Izayii 27 - LAWA A BOO SONBORE

¹ Bɛa pinaa, Dɛnaa Lawa á re yui *Leviatan gialaa ka a gɔya sa kaka pàãdɛnaa kɛ nɛ, Leviatan lɛ n miɛ̃ baa-sili lɛa. Leviatan piɛ̃maa-n ka taasiɛ baraa nɛ. Dɛnaa Lawa á re bɛa mu li ǹ màn babaraa lɛ dii.

Dɛnaa Lawa a rezɛ̃ da wuru a loe

² Bɛa pinaa, ka loe lɔ duvɛ̃ kɔɔ̃n *rezɛ̃ da wuru kɛ wɔ lɛa.

³ «Ma din Dɛnaa Lawa n bɛa rezɛ̃ da wuru lɛ a lɛduə̃li lɛa. Man mu kiɛ a ganaa paapaa, ma ń giɛ a walan, penleen ka tèlò, màn mɛn bɛ́ toɛ min kɔn baran baraa zɛnaa-n wa.

⁴ Ma foo a yoo-n li doo wa. Sɛnɛ, bɛ̀ má nyan dan yɛ a nɛ, ka koronkoron ne, ma nə ǹ kuri ma tɛ da ǹ ganaa.

⁵ Bɛ̀ min woo min nə́ n din sii wɔ masɛ gɔn, á re là nyantoro yii ma li. Sonbore, á re là nyantoro yii ma li.»

Lawa á re Izirayeli a zaman a siɛ̃ toɛ nɛ

⁶ Biikoo á re doe, Zakɔba a zaman tá re gòon dii boe. Izirayeli á re gùrù ten boe, a buũ kɔ. Kanaa á re piɛ̃ ka a nɛn nɛ.

⁷ Dɛnaa Lawa na a zaman lɛ dɛ, ká a bɛ́ á ǹ dɛ wolen kɛn dɛ lɔn wa. A ǹ dɛ ǹ nə́ gã ka a bɛ́ á ǹ dɛ a gã wolen kɛn dɛ ǹ nə́ gã lɔn wa.

⁸ A na á dɔlɔ bɔ ǹ ganaa, á ǹ loo, bɛ̀ á kiri we ǹ ganaa. A lɛ gɔ́ɔ̃ ǹ piɛ̃ nə́ ǹ pɛsɛ̃, piɛ̃ kɛa daa pinaa boe lɛ̀giala-n.

⁹ Zakɔba tɔrɔn siɛ̃ bɛ́ re n toɛ ǹ nɛ lɔn, bɛ á ke, ǹ sii baraan toa manɛ bɛ́ re die ka sii mɛn nɛ, bɛ á ke: *Wúlu bɔ ǹ bǎã a kɔlɔn kɛn, maǹ die bɛn yɔyɔrɛ mɔnɔmɔnɔ. Wúlu bɔ ǹ bìbìn kɛn laanka ǹ da yon gìĩ kɔɔ̃n tã n mànan kɛn, bɛn kɔn ba re goɛ̃ lon doo wa.

¹⁰ Kiwi ke tamaa nɛ, min kɔn ba re goɛ̃ bɛ-n doo wa. A gɔ́ɔ̃ kooro n die goɛ̃, ǹ tá re n la boe a ganaa ka diə gole bɛ́ lɔn. Diin tá re buu soɛ̃ walan, ǹ tá re n susui a nɛ, ǹ tá re a da bisinin luu soɛ̃.

¹¹ Bɛ̀ bɛa da bisinin lɛn gùrù laa, maǹ die ǹ yiɛ, lɔn nə tɛ da ǹ ganaa. Tɔrɔ kɛa sii kɔn giala miɛ wa. Bɛ lɛ na á toa, min mɛn zɛnaa, ǹ dɛnaa a makara boe a ganaa wa. Min mɛn yɛ á da kanaa, ǹ dɛnaa a bǐɛ̃ koe a ganaa wa.

Wo bɛ̀rɛbaa ǹ bǎã-n wolen wusoo a daa

¹² Bɛa pinaa, Dɛnaa Lawa á re *belee duwii, a saa Efrati tà ganaa, a wo yǎa Ezipti tà gòã nɛ. Kasɛn Izirayeli minin, a n die ka goɛ gogoon ka belee mìi bɛ́ lɔn.

¹³ Bɛa pinaa, sère gɔ̀lɔ̀ bɛn gole n die n pii. Bɛa biikoo li kəni, min mɛnɛn nə papaã Asiirii gána nɛ, ǹ nə n mɛnɛn loo Ezipti gána nɛ, bɛn tumaa á re die lenlen. Ǹ tá re die n musin koɛ tán Dɛnaa Lawa yɔrɔ-a, Zeruzalɛmu a kele sonbore kɛ la.