Ezekieli 22 - LAWA A BOO SONBORE

Zeruzalɛmu minin nə sii bɔbɔnɛɛn mɛnɛn zɛnaa

¹ Dɛnaa Lawa boo da ma nɛ á pɛ:

² – Minbuiin a nɛ, n too kɔ. Kiwi gɛ̀-dɛle kɛ lɛ, kiri wɔ a ganaa, a sii bɔbɔnɛɛn kɛn lɛn tumaa nyaa nɛ a dɔ̃.

³ N die n pɛ nɛ mà masɛ Lawa n kɛ pii: «Zeruzalɛmu, nsɛ kiwi ke mà kiɛ tán, n dɔlɔ bɔ ǹ lɛawaa á die. N nə n dìn zɛnɛɛ, bɛ lɛ nɛ, n gɔgɔrɛ kɔ.

⁴ N mà mɛn kaa, ma nə́ n sii da n din mìi ni. N dìn mɛnɛn zɛnaa, ma n nə́ n din gɔgɔrɛ kɔ. Ma n nə́ n din a lɛawaa kunu kɔ, n gɛ̀ na á dɔ. Bɛ lɛ nɛ, ma á re toɛ tɔrɔ kɔsɔn nə sìi da n ganaa, gána kɔsɔn tumaa nə n da yaa lɛa.

⁵ Min mɛnɛn wɔlɔ bɛ́ kunu, ǹ mɛnɛn dɔn wɔlɔ bɛ́ sɔsɔɔ, bɛn tá re yaa we n ganaa. A giala, n tɔ ziziɛ̃, n sii lɔlɔkɔn zɛnaa la yii ni.

⁶ «Á ke Zeruzalɛmu, Izirayeli nyɛɛnaandɛnan mɛnɛn bɛ́ n nɛ, bɛn manə ǹ pàã zɛnɛɛ, ǹ nə́ mà kiɛ tán.

⁷ Maǹ díi laanka náa puusə koe n piɛ Zeruzalɛmu. Maǹ mɛnɛɛ tiin la kiwi lɛ nɛ, ǹ nə́ boe nɛ-toenən laanka lɔ giɔɔrɔn yii ni.

⁸ Mànan mɛnɛn bɛ́ maa wɔn lɛa, maǹ sàn koe ka bɛn nɛ, ǹ tá maa susu ǹ piin kɛn ziziɛ̃.

⁹ N piɛ Zeruzalɛmu, tɔ-ziziɛ̃lin tan, ǹ nə́ minin kiɛ gɛ̀-dɛ ganaa. Kiwi lɛ nɛ, ǹ nə́ dì wúlu bɔ ǹ mànan bii kelen la, ǹ nə́ sii gɛsɛn zɛnaa.

¹⁰ Minin man giɛ̃ kun ka ǹ daanan nɛ, ta lɔ dɔ a lɛawaa na a ganaa, maǹ giɛ̃ kun ni.

¹¹ Minin man sii bɔbɔnɛɛ zɛnɛɛ kun ka ǹ miãn lɔn nɛ, min nə ǹ manaa bebele a giã kun ni woone. Min dɔ na á tan kiwi lɛ nɛ, giɛ̃ kun ka ǹ miãnɛn nɛ, a din a díi a yii lɛa.

¹² N kiwi kɛ nɛ Zeruzalɛmu, minin man lɛ koe ǹ lɛ pii ǹ màn si, ǹ gɛ̀ dɛ. Maǹ giɔ̀mɔ diɛ ǹ nə́ giɛ là babaraa li, maǹ mɛnɛɛ ǹ miãn la, ǹ nə́ giɛ màn li. Sɛnɛ, ǹ yiri n boe ka ma dinmaa kɛ nɛ! Ma din Dɛnaa Lawa a da ǹ boo ne.

¹³ «Á ke, ma nə n gɔn pepere ka li, a giala, kaa màn kɛ lɛ ká yɛ, ka n ká mɛnaa minin la, ka n ká gɛ̀ dɛ.

¹⁴ Bɛ̀ ma yoo ka gialaa ǹ mɛn pinaa, táa foo tãbaa laanka pàã á re yii ka lon, ka boo la ka golee? Bɛ̀ masɛ Dɛnaa Lawa boo mɛn da, man bɛ lɛ zɛnɛɛ.

¹⁵ «Ma á re ka niniɛ kɔn tɔrɔ kɔsɔn bii, ma ka pɛsɛ̃ gána kɔsɔn nɛ. Gɔgɔrɛbaa ǹ siin kɛn ka tá ǹ zɛnɛɛ, ma á re ka kurii bɛ ganaa.

¹⁶ Ka dinin man ka dinin ziziɛ̃ tɔrɔ kɔsɔn yɔrɔ-a, sɛnɛ, ka á re doɛ̃ mà masɛ din nə Dɛnaa Lawa lɛa.»

¹⁷ Dɛnaa Lawa wusoo á boo kɛ da ma nɛ:

¹⁸ – Minbuiin a nɛ, Izirayeli tɔrɔn lɛn nə́ fɔlɔ bù baa ma gɔn. Ǹ dinin tumaa, ta ǹ mɛn nə ka wɔrɔ bɛ́ lɔn, ta ǹ mɛn nə ka zan bɛ́ lɔn, ta ǹ mɛn nə ka fɔlɔ bɛ́ lɔn, ǹ dinin tumaa fɔlɔ bù baa fɔlɔ yo ǹ kùsì kɛ nɛ.

¹⁹ Bɛ lɛ na á toa masɛ Dɛnaa Lawa á kɛ pii: «Haya! Ka tumaa bɛ́ ká fɔlɔ bù baa, man die ka kiɛ kɔn la Zeruzalɛmu kiwi bii.

²⁰ Wɔrɔ nɛ, zan nɛ, fɔlɔ nɛ ka fɔlɔ bù ni, maǹ bɛa mànan lɛn kiɛ kɔn la fɔlɔ yo ǹ kùsì ni, ǹ tɛ wɔ ǹ giulun, yǎa ǹ yoe. A din yɔrɔ goon la, bɛ̀ ma foo busu ka li, á yoo ka li, ma á re ka soekɔn, ma ka kaa kɔn la fɔlɔ yo ǹ kùsì kɛ nɛ, ma ka tã.

²¹ Ma á re ka soekɔn. Ma bɛ́ re maa foo-yoo lɛ a dɔlɔ mɛn diɛ ka mìi ni, a n die goɛ̃ ka tɛ bɛ́ lɔn, ma ń piɛ̃ pii a ganaa. Ma á re ka yoe ka bɛa tɛ lɛ nɛ Zeruzalɛmu kiwi lɛ bii, ka fɔlɔ bɛ́ yoe tɛ-n lɔn.

²² Wɔrɔ bɛ́ yoe a yo ǹ kùsì-n lɔn, ka dɔn tá re yoe Zeruzalɛmu kiwi lɛ gɔ́ɔ̃-n miɛ̃. Ka á re doɛ̃ ka bɛ lɛ-n kəni mà ma din nə Dɛnaa Lawa lɛa, maa foo-yoo lɛ a dɔlɔ boe ka ganaa.»

²³ Dɛnaa Lawa a da ǹ boo á ke á pɛ ma-n doo:

²⁴ Minbuiin a nɛ, a pɛ Zeruzalɛmu minin lɛn manɛ, mà ǹ gána lɛ n ka tán mɛn bɛ́ ǹ na a yoren kɔ wa. La kaa a nɛ maa foo-yoo kɛa pinaa wa.

²⁵ Kiwi lɛ a Lawa a boo gii-dalin nə́ kɔn ma boo-a. Ká yàra bɛ́ siĩ soɛ̃ lɔn, á n wɔɔsaa we la, ǹ dɔn man minin dii miɛ̃, ǹ nə́ ǹ wɔrɔ laanka ǹ gɔn mànan goɛ. Maǹ lɔ giɔɔrɔn gialaa ǹ mɔnɛɛ kiwi lɛ nɛ.

²⁶ Ǹ Lawa wúlu-bɔlen nə́ maa dí-pɛ kɛ ziziɛ̃, ǹ nə́ sàn kɔ ka maa màn sonboren ne. Màn mɛn bɛ́ maa wɔ lɛa, màn mɛn dɔ bɛ́ a ba maa wɔ lɛa wa, ǹ bɛa bɔkɔnlɛ wɔ wa. Sii *yoreen laanka a gɔgɔrɛ nɛ, ǹ bɛ dɔ a bɔkɔnlɛ nyaa minin man wa. Ǹ nə́ n yii tã maa susu ǹ piin kɛn ganaa, minin nə́ nɔmaa ǹ nə́ sàn kɔ ka ma nɛ kiwi lɛ nɛ.

²⁷ Kiwi lɛ a nyɛɛnaandɛnan man ka don ginin bɛ́ lɔn siĩ soɛ̃. Ǹ yɔrɔ boemaa nɛ gɛ̀-dɛ taman yii, maǹ minin dii, ǹ nə́ giɛ pàãmaabaa li.

²⁸ Kiwi lɛ dɔ a Lawa a boo gii-dalin man pìi koe bɛa siin lɛn lɛ. Taásiɛ kokooron laanka soɛ boon manɛ, ǹ tá ǹ pii minin manɛ: «Dɛnaa Lawa gole n kɛ pii,» a da yaa masɛ Dɛnaa Lawa boo da wa.

²⁹ Gána lɛ a minin man kakaarɛbaa ǹ sii zɛnɛɛ, ǹ nə́ wurumu dɔ biɛ. Maǹ boe nɔmaa wolen laanka doobaan yii ni, maǹ mɛnɛɛ gùli la, haalɛ ta sonbore na a lon.

³⁰ Má ga min li ǹ bii, min mɛn bɛ́ re boe la a kungɔn dɔ a kiwi lɛ lɛnpɛnɛ nɛ, hinlaa a golee kungɔn lɛ a yala koo bǎã kɛ nɛ ma nyɛɛnɛ, gána lɛ a lɛa, màn mɛn bɛ́ toɛ ma baran gána lɛ yu wa. Sɛnɛ, ma min goon din yɛ wa.

³¹ Bɛ lɛ nɛ ma foo tɔ́n yoo ǹ li, má ǹ tumaa dɛ lenlen, ka tɛ bɛ́ màn kuĩ lɔn. Má ǹ zɛnaa ǹ sii lɛ a dɔlɔ da ǹ mìi ni. Ma din Dɛnaa Lawa a da ǹ boo ne.