Bɔ bɛ̀rɛbaa nɛ 8 - LAWA A BOO SONBORE

¹ Dɛnaa pɛ Muizu ni: «A pɛ Aarɔn nɛ, mà a n gɔn saa lon, ka a bàlà lɛ nɛ, a dia tà laanka piɛɛrɛnɛn lɛn la, a toa sɔmɔnɔn nə soo ǹ kaa Ezipti gána lɛ nɛ.»

² Aarɔn nə́ n gɔn saa lon á dia Ezipti gána a mu bǎãn lɛn la, sɔmɔnɔn nə́ soo ǹ nə́ kɔ gána lɛ tumaa lɛ.

³ Sɛnɛ, kɔ́lɔnbaalin lɛn dɔn nə́ bɛ lɛ miã zɛnaa ka ǹ boo sii la ǹ pàã baraa kɛ nɛ. Ǹ dɔn nə́ toa sɔmɔnɔn nə́ soo ǹ nə́ kaa Ezipti gána lɛ nɛ.

⁴ *Faarahɔn lɛ dia Muizu laanka Aarɔn la, á pɛ: «Ka Dɛnaa lɛ nyankɔ, a sɔmɔnɔn kɛn wɔlɔ lui, á ǹ bɔ ma laanka maa gána minin ganaa, ma á re toɛ zaman lɛ soo a wo *wúlu màn bɔ a kɔ Dɛnaa la.»

⁵ Muizu pɛ Faarahɔn nɛ kɛnɛn: «N din nə Lawa nyankɔ ǹ biikoo lɛ bɔ, ma boo la ma Lawa nyankɔ n lɛa, ka n kiodɛnan nɛ ka n gána minin tumaa nɛ, màn mɛn bɛ́ toɛ, a sɔmɔnɔn lɛn papaã a ǹ bɔ ka ganaa, a ǹ bɔ kaa kionən ne, ǹ gialakun dinsɔɔ̃ boo la ǹ goã tà mu li.»

⁶ Faarahɔn pɛ mà biɛ̃. Muizu dɔ pɛ: «Ka n bɛ́ n pɛ lɔn, man die zɛnɛɛ miɛ̃, màn mɛn bɛ́ toɛ, n dɔ̃ mà min kɔ́n ba n zoɛ̃ kɔn ka wɔsɛn Dɛnaa Lawa lɛ-n wa.

⁷ Sɔmɔnɔn lɛn tá re n boe n ganaa, ǹ nə n bɔ n kionən ne, ǹ nə n bɔ n kiodɛnan ganaa ka n gána minin ni, ǹ gialakun dinsɔɔ̃ goã tà mu li.»

⁸ Muizu laanka Aarɔn soo ǹ nə́ n bɔ Faarahɔn li, Muizu Dɛnaa nyankɔ sɔmɔnɔn lɛn sii ganaa, a sɔmɔnɔn mɛnɛn kaa Faarahɔn ganaa, ǹ nə́ nɔmaa.

⁹ Dɛnaa Muizu a nyankɔ lɛ si, á zɛnaa miɛ̃. Sɔmɔnɔn lɛn nə́ gã, ǹ nə́ papaã ǹ nə́ n bɔ kionən ne, sumun ni, ka wurun ni.

¹⁰ Ǹ nə́ ǹ geren goa ka giãgiãgiã. A gìĩ na á goã boe gána lɛ paǹ tumaa ganaa.

¹¹ Faarahɔn bɛ́ á yɛ mà dɔlɔ sii lɛ nya, á n too kaka kɔ doo. A n too kɔ Muizu laanka Aarɔn lon wa, ka Dɛnaa din bɛ́ á goã á pɛ lɔn.

(3) Nyɔɔnyaanan soo

¹² Dɛnaa pɛ Muizu ni kɛnɛn: «A pɛ Aarɔn nɛ, mà a na a bàlà lɛ saa lon a tán tii duwəə, á re n biɛ nyɔɔnyaanan lɛa Ezipti gána lɛ din tumaa nɛ.»

¹³ Ǹ nə́ zɛnaa miɛ̃. Aarɔn nə́ n gɔn saa lon, ka a bàlà lɛ nɛ, á tán tii lɛ duwəə. Yǎa nyɔɔnyaanan nə́ yoo ǹ nə́ kaa minin laanka tɔɔn ganaa. Tán tii lɛ tumaa nə́ n bɔyaa, á nyɔɔnyaanan baa Ezipti gána lɛ tumaa nɛ.

¹⁴ Kɔ́lɔnbaalin lɛn dɔn ná a lɛn zɔɔ̃, mà maǹ nyɔɔnyaanan boe, sɛnɛ, ǹ boo la wa. Nyɔɔnyaanan lɛn nə́ goã minbuiinin laanka tɔɔn ganaa.

¹⁵ Kɔ́lɔnbaalin lɛn nə́ pɛ Faarahɔn nɛ: «Lawa a dí n ka kɛ nɛ.» Sɛnɛ, Faarahɔn too goã a kakabaa gɔ́ɔ̃ nɛ. A n too kɔ Muizu laanka Aarɔn lon wa, ka Dɛnaa bɛ́ á goã á pɛ lɔn.

(4) Nyuun sɔn-dɔlen soo

¹⁶ Dɛnaa pɛ Muizu ni: – Yoo baayɛlɛ lɛlɛ, n wo n din nyaa Faarahɔn nɛ, bɛ̀ á re soe á woe tà mu lɛ-a. N pɛ nɛ: «Dɛnaa n boo diɛ kɛnɛn: Toa maa zaman lɛ soo a wo dí nya ma nɛ.

¹⁷ Bɛ̀ n toa maa zaman lɛ woo wa, man die nyuun sɔn-dɔlen diɛ n la, ka n kiodɛnan nɛ, ka n gána minin ni. Ǹ tá re n kionən piɛ̃, ka Ezipti gána minin kionən ne, haalɛ ka bɛ́ tán mɛn la, bɛ lɛ dɔ din tá re piɛ̃ ǹ nɛ.

¹⁸ Bɛa pinaa kɛ nɛ, ma á re Gosɛnɛ gána kɛ a sii boe a gɔrɔn, a giala, maa zaman lɛ n walan. Nyuun sɔn-dɔlen ba re goɛ̃ walan wa, màn mɛn bɛ́ toɛ, n dɔ̃ mà masɛ din Dɛnaa lɛ, mà ma tan haalɛ n gána lɛ din ni.

¹⁹ Ma á re min bɔ sii ni ǹ dí nyɛɛ, ma ma din a zaman kɛ na, ma bɔ n wɔ ganaa. Bɛa sii lɛ n die n zɛnɛɛ biɛ̃.»

²⁰ Dɛnaa sii lɛ zɛnaa miɛ̃. Nyuun sɔn-dɔlen nə́ daa kun ka giãgiã Faarahɔn a kionən ne, a kiodɛnan kionən ne, gána lɛ tumaa nɛ. Gána lɛ paǹ tumaa ziziɛ̃ nyuun sɔn-dɔlen lɛn gɔn.

²¹ Faarahɔn lɛ dia Muizu laanka Aarɔn la, á pɛ kɛnɛn: «Ka wo wúlu màn bɔ ka kɔ kaa Lawa lɛ la. Sɛnɛ, ka zɛnaa gána lɛ-n kànaa.»

²² Muizu pɛ nɛ: «A siĩni a n zɛnaa miɛ̃ wa, a giala, wɔsɛn bɛ́ màn mɛn boe, wɔ́ n koe wɔa Dɛnaa Lawa lɛ la, wúlu màn lɛa, bɛ n *gɔ̀ màn lɛa Ezipti minin gɔn. Ǹ bɛ́ giɛ màn mɛn-a gɔ̀ màn lɛa, wɔ á re boe la wɔ bɛ bɔ, wɔ kɔ Dɛnaa la, bɛ̀ ǹ nə́ ǹ ba wɔ dii ka kɔlɔ-n wa?

²³ Wɔ doamaa nɛ wɔ lɛawaa sɔɔ zii tɔ wɔ don bii, wɔ wo wúlu màn lɛ bɔ, wɔ kɔ wɔa Dɛnaa Lawa la walan. Wɔ á re zɛnɛɛ ka a din bɛ́ re pii wɔ-n lɔn.»

²⁴ Faarahɔn pɛ: «Ma á re toɛ ka wo wúlu màn lɛ bɔ, ka kɔ kaa Dɛnaa Lawa lɛ la don bii. Sɛnɛ, sii goon toto n ke, ka baran wo sɔsɔɔ wa dɛ! Ka Lawa nyankɔ maa lɛa.»

²⁵ Muizu pɛ: «Sonbore, man die soe man bɔ n li, ma Dɛnaa nyankɔ, biɛ̃ gɔrɔ nyuun sɔn-dɔlen lɛn tá re woe ǹ nə n bɔ n ganaa, ka n kiodɛnan nɛ, ka n gána minin ni. Sii goon nə́ ke, n bɛ́ sàn mɛn koe ka zaman kɛ nɛ, n nə n ba toɛ ǹ nə́ soe woe wúlu boe wɔa Dɛnaa-n wa, bɛ toa walan.»

²⁶ Muizu soo á n bɔ Faarahɔn li, á woo Dɛnaa nyankɔ.

²⁷ Dɛnaa dí nya á kɔnpɛ ka Muizu a gòã kuĩ diɛ lɛ nɛ. Nyuun sɔn-dɔlen lɛn nə́ n bɔ Faarahɔn ganaa, ka a kiodɛnan nɛ, ka a gána minin ni. Nyuunun lɛn giala kɔ́n din goã wa.

²⁸ Haalɛ ka bɛ lɛ dɔ nɛ, Faarahɔn nə́ n too kaka kɔ, a toa zaman lɛ soo á woo wa.