Izayii 24 - LAWA A BOO SONBORE

Dɛnaa Lawa n tán ziziɛ̃

¹ Á ke, Dɛnaa Lawa n basaã koe tán nɛ a n ziziɛ̃. Á tán lɔlɔkɔn, a na a zaman pɛsɛ̃ bǎã tumaa nɛ.

² A din sii goon lɛ n die min tumaa yii: min mɛnɛn bɛ́ Lawa a wúlu-bɔlen lɛa, ka min mɛn bɛ́ min kooro lɛa, min mɛn bɛ́ maadigiĩ lɛa ka min mɛn bɛ́ bɛ̀rɛ lɛa, min mɛn bɛ́ maadigiĩ a lɔ lɛa ka min mɛn bɛ́ bɛ̀rɛ lɔ lɛa, min mɛn bɛ́ màn siɛ̃, ka a pii wole ne, min mɛn bɛ́ giɔ̀mɔ diɛ, ka min mɛn bɛ́ giɔ̀mɔ siɛ, min mɛn bɛ́ giɔ̀mɔ ná a bɔlɔ-a ka min mɛn bɛ́ a giɔ̀mɔ n kanaa.

³ Tán ziziɛ̃. Á bɔ̀n baa lenlen, a giala, Dɛnaa Lawa na á golee li miɛ̃.

⁴ Tán yɔrɔ kɔsɛ, á laa. Kanaa n gɛ̀ koɛ, á ziziɛ̃. Kanaa a min dadaran dɔn nə́ pɛrɛ.

⁵ Sonbore, minbuiinin nə́ *gɔ̀ da tán ganaa. Ǹ nə́ Dɛnaa Lawa bɔlɔ tii. Ǹ nə n too kɔ a dí-pɛn li wa. Ǹ ná a landa boon puusə kɔ. Lɛ kɔ kɔn la mɛn bɛ́ duduu wɔ lɛa ǹ doɛ kɔn ka Dɛnaa Lawa nɛ, ǹ nə́ bɛ ziziɛ̃.

⁶ Bɛ lɛ taman yii, Dɛnaa Lawa lɛn baraa bíi tán li. Bɛ lɛ a dɔlɔ n ke minbuiin nɛn mìi ni. Bɛ lɛ nɛ kanaa minin nə́ papaã, ǹ nə́ kiɛɛrɛ kɔ.

⁷ Duvɛ̃ dii kiɛɛrɛ kɔ, *rezɛ̃ da pàã nya. Min mɛnɛn foo goã kɔɔ̃nɛ, bɛn man gini.

⁸ Maà wuu kɔɔ̃nɔn kɛn lɛkuru. Zɔ́n dadaran nə́ nya. Tùtu wuu kɔɔ̃n kɛ lɛkuru.

⁹ Minin ba duvɛ̃ mii ǹ nə́ loe loe doo wa. Yɔ kakaarɛn man kɔɔsɛ a milin lɛ-n.

¹⁰ Kiwi gɔ́ɔ̃ kooro-a lɛ kaa. Kionən tumaa lɛ tiɛ̃maa nɛ. Min kɔn ba boe la á we doo wa.

¹¹ Ziin la, minin manə n lɛ-dii duvɛ̃ li. Nyɛnyɛɛ banban doo wa. Foo kɔɔ̃nbaa soo á n bɔ gána lɛ nɛ.

¹² Kiwi gɔ́ɔ̃ nɛ, kɛbɔlɔ dinsɔɔ̃ nɛ. A kiɛnlɛ ziziɛ̃, á kaa.

¹³ Sonbore, tán la, minbuiinin bii, màn taãn kɔn ba re goɛ̃ wa, ka *olivie da bɛ́ lɔn, ǹ na a nɛ tumaa na, ka *rezɛ̃ da bɛ́ lon, ǹ na a nɛ tumaa kaa piɛ.

Minbuiin nɛn nyɛnyɛɛ

¹⁴ Min mɛnɛn yii goã koo, bɛn manə n lɛn siɛ lon, ǹ tá Dɛnaa Lawa tɔ boe. Maǹ boe lɛ̀nyɛɛn li, ǹ nə́ foo kɔɔ̃nbaa ǹ lɛ dii.

¹⁵ Lɛ̀giala gánan nɛ, ka Dɛnaa Lawa guguru kɔ. Gánan mɛnɛn bɛ́ yìsi mu nə́ ǹ da bii, ka Dɛnaa Lawa, Izirayeli a Lawa tɔ bɔ.

¹⁶ LOE kɛ lɛ n boe kanaa paǹ tumaa ganaa: «Ka Lawa tɔ bɔ, asɛ mɛn bɛ́ pepere!» Sɛnɛ, masɛ n kɛ pii: «Má sàabaa, má sàabaa. Wàa koe-n ka kɛ-n ma ganaa.» Tentenən man minin yiri siɛ̃, minin sã woo minin sã. Tentenən man minin siɛ̃.

¹⁷ Kanaa minin, nyɛ́ɛ nɛ, yala zuzulu ni, ka kan nɛ, bɛn tumaa n kaa wɔ lɛa.

¹⁸ Min mɛn bɛ́ baa sii nyɛ́ɛ da ǹ lɛ-dɛ nyɛɛnɛ, bɛa dɛnaa n mɛnɛɛ yala-n. Bɛ̀ min mɛn boo la á soo yala-n, kan tá re kuĩ. Lon a dɔǹɔn manə n lɛ buĩ banabana. Tán tumaa n bìn diɛ a wo a giala wɔ tán a ǹ bǎã yaa.

¹⁹ Tán nə́ n dɛ, a n pupuri, a n wurii.

²⁰ Yɔ bɛ́ min yii kuĩ a tatalaa lɔn, tán nə tatalɛɛ miɛ̃, ka piɛ̃ bɛ́ bìn diɛ siã ganaa bɛ̀ a n kanaa lɔn. A n mɛnɛɛ a sãn taman yii, a boe la a yoo doo wa.

Ǹ kɔn pinaa Lawa n die kii biɛ Zeruzalɛmu

²¹ Bɛa pinaa lɛ nɛ, Dɛnaa Lawa n die yui lon a zia kurun gialaa lon, ka tán a kiin ni tán la.

²² Maǹ die ǹ lɛ soekɔn ka kòso nɛn bɛ́ lɔn nyankɔrɔ gole ne. Maǹ die goɛ̃ kòso ne. Bɛ kio, bɛ̀ á belebɔ, ǹ doamaa nɛ ǹ nə n bɔlɔ pɛ.

²³ Sìi á re mui kuĩ, sìi á re n koe wasa lɛ. A giala, Dɛnaa Lawa Pàãyiidɛnaa n die kii biɛ Zeruzalɛmu, *Siɔn kele la. Dɛnaa Lawa a gugurubaa n die tɛ pii kiwi, min golen yɔrɔ-a.