Ezekieli 34 - LAWA A BOO SONBORE

Boo mɛn nə n da Zeruzalɛmu a nyɛɛnaandɛnan wɔ paǹ li

¹ Dɛnaa Lawa boo da ma nɛ á pɛ:

² – Minbuiin a nɛ, maa boo kɛ da Izirayeli zaman nyɛɛnaandɛnan kɛn wɔ paǹ li n pɛ ǹ nɛ, mà masɛ Dɛnaa Lawa a da ǹ boo á ke: «Izirayeli a zaman-lɛduə̃lin mɛnɛn bɛ́ giɛ ǹ dininsɔɔ̃nɔn walan, ǹ nə́ ǹ ba giɛ zaman kɛ walan wa, bɔ̀n nə bɛn wɔ lɛa!

³ Maǹ tɔɔn lɛn nyɔɔ soɛ̃, ǹ nə́ ǹ ka biɛ mɔnaa lɛa bɛ̀ ǹ wɔ, maǹ wúlu boe ka a kasiɛ̃ wolen ne. Sɛnɛ, ǹ ba giɛ tɔɔn lɛn dininmaan walan wa.

⁴ Tɔɔn mɛnɛn pàã bɛ́ á nya, ǹ màn-bii kɔ bɛn la ǹ nə́ pàã yɛ wa. Ǹ mɛn bɛ́ busulə lɛa, ǹ dagòã bɔ bɛ-n wa. Ǹ mɛn gòã bɛ́ á yiɛ, ǹ màn yii bɛ gòã ganaa wa. Ǹ mɛn bɛ́ á n na, ǹ bɛ loo ǹ nə́ daa-n wa. Ǹ mɛn papaã, ǹ wo ga bɛ li ǹ nə́ daa-n wa. Sɛnɛ, maǹ nə́ ǹ lɛduə̃ ka kakaarɛbaa nɛ, ǹ nə́ bɔ ǹ yii ni.

⁵ Bɛ lɛ na á toa tɔɔn lɛn nə́ sasawaa, a giala, ǹ lɛduəli banban. Ǹ nə́ sasawaa, ǹ nə́ don mànan màn-bii baa.

⁶ Maa sèren lɛn nə́ sasawaa, ǹ nə́ woo kelen tumaa laanka tentenen tumaa la. Maa sèren lɛn nə́ pɛsɛ̃ gána lɛ paǹ tumaa nɛ ka tenten sɔsɔrɔn tumaa nɛ. Sɛnɛ, min kɔn ga ǹ li wa, min kɔn nɔ̀n da ka ǹ sii-n wa.

⁷ «Bɛ lɛ taman yii, Izirayeli-lɛduə̃lin lɛn, ka n too kɔ masɛ Dɛnaa Lawa a boo li.

⁸ Masɛ Dɛnaa Lawa Yiikoonaa a da ǹ boo á ke: Maa sèren lɛn lɛduə̃li bɛ́ a banban, maa tɔɔn-lɛduə̃lin lɛn bɛ́ ǹ wo ga ǹ li wa, ǹ nə́ ke wurumunun gɔn, ǹ nə́ don màn babaraan tumaa a màn-bii baa, bɛn nə́ ǹ goa, ǹ nə́ woo ǹ ne. A giala, tɔɔn-lɛduə̃lin lɛn man nə́ goã n dinin toe, ǹ ba màn-bii koe maa tɔɔn lɛn la wa.

⁹ Tɔɔn-lɛduə̃lin lɛn, ka n too kɔ masɛ Dɛnaa Lawa a boo li.»

¹⁰ Masɛ Dɛnaa Lawa a da ǹ boo á ke: «Á ke, bɛa tɔɔn-lɛduə̃lin kɛn lɛn, ma á re yui ǹ gialaa, ma ǹ tɔɔn lɛn sii ǹ la ma ǹ sɔkɔn, ma ǹ lɛduə̃lin lɛn kaa ma ǹ bɔ dí ni. Ǹ ba re boe la ǹ nə n dinin too doo wa. Ma á re ma a tɔɔn lɛn sii ǹ lɛ la, ǹ ba re ǹ màn-bii biɛ doo wa.»

¹¹ Masɛ Dɛnaa Lawa n kɛ pii: «Á ke, kanna kəni, ma dinmaa n die ma a sèren lɛn basa boe, ma ga ǹ walan.

¹² Bɛ̀ tɔɔn-lɛduəli a tɔɔn nə́ papaã ǹ mɛn pinaa, a bɛ́ giɛ ǹ li lɔn, ma dɔ n die woe giɛ maa wɔn lɛn li miɛ̃. Ǹ sasawaa ǹ nə́ woo bǎã mɛn tumaa nɛ furumə gole ka wɔlɔ tì pinaa kɛ nɛ, ma á re ǹ wɛɛ, ma ǹ bɔ walan.

¹³ Ma á re ǹ wɛɛ ma ǹ bɔ tɔrɔn bii, ma á re ǹ wɛɛ ma ǹ bɔ gána kɔsɔn nɛ, ma ǹ sɔkɔn, ma da ǹ nɛ, ǹ dinin gána nɛ. Ma á re ǹ kiɛ buu ganaa Izirayeli gána a kelen kɛn la, nyankɔrɔ basan kɛn nɛ, ka gána lɛ a bǎã mɛn tumaa bɛ́ min nə́ boe la a n giɛ̃ a nɛ.

¹⁴ Ma á re woe ǹ kiɛ buu ganaa buu bǎã sonbore ne. Ǹ zìã n die goɛ̃ Izirayeli gána a kelen kɛn la. Maǹ die goɛ̃ walan ǹ waa bǎã sonbore ne, ǹ buu kɛkɛ sɔ̃ Izirayeli gána a kelen kɛn la.

¹⁵ Ma dinmaa n die woe maa tɔɔn lɛn kiɛ buu ganaa, ma dinmaa n die susui koe ǹ la. Ma din Dɛnaa Lawa a da ǹ boo ne.

¹⁶ Bɛ̀ tɔɔ lɛ mɛn papaã, ma á re woe giɛ li, bɛ̀ ǹ mɛn nə́ n na, ma á re woe lui ma da nɛ. Bɛ̀ ǹ mɛn gòã yiɛ, ma á re màn yii a ganaa, bɛ̀ ǹ mɛn ba lon wa, ma á re dagòã boe ne. Sɛnɛ, ǹ mɛn bɛ́ kasiɛ̃ nɛ, pàã ná a lon, ma á re bɛ dii ma bɔ ǹ bii. Ma á re maa tɔɔn lɛn nyɛɛnaan boe ka peperebaa nɛ.»

Min mɛnɛn bɛ́ giɛ ǹ dininsɔɔ̃nɔn bǐɛ̃ li

¹⁷ Maa minin lɛn, masɛ Dɛnaa Lawa bɛ́ màn mɛn pii ka nɛ, bɛ n ka kɛ nɛ: «Ma á re kiri kuri sère daanan bii, ma kuru sère gɔ̀lɔ̀n laanka butumun bii.

¹⁸ Buu sonbore ke ka á soɛ̃, bɛ na a doe ka yii li wa? Buu mɛn bɛ́ á goã, wàa na á baa, ka á tɔtɔrɛ bɛ la? Ka bɛ́ mu sonbore yii ka á mii, bɛ na a doe ka yii li wa? Wàa na á baa, ka tá a gialakun kɛ yii lɔlɛkɔn ka ka gòãn nɛ?

¹⁹ Bɛ̀ ká zɛnaa miɛ̃, ka tɔtɔrɔ buu mɛn la, ka mu mɛn dɔ yii lɔlɔkɔn, yǎa maa tɔɔ gialakunun lɛn nə bɛ mii.»

²⁰ Bɛ lɛ na á toa masɛ Dɛnaa Lawa á kɛ pii: «Á ke, ma dinmaa n die kiri kuri maa tɔɔ lɛ a kasiɛ̃ wolen laanka a pɛrɛɛ wolen bii.

²¹ A giala, tɔɔn lɛn mɛnɛn tumaa bɛ́ ǹ ba lon wa, ká bɛn nyanaa ka ka wàã nɛ, ká n nyàakoo da ǹ li, ká ǹ dɛ ka ka bɛnɛn nɛ, yǎa ká ǹ sasawaa ká ǹ bɔ tɔɔn màn bii ǹ bǎã kɛ nɛ.

²² Man die maa sèren lɛn sii ma ǹ kaa, màn mɛn bɛ́ toɛ min baran basaã kɔ ǹ nɛ doo wa. Ma á re kiri kuri ka bii.

²³ Man die tɔɔn-lɛduə̃li goon toto boe ma da maa tɔɔn lɛn mìi la, bɛ ga ǹ walan: Bɛ n ka maa dí-nyali Davida nɛ. Bɛ lɛ á re giɛ ǹ walan, bɛ lɛ á re ǹ lɛduə̃li biɛ.

²⁴ Masɛ Dɛnaa Lawa n die ǹ Lawa biɛ, maa dí-nyali Davida n die ǹ nyɛnaandɛnaa biɛ. Ma din Dɛnaa Lawa má pɛ.

²⁵ «Ma á re lɛ kɔ kɔn la we ka maa tɔɔ kuru lɛ nɛ, là nyantoro wɔ paǹ li. Ma á re don màn babaraan tumaa papaɛ̃ ma ǹ bɔ gána lɛ nɛ. Ǹ tá re giɛ̃ diə gole gɔ́ɔ̃ nɛ, ǹ yiri n bǎã goon ne, ǹ tá re nyuù din we daã nɛ.

²⁶ Ma á re barka diɛ gána kɛ ganaa, ka maa kele kɛ lɛkoro lɛ-a bǎãn nɛ. La mu mɛn bɛ́ barka da maa ǹ wɔ lɛa, ma á re toɛ bɛ kaa a biikoo li.

²⁷ Wuru gɔ́ɔ̃ dan tá re nɛ koe, tán tá re bǐɛ̃ koe. Maa zaman lɛ á re giɛ̃ ǹ gána nɛ, ǹ yiri n bǎã goon ne. Ma á re ǹ sii nɔmaa la. Min mɛnɛn bɛ́ boe ǹ yii ni, ma á re ǹ sii bɛn la. Ǹ tá re doɛ̃ bɛa biikoo li kəni, mà ma din nə Dɛnaa Lawa lɛa.

²⁸ Tɔrɔ kɔsɔ minin ba re die ǹ kokoe doo wa, don màn babaraan ba re ǹ kuĩ doo wa. Ǹ tá re giɛ̃ gána lɛ nɛ ǹ yiri n bǎã goon ne, min kɔn ná a banban, á n nyɛ́ɛ diɛ ǹ ganaa wa.

²⁹ Ma á re toɛ da sonboren nə bɔ ǹ wɔ lɛa, bòo á re minin dii gána lɛ-n doo wa. Tɔrɔ kɔsɔn ba re sìi diɛ ǹ ganaa doo wa.

³⁰ Ǹ tá re doɛ̃ bɛa biikoo li kəni mà ma din Dɛnaa Lawa nə ǹ Lawa lɛa, má n kunun ǹ ni, ǹsɛn Izirayeli tɔrɔn lɛn man maa zaman lɛa. Ma din Dɛnaa Lawa a da ǹ boo ne.

³¹ «Ka n maa sèren lɛa, ka n maa tɔɔ kuru lɛa, ma ń giɛ ka walan, ka n minbuiinin lɛa, masɛ n kaa Lawa lɛa. Ma din Dɛnaa Lawa a da ǹ boo ne.»