Ezekieli 27 - LAWA A BOO SONBORE

Tiiri kiwi a gɛ̀ koa n loe

¹ Dɛnaa Lawa boo da ma nɛ á pɛ:

² Minbuiin a nɛ, gɛ̀ loe lɔ Tiiri kiwi kɛ la.

³ Kɛ pɛ Tiiri kiwi lɛ nɛ, nsɛ mɛn bɛ́ yìsi mu lɛkoro lɛ-a, pii koe kun ka tɔrɔ kɔsɔn nɛ. Masɛ Dɛnaa Lawa n kɛ pii n ni: Nsɛ Tiiri kiwi, táa ma nə́ n pɛ mà nsɛ siĩn kɔ á la yii ni.

⁴ N kiwi lɛ a golebaa n woe yǎa yìsi mu kɛ bii. Min mɛnɛn nə n dɔ, n siĩn kɔ ka mu la ǹ goo bɛ́ lɔn.

⁵ N lɛkoro lɛ-a bǎãn kɛn, bɛn tumaa na á n dɔ ka Seniiri a Siprɛsi da kɛa gɔn nɛ. Maǹ nə́ n zɛnaa ka Liban da kaka kɛa gɔn nɛ.

⁶ N mu baa ǹ lasan kɛn, maǹ nə́ bɛn zɛnaa ka Basan da gɔn nɛ. N giã ǹ bǎã ke, maǹ nə́ bɛ zɛnaa ka Kitimun siprɛsi da kɛa gɔn nɛ ǹ na a nyan kɔ ka don a díi sɔn nɛ.

⁷ Ezipti minin mɔnaa wɔrɛɛ kɛ n mìi lalan, bɛ na á goã toɛ, min nə n yɛ tìãlɛa, a n dɔ̃. Mɔnaa ke n tá koe n pii mànan lɛ, maǹ nə́ bɛ tã ka Elisaa a bǎã gɛ̀sɛ nɛ, a koreeboree laanka a tã nɛ.

⁸ Sidɔn minin laanka Arbaadi minin man nə goà n mu la ǹ goo lɛ a bɔlin lɛa. Tiiri, n minin mɛnɛn bɛ́ sii doɛ̃, bɛn man nə́ goã n mu la ǹ goo kɛa da baa-a wolen lɛa.

⁹ Gebali a min golen laanka a gɔn dí-nyali sii-dɔ̃lin kɛn, bɛn man nə́ goã n mu la ǹ goo lɛ zɛnɛɛ. Yìsi mu la ǹ goon tumaa laanka a pii-kɔlen, man die pii mànan pii kaa piɛ.

¹⁰ Perɛsi gána minin ni, Ludu wɔn nɛ ka Puti wɔn nɛ, bɛn man nə́ goã kun ka n sɔraasin ni, n zia-baalin lɛa. Ǹ dinin lɛn man nə́ goã, ǹ goóron laanka ǹ ziabaa ǹ bafolon loɛ lon kaa piɛ, ǹ dinin lɛn man nə́ goã n pàã lɛa.

¹¹ Arbaadi minin kɛn, kun ka sɔraasin ni, bɛn man nə́ goã n kungɔnɔn kɛn lɛduĩ. Gamaadi minin kɛn, bɛn man nə́ goã n sanabolon kɛn nɛ wɔlɔ lɛduĩ. Maǹ nə́ goã ǹ goóron loɛ kungɔnɔn kɛn ganaa, n lɛnpɛnɛ. Bɛn nə́ n siĩnbaa lɛ lɛ pã.

Tiiri n pii kɔ ǹ bǎã gole lɛa

¹² Tarsiisi minin kɛn, bɛn nə́ goã pii màn tɔrɔ tumaa pii kaa piɛ. Maǹ nə́ goã die ka wɔrɔ nɛ, fɔlɔ nɛ, fɔlɔ fu ni, ka fɔlɔ bù ni, bɛ̀ ǹ kɔ n la pii mànan lɛn dòo.

¹³ Grɛki minin dinin nə́ goã pii koe kunun n ni, Tubaali kiwi wɔn nɛ ka Mesɛki kiwi wɔn nɛ. Bɛn man nə́ goã die bɛ̀rɛn siɛ̃ n la, ka zan mànan nɛ.

¹⁴ Togarmaa kiwi, maǹ nə́ goã sùi san koe n la, dundun sùin ni, ka sùi da baa-a wolen ne.

¹⁵ Dedan kiwi minin kɛn dɔn man nə́ goã pii koe kunun n ni. Minin man boe bǎã sɔsɔɔ nɛ, die mànan pii n piɛ. A da yaa maǹ nə́ goã don a díi sɔ koe n la, ka díwi gɔn nɛ, bɛ̀ ǹ nə n pii mànan lɛn si.

¹⁶ Siirii minin man nə́ goã die màn tɔrɔ tumaa pii n lon. Maǹ nə́ goã die ka kɔlɔ giɔ̀mɔ kaka-an nɛ, mɔnaa koreeboreen ne, mɔnaa wɔrɛɛn nɛ, mɔnaa guguru yii nɔnɔɔn nɛ, ka kɔlɔ tɔrɔ sonboren ne, bɛ̀ ǹ kɔ ka la kaa mànan lɛn giɔ̀mɔ lɛa.

¹⁷ Haalɛ Zudaa gána minin laanka Izirayeli gána minin dinin nə́ goã die pii koe kaa piɛ. Ǹ nə́ goã die ka *belee ne boe Miniiti, nyànan nɛ, zoo ne, nyɔɔ nɛ, ka da yon gìĩ kɔɔ̃n nɛ.

¹⁸ Màn mɛn nə goã yii n lon gigiã, màn tɔrɔ gigiã lɛa, Damaasi minin man nə́ goã die bɛ pii n lon. Maǹ nə́ goã die Ɛlbɔn a duvɛ̃ kɛ koe n la, ka Sahara kiwi a sère ka kɛ nɛ.

¹⁹ Dan tɔrɔn laanka Yavan tɔrɔn man nə́ goã n toɛ Uzali kiwi, bɛ̀ ǹ da fɔlɔ-zɛnaa sã n la, da fɔ́rɔ gìĩ kɔɔ̃n nɛ, ka buruu gìĩ kɔɔ̃n nɛ.

²⁰ Dedan minin man nə́ goã die sùin kɛkɛrɛ zɛnaa ǹ mɔnaa siɛ̃ n la.

²¹ Larabu gána minin laanka Kedaara a goledɛnan kɛn tumaa goã pii koe kunun n ni. Bɛn man nə́ goã die sère nɛn we n pii mànan lɛn nɛ, sère gɔ̀lɔ̀n nɛ, butumun ni.

²² Sabaa minin laanka Rayemaa minin dɔn nə́ goã pii koe kunun n ni. Bɛn man nə́ goã die nyɔɔ gìĩ kɔɔ̃n kɛ tumaa a sonbore we n pii mànan lɛn nɛ, kɔlɔ tɔrɔ sonbore tumaa, ka sana nɛ.

²³ Karan minin kɛn nə́ goã pii koe kunun n ni, Kanee wɔn nɛ, Edɛn wɔn nɛ, Sabaa a pii-kɔlen ne, ka Asuuru kiwi laanka Kilimaadi kiwi wɔn nɛ.

²⁴ Bɛn man nə́ goã die dɔnkɛ sonboren siɛ̃ n la, mɔnaa koreeboree laanka a wɔrɛɛ nɛ, mɔnaa sɛsia nɛ ka biɛ mɛn nə́ ke, ǹ nə́ tã a yii wɔ sɔnbɔraanɛ.

²⁵ Zii sɔsɔɔ tɔ wɔ ǹ mu la ǹ goon kɛn, bɛn man nə́ goã n pii mànan lɛn goɛ, bɛ̀ ǹ wo ǹ ne. N lon na á goã piɛ̃-n ka pii mànan nɛ, guruguru, yìsi mu kɛ bii.

²⁶ N mu la ǹ goo-bɔlen lɛn nə́ woo n ne mu gigiã li, sɛnɛ lɛ̀giala piɛ̃ kɛ nə n ziziɛ̃ yìsi mu bii.

²⁷ N gɔn mànan nɛ, n mànan mɛnɛn pii, n bɛ́ ǹ mɛnɛn siɛ̃, n goo gɔ́ɔ̃ minin kɛn laanka ǹ da baa-a wolen ne, a zɛnaalin ni, n pii-kɔlen ne, n zia-baalin tumaa, min mɛn tumaa bɛ́ n lɛ soekɔn-a n piɛ, Tiiri kiwi, n bɛ́ re mɛnɛɛ ǹ mɛn pinaa, ǹ tumaa á re kiɛ yìsi mu kɛ bii lenlen.

²⁸ N goo gɔ́ɔ̃dɛnan kɛn lɛ-dɛ wuu á re bìn diɛ yìsi mu lɛkoro lɛ-a dɛnan kɛn ganaa.

²⁹ Bɛa biikoo li kəni, min mɛnɛn tumaa bɛ́ mu baa ǹ lasa biĩ doɛ̃, bɛn tá re soe ǹ nə n bɔ n mu la ǹ goo ne, mu la ǹ goo-bɔlen lɛn laanka yìsi mu la ǹ goo gɔ́ɔ̃dɛnan lɛn tumaa nɛ, ǹ tá re gisĩ ǹ giã tán.

³⁰ Maǹ nə n lɛ dii ka n din tɔ nɛ, maǹ nə n lɛ dii kɔsɛkɔsɛ. Maǹ tii goɛ kiɛ ǹ dinin mìi ni, maǹ nə n birikəĩ tán ton li.

³¹ Maǹ nə n mìi koɛ̃ n din a lɛa, maǹ gɛ̀ koa ǹ mɔnaan we n din a lɛa, ǹ foo ziziɛ̃maa nɛ. Maǹ wuu pii n din a lɛa, maǹ nə n duduwii n din a lɛa.

³² Ǹ là-paparɛɛ gɔ́ɔ̃ nɛ, maǹ nə́ goã loe loe n la, ǹ yɔrɔ-kɔsiɛ gɔ́ɔ̃ nɛ, maǹ nə́ goã loe loe kɛnɛn: «Tiiri kiwi, die na á goã ka n bɛ́ lɔn, ka kiwi kɛ bɛ́ lɔn ǹ nə́ ziziɛ̃ yìsi mu bii?»

³³ Ǹ bɛ́ ǹ nə́ goã n pii kɔ ǹ mànan kɛn kiɛ goo ne, yìsi mu la bɛ̀ ǹ wo ǹ ne, ń tɔrɔ gigiã a màn-bii bɔ. N gɔn màn lɛ a mɔnaabaa taman yii, n pii màn lɛ a gigiãbaa taman yii, ń kanaa a kiin baa pàãman lɛa.

³⁴ Sɛnɛ, basaã bɛ́ á n din yɛ yìsi mu lalan, ń kiɛ̃ tán yìsi mu gialaa. N pii mànan nɛ, min mɛnɛn tumaa bɛ́ ǹ nə́ goã die n soekɔn-a n piɛ, bɛn nə́ papaã yìsi mu giulun.

³⁵ Yisi mu lɛkoro-a dɛnan kɛn tumaa foo n ziziɛ̃ nɛ n din a lɛa. Gɔ̀nɔn bìn diɛ a nɛn ǹ kiin kɛn la wa, nyɛ́ɛ n bɛn gialaa, ǹ yɔrɔ yii ziziɛ̃.

³⁶ Tɔrɔ kɔsɔn pii-kɔlen nə́ n kaãbaa n wɔ paǹ li, ń nyɛ́ɛ da ǹ màn baa, n wɔ na á nya duduu.