Ɛsidrasi 6 - LAWA A BOO SONBORE

Kii Dariusu a lɛ sii

¹ Kii Dariusu tɔ́n pɛ, ka ga sɛ́wɔ zizin kɛn nɛ, koa nɛ kii gɔn mànan koa ǹ bǎã nɛ, *Baabilonii lɛ-n walan.

² Ǹ nə́ tɔ́n sɛ́wɔ munii zizi goon yɛ Ekibatana, Mɛdi gána a kiwi gole kɛ nɛ. A n kiɛ̃-n bɛa sɛ́wɔ lɛ-n kɛnɛn:

³ «Kii Siirusu a kiibaa lɛ̀ bibinaa li, á goã á boo da Lawa a kion kɛ wɔ gɔn la Zeruzalɛmu: kion lɛ n die wusii a n dɔ, a n baa bǎã lɛa, bǎã mɛn nə́ ke, ǹ nə́ Lawa a wúlu boe a nɛ. Ǹ die ǹ kion lɛ giala wɔ tán kaka. A wo lon die a goã mɛtərə pɔsɔɔ, a gùrù kunun dɔ goã mɛtərə pɔsɔɔ.

⁴ Bɛ̀ ǹ nə́ kɔlɔ dadara koa á dɔ koa sɔɔ, koa goon nə n koa ka gɔn dii ni. Kii a kion nə die n toɛ̃ ka dí lɛ a guĩ ni.

⁵ Ka bɛ dɔ nɛ, Lawa a kion a sana mànan laanka a wɔrɔ mànan kɛn, Nebukadenezɔɔrɔ goã á minin kaa ǹ goa ganaa Lawa a kion Zeruzalɛmu, ǹ nə́ woo ǹ ne Baabilonii, bɛn tá re wusii ǹ nə n kɔ, ǹ gogoonmaa tá re woe a bǎã nɛ, Lawa a kion Zeruzalɛmu, a n koa Lawa a kion.

⁶ Sisia, nsɛ Efrati tà a lɛ̀nyɛɛn gɔn la a pàãdɛnaa Tatenayii, nsɛ Setara-Bozinayii, kasɛn kɛn ǹ miãn lɛa, Afarasataaki kiwi, Efrati tà a lɛ̀nyɛɛn gɔn la, ka n bɔ sii lɛ wɔlɔ li.

⁷ Ka toa ǹ Lawa a kion lɛ a dí nya. Zuifun nyɛɛnaandɛnan tá re kion lɛ doe a lɛlɛ a bǎã nɛ, kun ka Zuifun min golen ne.

⁸ Ka bɛ́ re sii mɛn zɛnɛɛ bɛa Zuifun min golen lɛn manɛ, Lawa a kion lɛ a dɔ gɔ́ɔ̃ nɛ, bɛ wɔ paǹ li, maa boo á ke: min mɛnɛn bɛ́ Efrati tà a lɛ̀nyɛɛn gɔn la, bɛn bɛ́ nyin giɔ̀mɔ mɛn sarɛɛ, á n doe kii ganaa, bɛa kii gɔn màn kɛ lɛ nɛ, ǹ tá re boe ǹ bɛa minin kɛn lɛn guĩ saa nɛ doɛ̃ sɔnbɔraanɛ, ǹ nə́ ǹ ba a bɔ lɛ diɛ wa.

⁹ Laadoo bɛ́ re doe mànan mɛnɛn ganaa, lon a Lawa a *wúlu màn tiɛ̃n wɔ lɛa, dii gɔ̀lɔ̀ tenən ne, sère gɔ̀lɔ̀n laanka sère tenən ne, *belee nàn nɛ, yìsi ni, duvɛ̃ laanka nyɔɔ nɛ, a kɔnpɛ ka Lawa a wúlu-bɔlen kɛn sii yɔrɔ pɛ nɛ, bɛa mànan kɛn lɛn tá re n koe Zuifun lɛn la baraabaraa, sã ná a ba yii wa.

¹⁰ Màn mɛn bɛ́ toɛ minin bɛ́ wúlu-mànan mɛnɛn koe, bɛ kɔɔ̃n kɔ lon a Lawa ganaa, ka bɛ dɔ nɛ, ǹ Lawa nyankɔ kii laanka a nɛnyaanan manɛ.

¹¹ Min mɛn bɛ́ a re koe bɛa boo kɛ lɛ wa, man kɛ pii ǹ dɛnaa wɔ paǹ li: Ǹ die ǹ mɛn goon bɔ ǹ dɛnaa a kion ne, ǹ da bii-a, ǹ nə ǹ dɛnaa saa ǹ dere lɛ. Ka bɛ dɔ nɛ, ǹ die ǹ nə ǹ dɛnaa a kion baa tonton bɔlɔ lɛa.

¹² Kii hinlaa tɔrɔ mɛn tumaa bɛ́ re bɔlɔ tii, ǹ nə n gɔn saa ǹ Lawa a kion kɛ ziziɛ̃ nɛ Zeruzalɛmu, Lawa mɛn lɛ á ke á kànaa bɔ a giã ǹ bǎã lɛa, bɛ die a ǹ yii tumaa bɔ a ǹ kaa. Masɛ Dariusu n má boo da, a die a n zɛnaa miɛ̃ lɛ n ka te!»

¹³ Bɛ kio, Efrati tà a lɛ̀nyɛɛn gɔn la a pàãdɛnaa, Tatenayii lɛ nɛ, Setara-Bozinayii lɛ laanka ǹ miãn lɛn nɛ, ǹ nə́ sii lɛ zɛnaa á kɔnpɛ ka kii Dariusu a gɔn-waan lɛn nɛ ka te, a gɔn waa ǹ boon mɛnɛn lɛn dia ǹ la.

Lawa a kion a zɔ́n

¹⁴ Zuifun min golen lɛn nə́ boo la ǹ nə́ woo nyɛɛnɛ ka kion lɛ a doe ne, ka Lawa goã á ná a boo gii-dali Azee laanka Idoo a nɛgiĩ Zakarii da a pɛ ganaa lɔn. Ǹ nə́ kion lɛ a dɔ gɔn nyɔmɔɔ á kɔnpɛ Izirayeli a Lawa a gɔn-waa nɛ, ka Pɛrsi gána a kiin kɛn dɔn gɔn-waa nɛ, Siirusu ni, Dariusu ni ka Artagizɛrɛsɛɛsi ni.

¹⁵ Lawa a kion lɛ a doe na á nya *Adaara mui a lɛawaa sɔɔbaa ǹ wɔ pinaa, kii Dariusu a kiibaa lɛ̀ sɔrɔbaa ǹ wɔ li.

¹⁶ Izirayeli minin lɛn nɛ, Lawa a wúlu-bɔlen ne, *Levii tɔrɔn nɛ, ka min gialakunun mɛnɛn nə bɔ bɛ̀rɛbaa ǹ bǎã nɛ ǹ nə́ daa, ǹ nə́ kion lɛ kɔ Lawa la ka nyɛnyɛɛ nɛ.

¹⁷ Maǹ nə́ dii gɔ̀lɔ̀ paabiɛ bɔ, sère gɔ̀lɔ̀ biɛpaa nɛ, ka sère ten biɛsii ni, Lawa a kion lɛ a kɔ Lawa la ǹ wɔ lɛa. Maǹ nə́ butumu fulupaa bɔ, Izirayeli tɔrɔn lɛn lɛ yii li, Izirayeli kuturu a sii baraan sawaa ǹ wɔ lɛa.

¹⁸ Ǹ nə́ Lawa a wúlu-bɔlen lɛn laanka Levii tɔrɔn lɛn dɔn tatala, ǹ nə́ Lawa a dí kɔ didie la Zeruzalɛmu, á kɔnpɛ ka Muizu a sɛ́wɔ kɛ gɔ́ɔ̃gɔ́ɔ̃ ǹ boo ne.

Kiɛ̃mala ǹ zɔ́n

¹⁹ Bɔ bɛ̀rɛbaa ǹ bǎã wolen lɛn nə́ *kiɛ̃mala ǹ zɔ́n zɛnaa, lɛ̀ a mui bibinaa a lɛawaa fulusiibaa ǹ wɔ pinaa.

²⁰ Lawa a wúlu-bɔlen lɛn laanka Levii tɔrɔn lɛn nə́ goã ǹ nə́ *gɔ̀ bɔ ǹ dinin ganaa kun, ǹ tumaa goã yoreene. Ǹ nə́ tɔ́n kiɛ̃mala ǹ zɔ́n sèren lɛn dɛ, bɔ bɛ̀rɛbaa ǹ bǎã wolen lɛn tumaa wɔ lɛa, ǹ dinin dɔɔ̃nɔn Lawa a wúlu-bɔlen wɔ lɛa, ka ǹ dininmaan dɔn nɛ.

²¹ Bɛa yɔrɔ lɛ la, Izirayeli minin tumaa zɔ́n bii kun, mɛnɛn nə bɔ bɛ̀rɛbaa ǹ bǎã nɛ, ka Lawa doɛ̃baã wolen kɛn mɛnɛn bɛ́ ǹ nə́ ǹ ba Lawa doɛ̃ wa, ǹ nə́ gána lɛ a Lawa doɛ̃baã wolen zɛnaa ǹ sii gɔgɔrɛn kɛn kaa, màn mɛn bɛ́ toɛ, ǹ ga Izirayeli a Lawa Dɛnaa Lawa li.

²² Ǹ nə́ *yɔ bùbaã buuru zɔ́n zɛnaa lɛawaa sɔbaa gɔ́ɔ̃ nɛ, ka nyɛnyɛɛ nɛ. Lawa na á ǹ kã ka nyɛnyɛɛ nɛ, a giala, á Asiirii gána a kii foo bɔyaa, màn mɛn bɛ́ toɛ, kii lɛ nə n yɔrɔ bǐɛ̃ da ǹ la, ka Lawa a kion lɛ a dí ni, Izirayeli a Lawa a kion dí lɛ.