Ezekieli 11 - LAWA A BOO SONBORE

Zeruzalɛmu a dɔlɔ

¹ Dɛnaa Lawa yiri ma saa. Lawa a kion lɛ a kiɛnlɛ mɛn yɔrɔ bɛ́ dia-n lɛ̀giala li, á woo ma-n walan. Giĩ fuəwensooro (25) na á goã bɛa kiɛnlɛ lɛ lɛ-a. Bɛn bii, má Azuuru a nɛgiĩ Yazaniya laanka Benayawuu a nɛgiĩ Pelatiyawuu yɛ, zaman lɛ a nyɛɛnaandɛnan min paa lɛa.

² Lawa yiri tɔ́n pɛ ma nɛ: – Nsɛ minbuiin a nɛ min mɛnɛn bɛ́ n taasɛ ka sii kɔkɔrɔ zɛnaa-n kiwi lɛ nɛ, ǹ nə́ yiri kɔkɔrɔ koe minin la, ǹ dinin man ka kɛn nɛ.

³ Maǹ pii: «Kion-dɔ biikoo bie ke wa. Kiwi lɛ n fɔlɔ donkolon lɛa, wɔsɛn man siĩ lɛa a nɛ.»

⁴ Bɛ lɛ taman yii, nsɛ minbuiin a nɛ, maa boo gii da ǹ nɛ. A da ǹ nɛ koe!

⁵ Dɛnaa Lawa yiri daa ma kũ, á pɛ ma nɛ: – Wo boo kɛ pɛ: «Masɛ Dɛnaa Lawa n kɛ pii: Izirayeli minin lɛn, ka bɛ́ màn mɛn diɛ, ma á miɛ. Sii mɛn bɛ́ ka yiri ni, ma á doɛ̃.

⁶ Ka min gigiã dɛ kiwi lɛ nɛ, gere n tán zii la bǎã yii ni.

⁷ Bɛ lɛ na á toa masɛ Dɛnaa Lawa á pii: Kiwi lɛ n ka fɔlɔ donkolon bɛ́ lɔn sonbore. Ka min mɛnɛn lɛn dɛ ka ǹ kaa tán-a a nɛ, siĩ lɛ n ka bɛ nɛ. Sɛnɛ, ma á re kasɛn wɛɛ ma soo ka nɛ.

⁸ Táa ka n nyɛ́ɛ biɛ zia nɛ? A bɛ́ miɛ̃ masɛ á re zia diɛ ka la. Ma din Dɛnaa Lawa a da ǹ boo ne.

⁹ Má á re ka lui ma ka bɔ kiwi lɛ nɛ, ma ka kɔ tɔrɔ kɔsɔn la, ma maa dɔlɔ kɛ bɔ ka ganaa.

¹⁰ Ka á re giɛ̃ zia la. Man die maa dɔlɔ lɛ boe ka ganaa Izirayeli gána din ni. Ka á re doɛ̃ kəni, mà ma din nə Dɛnaa Lawa lɛa.

¹¹ Kiwi kɛ lɛ a re kaa fɔlɔ donkolon biɛ, ka dinin nə́ siĩ lɛa a nɛ wa. A giala, man die maa dɔlɔ lɛ boe ka ganaa Izirayeli gána lɛ din ni.

¹² Ka á re doɛ̃ bɛa biikoo li kəni, mà masɛ din nə Dɛnaa Lawa lɛa. Á ke, maa landa boon kɛn, ka kɔ bɛn lɛ wa, ka maa sii yɔrɔ bɔ ǹ boon kɛn dɔn tamaa wa. A giala, tɔrɔ kɔsɔn mɛnɛn bɛ́ ka lɛnpɛnɛ, ka n ka bɛn sii zɛnaa ǹ gɔn saa.»

¹³ A ma toa Lawa a boo gii lɛ diɛ, Benayia a nɛgiĩ Pelatia gã. Má tɔ́n bɔ má mɛnaa tán ma lɛ la, má n lɛ dɛ kɔsɛkɔsɛ má pɛ: «E, Dɛnaa Lawa! Izirayeli minin mɛnɛn nə goã, man die bɛn dɔn tumaa dii?»

Lawa n wusii a zaman soekɔn

¹⁴ Dɛnaa Lawa a boo dɔ ma li á pɛ:

¹⁵ – Nsɛ minbuiin a nɛ, n dɔɔ̃nɔn lɛn tumaa, n dikion minin ni, Izirayeli tɔrɔn lɛn kuturu, Zeruzalɛmu minin lɛn man pii ka nɛ: «Ka n wɔlɔ lui Dɛnaa Lawa ganaa, a giala, gána kɛ lɛ na á n kɔ wɔsɛn dinin la.

¹⁶ Bɛ lɛ taman yii, Dɛnaa Lawa mà ma kɛ pɛ ma nyaa goa wolen lɛn manɛ: Má woo ka nɛ tɔrɔ kɔsɔn bii sɔsɔɔ, má ka pɛsɛ̃ gána kɔsɔn nɛ, a laan bɛ yii ni, ma á kun ka nɛ walan, ka maa kion kɛ n kun ka ka nɛ.

¹⁷ Bɛ lɛ nɛ, á pɛ ǹ nɛ mà masɛ Dɛnaa Lawa n kɛ pii: Ma ka pɛsɛ̃ tɔrɔn mɛnɛn bii ka gána kɔsɔn nɛ, ma á re ka wɛɛ walan, ma ka sɔkɔn, ma Izirayeli gána lɛ kɔ ka la.

¹⁸ Bɛ̀ ká dɔ, dì guguru kɔ ǹ mànan tumaa, ka ǹ bɛ́ sii bɔbɔnɛɛ zɛnɛɛ ka mànan mɛnɛn tumaa nɛ, ka bɛn goa, ka ǹ bɔ gána lɛ nɛ.

¹⁹ Ma á re foo dii koe ka la, ma yiri dii kɔ ka la. Foo kakabaa mɛn bɛ́ ka nɛ ka kɔlɔ bɛ́ lɔn, ma á re bɛ boe ma minbuiin nɛ baa ǹ foo basiɛ̃ kɔ ka la.

²⁰ Man die bɛ zɛnɛɛ màn mɛn bɛ́ toɛ, ka kɔ maa landa boon kɛn lɛ, ka maa sii yɔrɔ bɔ ǹ boon kɛn tamaa, kaa tɔ wɔ kɔn pɛ ǹ nɛ. Ka á re goɛ̃ maa zaman lɛa, ma dɔ á re goɛ̃ ka dɔn Lawa lɛa.

²¹ Sɛnɛ, min mɛnɛn taasiɛ bɛ́ tɔn doa-n dì mànan laanka sii bɔbɔnɛɛn kɛn ganaa, ma á re bɛn zɛnaa ǹ siin lɛn dɔlɔ diɛ ǹ dinin mìi ni. Ma din Dɛnaa Lawa a da ǹ boo ne.»

²² Lon màn yiikoonaan lɛn nə́ n nyàan lɛ bɔ. Wotoro gòãn lɛn dɔn nə́ yoo kunun ǹ ni. Izirayeli tɔrɔn Lawa lɛ a siĩnbaa na á goã ǹ lalan lon.

²³ Dɛnaa Lawa a siĩnbaa yoo á n bɔ kiwi lɛ gɔ́ɔ̃ nɛ, á woo mɛ kele kɛ la Zeruzalɛmu a lɛ̀giala-n.

²⁴ Lawa yiri daa ma saa á woo ma nɛ goa wolen lɛn li *Baabilonii gána nɛ. Lawa yiri na a bɛ nyaa ma nɛ sii-nyaa gɔ́ɔ̃ nɛ. Ma yii goã màn mɛn ganaa, bɛ daa á papaã á n bɔ ma lalan.

²⁵ Dɛnaa Lawa goã á màn mɛn nyaa ma nɛ, má bɛ tumaa boo da goa-wolen lɛn manɛ.