Ezekieli 5 - LAWA A BOO SONBORE

Lawa n die dɔlɔ boe Izirayeli ganaa

¹ Nsɛ minbuiin a nɛ, gɔya sa lɛ-bɔle-a saa, n nə n mìi ka laanka n lɛtoro ka kɔɔ̃ nɛ ka kùn bɛ́ lɔn. N bɛ́ re ka mɛn koɛ̃, n zɔɔ̃, n talakɔn wɔlɔ sɔɔ.

² Bɛ̀ Zeruzalɛmu nə n kũ biikoo mɛn li, n ka lɛ a talakɔn sɔɔ goon tã kiwi lɛ bii. A talakɔn sɔɔ lɛ a paabaa ǹ wɔ ke, n bɛ yawaa ka gɔya sa nɛ, n kiwi lɛ lɛnpɛnɛ nɛ. A talakɔn lɛ a sɔɔbaa ǹ wɔ ke, n die n bɛ pɛsɛ̃ piɛ̃ li, ma á re a kio lui ka maa gɔya sa nɛ.

³ Sɛnɛ, n die n mìi ka lɛ a boɛɛn bɔ, n kaa n dɔnkɛ zéwo ne.

⁴ N die n na a kɔn dɔ bɔ, n kaa tɛ-n n tã. Tɛ á re soe bɛ lɛ nɛ, a Izirayeli tɔrɔn lɛn tumaa kũ.

⁵ Masɛ Dɛnaa Lawa n kɛ pii: «Bɛ lɛ n die Zeruzalɛmu yii. Man má Zeruzalɛmu bɔ tɔrɔ kɔsɔn bii má koa, gána kɔsɔn ná a lɛnpɛnɛ.

⁶ Zeruzalɛmu minin lɛn nə́ n piã ka maa sii yɔrɔ bɔ ǹ boon ne, ǹ nə́ baraa kɔ ǹ nə́ la tɔrɔ kɔsɔn manɛ. Ǹ nə́ n piã ka maa landa boon ne, ǹ nə́ la gánan kɛn manɛ ǹ lɛnpɛnɛ. A giala, ǹ nə́ maa sii yɔrɔ bɔ ǹ boon lɛn tii, ǹ kɔ maa landa boon lɛn lɛ wa.»

⁷ Bɛ lɛ na á toa masɛ Dɛnaa Lawa á kɛ pii: «Tɔrɔn mɛnɛn bɛ́ ka lɛnpɛnɛ kaa too kakabaa lɛ la bɛn wɔ nɛ. Ka tɔ wɔ á kɔnpɛ ka maa landa boon kɛn laanka maa gɔn waa ǹ boo kɛn nɛ wa. Tɔrɔn mɛnɛn dinin bɛ́ ka lɛnpɛnɛ, ka kɔ bɛn dɔn dinin landan lɛ wa.»

⁸ Bɛ lɛ taman yii, masɛ Dɛnaa Lawa n kɛ pii: «Ma dɔ á die ka gialaa. Man die dɔlɔ boe ka ganaa kiwi lɛ bii, tɔrɔ kɔsɔn kɛn tumaa yɛ.

⁹ Ǹ zɛnaa ǹ siin lɛn nə́ bɔbɔnɛɛ kɔ á la yii ni. Bɛ lɛ taman yii, ma bɛ́ re sii mɛn zɛnɛɛ ka nɛ, ma bin nə ǹ miã zɛnaa duduu wa, ma ba re ǹ miã dɔ din zɛnɛɛ doo duduu wa.

¹⁰ Díin tá re ǹ nɛnyaanan soɛ̃ kiwi lɛ nɛ, nɛnyaanan dɔn tá re ǹ díin soɛ̃. Ma dɔlɔ mɛn boo da, man die bɛ lɛ boe ka ganaa. Kaa min mɛnɛn dɔn bɛ́ re goɛ̃, ma á re bɛn tumaa sasawɛɛ, ma ǹ kaa kanaa paǹ tumaa nɛ.»

¹¹ Dɛnaa Lawa a da ǹ boo á ke: Ma tɔ taman yii, ka bɛ́ ka *gɔ̀ da maa kion sonbore kɛ ganaa kaa sii babaraan kɛn tumaa laanka kaa sii bɔbɔnɛɛn kɛn tumaa nɛ, man die ka dii lenlen, ka ǹ bɛ́ min mìi koɛ̃ lenlen lɔn. Ma a re makara boe ka ganaa wa, ma a re ka toɛ walan wa.

¹² Piɛ̃ busu á re kaa minin lɛn talakɔn sɔɔ a goon dii, hinlaa bòo á re ǹ nyɛɛ a ǹ bɔ kiwi lɛ nɛ. Ǹ tá re kaa talakɔn sɔɔ lɛ a paabaa ǹ wɔ dii zia la kiwi lɛ lɛkoro-a. Kaa talakɔn sɔɔ lɛ a giala-nyɔmiɛ̃ ke, ma á re bɛn pɛsɛ̃ kanaa paǹ tumaa nɛ, ma maa gɔya sa kɛ woɛ̃ ǹ li.

¹³ Ma foo mɛn yoo ke, yǎa ma a nyɛɛ ǹ bǎã yii. Man die n foo nyɛɛ ka dinin lɛn la, ma maa gɛ̀ dòo bɔ ka ganaa. Ka á re doɛ̃ ka bɛ-n kəni mà ma din Dɛnaa Lawa n má boo da ka nɛ, a giala ma foo na á goã yoo-n ka li kaa lɛ-tii kɛ lɛ a lɛa.

¹⁴ Man die Zeruzalɛmu kiwi lɛ bɔ̀n biɛ. Tɔrɔ kɔsɔn mɛnɛn bɛ́ a lɛnpɛnɛ, a yɛ á re sìi diɛ bɛn ganaa kun ka kiɛ̃ wolen kɛn tumaa nɛ.

¹⁵ Ma á re dɔlɔ boe a ganaa ka ma foo ne, ka kakaarɛbaa nɛ, ma a sɔ̀n pɛ taãn-taãnɛ. Bɛ̀ ma bɛ zɛnaa ǹ mɛn waáraa, tɔrɔn mɛnɛn bɛ́ a lɛnpɛnɛ, bɛn tá re sɔ kiɛ la, ǹ da yaa lɛa. Bɛ lɛ á re min kɔsɔn doree, a nyɛ́ɛ da ǹ ganaa. Ma din Dɛnaa Lawa n ma pɛ.

¹⁶ Ma á re bòo babaraa diɛ ka gialaa, ka kiɛ babaraa bɛ́ lɔn basaã koe. Man die bɛ lɛ diɛ a da ka dɛ. Man die bòo lɛ baraa koe ka ganaa, a ka gɔn li ǹ màn-bii tumaa nya lenlen.

¹⁷ Ma á re bòo laanka don màn babaraan diɛ ǹ da ka gialaa, ǹ kaa nɛnyaanan dɛ. Piɛ̃ busu ni, kɔn-dɛ nɛ, bɛ á re yii kaa kiwi lɛ nɛ. Ma á re zia kiɛ ka ganaa. Ma din Dɛnaa Lawa n má pɛ.