Ezekieli 43 - LAWA A BOO SONBORE

Lawa a gugurubaa wusoo á daa

¹ Bɛ kio kəni, kiɛnlɛ mɛn bɛ́ dia-n lɛ̀giala gɔn la, giĩ lɛ ma kũ á woo ma-n walan.

² Á ke, ma bɛ́ giɛ, bɛ̀ Izirayeli a Lawa a gugurubaa á ke á n toa lɛ̀giala li, á n die. A wuu na á goã boe ka mu gole wuu bɛ́ lɔn, a tɛ-pɛ kanaa tumaa fúlu.

³ Ma yii màn mɛn yɛ bɛa biikoo li, a n ka màn kɛ nɛ má goã má yɛ, bɛ̀ Lawa bɛ́ re die kiwi lɛ yui, a n ka màn kɛ dɔ nɛ má yɛ, bɛ̀ ma bɛ́ Kebaara tà kɛ lɛ-a. Bɛa biikoo li, má na má kaa tán ma lɛ la.

⁴ Kiɛnlɛ mɛn yɔrɔ bɛ́ dia-n lɛ̀giala la, Dɛnaa Lawa a gugurubaa bɔ ka bɛ nɛ, á wusoo á wɔ kion lɛ nɛ.

⁵ Lawa yiri tɔ́n ma saa á woo ka ma nɛ sumu gɔ́ɔ̃ kɛ nɛ. Má yɛ, bɛ̀ Dɛnaa Lawa a gugurubaa á ke á kion lɛ pã.

⁶ Má tɔ́n min lɛ ma n toɛ kion lɛ gɔ́ɔ̃ li boo diɛ ma nɛ. Bɛ á zɛnɛɛ, bɛ̀ giĩ lɛ á golee-n ma li.

⁷ Á tɔ́n n toa ma ganaa: «Minbuiin a nɛ ganaa, bǎã kɛ lɛ n masɛ a kii dankan laanka maa gòãn kaa ǹ bǎã lɛa. Man die giɛ̃ Izirayeli minin lɛn bii walan, yǎa duduu. «Izirayeli tɔrɔn lɛn ba re ma tɔ sonbore kɛ ziziɛ̃ doo ka ǹ dì wúlu bɔn laanka ǹ kiin kɛn gere bĩ walan nɛ wa.

⁸ A giala, maǹ nə́ ǹ wɔ ǹ kiɛnlɛn bɔ masɛ a wɔ ǹ kiɛnlɛn genli. Kungɔn goon dinsɔɔ̃ n maa kion lɛ laanka ǹ wɔ lɛ bii. Ka bɛ nɛ ǹ nə́ sii bɔbɔnɛɛn zɛnaa, ǹ nə́ ma tɔ kɛ ziziɛ̃ nɛ. Bɛ lɛ na á toa ma foo yoo ǹ li, má ǹ dɛ lenlen.

⁹ Sisia kəni, ǹ tá re ǹ dì guguru kɔ kɛ lɛ diɛ, ǹ ba re n mɔrɛ maa bǎã kɛ ganaa, ka ǹ kiin kɛn gere-n doo wa. Bɛ lɛ n die toɛ ma giã ǹ bii yǎa duduu.

¹⁰ «Minbuiin a nɛ, kion lɛ bɛ́ re n doe lɔn, bɛ yɔrɔ pɛ Izirayeli tɔrɔn lɛn manɛ, màn mɛn bɛ́ toɛ ǹ sii baraa zɛnaa kɛ lɛ sìi da ǹ ganaa, ǹ ga kion lɛ nyín ganaa.

¹¹ Bɛ̀ ǹ zɛnaa ǹ siin lɛn tumaa sìi da ǹ ganaa, bɛa biikoo li, n maa kion lɛ nyín nyaa ǹ nɛ, a gɔ́ɔ̃ nə n kukuru kɔn lɔn, wɔ ǹ bǎãn laanka soo ǹ bǎãn nɛ, kion lɛ a dɔ ǹ gɔn tumaa. Kion lɛ a kɔnboe kiɛ̃ nyín lɛa n nyaa ǹ nɛ, màn mɛn bɛ́ toɛ, landan laanka sii zɛnaa ǹ gɔnɔn mɛnɛn tumaa nə n koa kion lɛ wɔ paǹ li, ǹ boo la ǹ bɛn tamaa, ǹ kɔ ǹ lɛ.

¹² Dí mɛn nə n pɛ kion lɛ wɔ paǹ li, bɛ n ka kɛ nɛ: Bǎã mɛn tumaa bɛ́ kion lɛ lɛnpɛnɛ kele lɛ mìi ni, ǹ dɔ̃ mà bɛ tumaa n Lawa dinsɔɔ̃ wɔ lɛa.»

Wúlu bɔ ǹ bǎã

¹³ Ǹ nə́ *wúlu bɔ ǹ bǎã kɛ zɔɔ̃. A zɔɔ̃ ǹ màn lɛ na á goã gùrù yii goon ka gɔn tìsì yii goon. Ǹ nyankɔrɔ mɛn fɔ̃ ǹ nə́ wúlu bɔ ǹ bǎã lɛ lɛnpɛnɛ nɛ, bɛa zuzulubaa na á goã gùrù yii goon. A gɔ́ɔ̃ a golebaa dɔ na á goã gùrù yii goon. Ǹ màn mɛn dɔ a lɛgon li ǹ ná a lɛnpɛnɛ nɛ, bɛ la a wo lon na á goã gùrù yii talɛɛ. Wúlu bɔ ǹ bǎã lɛ la a wo lon nə́ ke:

¹⁴ A saa a giala ganaa tán, a wo dɔ kìri-diɛ kɛ ganaa bii, bɛ n gùrù yii paa. Bɛa kìri-diɛ lɛ a gɔ́ɔ̃ a golebaa n gùrù yii goon. A saa bii a wo dɔ lon wɔ kɛ ganaa, bɛ n gùrù yii sii. Lon wɔ a kìri-diɛ lɛ dɔ gɔ́ɔ̃ a golebaa n gùrù yii goon.

¹⁵ Wúlu bɔ ǹ bǎã lɛ a lon bǎã ke kùsì ná a nɛ, bɛa la a wo lon nə gùrù yii sii, kara màn sii na a tan, kara goon gùrù gogoonmaa lalan.

¹⁶ Wúlu bɔ ǹ bǎã lɛ a lon wɔlɔ a sasabaa na á goã gùrù yii fulupaa, a gɔ́ɔ̃ dɔ a golebaa na á goã gùrù yii fulupaa. A wàã sii lɛ tumaa a sasabaa na á goã goon.

¹⁷ A kìri-diɛ paabaa ǹ wɔ kɛ dɔ na á goã wàã sii zɛnɛ kɔnlɛ lɛa. A gogoonmaa na á goã gùrù yii fulusii. Ǹ màn mɛn dɔ a lɛgon li ǹ ná a lɛnpɛnɛ nɛ, bɛ la a wo lon nə gùrù yii talɛɛ. Ǹ yala mɛn fɔ̃ ǹ ná a lɛnpɛnɛ nɛ, bɛa zuzulubaa n gùrù yii goon. A dii ǹ banbaranan kɛn man dia-n lɛ̀giala gɔn la.

¹⁸ Giĩ lɛ tɔ́n pɛ ma-n kɛnɛn: – Minbuiin a nɛ, masɛ Dɛnaa Lawa a da ǹ boo á ke: «Bɛ̀ ǹ nə́ wúlu bɔ ǹ bǎã lɛ dɔ ǹ nə́ nya ǹ mɛn pinaa, ǹ bɛ́ re *wúlu màn tiɛ̃ la ǹ tɔɔ mà kaa la, landan mɛnɛn bɛ́ ǹ tan wúlu bɔ ǹ bǎã lɛ wɔ paǹ li, bɛn man ka kɛn nɛ:

¹⁹ Levii tɔrɔ wúlu-bɔlen kɛn Sadɔki tɔrɔn lɛa, ǹ mɛnɛn lɛn bɛ́ n mɔrɛ Dɛnaa Lawa ganaa bɛ̀ ǹ dí nya nɛ, n die n dii gɔ̀lɔ̀ goon kɔ bɛn la, ǹ dɛ sii baraa sawaa ǹ wúlu màn lɛa. Ma din Dɛnaa Lawa a da ǹ boo ne.

²⁰ N die n dii gɔ̀lɔ̀ lɛ mà saa, n lɔ wúlu bɔ ǹ bǎã lɛ a kara sii lɛ ganaa, n lɔ a kìri-diɛ paabaa ǹ wɔ kɛa gùrù sii ganaa, ka màn kɛ dɔ nɛ ǹ nə́ dɔ a lɛgon li, ǹ ná a lɛnpɛnɛ nɛ. A zɛnaa miɛ̃ n *gɔ̀ bɔ wúlu bɔ ǹ bǎã lɛ ganaa, n koa Lawa nɛ.

²¹ Bɛ kio, n wúlu bɔ ka dii gɔ̀lɔ̀ mɛn lɛ nɛ, bǎã mɛn nə n koa a siĩ tã ǹ bǎã lɛa, n wo a siĩ lɛ tã walan, Lawa a kion lɛ kio.

²² «A lɛawaa paabaa ǹ wɔ pinaa, n die n ga butumu li, wɔ̀lɔ̀ ná a ba a ganaa wa. Ǹ die ǹ sii baraa sawaa ǹ wúlu bɔ ka bɛ nɛ wúlu bɔ ǹ bǎã lɛ lalan, ǹ na a *yoreen kɔ ka ǹ bɛ́ ǹ nə́ zɛnaa ka dii gɔ̀lɔ̀ lɛ-n lɔn.

²³ Bɛ̀ ń wúlu lɛ bɔ n nya, n wusoo n ga dii gɔ̀lɔ̀ goon li ka sère gɔ̀lɔ̀ goon ne tɔɔn bii, wɔ̀lɔ̀ ná a ba ǹ ganaa wa,

²⁴ n da bɛn kɔ masɛ Dɛnaa Lawa la. Ǹ wúlu-bɔlen lɛn die ǹ yìsi kaa bɛn ganaa, ǹ tɔn nə ǹ tã lenlen, Dɛnaa Lawa wɔ lɛa.

²⁵ N die n butumu goon dɛ baraabaraa sii baraa sawaa ǹ wúlu màn lɛa, yǎa lɛawaa sɔbaa, ka dii gɔ̀lɔ̀ goon laanka sère gɔ̀lɔ̀ goon mɛn dɔ bɛ́ wɔ̀lɔ̀ ná a ba ǹ ganaa tɔɔn bii wa.

²⁶ Lɛawaa sɔbaa gɔ́ɔ̃ nɛ, ǹ wúlu bɔ ǹ bǎã lɛ a gɔ̀ bɔma-a ǹ sii zɛnaa, ǹ na a yoreen kɔ, ǹ kɔ Lawa la.

²⁷ Bɛ̀ bɛa lɛawaan lɛn nə́ kiɛ̃, a saa a lɛawaa kiwisibaa ǹ wɔ ganaa a woo kəni, Lawa a wúlu-bɔlen lɛn tá boe la, ǹ wúlu màn tiɛ̃ laanka barka da Lawa nɛ ǹ wúlu mànan sii yɔrɔ bɔ wúlu bɔ ǹ bǎã lɛ lalan. Bɛa biikoo li kəni, ma á re n too koe ǹ lon. Ma din Dɛnaa Lawa a da ǹ boo ne.»