Ɛsidrasi 3 - LAWA A BOO SONBORE

Levii tɔrɔn nə́ wusoo ǹ nə́ wúlu-bɔ da a giala la

¹ Lɛ̀ a mui sɔbaabaa ǹ wɔ daa á dɔ, Izirayeli nɛnyaanan lɛn nə́ goã ǹ kiwin ni. Zaman lɛ tumaa tɔ́n na a wɔ baa goon, ǹ nə́ n sɔkɔn Zeruzalɛmu.

² Zozadaaki a nɛgiĩ Zozoe laanka ǹ miã wúlu-bɔlen ne, ka Salatieli a nɛgiĩ Zorobabeli laanka ǹ dɔɔ̃nɔn nɛ, ǹ nə́ yoo kun ǹ nə́ Izirayeli a Lawa a *wúlu bɔ ǹ bǎã lɛ dɔ, ǹ nə́ wúlu mànan tã la, ka a bɛ́ kiɛ̃ nɛ Lawa a min Muizu a dí-pɛn sɛ́wɔ kɛ-n lɔn.

³ A laanɛ, ǹ nə́ goã nyɛ́ɛ biɛ bǎã lɛ a minin manɛ, ǹ nə́ wusoo ǹ nə́ wúlu bɔ ǹ bǎã lɛ dɔ a lɛlɛ a bǎã nɛ, ǹ nə́ wúlu mànan tã la, wasamiɛ̃n wɔn laanka baayɛlɛ wɔn nɛ, ǹ nə́ ǹ kɔ Dɛnaa Lawa la.

⁴ Bɛ kio, ǹ nə́ *giã siã giulun zɔ́n zɛnaa, ka a bɛ́ kiɛ̃-n lɔn. Lɛawaa gogoonmaa, ǹ nə́ goã wúlu mànan tiɛ̃ koe Dɛnaa Lawa la. Landa *wúlu màn lɛ mɛn pɛ lɛawaa gogoon wɔ lɛa, maǹ zɛnɛɛ á kɔnpii ka bɛ nɛ.

⁵ Bɛ kio, wúlu mɛn doamaa bɛ́ nɛ a n bɔ baraabaraa ka wúlu màn tiɛ̃ nɛ, ǹ nə́ goã bɛ boe. Ǹ nə́ goã wúlu dɔ boe ka wúlu màn tiɛ̃n nɛ, ǹ mui dii zɔ́nɔn wɔn lɛa, ka biikoon mɛnɛn tumaa bɛ́ ǹ nə́ ǹ kɔ Dɛnaa Lawa la. Bɛ̀ á yoo bɛ la, wúlu mànan kɛn manɛ didie goã giɛ li mà a bɔ foo sii màn lɛa Dɛnaa Lawa nɛ.

⁶ Lɛ̀ a mui sɔbaabaa ǹ wɔ lɛ a giala kɔ pinaa gɔrɔ, ǹ ná a giala kɔ, ǹ nə́ wúlu mànan tã Dɛnaa Lawa wɔ lɛa, a da yaa Lawa a kion lɛ gòã tɔn nə n daa bɔrɔ wa.

⁷ Bɛ kio, ǹ nə́ wɔrɔ kɔ kɔlɔ-sɛlɛlin laanka gɔn dí-nyalin la. Màn-bii ni, mi ǹ mànan nɛ, ka nyɔɔ nɛ, ǹ nə́ bɛn dɔn kɔ Sidɔn minin laanka Tiiri minin la, màn mɛn bɛ́ toɛ, ǹ nə n toa Liban ǹ *sɛdrə gɔn kaa yìsi mu la, ǹ da nɛ yǎa Zafa kiwi, a kɔnpɛ ka Pɛrsi gána a kii Siirusu a zii kɔ ǹ la nɛ.

⁸ Bɛ kio, ǹ dɔ lɛ̀ paa a mui a paabaa ǹ wɔ Lawa a kion lɛ li Zeruzalɛmu, Salatieli a nɛgiĩ Zorobabeli ni, ka Zozadaaki a nɛgiĩ Zozoe ne, kun ka ǹ dinin miã Lawa a wúlu-bɔle gialakunun ni, *Levii tɔrɔn nɛ, ka min mɛnɛn nə bɔ bɛ̀rɛbaa ǹ bǎã nɛ ǹ nə́ daa Zeruzalɛmu, ǹ nə́ dí lɛ giala kɔ. Levii tɔrɔn min mɛnɛn nə dɔ lɛ̀ fuə, ka lɛ̀ fuə ka kio ne, ǹ nə́ bɛn kaa Dɛnaa Lawa a kion dí lɛ a ga ma walan ganaa.

⁹ Zozoe ne, a nɛgiĩn laanka ǹ dɔɔ̃nɔn nɛ, Kadimiyeli laanka a nɛgiĩn kɛn nɛ Zudaa tɔrɔn lɛa, Henadaadi a nɛgiĩn ni, bɛn nɛgiĩn ni, ka Levii tɔrɔn kɛn nɛ ǹ dɔɔ̃nɔn lɛa, ǹ tumaa golee li kun, ǹ nə́ giɛ Lawa a kion lɛ a dí-nyalin dí ganaa.

¹⁰ Kion-dɔlen lɛn bɛ́ Dɛnaa Lawa a kion lɛ goã daɛ, ǹ nə́ Lawa a wúlu-bɔlen kaa bii-a, wúlu bɔ ǹ mɔnaan nə́ ǹ ganaa, bɛnɛn nə́ ǹ gɔn. Levii tɔrɔn kɛn Azaafu tɔrɔn lɛa, ǹ nə́ bɛn dɔn kaa bii-a, fɔlɔ màn wuu bɔlen nə́ ǹ gɔn ǹ nə́ diɛ loen li, ń giɛ ǹ tá Dɛnaa Lawa guguru koe a kɔnpɛ ka Izirayeli gána a kii Davida a gɔn-waan nɛ.

¹¹ Ǹ bɛ́ Dɛnaa Lawa guguru kɔ ǹ loen laanka barka da Dɛnaa Lawa nɛ ǹ loen loe, maǹ nə́ goã siɛ loe-n kun kɛnɛn: «Lawa a siĩni, a kɔn narɛ ba nyɛɛ duduu Izirayeli wɔ paǹ li wa.» Zaman lɛ tumaa goã n lɛ wurii, bɛ̀ ǹ tá Dɛnaa lawa guguru koe, a kion lɛ gòã daa taman yii.

¹² Sɛnɛ Lawa a wúlu-bɔlen bii, Levii tɔrɔn bii, kɛdɛnaa yii fuli-an bii, ǹ mɛnɛn nə goã ǹ nə́ lɛlɛ a kion lɛ yɛ, bɛn gigiã wuu pɛ kəə̃kəə̃ ne, bɛ̀ ǹ tá a gialaa kion lɛ a kɛ gòã daɛ ǹ yii-n bii-a. Sɛnɛ, gigiã dɔ goã foo kɔɔ̃nbaa ǹ lɛ-dɛ we.

¹³ Bɛ lɛ nɛ, zaman lɛ din ba boe la á n foo kɔɔ̃nbaa ǹ lɛ-dɛ lɛ laanka wuu lɛ boe kɔnlɛ doɛ̃ wa, a giala zaman lɛ na á goã lɛ-dɛ we, a wuu n woe sɔsɔɔ.