Bɔ bɛ̀rɛbaa nɛ 35 - LAWA A BOO SONBORE

Susu ǹ pii

¹ Muizu Izirayeli nɛnyaanan zaman tumaa lɛ sɔkɔn, á pɛ ǹ nɛ: – Dɛnaa boon mɛnɛn pɛ mà ka ǹ zɛnaa, bɛn nə́ ke:

² «Lɛawaa sɔrɔ gɔ́ɔ̃ nɛ, ka kaa dí nya, sɛnɛ, lɛawaa sɔbaabaa ǹ wɔ pinaa kɛ á re goɛ̃ lɛawaa sonbore lɛa ka gɔn, ka kɔ Dɛnaa la, *susu ǹ pii ni. Bɛ̀ min mɛn dí nya bɛa lɛawaa kɛ li, ka á re ǹ dɛnaa dii a gã.

³ Ta ka n bǎã woo bǎã nɛ, bɛa susu ǹ pii kɛ lɛ li, ka baran tɛ dɔ din koa wa.»

Zaman lɛ n màn boe kion sonbore kɛa lɛa

⁴ Muizu pɛ Izirayeli nɛnyaanan zaman lɛ-n doo: – Dɛnaa boo mɛn pɛ, bɛ á ke:

⁵ «Ka màn bɔ ka gɔn màn nɛ, ka kɔ Dɛnaa la. Ka bɛ zɛnaa ka dinin bii, ka bɛa màn lɛ bɔ ka foo kɔɔ̃n nɛ, ka kɔ Dɛnaa la: ta sana nɛ, ka wɔrɔ nɛ, ka zan tã nɛ.

⁶ Ta gɛ̀sɛ korebore ne, a tã nɛ, a tã zenzen ne. Ta mɔnaa guguru sonbore ne, ka bòe ka nɛ,

⁷ ka sère gɔ̀lɔ̀n ki ni, ka màn tã kaa la, ka don siĩ ki sonboren ne. Ta kaasia gɔn nɛ,

⁸ ka nyɔɔ nɛ bolon wɔ lɛa, ka nyɔɔ gìĩ kɔɔ̃n nɛ, minin bɔ a koa ǹ wɔ lɛa, ka màn gìĩ kɔɔ̃n nɛ tã ǹ wɔ lɛa.

⁹ Ta kɔlɔ sonboren manɛ: dí nya ǹ mɔnaa wɔ màn paa kɛ laanka tìãbii zéwo wɔ fulupaa kɛ wɔn lɛa.

¹⁰ Dɛnaa màn mɛn tumaa pɛ, dí doɛ̃ wolen kɛn ka bii, bɛn nə daa ǹ na a tumaa zɛnaa sɔnbɔraanɛ.

¹¹ Kion kɛ laanka a mɔnaa nɛ, ka a kɔmalɛ ǹ wɔ kɛ nɛ, ka a karan nɛ, ka a doa ǹ bàlàn nɛ, ka a gɔn kerekaãn kɛn nɛ, ka a mɔnaa lɔɔ ǹ bàlàn nɛ, ka a giãmala ǹ mànan nɛ.

¹² Ta goo lɛ nɛ, ka a gũ ǹ bàlàn nɛ, ka a lɛpii ni, ka kion bii kuru kɔn-a ǹ mɔnaa kɛ nɛ.

¹³ Ta tabala kɛ nɛ, ka a gũ ǹ bàlàn nɛ, a màn bisinin tumaa nɛ, ka Lawa gɔ ǹ buuru kɛ nɛ.

¹⁴ Ta bolon da ǹ bǎã kɛ nɛ, ka a màn bisinin ni, a bolonən ne ka ǹ lɛ sã ǹ nyɔɔ nɛ.

¹⁵ Ta màn gìĩ kɔɔ̃n tã ǹ bǎã kɛ nɛ, ka a gũ ǹ bàlàn nɛ, ka minin bɔ a koa ǹ nyɔɔ kɛ nɛ, màn gìĩ kɔɔ̃n kɛ nɛ tã ǹ wɔ lɛa, ka kion lɛ a kiɛnlɛ mɔnaa kɛ nɛ.

¹⁶ Ta *wúlu bɔ ǹ bǎã kɛ nɛ, ka a zan tã tɛmɛ kɛ nɛ, a gũ ǹ bàlàn nɛ ka a màn bisinin ni, ka doo kaaraa kɛ nɛ, a laanka a gũ ǹ màn nɛ.

¹⁷ Ta sumu lɛnpɛnɛ ǹ mɔnaan kɛn manɛ, ka a lɔɔ ǹ bàlàn nɛ, ka a giãmala ǹ mànan nɛ, ka sumu lɛ a kiɛnlɛ mɔnaa nɛ.

¹⁸ Ta kion lɛ a kiɛ zumiin manɛ, sumu kɛ wɔn nɛ, ka ǹ biɛn nɛ.

¹⁹ Sii yɔrɔ bɔ ǹ mɔnaan kɛn, dí nya kion lɛ a lɛa, wúlu-bɔle Aarɔn a mɔnaa sonboren kɛn, ka a nɛgiĩn wɔn nɛ ǹ nə́ die dí nyɛɛ ǹ nɛ.»

²⁰ Izirayeli nɛnyaan zaman lɛ tumaa nə́ n bɔ Muizu yɔrɔ-a.

²¹ A kɔɔ̃n kɔ min mɛn tumaa foo ganaa, á dɔ ǹ yiri dɔ nɛ, bɛn nə́ daa ka ǹ màn bòen ne, ǹ nə́ ǹ kɔ Dɛnaa la, kɔn yɛ ka Lawa nɛ ǹ kion kɛ lɛ a dí a lɛa, a sii yɔrɔ bɔ tumaa a lɛa, mɔnaa sonboren kɛn dɔn lɛa.

²² Giĩn nə́ daa, lɔn dɔn nə́ daa ka foo kɔɔ̃n nɛ, ǹ nə́ sana màn tɔrɔ tumaa bɔ, ǹ nə́ kɔ Dɛnaa la, á kɔnpɛ ka sii lɛ a zɛnaa ǹ gɔn nɛ. Ǹ mànan mɛnɛn bɔ: nyin ni ǹ mànan manɛ, ka too ne ǹ wɔn nɛ, ka gòon ganaa ǹ kaaranan nɛ, ka bɔlɔ-a ǹ mànan nɛ.

²³ Gɛ̀sɛ goã min mɛn lon, a korebore ne, a tã nɛ, a tã zenzen ne ka mɔnaa guguru sonbore ne, ka bòe ka nɛ, ka sère gɔ̀lɔ̀ kin mɛnɛn bɛ́ ǹ nə́ màn tã kaa ǹ la, hinlaa don siĩ ki sonboren, bɛa dɛnaa daa ka bɛ nɛ.

²⁴ Min mɛn wɔrɔgiala hinlaa zan tã bɔ, bɛa dɛnaa daa ka bɛ nɛ, á kɔ Dɛnaa la. Kaasia gɔn goã min mɛn lon, bɛa dɛnaa daa ka bɛ nɛ, dín kɛn lɛn tumaa a lɛa.

²⁵ Lɔ dí doɛ̃ wolen kɛn tumaa gɛ̀sɛ ma ka ǹ dinin gɔn nɛ, ǹ nə́ daa nɛ, gɛ̀sɛ korebore lɛa ka a tã nɛ, a tã zenzen tɛ-pɛle ne ka mɔnaa guguru sonbore ne.

²⁶ Bɛa lɔ dí doɛ̃ wolen kɛn lɛn tumaa bòe ka dɔ ma.

²⁷ Nyɛɛnaandɛnan nə́ daa ka kɔlɔ sonboren kɔnɔn nɛ: dí nya ǹ mɔnaa kɛ paǹ tɛn laanka tìãbii zéwo kɛ a zɛnaa ǹ wɔn lɛa.

²⁸ Ǹ nə́ daa ka nyɔɔ gìĩ kɔɔ̃nɔn dɔn nɛ, ka nyɔɔ nɛ bolon wɔ lɛa, ka minin bɔ a koa ǹ nyɔɔ kɛ nɛ, ka màn gìĩ kɔɔ̃n kɛ nɛ tã ǹ wɔ lɛa.

²⁹ Giĩn ni ka lɔn nɛ, Izirayeli minin mɛnɛn foo bɛ́ kɔɔ̃n ka mànan kɛn kɔ nɛ, dí lɛ a nya ǹ mànan lɛa, Dɛnaa nə́ ǹ pɛ Muizu ni, bɛn man nə́ goã die mànan koe Dɛnaa la ka nyɛnyɛɛ nɛ.

Kion sonbore kɛa dɔlin

³⁰ Muizu pɛ Izirayeli nɛnyaanan lɛn manɛ: «Á ke, Dɛnaa na á Urii a nɛgiĩ Besaleli bíi ka a tɔ nɛ, Urii mɛn di tɔ bɛ́ á goã Uuru, Zudaa tɔrɔ lɛa.

³¹ A ná a n din Yiri kɔ la, màn mɛn bɛ́ toɛ, a sii-doɛ̃ laanka yiridɛnaabaa yɛ, ka màn-doɛ̃ laanka kanaa sii tumaa zɛnaa doɛ̃ nɛ:

³² màn zɛnaa ka nyaǹ nɛ nɛ, sana dí nya nɛ, wɔrɔ wɔ nɛ ka zan tã nɛ,

³³ kɔlɔ sonboren sɛlɛɛ nɛ, ǹ nə ǹ da màn nɛ, gɔn sɛlɛɛ nɛ, ka dí nya a nyaǹ kaa ma-a tumaa nɛ.

³⁴ Dɛnaa wɔ a foo ne mà a minin daraa bɛa dín kɛn lɛn ganaa, asɛ nɛ, ka Dan tɔrɔ Ayisamaaki a nɛgiĩ Oholiabu kɛ dɔ nɛ.

³⁵ Á dí-doɛ̃ kɔ ǹ la, mà ǹ boo dí tumaa la, ǹ boo a nyaǹ kaa ma-a wɔn dɔn la: kɔlɔ sonboren sɛlɛli a dí ni, nyaǹ kaa ma-a wole wɔ nɛ, mɔnaa-tãli a dí ni: gɛ̀sɛ korebore tãli wɔ nɛ, a tã tãli wɔ nɛ, a tã zenzen tãli wɔ nɛ, ka mɔnaa guguru sonbore fɔ̃li wɔ nɛ.