Bɔ bɛ̀rɛbaa nɛ 39 - LAWA A BOO SONBORE

Wúlu-bɔlen mɔnaan

¹ Mɔnaan mɛnɛn bɛ́ n we, ǹ nə́ dí nyɛɛ ǹ nɛ Kion sonbore kɛ nɛ, ka Aarɔn a wɔ ǹ mɔnaa sonboren kɛn nɛ, ǹ nə́ bɛn zɛnaa ka gɛ̀sɛ korebore ne, a tã nɛ, ka a tã zenzen ne, ka Muizu bɛ́ á pɛ lɔn.

² Á dí nya ǹ mɔnaa lɛ zɛnaa ka mɔnaa guguru sonbore ne, foɛ̃-n ka sana nɛ, ka gɛ̀sɛ korebore ne, a tã nɛ, ka a tã zenzen ne.

³ Ǹ sana mɛn dɛ ǹ nə́ nyɔmaa, maǹ nə́ goã gɔn bɔnboɛɛnɛn boe bɛ nɛ, ǹ nə́ we kɔn bii ka mɔnaa guguru sonbore ne, ka gɛ̀sɛ korebore kɛ nɛ, a tã nɛ, ka a tã zenzen ne. Nyaǹ kaa màn-a wolen dí n ka bɛ nɛ.

⁴ Á yii ǹ biɛ màn paa zɛnaa dí nya ǹ mɔnaa lɛ lɛkoron ganaa. Bɛ̀ á n wɔ, a nə n kuĩ ka bɛn nɛ.

⁵ Bɛa yii ǹ biɛn kɛn lɛn man doa-n kɔn ka dí nya ǹ mɔnaa lɛ din ni. Maǹ nə́ ǹ zɛnaa ka a din màn tɔrɔ goon lɛ nɛ: mɔnaa guguru sonbore ne, foɛ̃-n ka sana nɛ, ka gɛ̀sɛ korebore ne, a tã nɛ, a tã zenzen ne, ka Dɛnaa din bɛ́ á pɛ Muizu-n lɔn.

⁶ Ǹ nə́ kɔlɔ sonbore màn paa kɛ a dí nya, ǹ nə́ ǹ doa ka sana nɛ, ǹ nə́ Zakɔba a nɛgiĩn tɔn kiɛ̃ ǹ ganaa.

⁷ Á bɛa kɔlɔ màn paa kɛ lɛ da dí nya ǹ mɔnaa lɛ a kũ ǹ biɛn kɛn ganaa. Bɛa kɔlɔn kɛn lɛn man yiri gisĩ sii ni ǹ mànan lɛa Dɛnaa yɔrɔ-a, Izirayeli nɛnyaanan taman yii, ka Dɛnaa bɛ́ á pɛ Muizu-n lɔn.

Tìãbii zéwo

⁸ Bɛ kio kəni, á tìãbii zéwo kɛ zɛnaa, dí doɛ̃ wolen dí lɛa, ka ǹ bɛ́ ǹ nə́ dí nya ǹ mɔnaa kɛ zɛnaa lɔn. Ǹ nə́ zɛnaa ka mɔnaa guguru sonbore ne, foɛ̃-n ka sana nɛ, ka gɛ̀sɛ korebore ne, a tã nɛ, ka a tã zenzen ne.

⁹ Tìãbii zéwo lɛ a paǹ tumaa na á kɔnpɛ. Sɛnɛ, maǹ nə́ timəə, a timəə lɛ gɔ́ɔ̃ nɛ, a sasabaa n gùrù yii talɛɛ, a pəməbaa n guru yii talɛɛ.

^10-13 Ǹ nə́ kɔlɔ fulupaa sonbore doa a ganaa, kɔlɔ lɛ a gogoonmaa n tɔtɔ ka ǹ miã nɛ. Ǹ nə́ ǹ kaa kɔn kio zii sii, ziin lɛn nə́ kɔn giulun. Ǹ nə́ kɔlɔ lɛ a gogoonmaa doa sana la.

¹⁴ Kɔlɔn lɛn nə́ kɔn saa ka Zakɔba a nɛgiĩn lɛn tɔn nɛ, kɔlɔ fulupaa ka ǹ dɔn tɔn lɛn bɛ́ lɔn. Maǹ Izirayeli nɛnyaanan tɔrɔ giala basa fulupaa kɛa sii nyaa ǹ sii lɛa.

¹⁵ Tìãbii zéwo lɛ ganaa, ǹ nə́ biɛ bɔnboɛɛnɛn zɛnaa, dodoe-n kɔn lɛ ka biɛ pɛnɛɛn bɛ́ lɔn. Ǹ nə́ ǹ zɛnaa ka sana yoreen yoreen ne.

¹⁶ Ǹ nə́ ǹ da ǹ màn màn paa zɛnaa ka sana nɛ, ka sana kaaran màn paa nɛ, ǹ nə́ kaaranan lɛn doa tìãbii zéwo lɛkoro màn paa kɛ ganaa.

¹⁷ Ǹ nə́ sana biɛ pɛnɛ kɔn màn paa kɛ doa kaaran màn paa kɛ ganaa, tìãbii zéwo lɛ lɛkoron ganaa.

¹⁸ Ǹ nə́ tɔ́n biɛ màn paa lɛ lɛkoro doa kɔlɔ màn paa lɛ ganaa. Ǹ nə́ ǹ doa dí nya ǹ mɔnaa a biɛn kɛn lɛn ganaa nyɛɛnɛ.

¹⁹ Ǹ nə́ sana kaaran màn paa kɔsɔ zɛnaa, ǹ nə́ ǹ doa tìãbii zéwo lɛ a tán a lɛkoro wɔ a gùrù màn paa kɛ ganaa, naa-n dí nya ǹ mɔnaa lɛ ganaa.

²⁰ Ǹ nə́ sana kaaran màn paa kɔsɔ dɔ zɛnaa, ǹ nə́ ǹ doa dí nya ǹ mɔnaa lɛ a kũ ǹ biɛn kɛn giala ganaa nyɛɛnɛ, a nimi ǹ bǎã kɛ nɛ. Bɛa kaaranan kɛn lɛn man dɔnkɛ sɔɔbaa ǹ wɔ lɛ lalan.

²¹ Ǹ nə́ tìãbii zéwo lɛ a kaaranan kɛn yii kɔn ka dí nya ǹ mɔnaa kɛ wɔn nɛ, ka biɛ korebore kɔn nɛ. Ǹ nə́ yii ka yɔrɔ kɔn nɛ, màn mɛn bɛ́ toɛ, tìãbii zéwo lɛ sɛ á goɛ̃ dí nya ǹ mɔnaa a wíi biɛ kɛ lalan. Bɛa yɔrɔ kɛ lɛ la, a ba n bibiĩ dí nya ǹ mɔnaa lɛ lalan wa, ka Dɛnaa din bɛ́ á pɛ Muizu-n lɔn.

Mɔnaa kɔsɔ boo

²² Bɛ kio, Aarɔn bɛ́ re dɔnkɛ sasa mɛn we dí nya ǹ mɔnaa kɛ giulun, ǹ nə́ bɛ tumaa zɛnaa ka gɛ̀sɛ korebore ne.

²³ Mìi wɔ ǹ bǎã ke mɔnaa sasa lɛ bii, bɛ na á goã kəkə a ná a lɛnpɛnɛ, a ná a ba toɛ̃ wa.

²⁴ A lɛkoron ganaa tán, ǹ nə́ nyaǹ mànan zɛnaa ka da nɛ bɛ́ lɔn, ka gɛ̀sɛ korebore ne, a tã nɛ, ka a tã zenzen ne.

²⁵ Ǹ nə́ sana *yoreen toolo bɔnboɛɛnɛn kaa da nɛ nyaǹan lɛn bii, mɔnaa lɛkoro bǎã lɛn nɛ tan, ǹ ná a lɛnpɛnɛ nɛ.

²⁶ Sana toolo boɛɛn goon, bɛ kio da nɛ nyaǹ goon, bɛ kio doo sana toolo boɛɛn goon. Ǹ nə́ bɛ zɛnaa mɔnaa lɛ lɛ ganaa, yǎa ǹ ná a lɛnpɛnɛ nɛ. Bɛ n dí nya Kion sonbore kɛ nɛ ǹ mɔnaa lɛa, ka Dɛnaa din bɛ́ á pɛ Muizu-n lɔn.

²⁷ Bɛ dɔ kio doo, ǹ nə́ Aarɔn a dɔnkɛ boɛɛn kɛ zɛnaa ka mɔnaa guguru sonbore ne. Mɔnaa-tãli a dí lɛa, Aarɔn laanka a nɛgiĩn wɔ lɛa.

²⁸ Ǹ nə́ mìi yii ǹ mɔnaa gɔn zɛnaa, ka bafolon ne, ka bɛ̀rɛ̀n nɛ. Ǹ nə́ ǹ tumaa zɛnaa ka mɔnaa guguru sonbore ne.

²⁹ Ǹ nə́ binbin yii ǹ mànan zɛnaa ka mɔnaa guguru sonbore ne, foɛ̃-n ka gɛ̀sɛ tã nɛ, a tã zenzen ne, mɔnaa-fɔ̃li a dí lɛa, ka Dɛnaa din bɛ́ á pɛ Muizu-n lɔn.

³⁰ Bɛ kio doo kəni, ǹ nə́ nyaǹ màn zɛnaa ka sana yoreen ne, ka da buũ bɛ́ lɔn, ǹ nə́ kiɛ̃ a ganaa, ka ǹ bɛ́ gòã-kurii diɛ màn ganaa lɔn, "Kɛ n Dɛnaa wɔ lɛa".

³¹ Ǹ nə́ da biɛ korebore ganaa, bɛ goã mìi yii ǹ mɔnaa gɔn kɛ nyɛɛnaan ganaa, ka Dɛnaa din bɛ́ á pɛ Muizu-n lɔn.

Màn lɛ tumaa a kɔ Muizu la boo

³² Kɔn yɛ ka Lawa nɛ ǹ Kion lɛ a dí tumaa na á nya kɛnɛn. Izirayeli nɛnyaanan lɛn nə́ dí nya taãn-taãnɛ, ǹ nə́ zɛnaa ka Dɛnaa bɛ́ á pɛ Muizu-n lɔn.

³³ Izirayeli nɛnyaanan lɛn nə́ daa ka Kion lɛ-n Muizu li: Mɔnaa Kion lɛ nɛ ka a màn bisinin ni, a karan nɛ, a doa ǹ bàlàn nɛ, a kerekaã ǹ bàlàn nɛ, a gɔn sɔsɔrɔn laanka a giãmala ǹ mànan nɛ;

³⁴ a kɔmalɛ mɔnaa kɛ nɛ sère gɔ̀lɔ̀n ki lɛa, ǹ nə́ màn tã kaa la, ka don siĩ ki kəkə wɔ kɛ nɛ, ka a bii kuru kɔn-a ǹ mɔnaa kɛ nɛ;

³⁵ *lɛ kɔ kɔn la ǹ goo lɛ nɛ, a bàlàn nɛ ka a lɛpii ni;

³⁶ tabala kɛ nɛ, ka a màn bisinin ni, ka Lawa gɔ ǹ buuru kɛ nɛ;

³⁷ sana yoreen bolon da ǹ bǎã kɛ nɛ, a bolonən ne (bolonən lɛn zii boemaa nɛ), a dí nya ǹ màn bisinin ni, ka a lɛ sã ǹ nyɔɔ kɛ nɛ;

³⁸ sana *wúlu bɔ ǹ bǎã ke, nyɔɔ tã ǹ wɔ lɛa, ka minin bɔ a koa ǹ nyɔɔ kɛ nɛ, ka màn gìĩ kɔɔ̃n kɛ nɛ tã ǹ wɔ lɛa; ka mɔnaa kion lɛ a kiɛnlɛ mɔnaa kɛ nɛ;

³⁹ wúlu bɔ ǹ bǎã ke zan tã lɛa, ka zan tã tɛmɛ kɛ nɛ, a bàlàn nɛ, ka a màn bisinin tumaa nɛ; doo kaaraa kɛ nɛ ka a koamala ǹ màn nɛ;

⁴⁰ sumu lɛ a mɔnaa gɔnɔn nɛ, a gɔn sɔsɔrɔn nɛ, a giãmala ǹ mànan nɛ, sumu lɛ a kiɛnlɛ mɔnaa nɛ, a biɛn nɛ, a kiɛ zumiin ni; a màn bisinin tumaa nɛ, kɔn yɛ ka Lawa nɛ ǹ Kion lɛ a dí nya ǹ mànan lɛa;

⁴¹ dí nya kion sonbore kɛ nɛ ǹ mɔnaan nɛ, wúlu-bɔle Aarɔn a mɔnaa sonboren kɛn nɛ, ka a nɛgiĩn wɔn kɛn nɛ, ǹ nə́ die ǹ we, ǹ wúlu bɔ nɛ.

⁴² Izirayeli nɛnyaanan lɛn nə́ dí lɛ tumaa nya, ǹ nə́ tele Dɛnaa a boo kɛ tumaa li, á pɛ Muizu ni.

⁴³ Muizu nə́ ǹ dí lɛ tumaa yɛ. Á yɛ mà ǹ nə́ nya á kɔnpɛ taãn-taãnɛ ka Dɛnaa a boo pɛ nɛ. Bɛ lɛ taman yii, á Lawa bǐɛ̃ bíi ǹ li.