Ɛsidrasi 9 - LAWA A BOO SONBORE

Zuifun tɛnɛn man kɔn we ka tɔrɔ kɔsɔ lɔn nɛ

¹ Bɛ bɛ́ á n zɛnaa á nya, zaman lɛ a nyɛɛnaandɛnan nə́ daa dɔ ma li, ǹ nə́ pɛ ma-n kɛnɛn: «Izirayeli a zaman lɛ nɛ, Lawa a wúlu-bɔlen lɛn nɛ, *Levii tɔrɔn lɛn nɛ, ǹ nə n na, ǹ nə́ n bɔ gána lɛ a minin ganaa wa. Kanaan minin ni, Ɛti minin ni, Perɛzi minin ni, Zebuzu minin ni, Amɔn tɔrɔn nɛ, Moabu minin ni, Ezipti minin ni, ka Amɔɔrɔ minin ni, bɛn bɛ́ sii bɔbɔnɛɛn mɛnɛn zɛnɛɛ, ǹ dɔn man koe bɛn lɛn lɛ, ǹ tá ǹ zɛnɛɛ.

² A giala, ǹ laanka ǹ nɛgiĩn nə́ bɛa minin lɛn nɛlɔn wɔ lɔn lɛa, ǹ nə́ Lawa a tɔrɔ yii gɔgɔɔ̃ lɛ lɔlɔkɔn bɛa yɔrɔ lɛ la ka bɛa gánan kɛn lɛn minin ni. Ǹ goledɛnan laanka minin nyɛɛnaan-bɔlen man nə́ n gòãn kaa bɛa sii baraa kɛ lɛ nɛ bibinaa nɛ.»

³ Ma bɛ́ má bɛ ma, má maa mɔnaan kũ má ǹ tɔtoɛ̃, má ma mìi ka laanka ma lɛtoro ka kũ má wɔ̃woɛ̃, má giã tán ma foo ń busii ni.

⁴ Ma dinmaa lɛ sɛ giã tán miɛ̃ ma foo n busii ni, yǎa wasamiɛ̃n a wúlu bɔ biikoo li. Goa-wolen sii baraa lɛ taman yii, Izirayeli a Lawa lɛ goã boon mɛnɛn diɛ, min mɛnɛn nə goã nyɛ́ɛ biɛ bɛa boon lɛn manɛ, bɛn nə́ daa n sɔkɔn ma li.

⁵ Wasamiɛ̃n a wúlu bɔ biikoo lɛ bɛ́ á dɔ, má soo má n bɔ maa foo-ziziɛ̃ lɛ gɔ́ɔ̃ nɛ, maa mɔnaan nə́ tɔtoɛ̃ nɛ, má bɔ má mɛ ma musin la tán, má n gɔnɔn lɛ bɔ má ǹ dia Dɛnaa Lawa la,

⁶ má pɛ nɛ: – Maa Lawa, ma yiri lɔlɔkɔnmaa nɛ. E maa Lawa, sìi dɔ n ma ganaa man yɔrɔ saa ma dia n la. A giala, wɔa sãn lɛn nə́ kaa kɔn la wɔ mìi ni, wɔ zɛ̀rɛ dɔ gole kɔ yǎa á dɔ lon.

⁷ A kũ wɔ digolon biikoo kɛ ganaa, zɛ̀rɛ gole n wɔ ganaa, yǎa á daa pelo kɛ yaa. Wɔa sii baraan taman yii, wɔsɛn nɛ, wɔa kiin ni, ka wɔa Lawa a wúlu-bɔlen ne, kanaa a kiin nə́ pàã nyaa wɔ nɛ, ǹ nə́ zia da wɔ-a, ǹ nə́ wɔ baa bɛ̀rɛn lɛa, ǹ nə́ wɔa mànan kokoo, ǹ nə́ sìi da wɔ-a, sìi mɛn lɛ á ke tɔn wɔ gialaa pelo.

⁸ Sɛnɛ kanna, wɔa Lawa, Dɛnaa Lawa bǐɛ̃ kɔ wɔ ganaa biikoo boɛɛn gɔ́ɔ̃ nɛ, á toa wɔ gialakunun nə́ kanbaa. Ka bɛ dɔ nɛ, á giã ǹ bǎã kɔ wɔ la a bǎã sonbore kɛ nɛ, màn mɛn bɛ́ toɛ a wɔ yii toɛ̃, a yii-nyɛɛ boɛɛn kɔ wɔ la, wɔa bɛ̀rɛbaa lɛ gɔ́ɔ̃ nɛ.

⁹ A giala, wɔ n bɛ̀rɛn lɛa, sɛnɛ Lawa nə n gɔn bɔ wɔ ganaa wɔa bɛ̀rɛbaa lɛ gɔ́ɔ̃-n wa. Pɛrsi kiin nyɛɛnɛ, n bǐɛ̃ kɔ wɔ ganaa, n susui kɔ wɔ la, màn mɛn bɛ́ toɛ wɔ wɔa Lawa a kion lɛ dɔ, wɔ a kɛbɔlɔ saa wɔ da lon. N wɔ tamaa ǹ kungɔn kɔ wɔ la Zudaa gána laanka Zeruzalɛmu kiwi.

¹⁰ Kanna, wɔa Lawa, wɔ n die pii wáa wàa kɛ kio kəni?

¹¹ A giala, n dí-nyalin kɛn, n boo gii diɛ, bɛn nə n gɔn waa ǹ boon mɛnɛn pɛ wɔ nɛ, wɔ́ n piã ka bɛn nɛ. N nə n goã pii wɔ-n kɛnɛn: «Gána ke, ka n die we a nɛ, ka n die biɛ kaa wɔ lɛa, a minin sii baraan man ná a gɔgɔrɛ kɔ, ǹ nə́ sii bɔbɔnɛɛn zɛnaa ǹ gɔgɔrɛbaa lɛ gɔ́ɔ̃ nɛ, ǹ ná a gɔ́ɔ̃ yii pã nɛ.

¹² Bɛ lɛ nɛ, ka baran toa ka kaa nɛlɔn kɔ ǹ nɛgiĩn la wa, ka baran toa ka ǹ nɛlɔn wɔ, ka ǹ kɔ kaa nɛgiĩn la wa. Ka baran toa ka n taasɛ ka duduu ka ǹ là nyantoro yɛ laanka ǹ yii-nyɛɛ yɛ-n wa, màn mɛn bɛ́ toɛ, ka pàã yɛ ka gána lɛ a màn sonboren bii, ka die ka toa kaa nɛnyaanan gɔn kíɛ̃ lɛa yǎa duduu.»

¹³ Sii mɛn yii wɔ yɛ, wɔa nya ǹ dí baraan lɛn laanka wɔa zɛ̀rɛ gole lɛ taman yii ni. A laanka bɛ yii ni, wɔa Lawa, n dɔlɔ bɔ wɔ ganaa á dɔ wɔa sii baraan lɛn dɔlɔ bɔ ǹ bǎã-n wa. N toa wɔa zaman lɛ a gialakun kɛ yii goã koo.

¹⁴ Wɔ́ á boe la doo, wɔ n gɔn waa ǹ boon kɛn toa walan, wɔ wo n naa min bɔbɔnɛɛn kɛn ganaa, kɔn-wɔ barka nɛ? N foo ba re yui wɔ li, yǎa wɔ bɔ̀n biɛ lenlen, n nə́ n ba min kɔn toɛ walan a yii n koo wa?

¹⁵ Izirayeli a Lawa, Dɛnaa Lawa, n tá pepere, a giala, pelo, wɔ n kanbaa sii ganaa wolen lɛa, wɔ́ la. Wɔ á ke n yɔrɔ-a ka wɔ zɛ̀rɛn nɛ, a da yaa, min kɔn ba boe la a goã n yɔrɔ-a ka bɛa yɔrɔ kɛ lɛ-n wa.