Ezekieli 36 - LAWA A BOO SONBORE

Izirayeli minin wusoo a da piɛ

¹ Minbuiin a nɛ, maa boo kɛ da Izirayeli a kelen kɛn ganaa, mà ǹ nə n too kɔ masɛ Dɛnaa Lawa a boo li.

² Dɛnaa Lawa n pii: – Zɔ́ɔn nə́ yaa wɔ ka ganaa ǹ nə́ pɛ: «Izirayeli a kelen kɛn nə́ wɔa wɔ baa!»

³ A bɛ́ miɛ̃, maa boo gii da, n pɛ Izirayeli minin lɛn manɛ, mà masɛ Dɛnaa Lawa n kɛ pii: Ǹ tá ka gialaa bǎã tumaa nɛ, ǹ nə́ ka ziziɛ̃. Ká tɔrɔ kɔsɔn tumaa wɔ baa. Maǹ nə n lɛ we ka ganaa, ǹ nə́ ka diɛ yaa lɛa tɔrɔn bii.

⁴ Bɛ lɛ taman yii, Izirayeli a kelen lɛn, ka n too kɔ masɛ Dɛnaa Lawa a boo li. Masɛ Dɛnaa Lawa n kɛ pii kelen manɛ ka tentenen ne, mu ziin laanka nyankɔrɔ basan nɛ, kɛbɔlɔn laanka kiwi-soen ne, lɛkoro lɛ-a a tɔrɔn bɛ́ ǹ nə́ ǹ mɛnɛn minin kokoo, ǹ nə́ ǹ da yaa lɛa.

⁵ Bɛ lɛ na á toa, masɛ Dɛnaa Lawa á kɛ pii: Bɛ̀ ma foo kɛ yoo, a n ka tɛ bɛ́ lɔn. Man ma foo pii tɔrɔ kɔsɔn kɛn tumaa nɛ, sanparɛ Edɔmu minin kɛn dinin. A giala, ǹ nə́ maa gána lɛ baa ǹ dinin wɔ lɛa. Ǹ foo yii na á goã kɔɔ̃nɛ, busii nə́ ǹ gɔ́ɔ̃ nɛ, maa gána lɛ wɔ paǹ li. Maǹ nə́ goã giɛ li, ǹ na a mànan goa, ǹ na a gɔ́ɔ̃ kooro toa.

⁶ Bɛ lɛ taman yii, boo da Izirayeli gána wɔ paǹ li, n pɛ kelen laanka tentenen manɛ, ka mu ziin laanka nyankɔrɔ basan nɛ, mà masɛ Dɛnaa Lawa n kɛ pii: Tɔrɔ kɔsɔn nə sìi mɛn da ka ganaa, á ke, bɛ lɛ a foo wuu pɛ n ma diɛ boo diɛ ganaa ka foo ne.

⁷ Bɛ lɛ na á toa, masɛ Dɛnaa Lawa á kɛ pii ma á n liɛ: Tɔrɔn mɛnɛn bɛ́ ka lɛnpɛnɛ, bɛn tá re n yui ka ǹ dinin sìi ni.

⁸ Bɛa biikoo li, dan mɛnɛn bɛ́ Izirayeli gána a kelen kɛn la, bɛn tá re luu piɛ̃, ǹ nɛ kɔ maa zaman Izirayeli wɔ lɛa. A giala, ǹ daa diri.

⁹ Á ke, man wusii má n die giɛ ka walan. Kaa wurun tá re wusii ǹ nə n kɔsɔ, màn tɔrɔn nə n da ǹ nɛ.

¹⁰ Izirayeli gána tumaa nɛ, ma á re zaman mɔnɛɛ. Maa kɛbɔlɔn lɛn tá re wusii n nə n dɔ, minin nə wusoo ǹ giã kiwin lɛn nɛ.

¹¹ Ma á re minbuiinin laanka tɔɔn mɔnɛɛ. Ǹ tá re mɔnɛɛ, ǹ nɛnyaanan yɛ. Ma á re toɛ zaman mɔnaa gána lɛ nɛ a la lɛlɛ wɔ nɛ. Ma á re bǐɛ̃ zɛnɛɛ ka nɛ a la lɛlɛ wɔ kɛ nɛ. Ka á re doɛ̃ ka bɛ-n kəni, mà ma din nə Dɛnaa Lawa lɛa.

¹² Ma á re toɛ maa zaman Izirayeli lɛ tɔ wɔ gána lɛ paǹ tumaa nɛ. Ka á re gána lɛ sii ka baa kaa wɔ lɛa. Gána lɛ á re kaa wɔ biɛ, ǹ ba re kaa nɛnyaanan sii ka la doo duduu wa.

¹³ Masɛ Dɛnaa Lawa n kɛ pii: Minin tɛnɛn man pii mà n din gána lɛ nə n minin dii. Mà ma n nə́ n din a zaman a nɛnyaanan dɛ.

¹⁴ Bɛ lɛ nɛ, a kũ sisia ganaa, gána lɛ a re a minin dii doo wa, a re Izirayeli tɔrɔn lɛn nɛnyaanan dii doo wa. Ma din Dɛnaa Lawa a da ǹ boo ne.

¹⁵ Tɔrɔ kɔsɔn bɛ́ ka diɛ yaa lɛa, ǹ nə́ sɔ mɛn kiɛ ka la, ka too a re bɛ miɛ doo wa. Gána lɛ a re a minin dii doo wa. Ma din Dɛnaa Lawa a da ǹ boo ne.

Izirayeli minin man wusii die ǹ gána nɛ

¹⁶ Dɛnaa Lawa a da ǹ boo á ke á pɛ ma nɛ:

¹⁷ Minbuiin a nɛ, n too kɔ. Izirayeli tɔrɔn bɛ́ ǹ nə́ goã ǹ gána lɛ nɛ, ǹ dinin man nə́ ǹ gána lɛ gɔgɔrɛ kɔ, ka ǹ giã ǹ gɔn laanka ǹ zɛnaa ǹ siin ni. Masɛ yii li, ǹ giã ǹ gɔn lɛ n ka lɔ a *gɔ̀ bɛ́ lɔn, bɛ̀ a lɛawaa tá a ganaa.

¹⁸ Ǹ mà mɛn kaa gána lɛ nɛ, ǹ gána lɛ gɔgɔrɛ kɔ ka dìn mɛnɛn nɛ, bɛ lɛ na á toa masɛ foo yoo ǹ li.

¹⁹ Bɛ lɛ n ke, má ǹ sasawaa má ǹ kaa gána kɔsɔn nɛ, má ǹ pɛsɛ̃. Bɛ lɛ n dɔlɔ lɛa ma bɔ ǹ ganaa, á kɔnpɛ ka ǹ dinin giã ǹ gɔn laanka ǹ zɛnaa ǹ siin ni.

²⁰ Maa minin lɛn bɛ́ ǹ nə́ woo gánan mɛnɛn nɛ, ǹ nə́ ma tɔ sonbore kɛ ziziɛ̃ walan. A giala, maǹ nə́ goã kɛ pii ǹ wɔ paǹ li: «Dɛnaa Lawa a minin man ka kɛn nɛ, sɛnɛ, ǹ nə́ ke ǹ nə́ soo ǹ nə́ n bɔ a gána nɛ!»

²¹ Izirayeli tɔrɔn lɛn nə wo gánan mɛnɛn nɛ, ǹ dinin giã ǹ gɔn na á toa, bɛn nə́ ma tɔ sonbore kɛ ziziɛ̃. Bɛ lɛ na á goã kaka ma ganaa.

²² Bɛ lɛ taman yii, a pɛ Izirayeli tɔrɔn lɛn manɛ, mà masɛ Dɛnaa Lawa n kɛ pii: «Izirayeli tɔrɔn lɛn, ma bɛ́ re sii mɛn zɛnɛɛ, ma bie re bɛ zɛnɛɛ kasɛn taman yii wa. Man die zɛnɛɛ ma din tɔ sonbore kɛ taman yii. A giala, ka wo tɔrɔn mɛnɛn bii, ká ma tɔ sonbore kɛ ziziɛ̃ walan.

²³ Ká ma tɔ ziziɛ̃ tɔrɔ kɔsɔn bii, ká sìi da ma ganaa. Sɛnɛ, ma á re nyɛɛ bɛn manɛ, maa ma din nə Lawa gole sonbore lɛa. Man die dí nyɛɛ ká ka dinin lɛn nɛ, ma maa Lawabaa lɛ nyaa ǹ nɛ. Ǹ tá re doɛ̃ bɛa biikoo li kəni, mà ma din nə Dɛnaa Lawa lɛa. Ma din Dɛnaa Lawa a da ǹ boo ne.

²⁴ «Ka goã tɔrɔn mɛnɛn bii gánan mɛnɛn tumaa nɛ, ma á re ka wɛɛ ma ka bɔ walan, ma ka sɔkɔn, ma da ka ka nɛ, ka dinin gána nɛ.

²⁵ Ma á re mu sonbore kiɛ ka ganaa, bɛ ka *yoreen kɔ. Ma á re kaa gɔ̀ siin tumaa pii ma ǹ bɔ ka ganaa, ka kaa dì siin kɛn tumaa nɛ.

²⁶ Ma á re foo dii koe ka la, ma taasiɛ dii kɔ ka la. Ka foo mɛn bɛ́ kaka ka kɔlɔ bɛ́ lɔn, ma á re bɛ boe ma bɔ ka nɛ, foo mɛn bɛ́ lɛ koe maa boo ganaa, ma bɛ kɔ ka la.

²⁷ Ma á re ma din yiri we ka nɛ, ka boo la ka tɔ wɔ a kɔnpɛ ka maa landa boon kɛn nɛ, ka boo la ka maa sii yɔrɔ bɔ ǹ boon kɛn tamaa, ka kɔ ǹ lɛ.

²⁸ Ma gána mɛn kɔ ka digolon la, ka á re giɛ̃ bɛ lɛ nɛ. Ka á re maa zaman biɛ, ma dɔ á re ka dɔn Lawa biɛ.

²⁹ Ma á re kaa gɔ̀ tumaa pii ma bɔ ka ganaa. Ma á re toɛ ka *belee yɛ a mɔnaa, ma a re toɛ bòo ka kũ doo wa.

³⁰ Ma á re toɛ kaa dan nə nɛ gigiã kɔ, màn gigiã yɛ kaa wuru dí ni, màn mɛn bɛ́ toɛ, sìi nyan ka kũ tɔrɔn bii doo bòo taman yii wa.

³¹ Bɛa biikoo li, ka yiri á die gisĩ ka kaa giã ǹ gɔn baraa laanka kaa zɛnaa ǹ siin kɛn nɛ, ǹ mɛnɛn bɛ́ ǹ goã siĩn wa. Ka tìĩ á re boe ka dinin nyin ni, kaa sii baraan laanka kaa sii bɔbɔnɛɛn lɛn taman yii.

³² Masɛ Dɛnaa Lawa a da ǹ boo á ke: Ka doamaa-n ka dɔ̃, mà kasɛn lɛa bie ma á re bɛa sii lɛ zɛnɛɛ wa. Izirayeli tɔrɔn lɛn, kaa giã ǹ gɔn kɛ lɛ doamaa nɛ a sìi da ka ganaa, a ka mìi kuməə.»

³³ Masɛ Dɛnaa Lawa n kɛ pii: «Bɛ̀ má kaa sii baraan tumaa pii má ǹ bɔ ka ganaa ǹ mɛn pinaa, kɛbɔlɔ bǎãn tá re wusii ǹ nə n dɔ, ma á re zaman mɔnɛɛ kiwin lɛn nɛ.

³⁴ Ma gána mɛn lɛ ziziɛ̃, a bǎãn tá re wusii ǹ nə n kɔsɔ, màn mɛn bɛ́ toɛ kiɛ̃ wolen kɛn tumaa, ǹ kɔn baran taasɛ mà maǹ nə́ bǎã lɛ daa wa.»

³⁵ Minin tá re n toɛ: «Kiwi kɛ lɛ ǹ nə́ goã ǹ nə́ ziziɛ̃, á ke á n baa ka Edɛn dù gɔrɔ kɛ bɛ́ lɔn. Kiwin mɛnɛn bɛ́ ǹ nə́ goã ǹ nə́ wuru, ǹ nə́ ziziɛ̃ ǹ nə́ kɛbɔlɔ baa, ǹ nə́ kungɔn dɔ ǹ nə́ bɛn lɛnpɛnɛ nɛ, minin nə́ giã ǹ nɛ.

³⁶ Bɛa biikoo li kəni, kiwin mɛnɛn bɛ́ ǹ lɛnpɛnɛ, bɛn tá re doɛ̃, mà bɛ̀ ǹ nə́ bǎã mɛn wuru, mà ma din Dɛnaa Lawa n wusii ma dɔ, mà bɛ̀ ǹ nə́ bǎã mɛn daa, mà ma din nə wusii ma màn zumu a nɛ. Bɛ̀ masɛ Dɛnaa Lawa boo mɛn da, man bɛ lɛ zɛnɛɛ.»

³⁷ Masɛ Dɛnaa Lawa n kɛ pii: – Ma bɛ́ re sii mɛn dɔ zɛnɛɛ, bɛ n ka kɛ nɛ: «Ma á re lɛ koe Izirayeli tɔrɔn lɛn nə ma nyankɔ, màn mɛn bɛ́ toɛ, man dɔ ǹ lɛ. Ma á re ǹ minin mɔnɛɛ ka sère kuru bɛ́ lɔn.

³⁸ Ǹ kiwin mɛnɛn yu, bɛn man die piɛ̃ ka zaman nɛ, gigiã ka wúlu bɔ ǹ tɔɔn kɛn bɛ́ lɔn, ka tɔɔn bɛ́ lɔn Zeruzalɛmu zɔ́n biikoo li. Minin tá re doɛ̃ bɛa biikoo li, mà ma din nə Dɛnaa Lawa lɛa.»