Filipi minin 4 - LAWA A BOO SONBORE

Dan-diɛ boo

¹ A bɛ́ miɛ̃, ma dɔɔ̃n sonboren lɛn, ka n gòãn doa kaka, kaa tá kun ka Dɛnaa-n kɛ gɔ́ɔ̃ nɛ. Kasɛn mɛnɛn bɛ́ ma dɔɔ̃n narɛɛ wolen lɛa, ma tá li parsiini ma wusoo ma ka yɛ. Ka dinin lɛn man maa foo kɔɔ̃nbaa laanka maa din laakalaa ǹ màn lɛa.

² Nsɛ Evoodii laanka Sintisi ni, man ka nyankoe, man ka gòã kuĩ, máa kaa tá kun ka Dɛnaa-n kɛ gɔ́ɔ̃ nɛ, ka n doa ka kɔn ma.

³ Maa giĩ, nsɛ mɛn bɛ́ maa dí nya kun wole bɔlɔgoondɛnaa lɛa, ma nə n dɔ nyankoe, máa n nə n dɔ lɔn kɛn lɛ. A giala, mà ǹ nə́ zia baa kun ka ma nɛ, maa Boo Tii Kɔɔ̃n diɛ kɛ gɔ́ɔ̃ nɛ, ǹ laanka Klemaa nɛ, ka maa dí nya kun wole gialakun kɛ tumaa nɛ. Ǹ tɔn tá kiɛ̃-n nyin nyabaã sɛ́wɔ kɛ nɛ.

⁴ Ka n nyɛnyaa kaa tá kun ka Dɛnaa-n kɛ gɔ́ɔ̃-n baraabaraa! Man wusii pii, máa ka n nyɛnyaa!

⁵ Ka sii zɛnaa ka foo-basiɛ̃-n min tumaa nɛ. Dɛnaa lɛ a daa a sɔsɔɔ doo wa.

⁶ Ka baran n gɔ́ɔ̃ bii ka sii kɔ́n nɛ wa. Sɛnɛ, ka laadoo bɛ́ màn mɛn ganaa, ka a nyankɔ Lawa la, ka a gòã kũ, ka barka da nɛ.

⁷ Là nyantoro mɛn bɛ́ á kiɛ̃ minbuiinin doɛ̃ tumaa la, Lawa á re bɛ koe ka la, á re ka foo laanka ka yiri lɛduĩ Yezu *Krita wɔbaa gɔ́ɔ̃ nɛ.

⁸ Bɛ din tumaa kio kəni, ma dɔɔ̃nɔn lɛn, ka n yiri doa sii bǐɛ̃ ganaa, a n tɔ bɔ ǹ sii lɛa: ǹ mɛn bɛ́ taãn lɛa, guguru-kɔ ná a nɛ, a n pepere, *yoreen ne, a n kɔɔ̃nɛ, zín ná a nɛ.

⁹ Ka màn mɛn yɛ masɛ li, ká n daraa a ganaa, ka ma lɛ ma boo mɛn diɛ, ká ma yɛ a sii zɛnɛɛ, ka toa ka bɛ tumaa a sii zɛnaa. Bɛ̀ á n baa miɛ̃, Lawa mɛn bɛ́ là nyantoro koe wɔ la, bɛ á re goɛ̃ kun ka nɛ.

Barka-diɛ boo

¹⁰ Má foo kɔɔ̃n kɔ gole yɛ Dɛnaa li, a giala, ká boo la kəni ká n yiri koa ma li doo. Ma bie zoɛ̃ máa ma pɛ, mà ka yiri ná a bɔ ka ma-n wa, sɛnɛ, a dia ǹ yɔrɔ na a goã ka gɔn wa.

¹¹ Ma bie pii miɛ̃ dɔn, máa ma laadoo na a ganaa wa. A giala sii tumaa gɔ́ɔ̃ nɛ, masɛ á boe ma din la.

¹² Ma á boe ma din la doobaabaa gɔ́ɔ̃ nɛ, ma á boe ma din la paãmabaa dɔ gɔ́ɔ̃ nɛ. Má n daraa màn a dɔ ma yii li ganaa, paǹ din tumaa li, sii tumaa gɔ́ɔ̃ nɛ, ta màn-bii tá ma lon, ta bòo n ma ganaa, ta màn na á la yii-n ma gɔn, ta a na a tɛ wa.

¹³ Man boe la, ma á yɔ boe bɛa sii kɛ lɛ din tumaa ganaa, ka maa pàã kɔmala wole Krita barka nɛ.

¹⁴ A laanka bɛ nɛ, ka bɛ́ ká n gii wɔ maa fuun ni, ká sii bǐɛ̃ zɛnaa.

¹⁵ Ka Filipi minin dininmaan tá doɛ̃, mà ma bɛ́ má soo Masedoanɛ biikoo mɛn li, bɛ̀ wɔ bɛ́ Boo Tii Kɔɔ̃n kɛ laakalaa giala koe, ka dinin Lawa a sɔmɔ lɛ din sɔɔ̃ na á goã á n dɔ ma lɛ. Ka dininsɔɔ̃nɔn man ka n gii wɔ maa yoo laanka maa mɛnaa ǹ sii ni.

¹⁶ Ma bɛ́ má dɔ Tesaloniki lɔn gɔrɔ, ma laadoo bɛ́ dɔmalɛ mɛn ganaa, ká dia ma la, á gunyin dan bɔ.

¹⁷ Ma bie giɛ li, máa yǎa ka bǐɛ̃baa ǹ mànan diɛ ma la wa, sɛnɛ, man giɛ li máa Lawa màn gigiã koa ka nɛ.

¹⁸ Ka màn mɛn tumaa dia ma la, má yɛ, á la ma lɛ-n dinin. Epafroditi bɛ́ á daa kaa dɔmalɛn lɛn kɔ ma la, màn kɔ́n wɛɛ ba ma-a doo wa. Kaa bǐɛ̃baa ǹ mànan lɛn man ka wúlu bɔ ǹ màn gìĩ kɔɔ̃n bɛ́ lɔn, ka Lawa bɛ́ lɛ koe wúlu mɛn ganaa, a ń kɔɔ̃n a ganaa.

¹⁹ Maa Lawa á re giɛ ka laadoo tumaa walan sɔnbɔraanɛ, a kɔnpɛ ka a din a pàãmabaa gole kɛ nɛ, Yezu Krita wɔ gɔ́ɔ̃ nɛ.

²⁰ Tɔ golebaa die a goã wɔ Di Lawa wɔ lɛa yǎa duduu. A n miɛ̃.

Fòo-diɛ giala-nyɔmɔɔ boo

²¹ Min mɛnɛn tumaa bɛ́ Yezu Krita wɔbaa gɔ́ɔ̃ nɛ, ka fòo da ǹ gogoonmaa nɛ. Wɔ dɔɔ̃nɔn mɛnɛn bɛ́ kun ma nɛ, bɛn dɔn tá fòo diɛ ka nɛ.

²² Lawa a zaman mɛn tumaa bɛ́ kànaa ma li, sanparɛ ka gánadɛnaa gole a kion minin kɛn nɛ, ǹ tumaa á fòo diɛ ka nɛ.

²³ Wɔa Dɛnaa Yezu Krita a bǐɛ̃ die a goã ka li.