Ezekieli 16 - LAWA A BOO SONBORE

Izirayeli minin sii baraa zɛnaa

¹ Dɛnaa Lawa boo da ma nɛ á pɛ:

² – Minbuiin a nɛ, Zeruzalɛmu minin giã ǹ gɔn bɔbɔnɛɛ kɛ lɛ boo da ǹ dinin manɛ.

³ N die n pɛ ǹ nɛ, ma masɛ Dɛnaa Lawa n kɛ pii Zeruzalɛmu kiwi ni. Kanaan gána nə ǹ digolon bǎã lɛa, ka n ka yɛ walan. N díi n Amɔɔrɔ tɔrɔ lɛa, n náa n Ɛti tɔrɔ lɛa.

⁴ N yɛ pinaa, ǹ nə n bùũ lɛ kuru wa. Ǹ nə n zoo mu li n bɔ wa, ǹ yìsi dɔ tuturu n ganaa wa, ǹ mɔnaa gɔnɔn pɛpɛnɛ n ganaa wa.

⁵ N yɛ pinaa gɔrɔ, min kɔn nə n makara dɔ̃ á bɛa siin kɛn lɛn kɔn zɛnaa n nɛ wa. N tìĩ bɔ ǹ nyin ni, ǹ nə́ n zũ don.

⁶ Ma bɛ́ má kiɛ̃ kunu n li, má n yɛ n dudui tán n mà li. Má tɔ́n pɛ n nɛ máa n yii goã koo, a laanɛ n tá tán mà bii. Man laa máa n yii goã koo.

⁷ Ma din nə má n da gole kɔ ganaa, ka da ten bɛ́ lɔn. N gole kɔ n woo lon, n siĩn kɔ n la yii ni. N nyɔn nə́ bɔ, ka pã n ganaa. Sɛnɛ, mɔnaa goã n ganaa wa, n gɔ̀nɔn kooro na á goã nɛ.

⁸ Bɛ kio, ma bɛ́ má wusoo má bɔ walan doo, má n yɛ. Bɛa biikoo li, bɛ̀ ń dɔ lɔbaa ganaa. Ma tɔ́n maa mɔnaa lɛkoro lɛ bɔ má kɔ n lɛ, má n sìi duru ni. Bɛ kio má n lɛ kɔ n la, má n liɛ n nɛ. Máa n masɛ wɔ baa ka bɛa yɔrɔ lɛ nɛ. Ma din Dɛnaa Lawa a da ǹ boo ne.

⁹ Má n zoo mu li, má n mà kɛ pii ka mu gigiã nɛ, ma tɔ́n nyɔɔ gìĩ kɔɔ̃n lɔ n ganaa.

¹⁰ Má mɔnaa wɔrɛɛ kɔ n la, kɔsɔ sonboren ne, maabɛlɛ kəkə ne, ka dɔnkɛ sonbore ne.

¹¹ Má nyaǹ bɔ ǹ mànan kaa n gana: Má zanan kaa n gɔn wìin-a, má gii da n bɔlɔ-a.

¹² Ma kaaran da n nyin ni, má kɛn kaa n too ne, má kiibaa ǹ bafolo sonbore wɔ n mìi-a.

¹³ N nyaǹ bɔ ǹ mànan lɛn man nə́ goã wɔrɔ laanka sana lɛa, n wɔ ǹ mɔnaan kɛn man nə́ goã mɔnaa gugurun lɛa, mɔnaa tɔrɔ sonboren lɛa, mɔnaa wɔrɛɛn lɛa. Ma nə́ n goã wùsu tɔrɔ sonbore bii, ka zoo nyɔɔ laanka *olivie nyɔɔ nɛ. Bɛ̀ lɛ na á toa n siĩn kɔ n la yii ni, n daa n gána baa.

¹⁴ N tɔ bɔ gána kɔsɔn nɛ n siĩnbaa lɛ taman yii. A giala, ma nyaǹ mànan mɛnɛn kaa n ganaa, bɛ lɛ na á toa, n siĩnbaa lɛ pã. Masɛ din Dɛnaa Lawa a da ǹ boo ne.

Zeruzalɛmu minin man ka lɔ kɔrɔ bɛ́ lɔn

¹⁵ Ma n nə́ n saa n siĩnbaa kɛ li, n tɔ a bɔ kɛ taman yii, n kɔrɔbaa zɛnaa. N nə́ n din kɔ kiɛ̃ wolen tumaa la, ń kɔrɔbaa zɛnaa kunun ǹ ni, n nə́ n goã bɛn lɛn wɔ lɛa.

¹⁶ N nə́ n mɔnaan tɛnɛn goa ń nyaǹ kaa wúlu bɔ ǹ bǎãn ganaa ka bɛn nɛ, ń naarɛbaa zɛnaa ǹ là. Bɛa sii lɛ miã bin tɔn nə n zɛnaa wa, ǹ miã dɔ din ba re n zɛnɛɛ doo wa.

¹⁷ Ma goã má nyaǹ bɔ ǹ mànan mɛnɛn kɔ n la, sana laanka wɔrɔ lɛa, ma nə́ n màn nyínin zɛnaa ka bɛn nɛ, giĩn lɛa, ń kɔrɔbaa zɛnaa kunun ǹ ni.

¹⁸ Ma n nə́ n mɔnaa wɔrɛɛn kɛn goa, n bɛn kɔ ǹ lɛ. Ma din dɔ nyɔɔ laanka da yon gìĩ kɔɔ̃n mɛn kɔ n la, n bɛn kaa tán-a ǹ yɔrɔ-a.

¹⁹ Ma goã n toe ka màn-bii mɛn nɛ, wùsu tɔrɔ sonbore kɛ nɛ, nyɔɔ nɛ, ka zoo nyɔɔ nɛ, n bɛn lɛn kaa tán-a ǹ yɔrɔ-a, nyɔɔ gìĩ kɔɔ̃n lɛa, kiɛ ǹ foo la. N màn mɛn zɛnaa, a din lɛ n ka bɛ nɛ. Ma din Dɛnaa Lawa a da ǹ boo ne.

²⁰ Zeruzalɛmu, n nɛgiĩn laanka n nɛlɔn nɛ, n nə ǹ mɛnɛn lɛn yɛ masɛ wɔn lɛa, ń wusoo ń wúlu bɔ ka bɛn nɛ, bɛa dìn lɛn ganaa. N bɛ kɔrɔbaa mɛn zɛnɛɛ, bɛ na a goã n boe wa?

²¹ N maa nɛnyaanan dɛ n dìn ganaa, n nə́ ǹ tã.

²² N sii bɔbɔnɛɛ zɛnaa kɛ lɛ tumaa laanka n kɔrɔbaa ǹ siin kɛn lɛn gɔ́ɔ̃ nɛ, n nə n yiri kɔ ka n lɛlɛ ǹ kɛ-n wa. Táa n gɔ̀nɔn kooro na á goã, n goã n din pɛsɛ̃ tán mà li.

²³ N wɔ n ka bɔ̀n nɛ, bɔ̀n woo bɔ̀n! Ma din Dɛnaa Lawa a da ǹ boo ne! A giala, n sii baraa kɛ lɛ tumaa kio,

²⁴ ń kɔrɔbaa ǹ bǎã dɔ: Bɛ n ka kaa dì wúlu bɔ ǹ bǎãn kɛn nɛ, zaman paã ǹ bǎã tumaa nɛ.

²⁵ Ń *wúlu bɔ ǹ bǎã dɔ zii tumaa a giala kɔ ǹ bǎã nɛ. N nə́ n din a siĩnbaa kɛ ziziɛ̃ walan. Ma n nə́ n din kɔ kiɛ̃ wolen tumaa la, ń wusoo ń màn da n din a kɔrɔbaa li.

²⁶ Zeruzalɛmu, n kɔrɔbaa zɛnaa kun ka Ezipti minin kɛn nɛ, n miãkɛnɛn lɛn, ǹ tɔntɔraabaa n gole. N màn da n kɔrɔbaa lɛ li, yǎa ń má foo yoo.

²⁷ Á ke, bɛ lɛ nɛ má tɔ́n yoo n gialaa, má màn-bii kurəə n ganaa. Filisiti kiwin mɛnɛn bɛ́ n zɔ́ɔn lɛa, má n wɔ bɛn gɔn, ǹ nə n foo nyɛɛ n la. N gɛsɛbaa lɛ dinmaa lɛ n sìi diɛ bɛn ganaa.

²⁸ Ma nə́ n kɔrɔbaa zɛnaa kun ka Asiirii minin kɛn nɛ, a giala mà màn ba n boe wa. Sɛnɛ, a laanɛ n kɔrɔbaa lɛ zɛnaa kunun ǹ ni, a bɛ́ a n bɔ wa.

²⁹ N kɔrɔbaa lɛ a gigiã zɛnaa *Baabilonii, pii-kɔlen gána kɛ nɛ. Sɛnɛ, bɛn lɛn dɔn dinin wɔ lɛ bɛ́ a n bɔ wa.

³⁰ E! Wàa mɛn foo tãbaa tɔrɔ n ka bɛ nɛ nsɛ lon, n bɛa siin kɛn lɛn tumaa zɛnɛɛ nɛ, kɔrɔbaa nə nsɛ a dí lɛa! Ma din Dɛnaa Lawa a da ǹ boo ne.

³¹ N bɛ́ kɔrɔbaa ǹ bǎãn kɛn doe, dì wúlu bɔ n bǎãn kɛn, ziin tumaa a giala kɔ ǹ bǎãn nɛ, zaman paãn bǎã tumaa nɛ, n bie n zɛnaa ka lɔ kɔrɔn kɛn dɔn dinin wɔ bɛ́ lɔn wa. N lɛ kɔ saraa ganaa wa.

³² Ma n ka lɔ naarɛ bɛ lɔn, n nə́ n din zuũ kɛ toɛ walan, n nə́ giĩ kɔsɔn si.

³³ Maǹ màn koe lɔ kɔrɔ tumaa la, sɛnɛ, nsɛ nə n màn kɔ n tɔntɔraan lɛn tumaa la. N nə́ ǹ saraa, màn mɛn bɛ́ toɛ ǹ bɔ bǎã tumaa nɛ, bɛ̀ ǹ da giã kunun n ni.

³⁴ Nsɛ nə́ n kɔrɔbaa lɛ a zɛnaa ǹ gɔn bɔyaa, n bɔ n miã lɔn wɔ li. Min kɔn goã baa sii n kio mà n nə n lɔ kɔrɔ lɛa wa, n din nə n goã n tɔntɔraan lɛn pii ka wɔrɔ nɛ. Ǹsɛn bɛ́ ǹ goã màn kɔn koe n la wa, sii làfu ni, n goã zɛnɛɛ.

³⁵ Nsɛ Zeruzalɛmu, lɔ kɔrɔ, n too kɔ Dɛnaa Lawa a boo ganaa kəni:

³⁶ Masɛ Dɛnaa Lawa n kɛ pii: N bɛ́ n kɔrɔbaa lɛ zɛnɛɛ kun ka tɔntɔraan laanka dì bɔbɔnɛɛn kɛn tumaa nɛ, ma nə n goã n nə́ n sɔlɔ n nə́ n tontoro da. Haalɛ n din a nɛnyaanan kɛn, n bɛn dɔn kɔ ǹ la.

³⁷ Á ke, a bɛ́ miɛ̃, n sii kɔɔ̃n kɔ tɔntɔraan mɛnɛn tumaa ganaa, n nə ǹ mɛnɛn tumaa narɛ, ka ǹ mɛnɛn tumaa bɛ ǹ kɔɔ̃n kɔ n ganaa wa, ma á re ǹ tumaa soekɔn. Ma á re n tontoro diɛ ǹ yɔrɔ-a. Ǹ tá re n sìi tumaa yii.

³⁸ Lɔ naarɛn laanka ǹ mɛnɛn bɛ́ gɛ̀ dii, bɛn doamaa bɛ́ ka dɔlɔ mɛn nɛ, ma á re bɛ lɛ tɔrɔ diɛ n mìi ni. Ma á re mà boe n ganaa maa foo yoo kɛa pinaa, a giala ń ma sã.

³⁹ Ma á re n we ǹ gɔn. Ma á re n kɔrɔbaa ǹ bǎãn kɛn dii ma ǹ kaa, n wúlu bɔ ǹ bǎãn kɛn. Ǹ tá re n mɔnaan kɛn sɔlɛɛ ǹ nə ǹ bɔ n ganaa, ǹ nə n nyaǹ bɔ ǹ màn sonboren kɛn si n la, ǹ nə n gɔ̀nɔn kooro fulupaa da bii-a.

⁴⁰ Ǹ tá re zaman kiɛ n ganaa, ǹ kɔlɔ kaã bɔ n ganaa, ǹ nə n kakã ka ǹ gɔya san kɛn nɛ.

⁴¹ Ǹ tá re n kionən tiɛ̃. N doamaa bɛ́ ka dɔlɔ mɛn nɛ, ǹ tá re bɛ boe n ganaa lɔ damata yii ni. Ma á re n kurii n kɔrɔbaa kɛ lɛ ganaa, n nə́ n ba re boe la n min din saraa doo wa.

⁴² Man die n foo nyɛɛ n la. Bɛ̀ maa zia nya á n bɔ n ganaa ǹ mɛn waáraa, ma foo á re basɛ̃, a re yui doo wa.

⁴³ A giala, n nə n taasɛ n lɛlɛ ǹ kɛ-n wa. Bɛ lɛ nɛ, n sii kɛ lɛ tumaa zɛnaa n masɛ foo yoo ne. Bɛ lɛ nɛ, má n zɛnaa ǹ sii kɛ lɛ a dɔlɔ da n din mìi ni. Ma din Dɛnaa Lawa a da ǹ boo ne. Táa ma nə n bɛa sii gɔgɔrɛ kɛ lɛ zɛnaa n da n zɛnaa ǹ sii bɔbɔnɛɛn kɛn lɛn la.

Zeruzalɛmu a bɔnɛɛbaa la kiwi kialakunun wɔ nɛ

⁴⁴ A ke, suusu-dalin tumaa á re suusu kɛ diɛ n ganaa: «Náa bɛ́ lɔn, a nɛ dɔ n goɛ̃ miɛ̃!»

⁴⁵ Lɔ mɛn nə́ ke ǹ zuũ laanka a nɛgiĩn tìĩ bɔ a nyin ni, n nə n bɛa nɛlɔ lɛa. N dɔɔ̃nlɔn dɔn man miɛ̃. N dɔn zuũn laanka ǹ nɛgiĩn tìĩ na á bɔ ǹ nyin ni. Ka dan na á goã Ɛti tɔrɔ lɛa, ka di na á goã Amɔɔrɔ tɔrɔ lɛa.

⁴⁶ N gololɔ n ka Samarii kiwi kɛ nɛ gɔsɛ a lɛ̀gɔn la, kun ka a lɛkoro lɛ-a kiwin ni. N diɛ̃lɔ n ka Sodɔmu kiwi kɛ nɛ gusin a lɛ̀gɔn la, kun ka a lɛkoro lɛ-a kiwin ni.

⁴⁷ N bie n kɔ ǹ zɛnaa ǹ siin kɛn dininsɔɔ̃nɔn lɛ wa, n bie n sii bɔbɔnɛɛn kɛn dininsɔɔ̃nɔn zɛnaa wa. A n ka ma nə n màn kɔn din zɛnaa wa. N zɛnaa ǹ sii lɛ baraa kɔ á la ǹ wɔ nɛ.

⁴⁸ A ma toa ma yii n koo, ma din Dɛnaa Lawa a da ǹ boo ne, n din Zeruzalɛmu laanka n lɛkoro-a kiwin nə sii baraa mɛn zɛnaa, n dɔɔ̃nlɔ Sodɔmu kiwi kɛ laanka a lɛkoro-a kiwin nə bɛ din zɛnaa wa.

⁴⁹ Á ke, ǹ dɔɔ̃nlɔ Sodɔmu laanka a lɛkoro lɛ-a kiwin sii baraa n ka kɛ nɛ: Maǹ nə́ goã n dinin gole koe. A giala, maǹ nə́ kã, ǹ nə́ là nyantoro la, ǹ ba n taasɛ ka sii kɔn nɛ wa. Ǹ nə n dɔ doobaan laanka nɔmaa wolen lɛ wa.

⁵⁰ Maǹ nə́ n dinin saa lon, sii mɛn bɛ́ bɔbɔnɛɛ ma yii li, maǹ nə́ bɛ zɛnaa. Bɛ lɛ na á toa má ǹ dɛ má ǹ bɔ kanaa ka n yii bɛ́ a ganaa lɔn.

⁵¹ Samarii kiwi din nə n sii baraan kɛn talɛɛ zɛnaa wa. N sii bɔbɔnɛɛ zɛnaa lɛ la a wɔ nɛ. Bɛ̀ a n saa a zɔɔ̃ kɔn lɛa ka Sodɔmu laanka Samarii wɔ kɛ nɛ, n dɔɔ̃nlɔn kɛn, a n ka bɛn dinin nə màn kɔn zɛnaa wa.

⁵² Táa nsɛ nə n goã n dɔɔ̃lɔn lɛn zɛ̀rɛ biɛ? A da yaa, n din bɛ́ sii bɔbɔnɛɛ mɛn zɛnɛɛ, á la ǹ wɔ kɛ nɛ. N sii baraan lɛn taman yii, n din nə n toɛ̃ ka a sìi-n kəni! N din a zɛnaa ǹ sii na á nyaa, mà n dɔɔ̃lɔn lɛn tá pepere ǹ nə́ la n nɛ. Sìi laanka puusəbaa lɛ n doe n din ganaa sisia. A giala, n din a zɛnaa ǹ sii na á nyaa, mà n dɔɔ̃lɔn lɛn tá pepere ǹ nə́ la n nɛ.

⁵³ Ma á re wusii ma Sodɔmu laanka a lɛkoro lɛ-a kiwin giã ǹ gɔn bɔyaa, ma Samarii laanka a lɛkoro lɛ-a kiwin giã ǹ gɔn bɔyaa. Ma á re Zeruzalɛmu dɔ laanka a lɛkoro lɛ-a kiwin giã ǹ gɔn bɔyɛɛ,

⁵⁴ màn mɛn bɛ́ toɛ, n sii mɛn tumaa zɛnaa, bɛ lɛ a sìi nə n kũ, n nə n toɛ̃ ka n sìi ni. Bɛ á re n dɔɔ̃nlɔn lɛn foo basɛ̃.

⁵⁵ Sodɔmu ni, Samarii ni ka ǹ lɛkoro lɛ-a kiwin ni, n dɔn tá re wusii ǹ nə n baa ka ǹ lɛlɛ ǹ bɛ́ lɔn. N dɔ laanka n lɛkoro lɛ-a kiwin ni, ka dɔn tá re wusii ka n baa ka kaa lɛlɛ ǹ bɛ́ lɔn.

⁵⁶ N din-koa lɛ a waáraa, táa ma nə n goã n dɔɔ̃nlɔ Sodɔmu lɛ piɛ̃ boe.

⁵⁷ Bɛa biikoo li, bɛ̀ n baraabaa lɛ tɔn soo kanaa wa. Edɔmu kiwi laanka a lɛkoro lɛ-a minin nə́ ke sɔ kiɛ n dɔ la kanna, Filisiti kiwin nə́ ke n piɛ̃ boe.

⁵⁸ N sii baraan laanka sii bɔbɔnɛɛn mɛnɛn zɛnaa, bɛn dɔlɔ tá n mìi ni. Ma din Dɛnaa Lawa a da ǹ boo ne.

⁵⁹ Masɛ Dɛnaa Lawa n kɛ pii: N sii mɛn zɛnaa, man die bɛ lɛ miã zɛnɛɛ n nɛ. A giala, n liɛ mɛn wɔ, n bɛ baa sii lɛa wa, n lɛ kɔ kɔn la lɛ ziziɛ̃.

⁶⁰ Sɛnɛ, ma lɛ kɔ kɔn la mɛn wɔ ka n nɛ n tenmaa waáraa, ma á re n yiri koɛ bɛ li. Man die lɛ kɔ kɔn la duduu we ka n nɛ.

⁶¹ Bɛ̀ n kɔn yɛ ka n gololɔn laanka n diɛ̃lɔn kɛn nɛ, n yiri á die gisĩ ka n din a zɛnaa ǹ sii kɛ nɛ, bɛ á re sìi biɛ n ganaa. Ma á re ǹ kiɛ n pàã giulun, a laanɛ wɔ bɛ pɛ kɔn nɛ lɛ kɔ kɔn la lɛ gɔ́ɔ̃-n wa.

⁶² Zeruzalɛmu, ma á re wusii ma lɛ kɔ kɔn la wɔ ka n nɛ. N tá re doɛ̃ ka bɛ lɛ-n kəni, mà ma din nə Dɛnaa Lawa lɛa.

⁶³ Bɛa biikoo li kəni, n yiri á die gisĩ ka lɛlɛ ǹ kɛ nɛ. Sìi á re n kuĩ, n yii din ba re we, n nə n lɛ bũ n boo da wa. Sɛnɛ, n sii baraa mɛn tumaa zɛnaa, ma á re ǹ toɛ n nɛ. Ma din Dɛnaa Lawa a da ǹ boo ne.