Ezekieli 33 - LAWA A BOO SONBORE

Dɛnaa Lawa Ezekieli bɔ á koa wɔlɔ lɛduə̃li lɛa

¹ Dɛnaa Lawa boo da ma nɛ á pɛ:

² – Minbuiin a nɛ, boo da ka Izirayeli minin lɛn nɛ n pɛ ǹ nɛ: «Bɛ̀ man má zia yiɛ gána mɛn ganaa, bɛa gána lɛ a minin tá boe la ǹ min goon bɔ ǹ dinin bii, ǹ bɛ koa wɔlɔ-lɛduə̃li lɛa.

³ Bɛ̀ bɛa giĩ lɛ zia yɛ die gána lɛ gialaa, a n bɛn pii, a n gɔn waa zaman nɛ.

⁴ Bɛ̀ min mɛn bɛa bɛn lɛ wuu ma, a ná a gɔn-waa lɛ si wa, bɛ̀ ǹ dɛnaa toa zɔ́ɔn nə́ daa tɔwaa ǹ nə́ dɛ, man die a gɛ̀ lɛ a sii diɛ a din mìi ni.

⁵ A giala, á bɛn wuu lɛ ma, sɛnɛ, a na a gɔn-waa lɛ si wa. Ǹ dɛnaa din sii ni. Bɛ̀ a na á gɔn waa lɛ si, bɛ̀ a n die kanbiɛ.

⁶ Sɛnɛ, bɛ̀ wɔlɔ-lɛduə̃li lɛ zɔ́ɔn yɛ die ka zia nɛ, bɛ̀ a bɛn pɛ á n gɔn waa minin man wa, bɛ̀ zia lɛ daa yǎa a min mɛn dɛ, man die a gɛ̀ lɛ a sii diɛ wɔlɔ-lɛduəli lɛ din mìi ni.»

⁷ Minbuiin a nɛ, man má n din kɛ lɛ koa Izirayeli tɔrɔn lɛn wɔlɔ-lɛduə̃li lɛa. N too kɔ ma lɛ gɔ́ɔ̃ ǹ boo li, n bɛ lɛ pɛ ǹ nɛ, maa gɔn waa ǹ boo lɛa.

⁸ Bɛ̀ má pɛ min baraa nɛ, máa sàabaa ba la wa máa á re giɛ̃, bɛ̀ n boo da min baraa lɛ nɛ, n nə n gɔn waa-n wa, bɛ̀ a wusoo a zɛnaa ǹ sii kio wa, min baraa lɛ á re giɛ̃ a sii baraa a lɛa sɛn. Sɛnɛ, man die a gɛ̀ lɛ a sii diɛ n din mìi ni.

⁹ Sɛnɛ, bɛ̀ má n gɔn waa min baraa lɛ nɛ máa a wusoo a zɛnaa ǹ sii kio, bɛ̀ a wusoo wa, a din nə die giɛ̃ a sii baraa a lɛa, Sɛnɛ, nsɛ yii á re goɛ̃ koo.

¹⁰ Minbuiin a nɛ, boo da ka Izirayeli tɔrɔn kɛn nɛ, ǹ mɛnɛn lɛn nə́ ke pii kɛnɛn: «Wɔa bɔlɔ-tii siin laanka wɔa sii baraan kɛn man wɔ mìi ni, ǹ nə́ ke wɔ ziziɛ̃ gele wɔ nɛ, wɔ n die siɛ lɔn wɔ tɔn la?»

¹¹ A pɛ ǹ nɛ mà masɛ Dɛnaa Lawa n kɛ pii: «A ma toa maa yii n koo, min baraa a gɛ̀ bie kɔɔ̃nɛ ma ganaa wa. Sɛnɛ, man li, min baraa wusoo a zɛnaa ǹ sii kio a yii boo la a goã koo. Bɛ lɛ nɛ, ma á ka nyankoe, ka wusoo kaa sii baraan lɛn kio. Izirayeli tɔrɔn lɛn, wàa na á baa ka n die toɛ gɛ̀ ka dɛ kooro?»

¹² Nsɛ minbuiin a nɛ, wusoo n pɛ ma tɔrɔ minin lɛn manɛ kɛnɛn: «Bɛ̀ min pepere nə́ n bɔyaa á sii baraa zɛnaa ǹ mɛn pinaa, a sii pepere mɛn zɛnaa lɛlɛ, bɛa boe a-n bɛa pinaa kɛ lɛ-n wa. Bɛ min baraa dɔ́ wusoo a baraa baa kio ǹ mɛn pinaa, a baraa baa ǹ sii mɛn zɛnaa lɛlɛ, bɛ bie re toɛ a bɔ̀n baa bɛa pinaa wa. Sɛnɛ bɛ̀ min pepere sii baraa zɛnaa ǹ mɛn pinaa, a lɛlɛ a peperebaa kɛ a boe la a si a da wa.»

¹³ Sɛnɛ, bɛ̀ má pɛ min pepere ne, máa sàabaa ba la wa, máa a yii á re goɛ̃ koo, bɛ̀ á n foo doa a lɛlɛ a peperebaa kɛ la yǎa a sii baraa zɛnaa, a sii peperen kɛn lɛn á ǹ zɛnaa, ǹ goon din là banban. A sii baraa mɛn zɛnaa, a n die giɛ̃ bɛ lɛ taman yii.

¹⁴ Sɛnɛ bɛ̀ má kɛ pɛ min baraa nɛ: «Sàabaa ba la wa, ń tá re giɛ̃, bɛ̀ á wusoo a sii baraa kio, á sii zɛnaa a zii li pepere, a yii á re goɛ̃ koo.

¹⁵ A giɔ̀mɔ lɛ koa ǹ màn mɛn si minin la, bɛ̀ á bɛ kɔ ǹ la, a màn mɛn koã, bɛ̀ á wusoo á bɛ kɔ ǹ dɛnaa la, á n nyɛnaa sii baraa zɛnaa nɛ, bɛ̀ á kɔ dí-pɛn kɛn lɛ yiikoonaabaa koe min la, bɛ̀ á zɛnaa miɛ̃, sàabaa ba la wa, a yii á re goɛ̃ koo, a re giɛ̃ wa.

¹⁶ A sii baraa mɛn tumaa zɛnaa, ǹ kɔn a dɔlɔ a re n diɛ a mìi-n wa. A yii á re goɛ̃ koo, a giala, á sii zɛnaa a zii li pepere.»

¹⁷ Sɛnɛ Izirayeli tɔrɔn lɛn man pii: «Dɛnaa Lawa a zɛnaa ǹ sii ba siĩn wa.» Sɛnɛ, ǹ dininmaan lɛn zɛnaa ǹ sii na a ba siĩn wa.

¹⁸ Bɛ̀ min pepere wusoo a peperebaa kio á sii baraa zɛnaa, a n giɛ̃ a sii baraa lɛ taman yii.

¹⁹ Bɛ̀ min baraa ná a baraabaa toa walan, á sii zɛnaa a zii li pepere, bɛ dɔ yii n die goɛ̃ koo bɛ lɛ taman yii. Sii lɛ bɛ́ miɛ̃,

²⁰ wàa na á baa ka á pii mà Dɛnaa Lawa a zɛnaa ǹ sii na a pepere wa? Ka Izirayeli tɔrɔn lɛn, man die kiri kuri ka gogoonmaa la, a kɔnpɛ ka a zɛnaa ǹ sii ni.

Zeruzalɛmu yui

²¹ Wɔa goa a wo bɛ̀rɛbaa ǹ bǎã-n lɛ a lɛ̀ fulupaabaa ǹ wɔ, a mui fùbaa ǹ wɔ a lɛawaa soorobaa ǹ wɔ pinaa, baa si á la wole goon bɔ Zeruzalɛmu á daa ma li, á pɛ ma nɛ mà zɔ́ɔn nə́ kiwi lɛ yu.

²² Wasamiɛ̃nɛ, Dɛnaa Lawa pàã gisĩ ma la, á ma lɛ bũ. Bɛa lɛawaa baayɛlɛ, baa si á la wole lɛ daa á dɔ ma li. Maa lɛ tere-a baa lɛ, bɛ nya, má boo la má boo da bɛa biikoo li.

²³ Dɛnaa Lawa a da ǹ boo á ke:

²⁴ – Minbuiin a nɛ, ǹ kiwin mɛnɛn lɛn yu, bɛn minin mɛnɛn bɛ́ Izirayeli gána nɛ, bɛn man pii: «A laanɛ wɔ digolo Abrahamu goã a dinsɔɔ̃, á gána lɛ si á baa a wɔ lɛa. Sanparɛ ka wɔsɛn damata kɛ nɛ. Gána lɛ a dɛnaabaa na á n kɔ wɔsɛn dɔn la.»

²⁵ Bɛ lɛ taman yii, a pɛ ǹ nɛ, mà masɛ Dɛnaa Lawa n kɛ pii: «Ka n siĩ laanka a mà soɛ̃ kun, ká n dìn guguru koe, ká n gɛ̀n didii. Gána lɛ á boe la a kaa wɔ baa, a da yaa, ká n bɛa siin kɛn lɛn dɔn zɛnɛɛ?

²⁶ Ka foo n doa-n kaa ziabaa ǹ mànan ganaa, ká n sii bɔbɔnɛɛ laanka naarɛbaa zɛnɛɛ. Gána lɛ á boe la a kaa wɔ baa ka bɛa yɔrɔ kɛ lɛ nɛ?»

²⁷ N die n kɛ pɛ ǹ nɛ: «A ma toa ma yii n koo, masɛ Dɛnaa Lawa n kɛ pii: Ǹ kiwi mɛn lɛ yu, min mɛnɛn bɛ́ a nɛ, ǹ tá re bɛn dii. Min mɛn bɛ́ don, ma á re bɛ koe don màn babaraan la ǹ màn-bii lɛa. Min mɛnɛn bɛ́ kele la, ka kele yalan nɛ, bɛn tá re giɛ̃ piɛ̃ busu babaraa gɔn.

²⁸ Ma á re gána lɛ yui, ma baa ka diə gole bɛ́ lɔn. A din-koa ke á we a pàã kɛ taman yii, bɛ á re papaɛ̃. Izirayeli gána a kelen kɛn kooro á die goɛ̃. A giala, min ba re yii a bɔ walan doo wa.

²⁹ Ǹ sii bɔbɔnɛɛn kɛn tumaa ǹ nə́ ǹ zɛnaa, bɛ lɛ a lɛa nɛ ma á re gána lɛ yui, ma a gɔ́ɔ̃ kooro da. Ǹ tá re doɛ̃ bɛa biikoo li kəni, mà ma din nə Dɛnaa Lawa lɛa.»

³⁰ Minbuiin a nɛ, n din tɔrɔ minin lɛn man golee-n kungɔnɔn li, ǹ kionən kiɛnlɛ-a, ǹ nə́ nsɛ Ezekieli diɛ yaa lɛa. Maǹ boo diɛ kɔn nɛ, didie n pii ǹ miã nɛ: «Ka daa wɔ wo n too kɔ, Dɛnaa Lawa n die wàa boo diɛ ke kəni?»

³¹ Ǹ tá re die ma li ka zaman kɛa lɛsɔkɔn pinaa bɛ́ lɔn. Maa minin lɛn tá re die giɛ̃ tán ma yɔrɔ-a. Ǹ tá re n too koe maa boon li, sɛnɛ, ǹ ba re ǹ sii wa. A giala, boo kɔɔ̃n nə soe ǹ lɛ-n, sɛnɛ, ǹ foo kɛ nɛ, maǹ nə ǹ dinin là kio.

³² Á ke dinin, man má loe-lɔli baa ǹ gɔn, loe-lɔli mɛn bɔlɔ bɛ́ kɔɔ̃nɛ, ǹ bɛ́ màn wuu mɛn diɛ a loe li, bɛ dɔ n kɔɔ̃nɛ. Maǹ nə n too koe maa boon li, sɛnɛ, ǹ ba ǹ sii wa.

³³ Ma màn mɛn pɛ, bɛ á re n zɛnɛɛ, a sàabiɛ wa. Ǹ tá re doɛ̃ bɛa biikoo li, mà Lawa a boo gii-dali n ka giĩ kɛ lɛ nɛ, á goã kun ka ǹsɛn nɛ.