Izayii 16 - LAWA A BOO SONBORE

Moabu gána n giɛ Zeruzalɛmu a dɔmalɛ li

¹ Moabu a kiãn man pii: «A kũ Selaa ganaa diə gole ne, ka sère gɔ̀lɔ̀ dia gána lɛ a kiã la, *Siɔn kele la.»

² Moabu gána lɔn man golee-n Arnɔn tà lɛ-a. Maǹ ka bàan baa-silin bɛ́ lɔn, ǹ nə́ ǹ loo ǹ nə́ ǹ bɔ ǹ kii ni.

³ Ka yiri kɔ wɔ la, ka golee goon la. Penleen, ka n wúlu kɔ wɔ lɛ, ka tèlò bɛ́ lɔn. Ka n kɔ wɔa baasi wolen lɛ, ka nyan nə ǹ giala da kanaa wa.

⁴ Lɛ kɔ Moabu a baasi wolen kɛn ganaa, n toa ǹ nə n yu n la. Ǹ kanbaa ziziɛ̃ wole kɛ ganaa. Min mɛn bɛ ǹ kio lui, bɛa re goɛ̃ yǎa duduu wa. Basaã lɛ á re nyɛɛ. Ǹ dɛnaa á re woe a wɔa gána lɛ toa walan.

⁵ Bɛ kio, kii pàã á re gole koe a bǐɛ̃baa taman yii. Bɛa kii bɔlɔgoondɛnaa kɛ lɛ Davida tɔrɔ lɛa, á re gána lɛ nyɛɛnaan boe ka peperebaa nɛ. A n die goɛ̃ kiri-wɔle lɛa, a n koe dí-pɛn lɛ, a nə́ n yiri koɛ peperebaa li.

Gɛ̀ loe Moabu gána la

⁶ Zudaa minin man pii: Wɔ́ Moabu a din gole kɔ boo ma, a din koa nɛ, a din narɛɛ nɛ, a yiri koa ma din-a nɛ. A bɛ́ boo mɛn yii diɛ, boo fofolo ne.

⁷ Sisia kəni, Moabu minin man wuu pii ǹ gána la. Min tumaa n wuu pii. Maǹ gini rezɛ̃ mɔ̀mɔn kɛn li, ǹ nə́ goã zɛnɛɛ Kiiri-Herɛsi. Ǹ foo ziziɛ̃maa nɛ parsiini.

⁸ A giala, Ɛsibɔn dù gɔrɔ basaã baa. Tɔrɔn gánadɛnan nə́ Sibmaa a *rezɛ̃ da wuru sonbore kɛ ziziɛ̃. A na á goã woe yǎa Yaazɛrɛ, á gole kɔ yǎa diə gole ne. A da gɔnɔn manə nyoɛ̃ yǎa yìsi mu kio.

⁹ Bɛ lɛ nɛ, ma á wuu pii kun ka Yaazɛrɛ minin ni Sibmaa a rezɛ̃ dan la. Ɛsibɔn laanka Elaalee, man die n yii mu kiɛ ka la. A giala, foo kɔɔ̃n nə́ n lɛ da kaa rezɛ̃ laanka kaa kaa-piɛ mànan la.

¹⁰ Foo kɔɔ̃nbaa mɛn goã kaa da nɛ-kɔle wurun kɛn nɛ, bɛ nya. LOE laanka foo kɔɔ̃nbaa ǹ lɛ-dɛ á boe kaa rezɛ̃ wurun ni doo wa. Min kɔn ba rezɛ̃ tɔrɛ a tɔrɔ ǹ bǎã-n doo wa. Má foo kɔɔ̃nbaa ǹ lɛ-dɛ sàabaa.

¹¹ Bɛ lɛ taman yii, ma foo á ziziɛ̃ nɛ Moabu a paǹ li. Maa ginii n ka tùtu wuu bɛ́ lɔn. Man gini Kiiri-Herɛsi la.

¹² Moabu minin manə n dinin nɔmɛɛ, ǹ nə́ woe wúlu bɔ ǹ bǎãn nɛ, woe gòã-kũ diɛ ǹ dì kionən ne, sɛnɛ, bɛ là banban.

¹³ Dɛnaa Lawa boo mɛn da Moabu a paǹ li lɛlɛ, bɛ n ka kɛ nɛ.

¹⁴ Sisia, Dɛnaa Lawa n kɛ pii: «Kànaa ka lɛ̀ sɔɔ ka te, Moabu gána a min dadaran laanka a zaman damata kɛ a re màn kɔn biɛ doo wa. Min mɛnɛn yii bɛ́ re goɛ̃ koo, bɛn ba re tɛ koe wa. Ǹ ba màn lɛa wa, ǹ ba re màn kɔn dɔ biɛ wa.»