Ezekieli 2 - LAWA A BOO SONBORE

Lawa Ezekieli dia dí mɛn ganaa

¹ Bɛa dɛnaa lɛ tɔ́n pɛ ma nɛ: «Minbuiin a nɛ, yoo lon, n golee n gòãn la, a giala, man die boo diɛ n nɛ.»

² A bɛ́ bɛa boo lɛ diɛ ma nɛ ǹ mɛn waáraa, Lawa yiri daa wɔ ma nɛ, á ma saa á ma da lon. Min mɛn bɛ́ boo lɛ diɛ ma nɛ, má tɔ́n nə n too kɔ bɛ lon.

³ Á tɔ́n pɛ ma-n kɛnɛn: – Nsɛ minbuiin a nɛ, man die n diɛ Izirayeli minin kɛn li, bɛa piã-wɔlen kɛn lɛn ǹ nə́ n gòãn dii masɛ ganaa. Ǹ digolon nə ma bɔlɔ tii lɔn, a din lɛ n ke ǹ dɔn tá la, a da pelo kɛ lɛ yaa.

⁴ Bɛa too kaakaan kɛn lɛn sii woon zɛnaa wolen lɛa, man die n diɛ ǹ li, n wo pɛ ǹ nɛ kɛnɛn: «Dɛnaa Lawa n kɛ pii.»

⁵ Ǹ bɛ́ n piã-wɔlen lɛn lɛa, bɛ̀ ǹ nə́ n too kɔ n lon, ta ǹ nə n too kɔ ǹ lon wa, ǹ tá re doɛ̃, mà Lawa a boo gii-dali tá ǹsɛn bii.

⁶ Nsɛ minbuiin a nɛ, n nyan nyɛ́ɛ baa ǹ nɛ wa, n nyan nyɛ́ɛ baa ǹ da ǹ boon dɔn man wa. N tá kunun ǹ ni kɛ n ka min na á giã koronkoron laanka nyan bii, ka min na á giã ton kɛ la sɔn doe. N nyan nyɛ́ɛ baa ǹ da ǹ boon man wa, n nyan nyɛ́ɛ baa ǹ yii-n duduu wa. A giala, piã-wɔlen manɛ.

⁷ Sɛnɛ, maa boon kɛn pɛ ǹ nɛ, á kɔɔ̃nɛ ǹ nə n too kɔ li hinlaa ǹ baran n too kɔ li wa: Piã-wɔlen manɛ.

⁸ Nsɛ minbuiin a nɛ, masɛ bɛ́ re boo mɛn pii n ni, n too kɔ bɛ li: N nyan toa n piã-wɔle baa ka minin kɛn bɛ́ lɔn wa dɛ. Má bɛ́ re màn mɛn koe n la, n lɛ bũ n bɛ si n sɔ̃.

⁹ Ma bɛ́ giɛ, bɛ̀ gɔn goon nə́ ke dia-n ma la, ka sɛ́wɔ-munii ná a nɛ.

¹⁰ Á bɛa sɛ́wɔ lɛ lɛ bũ ma yɔrɔ-a. Màn na á goã kiɛ̃ nɛ a yɔrɔ laanka a dɔ̀ɔ̃ la. Màn mɛn goã kiɛ̃-n sɛ́wɔ lɛ nɛ, gɛ̀ loen manɛ, yɔrɔ-kɔsɛ ǹ siin ni, ka lɛ-dɛ ǹ siin ni.