Ezekieli 7 - LAWA A BOO SONBORE

Basaã gole

¹ Dɛnaa Lawa a boo dɔ ma li á pɛ:

² – Nsɛ minbuiin a nɛ, n too kɔ! Masɛ Dɛnaa Lawa n kɛ pii Izirayeli gána tumaa nɛ: «Á nya kəni! Kaa wɔ nya Izirayeli gána tumaa!

³ Sisia kəni, kaa wɔ nya. Man die die ka gialaa ka ma foo ne, ma kiri kuru ka la a kɔnpɛ ka kaa zɛnaa ǹ siin ni, ma kaa sii bɔbɔnɛɛn kɛn tumaa a dɔlɔ da ka mìi ni.

⁴ Ka makara a die ma kuĩ, ma ka toa walan wa. Ka sii mɛn zɛnaa, man die bɛ lɛ a dɔlɔ diɛ ka mìi ni. Kaa sii bɔbɔnɛɛn kɛn lɛn dɔlɔ á re kuĩ ka dinin mìi ni. Ka á re doɛ̃ ka bɛ lɛ-n kəni, mà masɛ din nə Dɛnaa Lawa lɛa.»

⁵ Masɛ Dɛnaa Lawa n kɛ pii: Koe n ka kɛ nɛ die, koe gole! Min bin nə ǹ miã yɛ wa.

⁶ Á ke, á nya kəni, koe gole lɛ á die ka gialaa, á dɔ á nya! Á dɔ.

⁷ Gána minin lɛn, kaa wɔ nya. Biikoo dɔ, lɛawaa lɛ diri. Kelen la foo kɔɔ̃n lɛ-dɛ banban doo wa, sɛnɛ nyɛ́ɛ gole ne!

⁸ Sisia kəni, golee ba a-n doo wa. Man die die ka gialaa ka ma foo ne, yǎa man foo nyɛɛ ka la. Ma á re kiri kuri ka la a kɔnpɛ ka kaa zɛnaa ǹ sii ni, ma kaa sii bɔbɔnɛɛn kɛn tumaa a dɔlɔ da ka mìi ni.

⁹ Ka makara a die ma kuĩ ma ka toa walan wa. Ka sii mɛn zɛnaa, man die bɛ lɛ a dɔlɔ diɛ ka mìi ni. Sii bɔbɔnɛɛn kɛn lɛn dɔlɔ á re kuĩ ka dinin mìi ni, kaa á re doɛ̃ ka bɛ lɛ-n kəni, mà masɛ Dɛnaa Lawa din nə dɔlɔ boe.

¹⁰ Kiri wɔ lɛawaa á ke die, á ke á dɔ á nya. Á dɔ. Màn nə miɛ̃ kakaarɛbaa li, din gole kɔ n pàã yii.

¹¹ Kakaarɛbaa na á yoo á golee, á gole kɔ sii baraa zɛnaa taman yii. Ka kɔn ba re goɛ̃ wa, kaa gugurubaa nɛ, ka gɔn mànan nɛ, ǹ kɔn ba re goɛ̃ wa.

¹² A pinaa á die, bɛa sàabiɛ wa. Màn-piili baran n nyɛnyɛɛ wa, a sãli dɔ baran n yɔrɔ kɔsɛ wa. A giala, ma foo n yoo-n gána lɛ a minin tumaa li.

¹³ Ta pii-kɔli mɛn goã a yii n koo, bɛa re woe a mànan goɛ doo wa. Sii-nyaa ke, gána lɛa ziziɛ̃ paǹ li, bɛa sàabiɛ wa. Didie n die goɛ̃ pàãwɛɛnaa lɛa a sii baraan taman yii.

¹⁴ Bɛn tá re n pii, mà ka n yɔrɔ bɔ, sɛnɛ, min kɔn ba a re yii a wo zia la wa. A giala, ma foo n yoo-n gána lɛ a minin tumaa li.

Bɔ Lawa a dɔlɔ nɛ n gɔn banban

¹⁵ Zia n die goɛ̃ wɛɛ̃-n kanaa, piɛ̃ busu laanka bòo ne, bɛn nə́ wɛɛ̃-n kion. Min mɛn bɛ́ don, ǹ tá re bɛ dii zia la. Min mɛnɛn bɛ́ kiwi gɔ́ɔ̃ nɛ, bòo laanka piɛ̃ busu á re wɛɛ bɛn la.

¹⁶ Min mɛnɛn bɛ́ re liɛ, bɛn tá re baa sii ǹ wo kelen la. Ǹ tá re puri ka kɔlɔn bɛ́ lɔn, ǹ sii baraa taman yii.

¹⁷ Ǹ nyàan tumaa á re gisĩ, pàã ná a banban, ǹ musin tumaa á re basɛ̃ ǹ giulun.

¹⁸ Ǹ tá re gɛ̀ koa ǹ mɔnaan we, ǹ nə ǹ tumaa mìi kɔɔ̃. Gɔ̀nɔn bìn diɛ á re ǹ kuĩ, sìi nə́ ǹ tumaa ganaa.

¹⁹ Ǹ tá re ǹ wɔrɔ kɛ pɛsɛ̃ tán zii la, ǹ sana kɛ á re màn kooro biɛ ǹ yii li. Lawa a foo-yoo kɛa pinaa, ǹ wɔrɔ laanka ǹ sana kɛ nɛ, bɛn ba re boe la ǹ nə ǹ kirisibaa wa. Ǹ nɔ̀ a re kiɛ̃ wa, ǹ nàn ba re kiɛ̃ wa. A giala, maǹ nə́ n saa sana laanka wɔrɔ li, ǹ nə́ sii baraa zɛnaa.

²⁰ Ǹ nə́ n saa ǹ nyaǹ màn sonboren kɛn li, ǹ nə́ n dinin gole kɔ. Ǹ nə́ màn nyín bɔbɔnɛɛn tìĩ-bɔlen zɛnaa ka bɛn lɛn nɛ. Bɛ lɛ na á toa, ma á re biɛ *gɔ̀ lɛa ǹ ganaa.

²¹ Man die n koe tiin la, ǹ nə ǹ saa ǹ wo ǹ ne. Man die ǹ koe gána lɛ a min baraan la, ǹ bɔ zia la ǹ mànan lɛa. Bɛn tá re gɔ̀ diɛ ǹ ganaa.

²² Ma á re n bɔyɛɛ man bɔ ǹ li, a giala, maa bǎã sonbore lɛ á re ziziɛ̃. Wurumunun tá re kiɛ a nɛ ǹ gɔ̀ da a ganaa.

²³ Ka ǹ kũ ǹ fɔlɔ zɔrɔka zɛnaa, a giala gɛ̀-dɛli la gána lɛ yii ni, kakaarɛbaa dɔ́ kiwi lɛ pã.

²⁴ Tɔrɔ mɛnɛn bɛ́ babaraa, man die die ka bɛn nɛ, ǹ tá re minin kionən sii ǹ la. Ma á re min kakan kɛn din gole kɔ nyɛɛ, ǹ wúlu bɔ ǹ bǎãn kɛn, ǹ tá re gɔ̀ diɛ bɛn ganaa.

²⁵ Foo ziziɛ á die, ǹ tá re giɛ là nyantoro li ǹ fɔ̃.

²⁶ Bɔ̀n woo bɔ̀n, gɔ́ɔ̃ wɔ̃ ǹ boo woo gɔ́ɔ̃ wɔ̃ ǹ boo, bɛn lɛn man die koɛ kɔn la. Ǹ tá re sii-nyaa liɛ Lawa a boo gii-dali la, Lawa a wúlu-bɔle ba re minin darɛɛ dí-pɛn kɛn ganaa doo wa, min golen ba re doree koe doo wa.

²⁷ Kii á re gɛ̀ koɛ, a kiodɛnan tá re foo ziziɛ̃ ǹ mɔnaan we, gána lɛ a minin gɔ̀nɔn tá re bìn diɛ. Man die ǹ kuĩ ǹ zɛnaa ǹ sii li, ǹ doamaa bɛ́ ka dɔlɔ mɛn nɛ, ma bɛ da ǹ mìi ni. Bɛa biikoo li kəni, ǹ tá re doɛ̃, mà ma din nə Dɛnaa Lawa lɛa.