Ezekieli 6 - LAWA A BOO SONBORE

Lawa n dɔlɔ boe dì guguru-kɔlen ganaa

¹ Dɛnaa Lawa a boo dɔ ma li á pɛ kɛnɛn:

² Nsɛ minbuiin a nɛ, n yɔrɔ bɔyaa n dia Izirayeli a kelen kɛn la, n masɛ a boo gii kɛ da ǹ ganaa.

³ N die n pɛ kɛnɛn: «Izirayeli a kelen lɛn, ka n too kɔ Dɛnaa Lawa a boo li. Dɛnaa Lawa n boo kɛ lɛ diɛ kelen wɔ paǹ li, tentenen ne, kele biin laanka nyankɔrɔ lɛn nɛ. Man die zia kiɛ ka ganaa, ma kaa wúlu bɔ ǹ bǎãn kɛn ziziɛ̃.

⁴ Ma á re kaa *wúlu màn tã ǹ bǎãn kɛn ziziɛ̃, ma kaa nyɔɔ gìĩ kɔɔ̃n tã ǹ mànan kɛn yu, ma kaa minin kɛn dɛ ma ǹ geren kaa tán kaa dìn kɛn yɔrɔ-a.

⁵ Má á re Izirayeli nɛgiĩn geren kiɛ tán kaa dìn kɛn yɔrɔ-a, má á re ka wen pɛpɛsɛ̃ ma kaa wúlu bɔ ǹ bǎãn kɛn lɛnpɛnɛ nɛ.

⁶ Ka bɛ́ kiwin mɛnɛn tumaa nɛ, bɛa kiwin lɛn gɔ́ɔ̃ kooro á die goɛ̃, kaa wúlu bɔ ǹ bǎãn kɛn tá re goɛ̃ tán. Kaa wúlu màn tã ǹ bǎãn kɛn tá re wurii, ǹ nə́ ǹ ba re màn kɔn bǐɛ̃ koe doo wa. Kaa dìn kɛn tá re yɔyɔrɛ ǹ papaã. Kaa nyɔɔ gìĩ kɔɔ̃n tã ǹ mànan kɛn laanka ka màn mɛn tumaa zɛnaa, bɛn tá re ziziɛ̃.

⁷ Min gigiã á re giɛ̃ ka bii. Ka á re doɛ̃ kəni, mà ma din nə Dɛnaa Lawa lɛa.

⁸ Sɛnɛ, ma á re toɛ ka gialakun nə goã zia lɛ kio, ma bɛn pɛsɛ̃ gána kɔsɔn nɛ.

⁹ Ma bɛ́ re woe ka kaa la wolen lɛn nɛ tɔrɔn mɛnɛn bii, ǹ tá re n taasɛ ka ma-n walan. Ka taasiɛ kɔrɔ laanka ga kɔrɔ mɛn wɔ, ka wusoo ka n bɔ masɛ kio, ka kaa naarɛɛbaa ǹ yiin kɛn doa dìn la, masɛ á re bɛa giã baraa lɛ ziziɛ̃. Ka tìĩ á re boe ka dinin nyin ni, kaa sii baraan laanka kaa sii bɔbɔnɛɛn kɛn tumaa taman yii ka zɛnaa.

¹⁰ Ka á re doɛ̃ ka bɛ lɛ-n kəni, mà ma din nə Dɛnaa Lawa lɛa, kooro bie má pɛ, máa ma á re bɛa koe kɛ lɛ diɛ ka mìi-n wa.»

¹¹ Masɛ Dɛnaa Lawa n kɛ pii: – N gɔn dɛ, n nə n gòã tɔ tán n pɛ: «Sii lɛ lɛ pã kəni!» Izirayeli tɔrɔn sii baraa bɔbɔnɛɛ lɛ tumaa taman yii, ǹ tá giɛ̃ zia la, bòo nə ǹ tɛn dɛ, piɛ̃ busu nə ǹ tɛn dɛ.

¹² Ǹ mɛnɛn wɔlɔ bɛ́ sɔsɔɔ, piɛ̃ busu á re bɛn dii. Ǹ mɛnɛn wɔlɔ bɛ́ kunun, bɛn tá re giɛ̃ zia la. Ǹ nə n mɛnɛn kũ ǹ yii n koo, bòo á re bɛn dii. Man die bɛ lɛ zɛnɛɛ ǹ nɛ yǎa ma foo nyɛɛ.

¹³ Ǹ geren tá re goɛ̃ tán kun ka ǹ dìn lɛn nɛ, ǹ wúlu bɔ ǹ bǎãn kɛn lɛnpɛnɛ, tenten sɔsɔrɔn tumaa laanka kelen tumaa mìi ni, da tumaa giulun ǹ mɛnɛn bɛ́ luu buruu lɛa ka kɛkɛ, ǹ goã wúlu boe bǎã mɛn tumaa nɛ ka màn gìĩ kɔɔ̃ nɛ ǹ dì kɔrɔn ganaa.

¹⁴ Man die yui ǹ gialaa, ta maǹ giã-n bǎã mɛn nɛ gána lɛ nɛ, ma á re ǹ tumaa lui, a saa diə gole kɛ ganaa, a wo Dibla kiwi yaa. Ǹ tá re doɛ̃ ka bɛ lɛ-n kəni, mà ma din nə Dɛnaa Lawa lɛa.