Ezekieli 26 - LAWA A BOO SONBORE

Boo mɛn nə n da Tiiri kiwi wɔ paǹ li

¹ Izirayeli minin goa lɛ a lɛ̀ fulugoonbaa ǹ wɔ a lɛawaa bibinaa pinaa, Dɛnaa Lawa boo da ma nɛ á pɛ:

² – Minbuiin a nɛ, Tiiri minin kɛn man yaa we Zeruzalɛmu ganaa kaakaakaa! Ǹ nə́ pii: Kiwi kɛ lɛ, min tumaa goã die a nɛ, a wɔ sàabaa! Kiwi lɛ yu, wɔsɛn dɔn man die pàãma biɛ kɛ gòã wuu li.

³ Bɛ lɛ na á toa, masɛ Dɛnaa Lawa á kɛ pii: Nsɛ Tiiri kiwi lɛ, ma á die n gialaa. Man die tɔrɔ kɔsɔn yiɛ gigiã, ma ǹ kaa n ganaa, ka mu tii bɛ́ lɔn.

⁴ Ǹ tá re Tiiri a kungɔnɔn kɛn ziziɛ̃, ǹ tá re a sanabolon kɛn wurii. Ma á re a tán tii gasiɛ̃, yǎa a woe doe a gɛ̀fu ganaa.

⁵ Tiiri kiwi á re goɛ̃ yìsi mu bii. Á re zɔ̀-kùlin zɔ̀ɔ nyɔmaa ǹ bǎã biɛ. Tɔrɔ kɔsɔn tá re a mànan goɛ, ma din Dɛnaa Lawa n má pɛ, ma din a da ǹ boo ne.

⁶ A lɛkoro lɛ-a kiwin kɛn yìsi mu lɛkoro-a, ǹ tá re bɛn dii zia la. Ǹ tá re doɛ̃ bɛa waáraa kəni, mà ma din nə Dɛnaa Lawa lɛa.

⁷ Masɛ Dɛnaa Lawa n kɛ pii: «Kii gole Nebukadenezɔɔrɔ ke Baabiloniin kii lɛa, ma á re boe ka bɛ nɛ gɔsɛ a lɛ̀gɔn la, ma da nɛ Tiiri kiwi kɛ gialaa. Ma á re die ka sùin ni, ziabaa ǹ wotoron ne, sùi da-baalin ni, ka zia-baali damata nɛ.

⁸ N lɛkoro lɛ-a kiwin kɛn yìsi mu lɛkoro-a, kii lɛ á re bɛn dii lenlen. Á re nyankɔrɔn fɔfoɛ̃, á re bèlèn doe, á re kungɔn doe, a giã bɛ kio goóro lɛa, bɛ̀ a kuu kɔ n ganaa.

⁹ Á re n kungɔnɔn kɛn didii ka a ziabaa ǹ mànan nɛ, á re n sanabolon kɛn wurii ka a sukunun ni.

¹⁰ A sùin lɛn gigiãbaa taman yii, á re gusuũ goɛ a kɔ n lɛ. Zia-baalin kɛn laanka ziabaa ǹ wotoron ne, bɛn gòã wuu á re bìn diɛ n kungɔnɔn kɛn ganaa, a giala, maǹ die we n kiwi lɛ nɛ, Ka zia-baalin bɛ́ kiɛ̃ ǹ bǎã boe kungɔn ganaa lɔn, bɛ̀ ǹ tɔn wɔ kiwi.

¹¹ Ǹ tá re boe n bǎãn tumaa nɛ ka ǹ sùin kɛn nɛ, ǹ tá re n minin kɛn dii ka gɔya sa nɛ, n tíĩn mɛnɛn bɛ́ n pàã lɛa, bɛn tá re kiɛ tán.

¹² Ǹ tá re n naforo kɛ goɛ, ǹ tá re n pii mànan kɛn kokoe. Ǹ tá re n kungɔnɔn kɛn dii ǹ nə ǹ kaa, ǹ tá re n kion sonboren kɛn wurii. N dɔn kɔlɔn nɛ, ǹ gɔnɔn nɛ ka a tii ni, ǹ tá re bɛn zuĩ mu giala-n.

¹³ Ma á re n kurii n loen kɛn lɔ ganaa, n tùtun kɛn wuu á re boe doo wa.

¹⁴ Ma á re n bɔyɛɛ ma n baa gɛ̀fu kooro lɛa, n tá re zɔ̀-kũlin zɔ̀ɔ nyɔmaa ǹ bǎã biɛ, kiwi lɛ a re n doe doo duduu wa. A giala, ma din Dɛnaa Lawa-n má pɛ, ma din Dɛnaa Lawa a da ǹ boo ne.

¹⁵ «Masɛ Dɛnaa Lawa n kɛ pii Tiiri kiwi kɛ nɛ: Bɛ̀ ǹ tá n minin kɛn dii ǹ mɛn waáraa, tà lɛ-a minin kɛn ǹ wɔlɔ n sɔsɔɔ, bɛn gɔ̀nɔn tá re bìn diɛ kiwi lɛ a mɛnaa wuu laanka a bɔlɔkan ginii taman yii.

¹⁶ Tɔrɔn mɛnɛn bɛ́ yìsi mu lɛ-a, bɛn goledɛnan tumaa á re gisĩ ǹ nə n bɔ ǹ kii dankanan la, ǹ tá re ǹ dɔnkɛ dadaran wɛɛ, ǹ nə ǹ mɔnaa sɛsian kɛn sɔlɔ, ǹ nə ǹ bɔ ǹ dinin ganaa. Nyɛ́ɛ á re ǹ kuĩ. Ǹ tá re giɛ̃ tán-a, ǹ gɔ̀nɔn nə́ bìn diɛ duduu. N sii lɛ á re nyɛ́ɛ diɛ ǹ ganaa.

¹⁷ Ǹ tá re gɛ̀ loe loe n la, ǹ kɛ pɛ n wɔ paǹ li: Yìsi mu lɛ-a minin kiwi lɛ, kiwi sonbore lɛ, a na á saa lɔn ń papaã? N laanka n minin pàã na á goã ka yìsi mu kɛ nɛ, Ma nə n goã nyɛ́ɛ diɛ min tumaa ganaa.

¹⁸ Sisia kəni, tɔrɔn mɛnɛn bɛ́ yìsi mu lɛ-a, bɛn gɔ̀nɔn nə́ ke bìn diɛ n mɛnaa lɛ taman yii, nyɛ́ɛ yìsi mu lɛ-a minin kɛn kũ n papaã lɛ taman yii.

¹⁹ «A giala, masɛ Dɛnaa Lawa n kɛ pii: Man die n biɛ kɛbɔlɔ lɛa, goon ka kiwi-soen kɛn nɛ, ma yìsi mu kɛ da yoo ganaa, a da kɔ n lɛ.

²⁰ Bɛa biikoo li, lɛlɛ minin kɛn yala-n, ma á re n diɛ kun ka bɛn nɛ. Ma á re tán giulun kɛ biɛ n giã ǹ bǎã lɛa. Min mɛnɛn bɛ́ yala-n, n tá re goɛ̃ kun ka bɛn nɛ, n nə n baa ka kɛbɔlɔ zizi á ke lɔn, màn mɛn bɛ́ toɛ, min din baran giã n nɛ doo wa, n nyan bǎã yɛ yiikoonaan kanaa kɛ-n doo wa.

²¹ Ma á re toɛ n sii nyɛ́ɛ da minin ganaa, n dinmaa dɔ wɔlɔ ná a banban. Minin tá re giɛ n li ǹ fɔ̃, ǹ nə́ ǹ ba re n yii doo duduu wa. Ma din Dɛnaa Lawa a da ǹ boo ne.»