Izayii 28 - LAWA A BOO SONBORE

Izirayeli a kiwi gole Samarii a ziziɛ̃

¹ Wàa koe-n ka kɛ nɛ Samarii ganaa! Efrayimu a yɔ-milin man nə n dinin koɛ kiwi k a lɛa. Ǹ dinin yii li a n ka kii bafolo bɛ́ lɔn tenten mìi ni nyankɔrɔ basa sonbore kɛ nɛ. Sɛnɛ, ka da buũ gere bɛ́ lɔn yɔ-milin mìi ni, kiwi lɛ dɔ n die n biɛ miɛ̃.

² Min kaka n ke, pàã ná a lon, Dɛnaa n bɛ lɛ diɛ. A na á kɔnbɔ ka la nɛ, kiɛ ka gii ni, basaã koe, la gole lɛa a mu bǎã tumaa si á n kɔ lɛ. Bɛa min kɛ n màn tumaa ziziɛ̃ ka pàã nɛ.

³ Kiwi ke ka kii bafolo bɛ́ lɔn Efrayimu a yɔ-milin kɛn yii li, bɛ n die n yɔyɔrɛ.

⁴ Da buũ geren kɛn, nyaǹ sonbore lɛa Samarii kiwi lɛ ganaa, tenten mìi ni nyankɔrɔ basa sonbore kɛ nɛ, bɛn tá re n biɛ ka gɔ́rɔ nɛ bɛ́ lɔn, á ma, a niɛ̃ biikoo ná a tɔn dɔ wa: Bɛ̀ min mɛn yɛ, bɛa dɛnaa n siɛ a bii goon lɛa.

⁵ Bɛa pinaa kɛ nɛ, Dɛnaa Lawa Pàãyiidɛnaa a zaman mɛn yii goã koo, a dinmaa n die n biɛ kii bafolo lɛa, gii giɔ̀mɔ kaka lɛa bɛn wɔ lɛa.

⁶ Min mɛnɛn doamaa bɛ nɛ ǹ kiri pepere wɔ, a n die peperebaa ǹ yiri koe bɛn la. Min mɛnɛn bɛ́ zɔ́ɔn lui kiwi a kiɛnlɛn ganaa, a n die pàã koe bɛn la.

Yɔ-mili baraan man yaa we Izayii ganaa

⁷ Duvɛ̃ taman yii Lawa a wúlu-bɔlen laanka Lawa a boo gii-dalin man boo kooron diɛ, yɔ kakaarɛ nə ǹ diɛ tatalaa ganaa. Yɔ kakaarɛ taman yii maǹ boo kooron diɛ, duvɛ̃ nə́ ǹ yiri lɔlɔkɔn, yɔ kakaarɛ nə ǹ diɛ tatalaa ganaa. Bɛ̀ ǹ nə́ sii-nyaan yɛ, maǹ boo kooron diɛ. Bɛ̀ ǹ tá kiri we, ǹ yii á wɔlɔ yii wa.

⁸ Ǹ tabalan tumaa n pisəə lɛa, ǹ tumaa n gɔgɔrɛ.

⁹ Bɛa màn-milin lɛn man nɔ̀n diɛ: Izayii n zoɛ̃ li a daraa kɔ die la? A na a boo giala pii die ne? Nɛnyaanan mɛnɛn bɛ́ ǹ nə́ ǹ lɛ na nyɔ ganaa sisia? Nɛnyaan tiɛɛ̃nɛn mɛnɛn bɛ́ ǹ nə́ ǹ lɛ bɔ nyɔ ganaa sisia?

¹⁰ A n zoɛ̃ li mà a wɔ daraa sɛ́wɔ nɛ gogoonmaa dan yii li, sii-nyaa gogoonmaa dan yii li, doroo gogoonmaa dan yii li!

¹¹ Haya, sisia kəni, Dɛnaa Lawa n die boo diɛ ka zaman lɛ nɛ ka bobo-pɛlin ni, bɔlɔ soree lɛa zaman lɛ bɛ́ a ba ǹ mɛn miɛ wa.

¹² A da yaa, á pɛ ǹ nɛ: «Kànaa n bǎã kiĩn lɛa. Min mɛn nɔmaa, ka toa bɛa dɛnaa nə n susu. Kànaa n bǎã kiĩn lɛa.» Sɛnɛ, ǹ lɛ kɔ ǹ nə́ n too kɔ wa.

¹³ Bɛ lɛ nɛ, Dɛnaa Lawa á re ǹ darɛɛ kɛnɛn: Sɛ́wɔ nɛ gogoonmaa dan yii li, sii-nyaa gogoonmaa dan yii li, doroo gogoonmaa dan yii li! Bɛ̀ ǹ tá tɔ we kəni, maǹ die mɛnɛɛ tán ǹ làfu la, ǹ wen nə yiyiɛ. Kan tá re ǹ kuĩ, ǹ nə ǹ baa kòso nɛn lɛa.

Kion gòã daa ǹ kɔlɔ Siɔn

¹⁴ Kasɛn foo-saalin kɛn Zeruzalɛmu nyɛɛnaan boe, ka n too kɔ Dɛnaa Lawa a boo li:

¹⁵ Ka ǹ pii: «Wɔ́ lɛ kɔ kɔn la wɔ ka gɛ̀ nɛ, wɔ́ lɛ kɔ kɔn la wɔ ka geren ne. Bɛ̀ koe daa, a re wɔ yii wa. A giala, soɛ n wɔa mìi duru ǹ bǎã lɛa, màn mɛn bɛ́ a taãn lɛa wa, bɛ n wɔa duru ǹ bǎã lɛa.»

¹⁶ Bɛ lɛ nɛ, Dɛnaa Lawa a boo á pii: «Man kion gòã daa ǹ kɔlɔ diɛ tán *Siɔn. Kɔlɔ barkadɛnaa nɛ, doa-n tán kaka. Min woo min nə́ n tiləə a ganaa, bɛa dɛnaa a re bìn diɛ wa.

¹⁷ Peperebaa n die goɛ̃ maa màn zɔ́ɔ̃ ǹ màn lɛa, kiri pepere n die goɛ̃ maa biɛ nàn lɛa.» La gii á re kaa minin sã ǹ mìi duru ǹ bǎã kɛ ziziɛ̃. Mu á re n koe kaa duru ǹ bǎã kɛ lɛ.

¹⁸ Ka lɛ kɔ kɔn la mɛn wɔ ka gɛ̀ nɛ, bɛ á re sàabiɛ, ka ǹ mɛn dɔ wɔ ka geren ne, bɛ dɔ a re yɔrɔ yii wa. Bɛ̀ koe daa, á re ka yɔyɔrɛ.

¹⁹ A n die kiɛ̃ baayɛlɛ baayɛlɛ, penleen ka tèlò. A kiɛ̃ gogoonmaa yii, a n die ka bii. Bɛ̀ minin ná a boo giala ma, nyɛ́ɛ gole á re ǹ dii.

²⁰ Ka n die n biɛ ka min mɛn bɛ́ a piì kiɛɛrɛ kɔ waa ma la ganaa, a kɔmalɛ kiɛɛrɛ kɔ kɔ min lɛ ganaa.

²¹ Dɛnaa Lawa n die sii zɛnɛɛ ka Perasimu a nyankɔrɔ basa bɛ́ lɔn. Bɛ̀ á re a dí nyɛɛ, a foo-yoo á die a gɔ̀nɔn diɛ bìn diɛ ganaa, ka Gabawɔ̃ nyankɔrɔ basa wɔ bɛ́ lɔn. Sɛnɛ, a n die goɛ̃ tɔwaa ǹ dí lɛa. A bɛ́ re dí mɛn nyɛɛ, bɛ n die goɛ̃ kaãbaa ǹ dí lɛa.

²² Ka foo-saa ǹ sii toa walan kanna kəni! Bɛ bie wa, kaa fɔlɔ biɛn tá re wusii ǹ ka suu. A giala, má Dɛnaa Lawa Pàãyiidɛnaa lɛ ma, á gole kiwi lɛ tumaa a ziziɛ̃ li.

Yiridɛnaabaa n Dɛnaa Lawa wɔ lɛa

²³ Ka n too da, ka n too kɔ ma lon! Ka yiri bɔ, ka n too kɔ maa boon li.

²⁴ Buu-kɔsɔli ba n din nɔmɛɛ biikoo yii li a na a wuru lɛ kɔsɔ, a na a zii bɔ, a na a tii kòrò yu wa.

²⁵ Sɛnɛ, a n wuru lɛ gɔ́ɔ̃ zɛnɛɛ bɔrɔ, bɛ kio, a n nigɛli laanka kumɛ̃ diɛ, bɛ kio, a tɔn *belee laanka *ɔrzi da, a tɔn a gɔn nyɔmɔɔ ka màn tɔrɔ kɔsɔ nɛ wuru lɛ lɛkoro-a.

²⁶ A Lawa na á bɛa sii zɛnaa ǹ gɔn kɛ lɛ nyaa nɛ, á daraa a ganaa.

²⁷ Min kɔn ba nyansan duwii ka ɛrsi n wa, ǹ ba boe la ka wotoro-n wa. Sɛnɛ, maǹ nigɛli duwii ka bàlà nɛ, ǹ kumɛ̃ duwəə ka lasa nɛ.

²⁸ Maǹ belee loe ǹ nə́ buuru diɛ nɛ, sɛnɛ ǹ bie duwii miɛ̃ duduu wa. Tɔɔn laanka wotoro gòã n boe la, sɛnɛ, ǹ ba yɔyɔrɛ wa.

²⁹ Bɛa dí nya ǹ gɔn kɛ dɔ n boe Dɛnaa Lawa Pàãyiidɛnaa li. Yiri kɔ wole sonbore ne, a dí-doɛ̃ á gole.