Bɔ bɛ̀rɛbaa nɛ 36 - LAWA A BOO SONBORE

¹ «Besaleli ni, Oholiabu ni ka dí doɛ̃ wolen mɛnɛn tumaa bɛ́, Dɛnaa din sii-doɛ̃ laanka màn-doɛ̃ kɔ ǹ la, mà ǹ Kion sonbore kɛ lɛ a sii yɔrɔ bɔ, ǹ na a din tumaa nya, bɛn lɛn man die Dɛnaa a di-kɔn kɛn lɛn tumaa nyɛɛ.»

² Muizu lɛ dia Besaleli la ka Oholiabu ni, ka minin kɛn lɛn tumaa nɛ, Dɛnaa sii-doɛ̃ kɔ ǹ la. Ǹ tumaa nɛ, ǹ nə́ n dinin kɔ dín kɛn lɛn lɛa.

³ Izirayeli nɛnyaanan nə mànan mɛnɛn bɔ, Kion sonbore lɛ a dín kɛn nyɛɛ a lɛa, ǹ nə́ bɛn tumaa si Muizu li. Sɛnɛ, minin man tɔn die baraabaraa, mànan koe ka foo kɔɔ̃n nɛ.

⁴ Bɛ lɛ nɛ, dí doɛ̃ wolen kɛn lɛn dín lɛn nyɛɛ, bɛn tumaa nə́ n gɔn bɔ ǹ nya ǹ dín ganaa gogoon.

⁵ Ǹ nə́ pɛ Muizu ni: «Dɛnaa din dín mɛnɛn pɛ, mà wɔ ǹ nya, zaman lɛ n die ka màn nɛ, á liɛ bɛa dńn kɛn lɛn manɛ.»

⁶ Muizu pɛ, mà minin nə bɔ giã ǹ bǎã lɛ nɛ ǹ pɛ: «Giĩn laanka lɔn, ka Kion sonbore kɛ lɛ a dí nya ǹ mànan boe lɛ doa.» Zaman lɛ màn lɛ a bɔ lɛ doa.

⁷ A màn mɛn bɔ, bɛ tɛ kɔ, á kion lɛ a dí nyɛɛ boe. A gialakun din tá goɛ̃ dinin.

Kion lɛ boo

⁸ Dí doɛ̃ wole taãn-taãnan kɛn, bɛn nə́ kion lɛ zɛnaa ka mɔnaa gɔn fù ni, zɛnaa-n ka mɔnaa guguru sonbore ne, foɛ̃-n ka gɛ̀sɛ korebore ne, ka a tã nɛ, ka a tã zenzen ne. Ǹ nə́ lon màn yiikoonaan nyínin zɛnaa ǹ ganaa sɔnbɔraanɛ.

⁹ Mɔnaa gɔn goon a sasabaa n gùrù yii fuəwenkiwisi, a pəməbaa n gùrù yii sii. Ǹ tumaa dɔ a zɔɔ̃ n goon.

¹⁰ Ǹ nə́ mɔnaa gɔn lɛ a sooro kaa kun ǹ nə́ ǹ kũ kɔn ganaa. Sooro kɔsɔ kɛ dɔ, ǹ nə́ bɛn dɔn kaa kun, ǹ nə́ ǹ kũ kɔn ganaa.

¹¹ Ǹ nə́ gɛ̀sɛ pɛnɛ kɔn koreboredɛnaa dɔ mɔnaa gɔn bibinaa kɛ lɛ lɛ, a kaa kun lɛ lɛkoro-a. Ǹ nə́ kɔsɔ dɔ dɔ mɔnaa gɔnɔn kaa kun goon kɛ lɛ a mɔnaa gɔn nyɔɔbaa kɛ lɛ.

¹² Ǹ nə́ gɛ̀sɛ pɛnɛ kɔn posooro dɔ mɔnaa gɔn bibinaa lɛ lɛ, ǹ nə́ posooro dɔ mɔnaa kaa kun paabaa ǹ wɔ kɛ lɛ dɔ a mɔnaa gɔn nyɔɔbaa kɛ lɛ. Ǹ nə́ toa gɛ̀sɛn lɛn nə́ goã kɔn a peperebaa la.

¹³ Ǹ nə́ kara posooro zɛnaa ka sana nɛ, ǹ nə́ mɔnaa gɔnɔn lɛn doa kɔn ka bɛa karan kɛn lɛn nɛ, ǹ nə́ mɔnaa kion lɛ kũ ni, á goã kɔn.

¹⁴ Bɛ kio, ǹ nə́ mɔnaa gɔnɔn zɛnaa ka bòe ka nɛ, ǹ nə́ bɛn baa Kion lɛ a kala lɛa. Ǹ nə́ zɛnaa mɔnaa gɔn fulugoon.

¹⁵ Goon a sasabaa n gùrù yii pɔsɔɔ, a pəməbaa n gùrù yii sii. Ǹ fulugoon lɛ tumaa a zɔɔ̃ n goon.

¹⁶ Ǹ nə́ mɔnaa gɔn sooro nimi kɔn ǹ gɔrɔn, bɛ kio, ǹ nə́ sɔrɔ nimi kɔn ǹ gɔrɔn.

¹⁷ Ǹ nə́ gɛ̀sɛ pɛnɛ kɔn posooro dɔ mɔnaa gɔn bibinaa kɛ lɛ, mɔnaa gɔnɔn kaa kun wɔ a nyɔɔbaa kɛ lɛ, ǹ nə́ gɛ̀sɛ pɛnɛ kɔn posooro dɔ dɔ mɔnaa gɔnɔn nimi kɔn paabaa ǹ wɔ kɛ dɔ a mɔnaa gɔn nyɔɔbaa lɛ.

¹⁸ Ǹ nə́ kara posooro zɛnaa ka zan tã nɛ, ǹ nə́ kion lɛ kũ kɔn nɛ.

¹⁹ Ǹ nə́ kɔmalɛ ǹ wɔ zɛnaa kion lɛ wɔ lɛa ka sère gɔ̀lɔ̀ kin ni, ǹ nə́ wɔ màn tã li, ǹ nə́ kɔmalɛ ǹ wɔ kɔsɔ dɔ zɛnaa ka don siĩ ki kəkə ni, bɛ goã a lalan.

²⁰ Bɛ kio, ǹ nə́ Kion lɛ a doa ǹ bàlàn zɛnaa ka kaasia gɔnɔn nɛ, ǹ nə́ ǹ zumu.

²¹ Kion lɛ a doa ǹ bàlà gogoonmaa a sasabaa n gùrù yii fù, a pəməbaa n gùrù yii goon ka talɛɛ.

²² Wɔkɔnlɛ ǹ lɛ màn paa goã bàlà gogoonmaa ganaa, ǹ nə́ kɔn para li. Ǹ nə́ Kion lɛ a doa ǹ bàlàn lɛn tumaa zɛnaa bɛa yɔrɔ kɛ lɛ la.

²³ Ǹ nə́ bɛa kion doa ǹ bàlàn kɛn lɛn fuə zɛnaa Kion lɛ a gusin a lɛ̀gɔn la ganaa.

²⁴ Ǹ nə́ giãmala ǹ màn pusi zɛnaa ka wɔrɔgiala nɛ, bɛa bàlà fuə kɛ lɛ giulun, giãmala ǹ màn màn papaa bàlà gogoonmaa giulun, ǹ wɔkɔnlɛ ǹ lɛ màn paa lɛ a lɛa.

²⁵ Kion lɛ a paǹ goon kɛ li dia-n woe gɔsɛ a lɛ̀gɔn la, doa ǹ bàlà fuə goã,

²⁶ ka ǹ giãmala ǹ màn pusi kɛ nɛ, zɛnaa-n ka wɔrɔgiala nɛ, giãmala ǹ màn màn papaa n bàlà gogoonmaa giulun.

²⁷ Kion lɛ gɔ́ɔ̃ wɔ a paǹ ke, dia-n woe lɛ̀nyɛɛn la, ǹ nə́ doa ǹ bàlà sɔrɔ zɛnaa bɛ wɔ lɛa.

²⁸ Ǹ nə́ bàlà màn paa dɔ zɛnaa a tɔ-a kion gɔ́ɔ̃ gùrù wɔkɔnlɛ ǹ wɔn lɛa.

²⁹ Ǹ giala na á goã boe-n kɔn tán, sɛnɛ, ǹ lɛwɔn nə́ woo wɔ kɔn lɛ lon kaaran lɛ a bibinaa kɛ nɛ. Maǹ nə́ zɛnaa miɛ̃ ka bɛa doa ǹ bàlà kaka màn paa kɛ lɛ nɛ.

³⁰ Doa ǹ bàlà kiwisi na á yɛ walan kəni, ka ǹ giãmala ǹ mànan nɛ, zɛnaa-n ka wɔrɔgiala nɛ. Giãmala ǹ màn fulusɔrɔ, màn papaa bàlà gogoonmaa giulun.

³¹ Bɛ kio, ǹ nə́ kerekaã ǹ bàlàn zɛnaa ka kaasia gɔn nɛ: sooro n kion lɛ a paǹ bibinaa kɛa bàlà wɔn lɛa,

³² sooro dɔ n kion lɛ a paǹ paabaa ǹ wɔ kɛ wɔn lɛa. Kion lɛ a paǹ mɛn bɛ́ dia-n woe lɛ̀nyɛɛn la, kion lɛ gɔ́ɔ̃ ke, sooro n bɛ dɔ a bàlàn wɔn lɛa.

³³ Kerekaã ǹ bàlà mɛn bɛ́ kion doa ǹ bàlàn kɛn lɛn lon laanka tán bii ni, ǹ nə́ bɛ zɛnaa á bɔ kion lɛ lɛ goon ganaa yǎa goon kɛ dɔ ganaa.

³⁴ Ǹ nə́ sana kaa bàlàn lɛn la. Ǹ nə́ ǹ kaaranan zɛnaa ka sana nɛ, kerekaã ǹ bàlàn kɛn lɛn wɔ ǹ bǎãn lɛa, ǹ nə́ sana kaa kerekaã ǹ bàlàn lɛn dɔn la.

³⁵ Bɛ kio doo, ǹ nə́ mɔnaa zɛnaa ka mɔnaa guguru sonbore ne, foɛ̃-n ka gɛ̀sɛ korebore ne, a tã nɛ, ka a tã zenzen ne. Ǹ nə́ lon màn yiikoonaan nyínin zɛnaa a ganaa nyaǹan lɛa.

³⁶ Ǹ ná a lɔɔ ǹ bàlàn zɛnaa màn sii ka kaasia gɔn nɛ, ǹ nə́ sana kaa ǹ la, ǹ karan nə́ sana lɛa. Ǹ nə́ wɔrɔgiala yo, ǹ nə́ ǹ giãmala ǹ màn zɛnaa nɛ, màn sii.

³⁷ Bɛ kio doo kəni, ǹ nə́ mɔnaa kɔsɔ zɛnaa Kion lɛ a kiɛnlɛ wɔ lɛa. Ǹ nə́ zɛnaa, foɛ̃-n ka mɔnaa guguru sonbore ne, a tã nɛ, ka a tã zenzen ne, a dí doɛ̃ wolen nə́ nya sɔnbɔraanɛ.

³⁸ Bɛa kiɛnlɛ mɔnaa lɛ a lɔɔ ǹ bàlàn màn sooro, ka ǹ karan nɛ, ka ǹ mìin ni, ka ǹ kiɛn kɛn nɛ, ǹ nə́ sana kaa ǹ la. Ǹ giãmala ǹ mànan man sooro, zan tã lɛa.