Ezekieli 24 - LAWA A BOO SONBORE

Zeruzalɛmu bɛ́ kɔnboe ka màn mɛn nɛ

¹ Izirayeli minin lɛn goa a lɛ̀ manangɔrɔbaa ǹ wɔ, mui fùbaa ǹ wɔ a lɛawaa fùbaa ǹ wɔ pinaa, Dɛnaa Lawa boo da ma nɛ á pɛ kɛnɛn:

² Minbuiin a nɛ, pelo a lɛawaa kɛ lɛ kiɛ̃ n lon, pelo a lɛawaa kɛ lɛ din. A giala, pelo lɛ din taãn nɛ, Baabiloniin kii á re die Zeruzalɛmu gialaa.

³ Boo giməə da piã-wɔlen kɛn manɛ, n pɛ ǹ nɛ, mà masɛ din Dɛnaa Lawa n kɛ pii ǹ ni: Fɔlɔ donkolon da tɛ la, a da la, n mu kaa a nɛ.

⁴ Siĩ-kurii lɛ kaa kun walan, a kurii sonboren lɛn tumaa kaa a nɛ, a gòãn laanka a nyàan nɛ, a gɔ́ɔ̃ pã ka a we sonboren kɛn nɛ.

⁵ Sère sonbore siĩ kaa a nɛ a wen kaa kɔn la a giulun. Tɛ kaa a ganaa taãn-taãnɛ, a wen lɛn dɔn dinin doamaa nɛ ǹ ma.

⁶ Bɛ lɛ nɛ, masɛ Dɛnaa Lawa á kɛ pii: Kiwi gɛ̀-dɛle ke, bɔ̀n na á yɛ! Fɔlɔ donkolon soedɛnaa, a soe bɛ́ a boe wa. Ǹ tá re a siĩ-kurii lɛ wɛɛ gogoon ǹ bɔ a nɛ, "ka daa wɔ n pã" din ba re goɛ̃ a sii-n doo wa.

⁷ A giala, a gɛ̀ mɛn dɛ, bɛa mà á tɔn tan kiwi lɛ nɛ. A na á mà lɛ kaa gɛ̀fu la tán kooro, á kaa tán kooro la, a tii kɔ lɛ wa.

⁸ A mà mɛn kaa gɛ̀fu kɛ la, man die toɛ tán ma a pìi koe lɛ wa, màn mɛn bɛ́ toɛ ma foo yoo, ma maa gɛ̀ dòo bɔ.

⁹ Bɛ lɛ na á toa masɛ Dɛnaa Lawa á kɛ pii: Kiwi gɛ̀-dɛle ke, bɔ̀n na á yɛ! Man die tɛ gole koɛ.

¹⁰ Gɔn kaa kɔn la, n tɛ da a ganaa. Siĩ lɛ kɔrɛ, n wusoo n kɔrɛ doo, a kɔɔ̃n kɔ ǹ mànan kaa li, n kɔrɛ yǎa a wen nə kukuĩ.

¹¹ Fɔlɔ donkolon lɛ gɔ́ɔ̃ kooro da tɛ nàn la, màn mɛn bɛ́ toɛ a wɔ̃, màn mɛn bɛ́ toɛ a taã, màn gɔgɔrɛn mɛnɛn bɛ́ a gɔ́ɔ̃ nɛ bɛn nə yo, a soe kɛ dɔ kũ a n bɔ a gɔ́ɔ̃ nɛ.

¹² Soe mɛn goã fɔlɔ donkolon lɛ nɛ, ǹ nə́ bɔ ka yɔrɔ yii ni ǹ nə́ fɔ̃ a baalɛ, tɛ dɔ din boo la á bɔ wa.

¹³ N gɛsɛbaa kɛ lɛ na á n gɔgɔrɛ kɔ, Zeruzalɛmu. A giala, man má goã giɛ li ma n *yoreen kɔ, sɛnɛ, ń nə́ n piã. Ma foo mɛn yoo n li ke, n ba yoreen koe doo wa, yǎa ma nə n foo nyɛɛ n la.

¹⁴ Ma din Dɛnaa Lawa má pɛ. Man die zɛnɛɛ dɔn, màn ná a ba n boe lɛ wa. Ma á re makara boe n ganaa wa, ma a re wusii ka ma kio dɔ-n wa. Ǹ tá re kiri we ka ganaa a kɔnpɛ ka kaa tɔ wɔ ǹ gɔn laanka kaa zɛnaa ǹ siin ni. Ma din Dɛnaa Lawa a da ǹ boo ne.

Ezekieli a lɔ a gɛ̀

¹⁵ Dɛnaa Lawa tɔ́n boo da ma nɛ á pɛ:

¹⁶ «Minbuiin a nɛ, á ke: Min mɛn lɛ a gamaa bɛ́ n foo kɔɔ̃n koe, man die bɛ lɛ sii n la ka parasa. Sɛnɛ, n baran a gɛ̀ koa wa, n baran n duduwəə wa, n yii mu nyan doo tán wa.

¹⁷ «Gini n din gɔ́ɔ̃ nɛ, n nyan toa n gɛ̀ koa wa. N mɔnaa gɔn kɛ pɛnɛ n mìi ganaa, kɔsɔnɔn wɔ ka n bɛ́ zɛnɛɛ lɔn lɛlɛ. N nyan màn kɔ n lɛ ka lɛ wa, n nyan lɛ kɔ n gɛ̀ wù si wa.»

¹⁸ Man má boo da ka zaman lɛ-n baayɛlɛ, a din wasamiɛ̃nɛ, maa lɔ gã. A lɛawaa, má zɛnaa ka Lawa bɛ́ á pɛ á laa ma ganaa lɔn.

¹⁹ Minin nə́ tɔ́n nɔ̀n da ma la, mà siin kɛn lɛn ma tá ǹ zɛnɛɛ, mà a giala n ka wàa nɛ?

²⁰ Má tɔ́n kɛ pɛ ǹ nɛ: – Dɛnaa Lawa na á boo da ma nɛ,

²¹ mà ma pɛ ka dinin Izirayeli minin lɛn manɛ, mà asɛ Dɛnaa Lawa gole a da ǹ boo á ke: «Maa kion sonbore ke ka tá n dinin koɛ la, ka nə́ n nyɛnyɛɛ la, ka á n foo doɛ a ganaa, ma á re bɛ lɛ ziziɛ̃. Ka kaa nɛgiĩn laanka kaa nɛlɔn mɛnɛn toa Zeruzalɛmu, ǹ tá re bɛn dii.»

²² Ezekieli zɛnaa lɔn, ka dɔn die ka zɛnaa miɛ̃. Ka nyan toa ka màn kɔ ka lɛ ka lɛ wa, ka nyan lɛ kɔ ka gɛ̀ wù si wa. Ka kaa mɔnaa gɔnɔn toa ka mìi ganaa, ka kaa kɔsɔnɔn toa ka gòãn ganaa.

²³ Ka baran gɛ̀ koa wa, ka baran n duduwəə wa. Sɛnɛ, ka á re pɛrɛ kaa sii baraan lɛn gɔ́ɔ̃ nɛ, ka dinin nə n bɔyaa ka gú wɔ kɔn la.

²⁴ Ezekieli a sii kɛ lɛ n sii giala pii ka nɛ. A sii mɛn tumaa zɛnaa, ka dɔn tá re bɛ lɛ miã tɔrɔ zɛnɛɛ. Bɛ̀ bɛa siin lɛn zɛnaa biikoo dɔ, ka á re doɛ̃ kəni, mà ma din nə Dɛnaa Lawa lɛa.

²⁵ Minbuiin a nɛ, n too kɔ: «Màn mɛn lɛ bɛ́ ǹ pàã lɛa, màn mɛn lɛ sii bɛ́ kɔɔ̃nɛ ǹ ganaa, ǹ bɛ́ nyaǹ boe màn mɛn lɛ la, ǹ bɛ́ n parɛɛ bǎã mɛn lɛ ganaa ǹ foo n doa nɛ a ganaa, ǹ kɔn pinaa, ma á re bɛ kuĩ ma si ǹ la, kun ka ǹ nɛgiĩn laanka ǹ nɛlɔn nɛ.

²⁶ Sii mɛn bɛ́ re n zɛnɛɛ bɛa pinaa kɛ lɛ nɛ, min tá re baa sii a la, a da a boo da n nɛ.

²⁷ Bɛa baa si a la wole kɛ lɛ a daa pinaa dɔ nɛ, n lɛ á re n buĩ. N tá re boo diɛ, n ba re goɛ̃ lɛ tere-a lɛa doo wa. N sii kɛ lɛ á re sii giala pii ǹ ni. Ǹ tá re doɛ̃ ka bɛ lɛ-n kəni, mà ma din nə Dɛnaa Lawa lɛa.»