Ezekieli 35 - LAWA A BOO SONBORE

Boo mɛn nə n da Edɔmu minin wɔ paǹ li

¹ Dɛnaa Lawa boo da ma nɛ á pɛ:

² – N yɔrɔ dia Edɔmu minin kɛn la Seyiri kele yii ni, n Lawa a boo gii da ǹ ganaa,

³ n pɛ ǹ nɛ, mà masɛ Dɛnaa Lawa n kɛ pii: Á ke, Edɔmu a kele yii minin lɛn, ma á die ka gialaa, ma gɔn tá re miɛ ka ganaa. Ma á re kaa bǎã lɛ ziziɛ̃, ma bɔyaa ma baa ka diə gole bɛ́ lɔn.

⁴ Má á re kaa kiwin kɛn ziziɛ̃, kaa gána lɛ din tá re don biɛ. Ka á re doɛ̃ bɛa biikoo li, mà ma din nə Dɛnaa Lawa lɛa.

⁵ A giala, ka dinin Edɔmu minin lɛn man ká goã Izirayeli minin lɛn biɛ zɔ́ɔ duduu. Sii bɛ́ á Izirayeli minin lɛn yɛ ǹ mɛn pinaa, ma bɛ́ má ǹ sii baraa lɛ a dɔlɔ bɔ ǹ ganaa ǹ mɛn pinaa, ka n ká n gɔn kũ bɛ lɛ ganaa, ká Izirayeli minin lɛn dɛ.

⁶ Á bǐɛ̃ kɔ! A ma toa ma yii n koo, masɛ Dɛnaa Lawa a da ǹ boo á ke: Ma á re ka koe gɛ̀ la, gɛ̀ á re ka kio lui. Gɛ̀-dɛ bɛ́ a bie nyɛ́ɛ diɛ ka ganaa wa, gɛ̀ á re ka kio lui.

⁷ Ma á re Edɔmu a kele yii bǎã kɛ ziziɛ̃, ma bɔyaa, ma baa diə gole lɛa. Bɛ̀ min mɛn tɔ wɔ á woo bɔ walan, ma á re ǹ dɛnaa dii.

⁸ Ma á re kaa kelen kɛn piɛ̃ ka kaa geren ne. Gɔn bɛ́ re ka mɛnɛn kuĩ zia la, bɛn tá re mɛnɛɛ kaa tentenen kɛn bii, kaa nyankɔrɔ basan kɛn nɛ, ka kaa mu ziin ni.

⁹ Ma á re kaa gána lɛ biɛ diə gole lɛa yǎa duduu. Min din ba re boe la a giã kaa kiwin kɛn nɛ doo wa. Ǹ tá re doɛ̃ kəni, mà ma din nə Dɛnaa Lawa lɛa.

¹⁰ Kaa da ǹ boo á ke: «Gána màn paa kɛ lɛ laanka ǹ minin tá re wɔa wɔ biɛ, wɔ á re ǹ sii, wɔ ǹ baa wɔa wɔ lɛa.» A da yaa, masɛ Dɛnaa Lawa dɔ n bǎã lɛ-n walan.

¹¹ Bɛ lɛ taman yii, a ma toa ma yii n koo, masɛ Dɛnaa Lawa a da ǹ á ke: – Zɔ́ɔbaa ke ká a yɔrɔ dia Izirayeli minin lɛn la, ka kakaarɛbaa ǹ sii laanka foo a wuu pɛ ǹ sii mɛn zɛnaa ǹ nɛ bɛ gɔ́ɔ̃ nɛ, ma dɔ n die bɛ lɛ miã zɛnɛɛ ka dɔn manɛ. Ma bɛ́ re dɔlɔ mɛn diɛ ka mìi ni, Izirayeli minin lɛn tá re ma doɛ̃ bɛ li.

¹² Ka á re doɛ̃ bɛa biikoo li kəni, mà ka tɔ ziziɛ̃ ǹ boon mɛnɛn da Izirayeli gána a kelen kɛn wɔ paǹ li, mà masɛ Dɛnaa Lawa ma. Kaa da ǹ boo á ke: «Izirayeli a kelen kɛn nə́ ziziɛ̃! Wɔ gɔn dɔ ǹ ganaa.»

¹³ Ká din gole kɔ ǹ boo da ma ganaa, ká din koa ǹ boon dada ma ganaa. Má ma!

¹⁴ Dɛnaa Lawa a da ǹ boo á ke: Kanaa minin tumaa bɛ́ re n nyɛnyɛɛ kaa zɛnaa ǹ sii kɛ taman yii ǹ mɛn waáraa, masɛ á re kaa gána lɛ ziziɛ̃.

¹⁵ Ka bɛ́ ka n nyɛnyɛɛ Izirayeli gána lɛ a ziziɛ̃ taman yii, ma dɔ á re ka dɔn ziziɛ̃. Seyiiri kele kɛ á re ziziɛ̃, Edɔmu gána din kuturu. a tá re doɛ̃ bɛa biikoo li kəni, mà ma din nə Dɛnaa Lawa lɛa.