Ezekieli 4 - LAWA A BOO SONBORE

Zeruzalɛmu a kuĩ

¹ Dɛnaa Lawa pɛ ma-n doo: Nsɛ minbuiin a nɛ, toopaa saa n da tán n yɔrɔ-a, n Zeruzalɛmu kiwi nyín zɛnaa la.

² N nyaa, ka maǹ nə́ kũ. N nyankɔrɔ bɔ, n na a tii dɔ kaa kɔn la n kiwi nyín lɛ lɛnpɛnɛ nɛ, zia-baalin bǎãn nyín ni, ka ziabaa ǹ màn dadaran nyínin ni, n kiwi nyín lɛ lɛnpɛnɛ nɛ.

³ Fɔlɔ pataraa goon saa n zumu tán ka kungɔn bɛ́ lɔn, n laanka kiwi lɛ bii n ni. N ga kiwi lɛ ganaa gongongon, a n die goɛ̃ ka maǹ nə́ kũ, a giala, ma n nə́ n doa kiwi lɛ nyɛɛnɛ. Bɛ n die goɛ̃ sii a kɔnboe lɛa, a n nyaa Izirayeli tɔrɔn lɛn manɛ.

⁴ Waa n gɔsɛ a wàã la, n toa bɛa wàã lɛ la, n nə n toɛ̃ ka Izirayeli minin lɛn sii baraa a guĩ ni. N bɛ́ re wɛɛ bɛa wàã lɛ la n lɛawaa lɛ mɛn dɔ, n die n nə n toɛ̃ ka ǹ sii baraan guĩ ni, bɛa lɛawaan lɛn gɔ́ɔ̃ nɛ.

⁵ Ǹ sii baraa lɛ zɛnaa lɛ̀ lɛ mɛn gɔ́ɔ̃ nɛ, man die lɛawaa lɛ diɛ n mìi ni, a kɔnpɛ ka bɛ nɛ. Lɛawaa biɛsɔɔ ka pɔmanangɔrɔ (390). N die n nə n toɛ̃ ka Izirayeli minin lɛn sii baraa a guĩ ni bɛa lɛawaan lɛn gɔ́ɔ̃ nɛ.

⁶ Bɛ̀ bɛa lɛawaan lɛn lɛ pã, n bɔyaa n waa n gusin a wàã dɔ la, n nə n toɛ̃ ka Zudaa minin kɛn dɔn sii baraa a guĩ ni lɛawaa pusi gɔ́ɔ̃ nɛ. Ǹ sii baraa zɛnaa lɛ̀n mɛnɛn gɔ́ɔ̃ nɛ, ma a lɛawaa gogoon kɔ n la, ǹ gogoonmaa wɔ lɛa.

⁷ N die n nə n yɔrɔ dia n nə n gɔn pepere Zeruzalɛmu kiwi kɛ li, zɔ́ɔn nə́ da bii. N die n masɛ a boo gii da a ganaa.

⁸ Á ke, man die biɛn kiɛ n ganaa, màn mɛn bɛ́ toɛ n baran n bɔyaa n nə n bɔ n wàã goon la n waa kɔsɔ la wa, yǎa n gɔn pepere Zeruzalɛmu kiwi kɛ li a lɛawaan lɛ piɛ̃.

⁹ *Belee saa, ka *ɔrzi ni, dù gere ne, zii ni, wii ni ka belee bibiɛ nɛ. N nə ǹ tumaa lɔlɔkɔn màn goon ne, n buuru zɛnaa nɛ. N bɛ́ re goɛ̃ waa-n tán n wàã la lɛawaa biɛsɔɔ ka pɔmanangɔrɔ mɛn gɔ́ɔ̃ nɛ, n tá re bɛa buuru lɛ soɛ̃ bɛa lɛawaan lɛn gɔ́ɔ̃ nɛ.

¹⁰ Bɛ lɛ n die goɛ̃ n màn-bii lɛa. N die n bɛ lɛ a garamu biɛsɔɔ bii baraabaraa.

¹¹ N mi ǹ mu dɔ á re n zoɛ̃ bɛ̀ a n kɔ n la: litiri goon nə n tá re mii babaraa.

¹² N die n màn-bii lɛ zɛnaa ka ɔrzi mɔ̀mɔ bɛ́ lɔn. N die n kɔrɛ ka minbuiin nɛ bù ni, ǹ dinin yii ni.

¹³ Dɛnaa Lawa tɔ́n pɛ doo: «Izirayeli minin lɛn man die màn gɔgɔrɛ bii miɛ̃ tɔrɔ kɔsɔn bii, ma bɛ́ re ǹ lui ma ǹ kaa tɔrɔn mɛnɛn lɛn bii.»

¹⁴ Má tɔ́n a lɛ si má pɛ: «E! Dɛnaa Lawa, ma tɔn *gɔ̀ da ma din-a duduu wa. A saa maa nɛnyaanbaa waáraa ganaa a da kaa pelo lɛ, bɛ̀ màn mɛn gã a din li hinlaa don mànan man nə́ dɛ, máa ma bin bɛa siĩ sɔ̃ duduu wa, ma bin siĩ gɔgɔrɛ kɔn wɔ ma lɛ-n wa.»

¹⁵ Á tɔ́n pɛ ma nɛ: «Bɛ̀ á miɛ̃, minbuiin nɛ bù lɛ toa walan, n diin bù goa, n nə n màn-bii lɛ kɔrɛ nɛ.»

¹⁶ Á tɔ́n pɛ ma-n doo: «Nsɛ minbuiin a nɛ, á ke màn-bii mɛn tumaa á ke ǹ nə́ koa ǹ gɔn li Zeruzalɛmu kiwi, masɛ á re a tumaa papaɛ̃. Ǹ tá re ǹ màn-bii zoɛ̃ bɛ̀ ǹ kɔ ǹ la, ǹ bii ka foo ziziɛ̃ nɛ, ǹ tá re ǹ mi ǹ mu zoɛ̃ bɛ̀ ǹ kɔ ǹ la ǹ mi, bɛ̀ ǹ gɔ́ɔ̃ ń woɛ̃ nɛ.

¹⁷ A giala, màn-bii laanka mu á re nyaabiɛ. Bɛ lɛ á re nyɛ́ɛ diɛ min tumaa ganaa, ǹ tá re pɛrɛ ǹ sii baraan lɛn taman yii.»