Izayii 1 - LAWA A BOO SONBORE

A. Dɔlɔ bɔ ǹ boo ( 1—35 )

¹ Boon kɛn man Amɔsi a nɛgiĩ Izayii a sii yɛn lɛa, Zudaa gána laanka Zeruzalɛmu kiwi a paǹ li. Bɛa sii yɛn lɛn biikoo na á kɔnpɛ kii Oziasi a biikoo ne, Zoatamu wɔ nɛ, Ahaazi ni ka Ezekiasi wɔ nɛ, Zudaa gána mìi la.

Lawa a zaman ba Lawa doɛ̃ wa

² Lon, n too kɔ! Tán, n dɔ nə n too da! Dɛnaa Lawa n kɛ pii: «Man nɛnyaanan too, ǹ nə́ dadara kɔ, sɛnɛ, ǹ nə́ n gòãn dii ma ganaa.

³ Dii tá a dɛnaa doɛ̃, dundun na a màn-bii ǹ goo doɛ̃, ǹ dɛnaa bɛ́ màn-bii koe la ǹ mɛn lɛ nɛ. Sɛnɛ, Izirayeli sɛ a màn kɔ́n doɛ̃ wa, maa zaman kɛ a màn kɔ́n giala miɛ wa.»

Zudaa gána n ka diə gole bɛ́ lɔn

⁴ Nsɛ, sii baraa-zɛnaali tɔrɔ, n sii baraan nə́ la yii ni, n wɔ n ka bɔ̀n nɛ! Nɛnyaan gòãn dii wole, tɔrɔ babaraa, ka n dɔ̀ɔ̃ wɔ Dɛnaa Lawa nɛ! Ká Izirayeli a Lawa sonbore kɛ bɔlɔ tii, ka n gòãn dii a ganaa.

⁵ N mìi tumaa n busulɛ lɛa, n foo tumaa zɔzɔɔ. Man die boe la ma n dɛ n paǹ mɛn kɔsɔ-a doo nsɛ mɛn bɛ́ tɔn nə n gòãn dii gɔ́ɔ̃ nɛ?

⁶ A saa n gòã tìsì ganaa a wo n baã bii yaa, bɛ tumaa n sɔsɔlɛɛ nɛ, n paǹ tumaa n busulɛ lɛa, bayɛrɛ nɛ, ka mandɛ lɛ nɛ. Min kɔn nə ǹ lɛ pii wa, min kɔn nyɔɔ lɔ ǹ ganaa wa, min kɔn màn yii ǹ ganaa wa.

⁷ Kaa gána n kɛbɔlɔ lɛa. Tɛ kaa kiwin kũ. Tiin man kaa wurun ziziɛ̃ ka dinin yii ni. Kaa wurun man ka kɛbɔlɔ bɛ́ lɔn, ká kaa zɔ́ɔn man nə́ bɔ ǹ nɛ.

⁸ *Siɔn kiwi dinsɔɔ̃ na á goã, ka mìi susu ǹ bǎã bɛ́ lɔn rezɛ̃ wuru-n, ka zìã bɛ́ lɔn dù gɔrɔ-n, ka kiwi bɛ́ lɔn, zɔ́ɔn sɔraasin na á lɛnpɛnɛ.

⁹ Bɛ̀ Dɛnaa Lawa Pàãyiidɛnaa bie á min tɛn yii toa koo wɔ bii wa, bɛ̀ wɔ n die papaɛ̃ lenlen ka Sodɔmu laanka Gomɔɔrɔ kiwi bɛ́ lɔn.

Giã ǹ gɔn bɔyaa

¹⁰ Kasɛn Zudaa a kiãn kɛn, ka n ka Sodɔmu kiãn bɛ́ lɔn: Ka n too kɔ Dɛnaa Lawa a da ǹ boon li. Kasɛn Zudaa minin, ka n ka Gomɔɔrɔ minin bɛ́ lɔn: Ka n too kɔ Dɛnaa Lawa a boo li, ka n too kɔ wɔa Lawa a doroon li!

¹¹ Dɛnaa Lawa n pii: Kaa *wúlu màn damata kɛ là n ka wàa nɛ ma ganaa? Ka bɛ́ sère kuturun mɛnɛn tiɛ̃ lenlen maa wɔ lɛa, tɔɔ kasiɛ̃ wolen nyɔɔ ke ka á koe wúlu màn lɛa, bɛn tumaa tìĩ bɔ ma yin ni kanna. Dii gɔ̀lɔ̀n mà ke, sère nɛ tenən wɔ nɛ, ka butumun wɔ nɛ, ma ba ǹ li doo wa.

¹² Bɛ̀ ka daa ma yɔrɔ-a, die na á ka bíi mà ka da giã maa kion a sumu-n?

¹³ Kaa Lawa gɔ ǹ màn ke, ka n susu ka bɛa koe ne. A là banban. A tɛmaa gìĩ kɔɔ̃n ke, bɛ tìĩ bɔ ma nyin ni. A giala, kaa mui dii zɔ́nɔn kɛn bɛ̀ ka ǹ zɛnaa, kaa susu ǹ piin kɛn nɛ, ka kaa zɔ́n dadaraan kɛn nɛ, ka n sii baraan zɛnɛɛ bɛn li. Ma a bɛ sii ma ganaa duduu wa.

¹⁴ Kaa mui dii zɔ́nɔn kɛn tìĩ bɔ ma nyin ni, ka kaa zɔ́n dadaraan kɛn nɛ. Maǹ guguru ma ganaa, má ǹ si ma ganaa ma nɔmaa ǹ nɛ.

¹⁵ Bɛ̀ ka n gɔnɔn goa lon ka á ma nyankoe, man ma yɔrɔ bɔyɛɛ ma bɔ ka la. Ta ka ma nyankɔ lɔn, maa n too koe wa. Ka gɔnɔn man mà lɛa.

¹⁶ Ka n zoo, ka *gɔ̀ bɔ ka dinin ganaa. Kaa sii bɔbɔnɛɛn kɛn, ka bɛn pii ka ǹ bɔ ma yɔrɔ-a, ka kaa sii baraan kɛn kaa.

¹⁷ Ka n daraa sii sonbore zɛnaa ganaa, ka ga peperebaa li. Ka min kakaarɛ doroo, ka bǐɛ̃ zɛnaa nɛ toen ne, ka lɔ giɔɔrɔ a guĩ saa.

¹⁸ Dɛnaa Lawa n pii kɛnɛn: «Ka daa wɔ kɔn ma. Ta kaa sii baraan man nə́ tì kɔ lɔn, ǹ tá re fu koe ka bɔ̀nyaa bɛ́ lɔn. Ta maǹ nə́ tì kɔ lɔn ǹ tá re fu koe ka koara bɛ́ lɔn.

¹⁹ Bɛ̀ ka lɛ kɔ, ka n too kɔ, ka á re gána lɛ a màn sonboren bii.

²⁰ Sɛnɛ, bɛ̀ ka n piã, ka woo nyɛɛnɛ ka n gòãn dii ma ganaa, gɔya sa n die ka bɔ̀n biɛ.» Dɛnaa Lawa na á pɛ.

Dɛnaa Lawa n die Zeruzalɛmu yoreen koe

²¹ E! A na á saa lɔn kiwi sonbore kɛ á n bɔyɛɛ á n kɔrɔbaa zɛnɛɛ? Lɛlɛ, peperebaa goã Zeruzalɛmu, sonborebaa dɔ goã a nɛ. Sɛnɛ, sisia, kiwi lɛ piɛ̃maa-n ka gɛ̀-dɛlen ne.

²² Zeruzalɛmu, ma n min yiri gisĩ ka wɔrɔ a màn koorobaa nɛ, ǹ nə́ mu kaa n duvɛ̃ kɔɔ̃n kɛ li.

²³ N kiãn man gòãn dii wolen lɛa. Maǹ nə n lɛ kiɛ kun ka wurumun ni. Lɛ pii ǹ mànan si n kɔɔ̃nɛ ǹ ganaa. Maǹ baa sii bɛn kio. Ǹ ba bǐɛ̃ zɛnɛɛ nɛ toen ne wa, ǹ ba lɔ giɔɔrɔ a guĩ siɛ wa.

²⁴ Bɛ lɛ nɛ, Pàãyiidɛnaa Lawa, Izirayeli a Lawa Kaka a daǹ boo á ke: Koe n ka kɛ nɛ! Ma á re yui gòãn dii wolen kɛn gialaa, ma maa gɛ̀ dòo bɔ maa zɔ́ɔn ganaa!

²⁵ Zeruzalɛmu, ma á re n bɔyɛɛ nsɛ li, man pii ka sɔmaa nɛ, n *yoreen kɔ. Ma á re n gɔ̀ yoe ma bɔ n ganaa, ma n yoreen kɔ.

²⁶ Ma á re toɛ n kiri-wɔlen kɛn nə goã ka lɛlɛ ǹ wɔn bɛ́ lɔn, n sii yɔrɔ-bɔlen nə ǹ lɛlɛ ǹ giã ǹ gɔn saa. Bɛ kio kəni, ǹ tá re n bíi "kiwi pepere", "kiwi bɔlɔgoondɛnaa".

²⁷ Bɛ̀ Siɔn kiwi kɔ peperebaa ǹ zii lɛ, á re kirisibiɛ. A min mɛnɛn bɛ́ re n bɔyɛɛ ǹ da masɛ li, bɛn tá re kirisibiɛ ǹ peperebaa taman yii.

²⁸ Sɛnɛ, gòãn dii wolen kɛn, ka sii baraa-zɛnaalin kɛn nɛ, bɛn tumaa wɔ n ka bɔ̀n nɛ. Min mɛnɛn bɛ́ n dɔ̀ɔ̃ we Dɛnaa Lawa nɛ, bɛn man die bɔ̀n biɛ.

²⁹ Bɛa biikoo li kəni, dan kɛn kɔɔ̃n ka-a, ká goã wúlu boe ǹ ganaa, ka foo á re ziziɛ̃ bɛn taman yii. Dù gɔrɔn kɛn kaa wúlu bɔ ǹ bǎãn lɛa, sìi á re ka kuĩ bɛn taman yii.

³⁰ Ka n die goɛ̃ ka da mɛn bɛ́ a luu kaa, ka dù gɔrɔ mɛn nə́ ke mu nyaabaa a ganaa.

³¹ Min kaka n die goɛ̃ ka buu gere bɛ́ lɔn, a zɛnaa ǹ sii n die goɛ̃ ka tɛ nàn bɛ́ lɔn, ǹ tumaa n die kuĩ kun, min kɔn ba re boe la a nimi wa.