Izayii 18 - LAWA A BOO SONBORE

Etiopii minin gɔn waa manɛ

¹ Ebe, gána goon tan Etiopii tàn kio nyàa kan wuu n boe a nɛ.

² Bɛa gána lɛ n dia dí-a wolen diɛ yìsi mu la, ka tà dɔ nɛ, mu la ǹ goo ne zɛnaa-n ka gɛnkurun da nɛ! Dia dí-a wole yii fuunaan lɛn, ka wo tɔrɔ sɔsɔrɔ gɔ̀nɔn tɛ-pɛle kɛ li. Ka wo tɔrɔ kɛ li nyɛ́ɛ diɛ bǎã tumaa nɛ, pàã nə ǹ lon, ǹ nə́ ǹ zɔ́ɔn yɔyɔrɛ. Tàn man kiɛ̃ ǹ gána nɛ.

³ Kasɛn kanaa tumaa minin, kasɛn mɛnɛn bɛ́ tán piɛ̃, bɛ̀ ka zazan yɛ tenten la biikoo mɛn li, ka ga! Bɛ̀ ka sère gɔ̀lɔ̀ bɛn wuu ma ǹ mɛn waáraa, ka n too kɔ!

⁴ A giala, Dɛnaa Lawa pɛ ma-n kɛnɛn. Ma bɛ́ giã-n bǎã mɛn nɛ, man zoɛ̃ li ma giã kiĩni, ka kaa-piɛ waáraa labara bɛ́ lɔn. Man zoɛ̃ li ma ga gongon, ka sɛ̀fuu waáraa a wasa bɛ́ lɔn.

⁵ Kaa-piɛ laan bɛ̀ a dɔ, ǹ mɛn waáraa bɛ̀ *rezɛ̃ da buũ kɔ á nya, a nɛ n zoɛ̃ li a ma, gùrùn mɛnɛn bɛ́ ǹ là ná a banban, maǹ bɛn boe ka kuku ni. Maǹ nə ǹ kuri, maǹ a gɔnɔn boe.

⁶ A din yɔrɔ goon la, Etiopii minin dɔn tá re n toɛ walan kele la ǹ sían laanka don mànan gɔn. Sían tá re ǹ mui bɔ̀nɔn, don mànan nə ǹ sɔ̃ taãlan.

⁷ Bɛa biikoo li kəni, tɔrɔ sɔsɔrɔ gɔ̀nɔn tɛ-pɛle kɛ á re gɔn mànan koe Dɛnaa Lawa Pàãyiidɛnaa la, ǹsɛn kɛn lɛn nyɛ́ɛ diɛ bǎã tumaa nɛ, pàã nə ǹ lon, ǹ nə́ ǹ zɔ́ɔn yɔyɔrɛ, tàn nə́ kiɛ̃ ǹ gána nɛ. Maǹ woe bɛa gɔn mànan lɛn nɛ *Siɔn kele la, ka bǎã kɛ nɛ Dɛnaa Lawa Pàãyiidɛnaa tɔ n la.