Izayii 10 - LAWA A BOO SONBORE

Zudaa nyɛɛnaandɛnan dɔlɔ

¹ Min mɛnɛn bɛ́ dí-pɛ kɔkɔrɔn koɛ, landa sɛ́wɔn kiɛ̃, koe boe ǹ miãn ganaa nɛ, bɛn wɔ n ka bɔ̀n nɛ.

² Bɛa yɔrɔ lɛ la, ǹ ba kiri pepere we doobaan man wa. Min mɛnɛn bɛ́ pàãwɛɛnaan lɛa maa zaman bii, maǹ pàã nyɛɛ bɛn manɛ. Maǹ lɔ giɔɔrɔn lon dudui, ǹ nə́ mɛnɛɛ nɛ toenən la.

³ Bɛ̀ Dɛnaa Lawa a dɔlɔ bɔ pinaa dɔ, bɛ̀ koe bɔ wɔlɔ sɔsɔɔ nɛ á daa, ka ǹ die n biɛ lɔn? Ka ǹ die gú diɛ die ne a da n dɔ ka lɛ? Ka ǹ die kaa naforon kɛn kiɛ maa?

⁴ Ka á re n giɛrɛɛ tán kòso nɛn bii, ka mɛnaa, geren bii. Sɛnɛ, bɛ tumaa kio, Dɛnaa Lawa a foo-yoo a nyɛɛ wa, a gɔn-munii n tɔn lon.

Asiirii gána laanka a kii wɔ n ka bɔ̀n nɛ

⁵ Dɛnaa Lawa pɛ: Koe n ka kɛ nɛ Asiirii ganaa, asɛ mɛn bɛ́ maa dɔlɔ bɔ ǹ sɛ̌n lɛa! Man die maa foo-yoo nyɛɛ ka dɔ̀rɔ̀ kɛ lɛ nɛ a gɔn.

⁶ Man Asiirii a sɔraasin diɛ tɔrɔ bɔlɔgoonbaãdɛnaa gialaa. Tɔrɔ mɛn bɛ́ ma foo yui, maǹ nə n yɔrɔ diɛ bɛn la, ǹ nə ǹ kokoo, ǹ nə ǹ naforon goa! Ǹ nə́ ǹ tɔtɔrɔ ka zii gialaa ǹ bɛrɛɛ bɛ́ lɔn.

⁷ Sɛnɛ, Asiirii sɛ bɛa woo ǹ bǎã yɛ wa. Asɛ n taasiɛ kɔsɔ we. A bɛ́ re tɔrɔ gigiã bɔ̀n biɛ lɔn, asɛ n bɛa taasiɛ we taãn-taãnɛ.

⁸ A n pii: Maa sɔraasi nyɛɛnaadɛnan dinin man ka kiin bɛ́ lɔn.

⁹ Fuu mɛn Karkemisi kiwi yɛ, bɛ miã dɔ na á Kalnee kiwi yɛ. Ma màn mɛn da Amaati la, a din lɛ-n ma da Arpaadi dɔ la. Ǹ mɛn nə Damaasi yɛ, bɛ lɛ dɔ na á Samarii yɛ.

¹⁰ Má bɔ̀n da gánan ganaa, ǹ mɛnɛn dìn bɛ́ mɔnaa nɛ ǹ nə́ la Zeruzalɛmu laanka Samarii wɔn manɛ.

¹¹ Ma bɔ̀n mɛn da Samarii laanka a lawa kooron ganaa, ma a boe la ma bɛ miã da Zeruzalɛmu laanka a dìn ganaa wa?

¹² Sɛnɛ, bɛ̀ Dɛnaa nya a dín kɛn ganaa *Siɔn kele la ka Zeruzalɛmu ni ǹ mɛn waáraa, á re yui Asiiriin kii gialaa, a din gole kɔ laanka a din koa kɛ taman yii.

¹³ A giala, bɛa kii lɛ na á pɛ: «Ma sii mɛn tumaa zɛnaa, ma pàã laanka maa yiridɛnaabaa a lɛa nɛ. A giala, man sii-dɔ̃li lɛa. Má gána gigiã gèlè papaã, má ǹ naforon goa, má ǹ kiin loo má ǹ bɔ ǹ kii dankanan la.

¹⁴ Ǹ bɛ́ bàan kii niɛ̃ lɔn, má tɔrɔn naforon goa miɛ̃. Ǹ bɛ́ màn gii goɛ lɔn, man má màn tumaa goa tán la miɛ̃. Min kɔn yɛ á n papasa wa, min kɔn yɛ á n lɛ bũ á boo da wa.»

¹⁵ Sɛ̀miɛ̃ á boe la a n din gole kɔ a dí nya ma-n wole ganaa? Hinlaa gɔya á boe la a n din koa a dí nya ma-n wole ganaa? Bɛ n goon ka min mɛn nə́ ke bàbàla ná a gɔn, asɛ n bàbàla lɛ foo sii zɛnɛɛ. Hinlaa ka min bɛ́ dɔ̀rɔ̀ ná a gɔn asɛ n dɔ̀rɔ̀ lɛ foo sii zɛnɛɛ.

¹⁶ Bɛ lɛ taman yii, Dɛnaa Lawa Pàãyiidɛnaa á re a zia-baali kasiɛ̃ wolen kɛn pɛrɛ. Ǹ siĩnbaa gɔ́ɔ̃ nɛ, tɛ n die yui ǹ ganaa girigiri.

¹⁷ Dɛnaa Lawa ke Izirayeli a wɔlɔ fúlu lɛa, á re tɛ biɛ. A sonborebaa kɛ n die tɛ biɛ, a nyan tewonən kɛn kũ, a ǹ nya lɛawaa goon toto.

¹⁸ Daã sonboren kɛn, a n die bɛn kuĩ lenlen, a da nɛ-kɔle kɛ tumaa ziziɛ̃ lenlen. Asiirii n die goɛ̃ ka busulə mɛn nə́ ke, a pàã n nyɛɛ.

¹⁹ Dan mɛnɛn bɛ́ re goɛ̃ daã lɛ nɛ, nɛnyaan boɛɛn din tá re ǹ nimii a ǹ lɛ dɔ̃.

Izirayeli minin mɛnɛn yii goã koo

²⁰ Bɛa waáraa, min mɛnɛn yii goã koo Izirayeli gána nɛ, Zakɔba tɔrɔ gialakun mɛn goã, bɛn ba re n foo doɛ ǹ dɛle wole kɛ ganaa doo wa. Sɛnɛ, ǹ tá re n foo doɛ Dɛnaa Lawa ganaa taãn-taãnɛ, Izirayeli a Lawa sonbore ke.

²¹ Sonbore, gialakun tá re wusii a daa. Zakɔba gialakun boɛɛn kɛ á re n bɔyɛɛ a wo Dɛnaa Lawa Pàãdɛnaa li.

²² Sɛnɛ Izirayeli, ta n zaman nə mɔnaa-n lɔn, ta a n mɔnaa-n ka yìsi mu lɛ-a ǹ nyɔɔsɔ̃ bɛ́ lɔn, a gialakun boɛɛn dinsɔɔ̃ n die wusii ǹ nə n bɔyaa ǹ da Dɛnaa Lawa li. Bɔ̀n na á n yɔrɔ bɔ. Peperebaa n koe a zii lɛ.

²³ Taãn nɛ, Dɛnaa Lawa Pàãyiidɛnaa na á bɛa koe kɛ lɛ yɔrɔ bɔ. A n die koe lɛ boe gána lɛ gɔ́ɔ̃ tumaa nɛ ka a bɛ́ á pɛ lɔn.

Ka nyan nyɛ́ɛ baa Asiirii gána-n wa

²⁴ Bɛ lɛ nɛ, Dɛnaa Lawa Pàãyiidɛnaa n kɛ pii: «Maa zaman, kasɛn mɛnɛn bɛ́ giã-n Siɔn, ka nyan nyɛ́ɛ baa Asiirii gána-n wa. A n ka duwii ka sɛ̌n nɛ, a na a dɔ̀rɔ̀ siɛ ka li, ka Ezipti minin kɛn nə goã zɛnɛɛ ka-n lɛlɛ lɔn.

²⁵ A giala, kànaa ka boɛɛn nɛ, maa foo-yoo baraa kɛ á re nyɛɛ. Sɛnɛ ma á re Asiirii minin kɛn ziziɛ̃ lenlen.»

²⁶ Dɛnaa Lawa Pàãyiidɛnaa á re a dɔlɔ bɔ ǹ sɛ̌n siɛ Asiirii gána li ka a bɛ́ á saa Madiã minin li lɔn Orɛbu a gɛ̀fu la. A n die a dɔ̀rɔ̀ siɛ ka a bɛ́ á saa Ezipti minin li lɛlɛ lɔn yìsi mu la.

²⁷ Bɛa pinaa kɛ nɛ, guĩ mɛn bɛ́ n kɔrɔn, á re bɛ siɛ a bɔ n la. N zǔu lɛ á re yiɛ, a giala n tá re wusii n pàã yɛ.

Zeruzalɛmu a zɔ́ɔn nə́ diri

²⁸ Zɔ́ɔn nə́ diri Ayati kiwi la. Maǹ boe Migrɔn, maǹ nə ǹ mànan koɛ Mikmaasi.

²⁹ Maǹ koe zii bɔnboɛɛnɛn lɛ kelen bii ǹ nə́ pii: «Ka daa wɔ nyəə Gebaa.» Ramaa kiwi, minin man bìn diɛ ǹ nyɛɛnɛ. Gibeya, Sayulu a kiwi minin man baa sii.

³⁰ Galimu minin lɛn, ka n lɛ dɛ! Layisaa kiwi, yiri bɔ! Anaatɔti doobaanɛ!

³¹ Madmenaa minin manə n mìi foɛ̃. Gebimu wɔ́n man giɛ duru ǹ bǎã li.

³² A din pinaa kɛ lɛ nɛ, n zɔ́ɔn lɛn man die golee Nɔbu kiwi, ǹ nə n gɔn pepere Siɔn kele li, ka Zeruzalɛmu tenten ne.

³³ Á ke, Dɛnaa Lawa Pàãyiidɛnaa n da gùrùn yiyiɛ ka pàã nɛ, a n da lɛwɔnɔn yiyiɛ, a n da sɔsɔrɔn woɛ̃ ǹ naɛ tán.

³⁴ Daã gòã li ǹ da bisinin kɛn, a n bɛn lɛ naɛ ka sɛ̀miɛ̃ nɛ. Liban da kakan kɛn, a n bɛn dɔn lɛ naɛ.