Bɔ bɛ̀rɛbaa nɛ 6 - LAWA A BOO SONBORE

¹ Dɛnaa pɛ Muizu ni: «Kanna kəni, ma bɛ́ re màn mɛn zɛnɛɛ *Faarahɔn nɛ, n tá re bɛ yii. Ma á re sii nyɛɛ a yii ni, á re toɛ ka woo. Ma á re sii nyɛɛ a yii ni, á re ka lui dinin, a ka bɔ a gána nɛ.»

Lawa nə n lɛ kɔ Muizu la lɔn mà asɛ á re Izirayeli kirisibiɛ

² Lawa boo da Muizu ni, á pɛ-n kɛnɛn: «Ma din nə "Dɛnaa Lawa" lɛa.

³ Má n din nyaa Abrahamu ni, Izaaki laanka Zakɔba nɛ, "Lawa Pàãyiidɛnaa" lɛa, sɛnɛ, ma tɔ ke "Dɛnaa" ke, man din nyaa ǹ nɛ ka bɛ-n wa.

⁴ Man má lɛ kɔ kɔn la wɔ ka ǹ dinin lɛn nɛ, máa ma á die Kanaan gána koe ǹ la, gána mɛn bɛ́ ǹ nə́ tiibaa zɛnaa a nɛ.

⁵ Kanna kəni, má Izirayeli nɛnyaanan busii pɛ lɛ ma, má ǹ bɛ̀rɛbaa a nɔmaa lɛ yɛ Ezipti minin gɔn, ma yiri gisĩ maa lɛ kɔ lɛ nɛ.

⁶ Bɛ lɛ taman yii, Muizu, wo pɛ Izirayeli nɛnyaanan manɛ mà ma din nə Dɛnaa Lawa lɛa. Ma á re ǹ boe Ezipti minin nɔmaa ǹ dín kɛn li. Ma á re ǹ boe bɛ̀rɛbaa kɛ nɛ ǹ gɔn. Ma á re ǹ boe ka ma din pàã taãn-taãn kɛ nɛ, ma dɔlɔ bɔ ǹ ganaa sɔnbɔraanɛ.

⁷ Ma á re ǹ sii, ǹ goã ma din a zaman lɛa, ma dɔ goã ǹ dɔn Lawa lɛa. Ǹ tá re doɛ̃, mà ma din Dɛnaa lɛ nə ǹ Lawa lɛa, Lawa mɛn bɛ́ ǹ boe Ezipti minin nɔmaa ǹ dín li.

⁸ Ma din nə n liɛ, máa ma á re gána mɛn koe Abrahamu la, ka Izaaki laanka Zakɔba nɛ, man woe bɛa gána lɛ koe ǹ dinin kɛn lɛn la, ǹ nɛnyaanan lɛa. Man die koe ǹ la, a ǹ wɔ baa. Ma din lɛ n Dɛnaa Lawa lɛa.»

⁹ Muizu boo lɛ da miɛ̃ Izirayeli nɛnyaanan lɛn manɛ, sɛnɛ, ǹ nə n too kɔ a lon wa, a giala, ǹ tá bɛ̀rɛbaa-n lɛ na á goã ǹ foo ziziɛ̃ parsiini.

^10-11 Dɛnaa pɛ Muizu-n doo: «Woo, n pɛ Ezipti gána a kii Faarahɔn nɛ, mà a toa Izirayeli nɛnyaanan lɛn nə soo, ǹ nə n bɔ a gána lɛ nɛ.»

¹² Sɛnɛ, Muizu kɛ pɛ Dɛnaa yɔrɔ-a: «Á ke, Izirayeli nɛnyaanan dinin nə n too kɔ ma lon wa. Faarahɔn nə die n too koe ma lon lɔn, masɛ mɛn bɛ́ maa boo diɛ doɛ̃ wa?»

¹³ Dɛnaa boo da Muizu laanka Aarɔn nɛ, a ná a dí kɔ ǹ la, Izirayeli nɛnyaanan laanka Ezipti gána a kii Faarahɔn wɔ lɛa, màn mɛn bɛ́ toɛ, ǹ soo ka Izirayeli nɛnyaanan lɛn nɛ, ǹ nə ǹ bɔ Ezipti gána nɛ.

Muizu laanka Aarɔn tɔrɔ giala basa

¹⁴ Izirayeli nɛnyaanan digolon tɔn man ke: Zakɔba a nɛgiĩ bibinaa Urubɛn lɛ a nɛnyaanan tɔn man ke: Anɔɔki ni ka Paluu ni, Ɛsirɔn nɛ ka Karmii ni. Urubɛn a tanlɛ minin man bɛn nɛ.

¹⁵ Simiɔn a nɛnyaanan: Yemoeli-n ka Yamin ni, Ohadi-n ka Yakini ni, Sohara nɛ ka Kanaan lɔ kɛ a nɛgiĩ Sawulu ni. Simiɔn a tanlɛ minin man bɛn nɛ.

¹⁶ Levii a nɛnyaanan tɔn nə́ ke, a n kɔnpii ǹ tɔrɔ basa nɛ: Gɛrsɔn nɛ ka Keyati laanka Merarii ni. Levii a tá kanaa na á kɔnpɛ ka lɛ̀ paabiɛ ka pɔsɔɔwensɔbaa (137) nɛ.

¹⁷ Gɛrsɔn a nɛnyaanan: Livini ni ka Simiyii ni, a n kɔnpii ǹ tanlɛn nɛ.

¹⁸ Keyati a nɛnyaanan: Amuramu ni ka Isaari ni, Ebrɔn nɛ ka Uziili ni. Keyati a tá kanaa na á kɔnpɛ ka lɛ̀ paabiɛ ka pɔsɔɔwensɔɔ (133) nɛ.

¹⁹ Merarii a nɛnyaanan: Mayili ni ka Musi ni. Levii a tanlɛn minin lɛn man bɛn nɛ, a n kɔnpii ka ǹ tɔrɔ basa nɛ.

²⁰ Amuramu na á ǹ dɛlan Zokebɛdi saa lɔ lɛa. Á Aarɔn laanka Muizu yɛ la. Amuramu a tá kanaa na á kɔnpɛ ka lɛ̀ paabiɛ ka pɔsɔɔwensɔbaa (137) nɛ.

²¹ Isaari a nɛnyaanan: Kooree ne, ka Nɛfɛgɛ laanka Zikiri ni.

²² Uziili a nɛnyaanan: Misayeli ni ka Elisafan laanka Sitri ni.

²³ Aarɔn Elizabɛti saa lɔ lɛa, Aminaadaabuu a nɛlɔ nɛ, Nasɔn ǹ miãnɛn nɛ. Á Nadaabu laanka Abiu, ka Eleyazaara laanka Itamaara yɛ la.

²⁴ Kooree a nɛnyaanan: Asiiri ni, ka Elkana laanka Abiazafu ni. Kooree a minin tanlɛn man bɛn nɛ.

²⁵ Aarɔn a nɛgiĩ Eleyazaara na á Putiɛli a nɛlɔ goon saa lɔ lɛa. Á Pinasi yɛ la. Levii a minin kɛdɛnan man bɛn nɛ, a n kɔnpii ǹ tanlɛn nɛ.

²⁶ Dɛnaa pɛ Aarɔn laanka Muizu mɛn nɛ mà ǹ wo soo ka Izirayeli nɛnyaanaan lɛn nɛ, ǹ nə ǹ bɔ Ezipti gána nɛ, ǹ nə ǹ kakaa kun ka zia-baalin bɛ́ lɔn, bɛn lɛn sii n ke.

²⁷ Ǹ dinin lɛn man nə́ boo da Ezipti gána a kii Faarahɔn lɛ nɛ, màn mɛn bɛ́ toɛ, Izirayeli nɛnyaanan nə soo, ǹ nə n bɔ Ezipti gána nɛ. Muizu lɛ laanka Aarɔn a sii n ke kəni.

Lawa wusoo a ná a lɛ kɔ ǹ boo lɛ pɛ Muizu ni

²⁸ Dɛnaa boo da Muizu ni ǹ mɛn pinaa Ezipti gána nɛ,

²⁹ a na á pɛ-n kɛnɛn: – Ma din nə Dɛnaa Lawa lɛ lɛa! Woo, ma din nə màn mɛn tumaa pɛ nnɛ, n bɛ pɛ Ezipti gána a kii Faarahɔn nɛ doo.

³⁰ Sɛnɛ Muizu pɛ Dɛnaa nɛ: «Á ke, masɛ a boe boo la wa. Faarahɔn nə die n too koe ma lon lɔn?»