Izayii 17 - LAWA A BOO SONBORE

Damaasi laanka Izirayeli a gɔn-waa manɛ

¹ Damaasi a boo gii: Á ke, kànaa ka boɛɛn, Damaasi a re kiwi biɛ doo wa. A n die kɛbɔlɔ biɛ.

² Aroɛɛrɛ kiwin kɛn, á re n la boe bɛn ganaa duduu. Ǹ tá re tɔɔn buu sɔ̃ ǹ bǎã biɛ, ǹ tá re wɛɛ tán walan, min kɔn ná a ba ǹ nɔmɛɛ wa.

³ Efrayimu gána nɛ, lɛduə̃ ǹ kungɔn ba re yii doo wa. Kii a re yii Damaasi kiwi wa. Siirin min mɛnɛn yii bɛ́ re goɛ̃ koo, bɛn man die goɛ̃ kiɛɛrɛ ka Izirayeli minin bɛ́ lɔn. Dɛnaa Lawa Pàãyiidɛnaa a da ǹ boo ne.

⁴ Bɛa pinaa kɛ nɛ, Zakɔba a yii gugurubaa kɛ á re kiɛɛrɛ koe. Á re n biɛ ka paan bɛ́ lɔn.

⁵ A n die n biɛ ka kaa-piɛ a nya bɛ́ lɔn, *belee kurii waáraa, gɔn sara sɔkɔn a nya kio. A n die n biɛ ka Refayiti a nyankɔrɔ basa kɛ bɛ́ lɔn kaa-piɛ kio.

⁶ Màn bún dinsɔɔ̃ n die goɛ̃. Gána lɛ n die n biɛ ka *olivie da bɛ́ lɔn, a nɛ sɔlɛɛ kio, nɛ paa hinlaa sɔɔ n die goɛ̃ a lɛwɔn ganaa lon. A gùrù mɛn bɛ́ á nɛ kɔ á la yii ni, bɛa re liɛ nɛ sii hinlaa sooro-n wa. Dɛnaa Lawa, Izirayeli a Lawa a da ǹ boo ne.

⁷ Bɛa pinaa kɛ nɛ, minbuiinin tá re giɛ ǹ zɛnaali kɛ ganaa, ǹ tá re Izirayeli a Lawa sonbore kɛ yii.

⁸ Ǹ dinin nə wúlu bɔ ǹ bǎãn mɛnɛn dɔ ka ǹ gɔn nɛ, ǹ ba re n yiin doɛ bɛn la doo wa. Ǹ wúlu bɔ ǹ bìbìn kɛn ka ǹ *wúlu màn gìĩ kɔɔ̃n tã ǹ bǎãn kɛn nɛ, ǹ dinin gɔn màn zɛnaa lɛa, ǹ ba re n yɔrɔ diɛ bɛn la doo wa.

⁹ Bɛa pinaa kɛ nɛ, Izirayeli a mìi duru ǹ kiwin kɛn tá re kɛbɔlɔn biɛ. Ǹ tá re n la boe ǹ ganaa ka daãn laanka kele mìin kɛn bɛ́ lɔn, ǹ nə́ n la bɔ ǹ ganaa Izirayeli minin nyɛɛnɛ.

¹⁰ Izirayeli, n yiri bɔ n kirisibaa wole Lawa nɛ. Gɛ̀fu mɛn bɛ́ n tamɛɛ, n yiri bɔ ka bɛ nɛ. Bɛ lɛ nɛ, n da tɔrɔ sonboren zumu, n tá lawa soreen guguru koe.

¹¹ Maǹ gole koe n yii ni ǹ zumii pinaa. N da we mɛn kaa baayɛlɛ, bɛ n buũ koe a din pinaa. Sɛnɛ bɛ̀ busu daa ǹ mɛn pinaa, a nɛ a bǐɛ̃ koe wa. Bɛa busu lɛ, dagòã ba la wa.

Zɔ́ɔn man baa sii Dɛnaa Lawa nyɛɛnɛ

¹² Wàa koe n ka kɛ nɛ! Tɔrɔ damata gòã wuu á ke boe die. Ǹ gòã wuu n ka yìsi mu gole a ginii bɛ́ lɔn. Maǹ gini ka pàã nɛ ka yìsi mu gole bɛ́ gini lɔn.

¹³ Tɔrɔn gini n ka Yìsi mu gole a ginii bɛ́ lɔn. Bɛ̀ Dɛnaa Lawa paraa ǹ li, maǹ nə n mìi foɛ̃ ǹ wo sɔsɔɔ. Maǹ nə ǹ lui ka kele mìi ni ǹ piɛ̃ bɛ́ buu gere siɛ lɔn, ka la piɛ̃ bɛ́ gusuũ goɛ lɔn.

¹⁴ Wasamiɛ̃nɛ, nyɛ́ɛ gole ne. Lɛ̀ laan bɛ̀ a n wɛɛ, ǹ tumaa papaã. Min mɛnɛn bɛ́ mɛnɛɛ wɔ la, bɛn wɔ gii n ka bɛ nɛ, min mɛnɛn bɛ́ boe wɔ yii ni, bɛ lɛ n die ǹ yii.