Ezekieli 25 - LAWA A BOO SONBORE

Boo mɛn nə n da Amɔn tɔrɔn wɔ paǹ li

¹ Dɛnaa Lawa boo da ma nɛ á pɛ:

² – Minbuiin a nɛ, n yɔrɔ dia Amɔn tɔrɔn kɛn la, n maa boo kɛ da ǹ wɔ paǹ li.

³ A pɛ Amɔn tɔrɔn lɛn manɛ, mà ǹ nə n too kɔ masɛ Dɛnaa Lawa a boo kɛ li. Masɛ Dɛnaa Lawa n kɛ pii: «Zɔ́ɔn bɛ́ ǹ nə́ maa kion sonbore lɛ ziziɛ̃ ǹ mɛn waáraa, ǹ nə́ basaã kɔ Izirayeli gána kɛ nɛ, ǹ nə́ ǹ goa ǹ nə́ woo ǹ ne gána kɔsɔ nɛ, táa ka n ka yaa wɔ?

⁴ Bǐɛ̃ kɔ! Ma á re toɛ lɛ̀giala gána minin kɛn nə kaa bǎã lɛ si, ǹ baa ǹ wɔ lɛa. Ǹ tá re ǹ mɔnaa zìãn doɛ kaa bǎã kɛ lɛ nɛ, ǹ giã a nɛ. Ǹ dinin lɛn man die kaa tán-kɔsiɛ mànan bii, ǹ kaa tɔɔn nyɔ bɔɔ̃, ǹ mi.

⁵ Kaa kiwi gole Rabaa ke, ma á re bɛ biɛ nyɔɔmaan buu sɔ̃ ǹ bǎã lɛa, ma kaa Amɔn tɔrɔn gána lɛ din baa sèren kaa ǹ bǎã lɛa. Ka á re doɛ̃ bɛa waáraa kəni, mà masɛ din nə Dɛnaa Lawa lɛa.»

⁶ Masɛ Dɛnaa Lawa gole a da ǹ boo á ke: «Sii mɛn Izirayeli gána yɛ, ka n ká foo kɔɔ̃nbaa gole yɛ bɛ gɔ́ɔ̃ nɛ, ká n gɔn dɛ, ká bɛ̀ baa, ká ǹ puusə kɔ á la yii ni.

⁷ Ka bɛ mɛn zɛnaa ke, ma á re yui ka gialaa, ma ka wɔ tɔrɔ kɔsɔn gɔn, bɛn nə ka gɔn mànan kũ ǹ nə ǹ si ka la. Ma á re ka wɛɛ ma ka bɔ tɔrɔn bii, ma ka dɛ lenlen, ma kaa gána kɛ papaã. Ka á re doɛ̃ ka bɛ-n kəni, mà masɛ din nə Dɛnaa Lawa lɛa.»

Boo mɛn nə n da Moabu tɔrɔn wɔ paǹ li

⁸ Masɛ Dɛnaa Lawa gole a da ǹ boo á ke: Moabu minin laanka Seyiiri minin man pii: «Zudaa minin dɔn nə́ ke, ǹ nə́ n baa ka tɔrɔ kɔsɔn kɛn tumaa bɛ́ lɔn.»

⁹ Bɛa boo kɛ lɛ taman yii, kiwin mɛnɛn lɛn nə́ ke zɔ́ɔn kurii Moabu kiwi a wɔ ganaa, ma á re bɛa kiwin lɛn tumaa wɛɛ ma ǹ bɔ ǹ nyɛɛnɛ, haalɛ gána lɛ a kiwi sonboren dɔn dinin: Bɛti Yesimɔti ni, Baali-Mewɔn nɛ ka Kiriyatimu ni.

¹⁰ Bɛa kiwin lɛn tá re lɛ̀giala gána minin kɛn wɔ biɛ, ka Amɔn tɔrɔn gána kɛ bɛ́ á ǹ wɔ baa lɔn. Ma din ni má kɔ ǹ la ǹ wɔ lɛa, min din yiri á die gisĩ Amɔn tɔrɔn gána kɛ nɛ tɔrɔn bii wa.

¹¹ Ma á re dɔlɔ diɛ Moabu minin kɛn mìi ni. Ǹ tá re doɛ̃ bɛa biikoo li kəni, mà masɛ din nə Dɛnaa Lawa lɛa.

Boo mɛn nə n da Edɔmu minin wɔ paǹ li

¹² Masɛ Dɛnaa Lawa gole a da ǹ boo á ke: – Edɔmu minin nə́ gɛ̀ dòo babaraa bɔ Zudaa minin ganaa. Bɛa gɛ̀ dòo kɛ lɛ ǹ nə́ bɔ ǹ ganaa, maǹ nə́ zɛ̀rɛ da ǹ dinin mìi ni. Ǹ sii mɛn zɛnaa,

¹³ bɛ lɛ taman yii ni masɛ Dɛnaa Lawa á kɛ pii: «Man die yui Edɔmu gána kɛ gialaa. Ma á re a minin laanka a tɔɔn dii lenlen, ma ǹ bɔ a nɛ. Ma á re bɛa bǎã lɛ biɛ kɛbɔlɔ lɛa, a saa Teman kiwi ganaa, a wo yǎa Dedan kiwi, ǹ tá re ǹ minin dii zia la.

¹⁴ Ma á re a gɛ̀ dòo bɔ sii we ma din a minin Izirayeli tɔrɔn kɛn gɔn, ǹ maa gɛ̀ dòo bɔ Edɔmu minin kɛn ganaa. Ma bɛ́ sii mɛn zɛnɛɛ maa foo-yoo laanka maa foo-busii gɔ́ɔ̃ nɛ, ǹ tá re bɛ miã zɛnɛɛ, Edɔmu minin lɛn manɛ. Bɛa biikoo li kəni, ǹ tá re ma gɔn lɛ yii. Ma din Dɛnaa Lawa a da ǹ boo ne.»

Boo mɛn nə n da Filisiti minin wɔ paǹ li

¹⁵ Masɛ Dɛnaa Lawa bɛ́ màn mɛn pii, bɛ n ka kɛ nɛ: – Filisiti minin man nə́ sii zɛnaa, ǹ nə́ ǹ gɛ̀ dòo bɔ nɛ. Ǹ min puusə kɔ ǹ sii gole mɛn zɛnaa ǹ nə́ ǹ gɛ̀ dòo bɔ nɛ, basaã-kɔ dinsɔɔ̃ a lɛa, lɛlɛ a zɔ́ɔbaa taman yii,

¹⁶ masɛ Dɛnaa Lawa gole n kɛ pii: «Ma á re yui Filisiti minin lɛn gialaa. Ma min mɛnɛn tumaa bɔ Kafutɔɔrɔ ǹ nə́ daa giã yìsi mu kɛ lɛkoro-a, ma á re bɛn tumaa dii lenlen.

¹⁷ Ma á re gɛ̀ dòo baraa boe ǹ ganaa, ma dɔlɔ gole da ǹ mìi ni. Bɛ̀ má maa gɛ̀ dòo lɛ bɔ ǹ ganaa ǹ mɛn waáraa, ǹ tá re doɛ̃ bɛa biikoo li kəni, mà ma din nə Dɛnaa Lawa lɛa.»