Ezekieli 10 - LAWA A BOO SONBORE

Lawa nə́ n din nyaa Ezekieli ni doo

¹ Labara mɛn goã lon màn yiikoonaan lɛn mìi la, masɛ Ezekieli goã giɛ bɛ ganaa. Ma bɛ́ giɛ, bɛ̀ kɔlɔ sonbore goon nə́ ke, tɛ pii ka kii dankan bɛ́ lɔn.

² Mɔnaa gole goã giĩ mɛn lɛ ganaa, Lawa tɔ́n pɛ bɛ nɛ: «Bɔ wotoro gòãn lɛn bii, lon màn yiikoonaan lɛn giulun, n wo n gɔn pã tɛ nàn kɛ nɛ lon màn yiikoonaan lɛn bii, n pɛsɛ̃ Zeruzalɛmu kiwi lɛ la.» Giĩ lɛ kiɛ̃, á wɔ ma din yii ni.

³ Giĩ lɛ bɛ́ we, bɛ̀ lon màn yiikoonaan lɛn man Lawa a kion lɛ a gusin a lɛ̀gɔn la, tɛmaa kɛ n sumu gɔ́ɔ̃ piɛ̃.

⁴ Dɛnaa Lawa a siĩnbaa yoo á n bɔ lon màn yiikoonaan lɛn la, á woo kion lɛ a kiɛnlɛ-a. Kion lɛ gɔ́ɔ̃ ná goã piɛ̃-n ka tɛmaa nɛ, a sumu gɔ́ɔ̃ kɛ dɔ na á goã piɛ̃-n ka Dɛnaa Lawa a siĩnbaa kɛa tɛ-pɛ nɛ.

⁵ Lon màn yiikoonaan lɛn dɔn nyàa ka wuu na á goã boe ka Pàãyiidɛnaa kɛa boo-diɛ lɛn bɛ́ lɔn, á woo yǎa sumu gɔ́ɔ̃ kɛ nɛ kanaa.

⁶ Giĩ lɛ na á goã golee-n wotoro gòã lɛ goon li. A na á goã á woo golee walan, bɛ̀ Lawa bɛ́ á goã á pɛ nɛ, mà a bɔ wotoro gòãn lɛn bii, a tɛ bɔ a soo ne lon màn yiikoonaan lɛn bii.

⁷ Lon màn yiikoonaa lɛ goon nə́ n gɔn wɔ tɛ lɛ nɛ a din genli, á tɛ nàn lɛ kɔn bɔ. Á tɛ nàn lɛ kaa bɛa giĩ lɛ gɔn. A dɔ́ si, yǎa a soo.

⁸ Bɛa biikoo li, màn kɔn nə́ bɔ lon màn yiikoonaan lɛn nyàa giulun ka minbuiin nɛ gɔn bɛ́ lɔn.

⁹ Má ga doo, bɛ̀ wotoro gòã sii á ke lon màn yiikoonaan lɛn li. Wotoro gòã goon na á goã ǹ gogoonmaa li. Wotoro gòãn lɛn man nə́ goã tɛ pii, ka kɔlɔ kùsidɛnaa giɔ̀mɔ kaka-a kɛ bɛ́ lɔn.

¹⁰ Bɛ̀ n nə́ ǹ yɛ, ǹ tumaa n goon ǹ siimaa tumaa n ka maǹ we-n kɔn nɛ.

¹¹ Bɛ̀ ǹ tá tɔ we, ǹ tá boe la ǹ wo ǹ wàã sii tumaa li, bɔyaa sii ná a ba a-n wa. Sɛnɛ, lon mán yiikoonaan lɛn yɔrɔ bɛ dia-n bǎã mɛn la, maǹ woe walan, bɔyaa sii ná a ba a-n wa.

¹² Lon màn yiikoonaan lɛn gɔ̀nɔn tumaa, ǹ dɔ̀ɔ̃ nɛ, ǹ gɔnɔn nɛ, ǹ nyàan nɛ, ǹ paǹ tumaa na á goã yii nàn lɛa, ka ǹ wotoro gòã sii kɛ lɛ dɔ nɛ.

¹³ Má lɛn ma á tɔ kɔ wotoro gòãn lɛn ganaa: «Kurunkurun.»

¹⁴ Lon màn yiikoonaan lɛn gogoonmaa yɔrɔ na á goã sii: Yɔrɔ lɛ a bibinaa kɛ n lon màn yiikoonaa wɔ lɛa, a paabaa ǹ wɔ n minbuiin nɛ wɔ lɛa, a sɔɔbaa ǹ wɔ n yàra wɔ lɛa, a siibaa ǹ wɔ n giogialatã-a wɔ lɛa.

¹⁵ Lon màn yiikoonaan lɛn nə́ yoo lon. A din mànan lɛn manɛ, má goã má ǹ yɛ Kebaara tà lɛ-a.

¹⁶ Bɛ̀ lon màn yiikoonaan lɛn tá woe, wotoro gòãn lɛn dɔn man nə́ goã tɔ we ǹ wàã li. Bɛ̀ ǹ nə́ n nyàan lɛ bɔ ǹ nə́ yui n boe tán, wotoro gòãn lɛn nə goã n niɛ ǹ ganaa wa.

¹⁷ Bɛ̀ ǹ nə́ golee, wotoro gòãn lɛn dɔn man golee. Bɛ̀ ǹ nə́ yoo, wotoro gòãn lɛn man yui kunun ǹ ni. A giala, màn mɛn bɛ́ á goã woe ka màn yiikoonaan lɛn nɛ, a din lɛ dɔ na á goã woe ka wotoro gòãn lɛn nɛ.

Dɛnaa Lawa a gugurubaa yoo á n bɔ kion sonbore lɛ la

¹⁸ Dɛnaa Lawa a siĩnbaa yoo á n bɔ a kion lɛ a kiɛnlɛ-a, á woo mɛ lon màn yiikoonaan lɛn la.

¹⁹ Bɛa biikoo li, lon màn yiikoonaan lɛn nə́ n nyàan lɛ bɔ, ǹ nə́ yoo ǹ nə́ n bɔ tán. Ǹ nə́ soo kun ka wotoro gòãn lɛn nɛ ma din yii ni. Dɛnaa Lawa a kion ke dia-n lɛ̀giala gɔn la, ǹ nə́ woo golee bɛa kiɛnlɛ-a, Dɛnaa Lawa a siĩnbaa lɛ woo golee lon màn yiikoonaan kɛn lalan.

²⁰ Ma goã má màn yiikoonaan mɛnɛn yɛ Izirayeli a Lawa a siĩnbaa lɛ giulun Kebaara tà lɛ-a, ǹ dinin lɛn manɛ. Má dɔ̃ bɛa biikoo li, máa lon màn yiikoonaan manɛ.

²¹ Lon màn yiikoonaan lɛn gogoonmaa yɔrɔ na á goã sii, ǹ nyàa dɔ n sii. Màn na á goã ǹ nyàan lɛn giulun, ka minbuiin nɛ gɔn bɛ́ lɔn.

²² Ma goã má màn yiikoonaan mɛnɛn yɛ Kebaara tà lɛ-a, ǹ yɔrɔn lɛn man nə́ goã ka bɛn wɔ bɛ́ lɔn. Ǹ gogoonmaa na á goã woe a din nyɛɛn perepere.