Ezekieli 47 - LAWA A BOO SONBORE

Lawa a kion lɛ a mu a bɔ ǹ bǎã

¹ Bɛ kio, giĩ lɛ wusoo á daa ka ma nɛ Lawa a kion lɛ a wɔ ǹ kiɛnlɛ kɛ lɛ-a. Ma bɛ́ giɛ, bɛ̀ mu á ke soe Lawa a kion lɛ a kiɛnlɛ giulun, lɛ̀giala gɔn la. A giala, kion lɛ yɔrɔ na á goã dia-n lɛ̀giala la. Mu lɛ na á goã baa sii woe kion lɛ a gusin a lɛ̀gɔn la, á n kiɛ̃ *wúlu bɔ ǹ bǎã kɛa gusin a lɛ̀gɔn la.

² Bɛ kio, á ma kũ á soo ka ma nɛ, ka gɔsɛ a lɛ̀gɔn la a kiɛnlɛ kɛ nɛ. Á tɔ́n kion lɛ lɛnpɛnɛ ka ma nɛ, á woo yǎa sɔmɔ gɔ́ɔ̃ a kiɛnlɛ kɛ lɛ-a, ǹ mɛn lɛ yɔrɔ bɛ́ dia-n lɛ̀giala gɔn la. Ma bɛ́ giɛ, bɛ̀ mu lɛ á ke baa sii kiɛnlɛ lɛ a gusin a lɛ̀gɔn la.

³ Giĩ lɛ soo á woo lɛ̀giala gɔn la, ka màn zɔɔ̃ ǹ biɛ ná a gɔn. Á tɔ́n gùrù yii duu goon (1 000) zɔɔ̃. Bɛ kio, á ma kũ, á mu lɛ kuru ka ma nɛ. Mu lɛ na á goã ma kuĩ ma gòã kòrò ganaa.

⁴ Á wusoo á gùrù yii duu goon zɔɔ̃, á ma kũ, á mu lɛ kuru ka ma nɛ. Bɛa mu lɛ na á goã ma kuĩ ma musin ganaa. Bɛ kio doo, á gùrù yii duu goon zɔɔ̃, á ma kũ á mu lɛ kuru ka ma nɛ. Bɛa bǎã a mu na á goã ma kuĩ ma bɔsɔ̃-n.

⁵ Bɛ kio doo, á wusoo á gùrù yii duu goon zɔɔ̃. Bɛa bǎã a mu na á goã mu gole lɛa ma goã boe la ma á kuri wa. A giala, mu lɛ na á goã á dii lon, min ba boe la á kuri ka yɔrɔ kɔsɔ-n wa, yǎa bɛ̀ á mu biɛ doɛ̃.

⁶ A bɛ́ miɛ̃, giĩ lɛ tɔ́n nə n toa ma ganaa kɛnɛn: «Minbuiin a nɛ, ń yɛ ke?» Bɛ kio, á ma kũ á wusoo á daa ka ma nɛ mu lɛ lɛ-a.

⁷ Ma bɛ́ ma dɔ mu lɛ lɛ-a, ma bɛ́ giɛ, bɛ̀ dan nə́ ke mu lɛ lɛkoro-a gigiã, a paǹan paanan li.

⁸ Á tɔ́n pɛ ma nɛ: «Mu kɛ lɛ n baa sii woe gána lɛ a lɛ̀giala gɔn li. A n gisĩ a bɔ Zurdɛ̃ a nyankɔrɔ basa kɛ nɛ, a kiɛ̃ a wo kaa yìsi mu kɔsɛ kɔsɛ kɛ li. Bɛ̀ á kaa yìsi mu lɛ li, a n bɔyɛɛ, a baa mu sonbore lɛa.

⁹ Bɛa biikoo li, màn yiikoonaa mɛn tumaa bɛ́ bìn diɛ, mu lɛ bɛ́ re kiɛ bǎã woo bǎã nɛ, bɛn tá re ǹ yiikoonaabaa zɛnɛɛ walan. Bɛ̀ á n baa miɛ̃, zɔ̀ á re mɔnɛɛ parsiini, a giala, mu lɛ bɛ́ re kiɛ yìsi mu lɛ li, a n die bɔyɛɛ a baa mu sonbore lɛa. Mu lɛ bɛ́ re doe bǎã woo bǎã nɛ, yiikoonaabaa á yii walan.

¹⁰ Bɛa biikoo li, zɔ̀-kũlin tá re golee tà lɛ lɛ-a. A kũ Ɛn-Gedii ganaa yǎa Ɛn-Eglayimu, bɛa bǎã kɛ tumaa á re zɔ̀ɔn nyɔmaa ǹ bǎã biɛ. Zɔ̀ tɔrɔ gigiã á re goɛ̃ li, ka Yìsi mu gole kɛ bɛ́ lɔn.

¹¹ Sɛnɛ, a lɛkoro lɛ-a bǎãn kɛn mu á re n bɔyɛɛ a mu sonbore baa wa. Bɛn tá re goɛ̃ yìsi bɔ ǹ bǎã lɛa.

¹² Mu gole lɛ lɛkoro-a, a wàãn paanan li, da nɛ-kɔle tɔrɔ tumaa bɔ. Ǹ luu á re bɛbɛnɛ wa, ǹ nɛ dɔ a re nyɛɛ a n bɔ ǹ la wa. Mui woo mui, maǹ die nɛ mərə niɛ̃ ǹ la. A giala, mu gole lɛ n soe Lawa a kion. Dan lɛn nɛ á re màn-bii biɛ, ǹ luu tá re dagòã biɛ.»

Gána lɛ gèlèn

¹³ Dɛnaa Lawa tɔ́n pɛ kɛnɛn: «Izirayeli tɔrɔ fulupaa lɛ bɛ́ re gána mɛn lɛ gii kɔn, man die a gèlè nyɛɛ ka nɛ. Bɛ̀ ka á gii, ka die ka Zozɛfu tɔrɔn kɛn wɔ baa paa.

¹⁴ Gána lɛ á die kaa wɔ biɛ. Sɛnɛ, ka gii kɔn, ka tumaa wɔ goã goon. A giala, man má liɛ wɔ ka digolon manɛ, máa ma á re gána lɛ koe ǹ la. Sonbore, gána lɛ á re doe ka ganaa, a kaa wɔ baa.

¹⁵ Gána lɛ gèlè n die goɛ̃ ka kɛ nɛ: A gɔsɛ a lɛ̀gɔn la gèlè n yui tán Yìsi mu gole kɛ lɛ-a, a kɔ zii kɛ lɛ boe Etilɔn kiwi, Lebo-Amaati laanka Sedati kiwi,

¹⁶ a kiɛ̃ a da bɔ Berotaa laanka Sibrayimu kiwin kɛn nɛ, Damaasi laanka Hamati gána bii. A nə n toɛ walan, a wo bɔ Asɛɛrɛ-Tikɔn gána kɛ nɛ, kunu Horan gána gèlè ganaa.

¹⁷ Bɛa yɔrɔ lɛ la, gèlè lɛ n die yui tán Yìsi mu gole kɛ lɛ-a, a wo yǎa Asara-Enan kiwi, Damaasi gána laanka Hamati gána a gɔsɛ a lɛ̀gɔn la. Gɔsɛ a lɛ̀gɔn la wɔ n ka bɛ nɛ.

¹⁸ Lɛ̀giala gɔn la a gèlè kɛ n yui tán Damaasi laanka Horan biin ni, a kɔ Zurdɛ̃ a nyankɔrɔ basa kɛ lɛ, Galaati gána laanka Izirayeli gána biin ni, a kũ gɔsɛ a lɛ̀gɔn la gèlè ganaa, yǎa yìsi mu kɔsɛ kɔsɛ kɛ lɛ-a. Lɛ̀giala gɔn la wɔ n ka bɛ nɛ.

¹⁹ Gusin a lɛ̀gɔn la, gèlè lɛ n die siɛ tán Tamaara kiwi, a wo Meribaa tà kɛ lɛ-a Kadɛsi kiwi. A n die koe Ezipti a lɛ̀giala gɔn la tà kɛ gɔ̀nɔn lɛ, a wo yǎa Yìsi mu gole kɛ lɛ-a. Gusin a lɛ̀gɔn la gèlè n ka bɛ nɛ.

²⁰ Lɛ̀nyɛɛn gɔn la, Yìsi mu gole kɛ n die goɛ̃ gèlè lɛa, a saa gusin a lɛ̀gɔn la ganaa, a wo yǎa Lebo-Amaati yɔrɔ-a. Bɛ n lɛ̀nyɛɛn gɔn la wɔ lɛa.

²¹ «Ka dinin Izirayeli tɔrɔ fulupaa lɛ die ka gána lɛ gii kɔn.

²² Ka n pã bǎãn lɛn ganaa, ka tɔn nə ǹ gii kɔn ka dinin laanka tiin mɛnɛn bɛ́ giã-n ka bii, ǹ nə́ nɛnyaanan yɛ ka bii. Ka ǹ dɔn kũ Izirayeli minin lɛa, ǹ dɔn nə n pã ǹ bǎãn ganaa kun ka ka nɛ.

²³ Tii lɛ bɛ́ giã-n kaa tɔrɔn lɛn mɛnɛn bii, ka a bǎã kɔ la walan. Ma din Dɛnaa Lawa a da ǹ boo ne.»