Filipi minin 1 - LAWA A BOO SONBORE

¹ Masɛ Pooli laanka Timote n Yezu *Krita a bɛ̀rɛn lɛa. Lawa a zaman mɛn bɛ́ Filipi kiwi ǹ nə́ golee-n Yezu Krita li, wɔ ǹ sɛ́wɔ kɛ diɛ bɛn la, ǹ laanka ǹ Lawa a sɔmɔ nyɛɛnaandɛnan nɛ, ka ǹ dɔmalɛ wolen ne.

² Wɔ Di Lawa laanka Dɛnaa Yezu Krita die ǹ bǐɛ̃ zɛnaa ka nɛ, ǹ là nyantoro kɔ ka la.

Pooli Lawa nyan mɛn kɔ

³ Bɛ̀ ma yiri daa ka-n biikoo mɛn tumaa li, man barka diɛ maa Lawa nɛ kaa lɛa.

⁴ Biikoo tumaa li, bɛ̀ ma á Lawa nyankoe ka tumaa a lɛa, man koe ka foo kɔɔ̃n nɛ.

⁵ A giala, ka n dɔ ma lɛ Boo Tii Kɔɔ̃n kɛ a laakalaa gɔ́ɔ̃ nɛ, a saa a giala kɔ waáraa ganaa a da pelo ǹ yaa.

⁶ Ma foo doamaa-n kɛ ganaa: Lawa dí sonbore mɛn giala kɔ ka gɔ́ɔ̃ nɛ, á re toɛ bɛ wo miɛ̃, a wo n giala-nyɔmɔɔ Yezu Krita a lɛawaa kɛ ganaa.

⁷ A n siĩni ma taasiɛ wɔ miɛ̃ ka tumaa wɔ paǹ li, a giala, ka sii á kɔɔ̃n ma ganaa. Lawa bǐɛ̃ zɛnaa ma nɛ á dí mɛn kɔ ma la, ka tumaa nə́ n gii wɔ a nɛ. Ma bɛ́ kòso-n, ká n dɔ ma lɛ. Ma bɛ́ re golee ma yɔ mɛn bɔ Boo Tii Kɔɔ̃n kɛ a lɛa, ka nə n gii we bɛ dɔ nɛ.

⁸ Ma pɛ ka-n lɔn, Lawa din nə maa siére lɛa, ma á ka tumaa narɛ ka Yezu Krita bɛ́ ka narɛ lɔn.

⁹ Ma bɛ́ Lawa nyan mɛn koe ka a lɛa, bɛ á ke: Ma na a nyankoe, máa a kaa kɔn-narɛɛ gole kɔ a wo nyɛɛn miɛ̃, a toa sii-doɛ̃ taãn mɛ li, ka sii giala ma sonbore ne,

¹⁰ màn mɛn bɛ́ toɛ, ka sii sonbore gɔgɔɔ̃ doɛ̃. Bɛa yɔrɔ lɛ la ka á re goɛ̃ *yoreen ne, ǹ ba re boe la ǹ ka zɛ̀rɛ baa ka sii kɔ́n nɛ, Krita a lɛawaa kɛ a pinaa wa.

¹¹ Yezu Krita bɛ́ sii peperen mɛnɛn zɛnɛɛ wɔ nɛ, ka á re piɛ̃ ka bɛn nɛ, Lawa a gugurubaa laanka a tɔ bɔ a lɛa.

Krita tɔ gole kɔ boo

¹² Ma dɔɔ̃nɔn lɛn, sii mɛn ma yɛ, má n zoɛ̃ máa ka dɔ̃, bɛ lɛ na á toa Boo Tii Kɔɔ̃n kɛa laakalaa woo nyɛɛnɛ.

¹³ A na á n baa miɛ̃, goledɛnaa a kion gole kɛ a garadin ni, ka min kɔsɔn tumaa dɔ̃ kanna, mà maǹ nə́ ma da kòso-n, a giala mà man dí nyɛɛ Krita nɛ.

¹⁴ Wɔ dɔɔ̃nɔn mɛnɛn nə goã ma yii kòso-n, ǹ gigiã foo tãbaa yɛ Dɛnaa pàã ganaa, bɛ́ toa ǹ yii wɔ n nə́ n gù we yii Lawa a boo laakalaa li, nyɛ́ɛ ná a ba ǹ ganaa wa.

¹⁵ Taãn nɛ, ǹ tɛnɛn tá ǹ bii, ǹ nə́ Krita boo diɛ ka foo a wuu pɛ nɛ, ǹ nə́ giɛ zia li; sɛnɛ, ǹ tɛnɛn dɔn tá Krita boo lɛ diɛ ka taasiɛ sonbore ne.

¹⁶ Bɛn man zɛnɛɛ, ka kɔn-narɛɛ nɛ, a giala, ǹ tá doɛ̃, mà man kànaa maa yɔ-bɔ kɛa lɛa Boo Tii Kɔɔ̃n kɛ taman yii.

¹⁷ Gialakunun taasiɛ a siĩn wa. Maǹ Krita boo lɛ diɛ ka foo a wuu pɛ nɛ, ǹ nə́ taasɛ, mà ǹsɛn man màn diɛ maa fuu li, maa tá kòso-n lɛ gɔ́ɔ̃ nɛ.

¹⁸ Sɛnɛ, ma laadoo! Á kɔɔ̃nɛ ǹ ganaa, ǹ taasiɛn nə́ goã kɔkɔrɔ, hinlaa pepere, yǎa Krita boo bɛ́ n diɛ, masɛ nə n nyɛnyɛɛ bɛa lɛa. Man die n nyɛnyɛɛ dɔn dinin a wo miɛ̃.

¹⁹ A giala, ma á doɛ̃ máa bɛ tumaa n die ǹ bɔyɛɛ, a ma kirisibaa ǹ sii baa, Lawa n kaa Lawa-nyankɔ pàã nɛ, ka Yezu Krita a Yiri Fu a dɔmalɛ kɛ pàã nɛ.

²⁰ Sonbore, masɛ gɔ́ɔ̃ nɛ, ma yiri na a ganaa, máa ma nyan sii kɔ́n zɛnaa a n sìi diɛ ma din ganaa ka duduu wa. Man giɛ li, máa ma goã piɛ̃-n ka foo tãbaa-n baraanɛ, sanparɛ sisia kɛ nɛ, ta man liɛ, ta man giɛ̃, Krita a gugurubaa yɛ maa minbuiinbaa tumu gɔ́ɔ̃ nɛ.

²¹ A giala, maa tá kanaa ǹ mìi n ka Krita nɛ, bɛ̀ má gã dɔn bɛ n là lɛa ma ganaa.

²² Sɛnɛ, bɛ̀ maa tá kanaa dɔ n toɛ ma dí sonbore nya, ma bɛ́ ǹ mɛn boe kəni, ma a bɛ doɛ̃ doo wa.

²³ Bɛa sii màn paa kɛ n ma yiri baɛ̃ kɔn. Man taasɛ máa man bɔ yiikoonaabaa kɛ nɛ, ma wo giã kun ka Krita nɛ, bɛ n kɔɔ̃n ma ganaa á la a yii ni.

²⁴ Sɛnɛ, bɛ̀ ma yii á koo kanaa kɛ nɛ, bɛ dɔ a là á gole ka ganaa parsiini.

²⁵ Ma á waa-n la sɛn máa ma á re goɛ̃. Ma á doɛ̃ máa ma á re goɛ̃ kun ka tumaa nɛ, man dɔ ka lɛ, ka wo nyɛɛn ka foo kɔɔ̃n nɛ goleemali gɔ́ɔ̃ nɛ.

²⁶ Ma á re wusii ma da ka li doo. Bɛ̀ má daa, Yezu Krita sii mɛn zɛnaa ka nɛ masɛ pàã ganaa, sonbore á die yii ka lon ka ka dinin laakalaa ka bɛ nɛ.

²⁷ Sɛnɛ, giã ǹ gɔn mɛn bɛ́ woe kun ka Krita a Boo Tii Kɔɔ̃n kɛ nɛ, ka toa ka kɔ bɛ lɛ. Ka bɛ nɛ, ta má daa n yii kɔ ka li, ta ma banban, Boo Tii Kɔɔ̃n bɛ́ goleemali mɛn koe, a n siĩni ma ka boo ma, mà ka tá bɛ gɔ́ɔ̃-n taãn-taãnɛ, mà ka n kun ka taasiɛ goon ne, ka n yɔ boe kun ka foo goon ne.

²⁸ Ka baran toa kaa zɔ́ɔn nə nyɛ́ɛ da ka ganaa ka sii kɔ́n nɛ wa. Bɛ á re sii biɛ, a n nyɛɛ ǹ nɛ, mà ǹ dininmaan wɔ na á ziziɛ̃, a n nyɛɛ mà kasɛn man kaa kirisibaa ǹ zii la, a giala, bɛ lɛ n boe Lawa li.

²⁹ A giala, Krita wɔ paǹ li, Lawa na á bǐɛ̃ zɛnaa ka nɛ mà ka dí nya nɛ goleemali gɔ́ɔ̃ nɛ. Bɛ din sɔɔ̃ bie wa, a n mà ka fuu dɔ yɛ a lɛa.

³⁰ Sisia kəni, ka n gii wɔ ziabaa kɛ-n kun ka ma nɛ. Bɛa ziabaa kɛ n goon, ka ka bɛ́ ká ma yɛ biɛ lɔn lɛlɛ, man tɔn biɛ miɛ̃, ka ka bɛ́ doɛ̃ lɔn.