Bɔ bɛ̀rɛbaa nɛ 37 - LAWA A BOO SONBORE

Lɛ kɔ kɔn la ǹ goo lɛ boo doo

¹ Besaleli *lɛ kɔ kɔn la ǹ goo lɛ zɛnaa ka kaasia gɔn nɛ, a sasabaa n gùrù yii paa ka talɛɛ, a pəməbaa n gùrù yii goon ka talɛɛ, a wo lon nə gùrù yii goon ka talɛɛ.

² Á sana yoreen yoreen kaa la, á kaa a gɔ́ɔ̃ la, á kaa a kanaa la, á sana dɔ a lɛkoro ganaa, a ná a lɛnpɛnɛ nɛ.

³ Á sana kaaran màn sii zɛnaa goo lɛ wɔn lɛa, á ǹ doa a gùrù wɔkɔnlɛ ǹ bǎã sii kɛ ganaa. Á màn paa dɔ paǹ goon ganaa, màn paa paǹ goon kɛ dɔ ganaa.

⁴ Á bàlàn zɛnaa ka kaasia gɔn nɛ, á sana kaa ǹ la.

⁵ Á bàlàn lɛn wɔ goo lɛ a paǹan li kaaran yalan kɛn nɛ, goo lɛ a gũ ǹ bàlàn lɛa.

⁶ Bɛ kio, á goo lɛ a lɛpii zɛnaa ka sana yoreen yoreen ne, a sasabaa n guru yii paa ka talɛɛ, a pəməbaa n guru yii goon ka talɛɛ.

⁷ Á sana dɛ, á lon màn yiikoonaa nyín màn paa zɛnaa nɛ. A na á ǹ zɛnaa, á ǹ doa goo lɛpii lɛ a lɛkoron paanan ganaa.

⁸ Á goon zɛnaa lɛkoro goon ganaa, goon kɛ dɔ n kɛ ganaa. Á lon mànan yiikoonaa nyínin lɛn zɛnaa, á ǹ doa kɔn ka lɛpii lɛ nɛ, gogoon ná a lɛkoron paanan ganaa.

⁹ Lon màn yiikoonaa nyínin lɛn nə́ n nyàan lɛ bɔ, ǹ nə́ ǹ dia lon, ǹ nə́ n nyàa kan kɔ goo lɛpii lɛ lɛ. Ǹ yɔrɔ na á goã dia-n kɔn la, ǹ nə́ giɛ goo lɛpii lɛ ganaa.

Tabala boo

¹⁰ Bɛ kio doo, á tabala goon zɛnaa ka kaasia gɔn nɛ, a sasabaa n gùrù yii paa, a pəməbaa n gùrù yii goon, a wo lon nə gùrù yii goon ka talɛɛ.

¹¹ Á sana yoreen yoreen kaa la, a ná a lɛkiri zɛnaa ka sana nɛ, a ná a lɛnpɛnɛ nɛ.

¹² A ná a lɛ dɔ doo ka gɔn kɔsɔ nɛ, pəmə ka gɔn tìsì bɛ́ lɔn, a ná a lɛnpɛnɛ nɛ, á sana kaa bɛa gɔn kɛ lɛ lɛkoro gana.

¹³ Á sana kaaran màn sii zɛnaa tabala lɛ wɔn lɛa, á ǹ kaa a gòã màn sii kɛa gùrù sii ganaa.

¹⁴ Á kaaranan lɛn doa, kunu a lɛ dɔ ǹ gɔnɔn kɛn lɛn li. Ǹ bɛ́ bàlàn mɛnɛn we tabala lɛ li, ǹ saa, bɛn man we kaaranan kɛn lɛn nɛ.

¹⁵ Á bàlàn lɛn zɛnaa ka kaasia gɔn nɛ, á sana kaa ǹ la, bɛn man tabala lɛ saa ǹ bàlàn lɛa.

¹⁶ Á tabala lɛ a màn bisinin tumaa zɛnaa ka sana yoreen yoreen ne: tasanan nɛ, gongonən ne, tàanan nɛ, yɔ zuməə ǹ mànan nɛ.

Bolon da ǹ bǎã boo

¹⁷ Bɛ kio kəni, á bolon da ǹ bǎã lɛ zɛnaa ka sana yoreen yoreen ne. Á sana dɛ á zɛnaa nɛ: a giala nɛ, a bàlà nɛ, a tàanan nɛ, a kòròn ne ka a nyaǹan kɛn nɛ ka da buũn bɛ́ lɔn. Bɛn tumaa n zɛnaa-n kɔn ka a din sana goon lɛ nɛ.

¹⁸ Gùrù sɔrɔ n boe a paran li, a gùrù sɔɔ n para goon, a sɔɔ dɔ n para goon kɛ dɔ ganaa.

¹⁹ Gùrù goon ganaa, tàan sɔɔ ka da nɛ bɛ́ lɔn, kòròn laanka buũn ná a ganaa. Gùrù goon kɔsɔ dɔ ganaa, tàan sɔɔ ka da nɛ bɛ́ lɔn, kòròn laanka buũn ná a ganaa. A n miɛ̃ ka gùrù sɔrɔ lɛ din tumaa nɛ, boe bolon da ǹ bǎã lɛ ganaa.

²⁰ Bii wɔ a gùrù lɛ dinmaa ganaa, tàan sii ka da nɛ bɛ́ lɔn, kòròn laanka buũn ná a ganaa.

²¹ Gùrù bibinaa màn paa mɛn bɛ́ boe bolon da ǹ bǎã lɛ ganaa, kòrò n bɛn giulun. Kòrò goon nə gùrù nyɔɔbaa màn paa kɛ dɔ giulun, boe bolon da ǹ bǎã lɛ ganaa. A n miɛ̃ ka gùrù sɔrɔ kɛ lɛ tumaa nɛ, boe bolon da ǹ bǎã lɛ ganaa.

²² Kòròn lɛn laanka gùrùn lɛn tumaa n kɔn ka a dinmaa tumu lɛ nɛ, ǹ nə́ dɛ ǹ nə́ zɛnaa ka sana *yoreen ne.

²³ Á bolon sɔbaa zɛnaa a ganaa, ka ǹ lɛ bɔ ǹ banbaalanan nɛ, ka ton kaa ǹ mànan nɛ, sana yoreen lɛa.

²⁴ A na á bolon da ǹ bǎã lɛ laanka a màn bisinin tumaa zɛnaa, ka sana yoreen yoreen kilo pɔsɔɔ nɛ.

Màn gìĩ kɔɔ̃n tã ǹ bǎã

²⁵ Bɛ kio doo, á màn gìĩ kɔɔ̃n tã ǹ bǎã kɛ zɛnaa ka kaasia gɔn nɛ, a sasabaa n gùrù yii goon, a pəməbaa n gùrù yii goon. A gùrùn tumaa na á kɔnpɛ. A wo lon nə gùrù yii paa. A bìbìn man doa-n kɔn ka a din ni.

²⁶ Á sana yoreen yoreen yo á kaa la. Á kaa a lalan la, ka a gùrù sii lɛ a gɔnɔn tumaa nɛ, ka a bìbìn ni.

²⁷ Á sana kaaranan zɛnaa a lɛkiri lɛ giulun, a paǹan paanan li, a wàãn ganaa, a ná a gũ ǹ bàlàn wɔ bɛn nɛ.

²⁸ A na á bɛa bàlàn lɛn zɛnaa ka kaasia gɔn nɛ, á sana yo á kaa ǹ la.

²⁹ Á minin bɔ a koa ǹ nyɔɔ sonbore kɛ zɛnaa, ka màn gìĩ kɔɔ̃n yoreen ne, tã ǹ wɔ lɛa. Nyɔɔ dí-nyali sonbore na á bɛa dí nya.