Maa kion, màn-bii banban, mɔnaa banban. Maa boe la ma kiã baa doɛ̃ wa.»

⁸ Zeruzalɛmu kiwi mɛnaa, Zudaa gána bɔ̀n baa. A giala, maǹ nə́ n gòãn dii Dɛnaa Lawa ganaa ǹ da ǹ boon laanka ǹ nya ǹ dín gɔ́ɔ̃ nɛ, maǹ nə́ n gòãn dii a gugurubaa ganaa.

⁹ Ǹ yɔrɔ gɔ́ɔ̃ din nə ǹ zɛnaa ǹ siin nyɛɛ. Ǹ ba ǹ sii baraan duri wa, maǹ nə ǹ pii ǹ lɛ-a ka Sodɔmu minin wɔ bɛ́ lɔn. Koe n ka kɛ nɛ, maǹ bɔ̀n yɔrɔ boe ǹ dinin wɔ lɛa.

¹⁰ Ka pɛ kɛnɛn: «Min pepere n yii-nyɛɛ la, a giala, á re a nya ǹ dí sonboren kɛn là yii.»

¹¹ Sɛnɛ, min baraan wɔ n ka bɔ̀n nɛ, bɔ̀n woo bɔ̀n. A giala, a baraa mɛn zɛnaa, bɛ lɛ n die kuĩ a mìi ni.

¹² Dɛnaa Lawa n pii: «Maa zaman, min mɛnɛn bɛ́ n nɔmɛɛ, nɛnyaanan manɛ. Ǹ mìilandɛnan man lɔn lɛa. Ee, maa zaman, min mɛnɛn bɛ́ n nyɛɛnaan boe, bɛn manə n yiri siɛ̃. Maǹ nə n diɛ zii baraa la.»

Dɛnaa Lawa n kiri we Izirayeli a kiãn ganaa

¹³ Dɛnaa Lawa yoo kiri wɔ taman yii, a n yui, die kiri we tɔrɔn ganaa.

¹⁴ A n die kiri we a zaman a min golen ganaa, ka ǹ kiãn kɛn nɛ: «Ka dinin lɛn man ka maa *rezɛ̃ dan kɛn ziziɛ̃, ka doobaan gɔn mànan koã, ka kaa kionən pã nɛ.

¹⁵ Ka n maa zaman nɔmɛɛ, ka n pàã nyɛɛ doobaan nɛ. Bɛ giala mà wàa kəni?» Dɛnaa Lawa Pàãyiidɛnaa a da ǹ boo ne.

Lawa n die Zeruzalɛmu lɔn gialaa

¹⁶ Dɛnaa Lawa n pii: «*Siɔn kiwi lɔn kɛn tá kɔɔ̃nɛ ǹ dinin ganaa. Maǹ nə n wìi dii ǹ nə́ tɔ we, ǹ nə́ n yii boe minin li. Maǹ nə n gòã siɛ gogoon, ǹ gòã wìi ganaa ǹ zanan kɛn wuu li.»

¹⁷ Kanna kəni, Dɛnaa á re kɔǹgɛ boe ǹ mìi-a, ǹ goã baã gere-an lɛa.

¹⁸ Bɛa pinaa lɛ nɛ, ǹ nyaǹ mànan kɛn, Dɛnaa á re bɛn woɛ a ǹ bɔ ǹ ganaa: Gòã ganaa ǹ zanan nɛ, giin ni, bɔlɔ-a ǹ giin ni mui nyin nə́ ǹ la,

¹⁹ too ganaa ǹ kaaranan nɛ, zanan nɛ, lankanan nɛ,

²⁰ taparan nɛ, zɔrɔka bisin zɔzɔnɔn nɛ, maabɛlɛn tiɛ̃ nɛ, sɛ́wɔ nɛn nɛ, ka gɛ̀rɛsiɛ bɔ ǹ dagòãn nɛ,

²¹ nyin gɔ́ɔ̃naa ǹ kaaranan laanka a zanan nɛ,

²² zɔ́n mɔnaan nɛ, mɔnaa dadaran nɛ, pataran nɛ, takoo bɔnboɛɛnɛn nɛ,

²³ damalen ne, mɔnaa zɔrɔn nɛ, mìi ganaa ǹ mɔnaa gɔnɔn nɛ, ka yonyolon ne.

²⁴ Màn gìĩ kɔɔ̃n bǎã nɛ, màn bɔnɛɛ gìĩ á re goɛ̃ a tan, maabɛlɛ bǎã nɛ, biɛ nɛ, mìi-tiɛ̃ sonbore bǎã nɛ, mìi-koɛ̃ nɛ, mɔnaa sonboren bǎã nɛ, gɛ̀ koa ǹ mɔnaa nɛ. Sìi n die siĩnbaa bǎã siɛ.

Zeruzalɛmu lɔn man giɔɔrɔn lɛa

²⁵ Zeruzalɛmu, n giĩn tá re gɔya sa gɛ̀ we, n sɔraasin tá re giɛ̃ zia la.

²⁶ Bɛa biikoo li kəni, kiwi min tumaa á re gɛ̀ koɛ, ǹ gini ka lɔ mɛn nə́ ke giã-n tán furu-n, a gɔn màn tumaa bɔ̀n baa.