Bɔ bɛ̀rɛbaa nɛ 32 - LAWA A BOO SONBORE

Lɛ kɔ kɔn la kɛa ziziɛ̃ ( 32.1—34.35 ) Sana diin nɛ boo

¹ Zaman lɛ yɛ mà Muizu belebɔ kele lɛ la, a ná a ba gisĩ wa. Ǹ nə́ n lɛ sɔkɔn Aarɔn li, ǹ nə́ pɛ nɛ: «Yoo! N dìn zɛnaa n kɔ wɔsɛn la, dìn mɛnɛn bɛ́ re wɔ nyɛɛnaan boe, a giala, Muizu mɛn soo wɔ nɛ á wɔ bɔ Ezipti gána nɛ, sii mɛn yɛ, wɔ ba doɛ̃ wa.»

² Aarɔn pɛ ǹ nɛ: «Sana mànan kɛn lɛn kaa lɔn toon ne, ka kaa nɛgiĩn laanka kaa nɛlɔn wɔn nɛ, ka bɛn waa, ka da ǹ nɛ ma li.»

³ Zaman lɛ tumaa nə́ ǹ too ne ǹ sana mànan waa, ǹ nə́ daa ǹ nɛ Aarɔn li.

⁴ Aarɔn bɛa sana kɛ lɛ si ǹ gɔn, á yo á zɛnaa diin nɛ nyí lɛa. Ǹ nə́ tɔ́n pɛ kəni: «Haya, Izirayeli minin lɛn! Kaa lawa lɛ á ke, ǹ mɛn lɛ ka bɔ Ezipti gána nɛ, á soo ka nɛ!»

⁵ Aarɔn bɛ lɛ yɛ, yǎa a *wúlu bɔ ǹ bǎã dɔ màn nyín lɛ yɔrɔ-a, á tɔ́n pɛ kɛnɛn: «Biɛ̃, zɔ́n tán Dɛnaa a lɛa.»

⁶ A lɛawaa sonbore, ǹ yoo tán maa-n gɔrɔ, ǹ nə́ *wúlu màn tiɛ̃n bɔ, ǹ nə́ bii kɔɔ̃n kɔ kɔn wúlu mànan bɔ. Zaman lɛ giã tán á màn bii, á màn mi, bɛ kio, á yoo á sàn kɔ.

⁷ Dɛnaa boo da Muizu ni, á pɛ: – Gisĩ fufuu. A giala, n zaman lɛ sàabaa, zaman kɛ lɛ, ń soo ne ń bɔ Ezipti gána nɛ.

⁸ Á ke, ma zii mɛn nyaa ǹ nɛ, ǹ nə n foo kũ, ǹ nə́ goã bɛ la wa, ǹ nə́ ke ǹ nə́ kanaa ǹ nə́ n bɔ la. Á ke, ǹ nə́ diin nɛ nyín zɛnaa, ǹ ná a guguru kɔ, ǹ nə́ wúlu mànan dɛ a ganaa. Ǹ nə́ pɛ kɛnɛn dɔn dinin: «Haya, Izirayeli minin lɛn, kaa lawa lɛ á ke, ǹ mɛn lɛ ka bɔ Ezipti gána nɛ, á soo ka nɛ.»

⁹ Á siĩni! Má zaman kɛ lɛ dɔ̃ kəni! Tɔrɔ too kaka-a nɛ!

¹⁰ Sisia kəni, a toa ma daa. Maa foo-yoo gɔ́ɔ̃ nɛ, man die ǹ dii ma ǹ nya. Bɛ kio, ma á re zɛnɛɛ, zaman gole bɔ Muizu din ni.

¹¹ Sɛnɛ, Muizu Dɛnaa Lawa nyankɔ, mà a n foo basã. Á pɛ nɛ: – Dɛnaa, wàa na á baa, n foo-yoo gɔ́ɔ̃ nɛ, n nə yui n din a zaman kɛ gialaa, n din bɛ́ ń zaman mɛn bɔ Ezipti gána nɛ, ń soo ne ka n din pàã gole kɛ nɛ?

¹² Dɛnaa, bɛ̀ ń zɛnaa miɛ̃, Ezipti gána minin kɛn tá re pii, mà baraabaa a lɛa nɛ, n soo ǹ ne, màn mɛn bɛ́ toɛ, n nə ǹ dɛ kelen la, n nə ǹ tɔ papaã n bɔ kanaa. Dɛnaa, sabara baa n toa n foo basã, n baran baraa zɛnaa n din a zaman kɛ-n wa.

¹³ Dɛnaa, n yiri gisĩ Abrahamu ni, Izaaki ni ka Zakɔba nɛ. N yiri gisĩ n din a liɛ kɛ nɛ, ń wɔ ǹ nɛ ka n din tɔ nɛ. Táa ma nə́ n pɛ ǹ nɛ kɛnɛn: «Ma á re ka tɔrɔn mɔnɛɛ ka lon a leeren bɛ́ lɔn, ma gána tumu mɛn boo da ke, ma á re bɛ koe kaa nɛnyaanan la, a ǹ wɔ baa yǎa duduu.»

¹⁴ Dɛnaa bɛ́ á goã mà a n die baraa mɛn zɛnɛɛ a din a zaman kɛ nɛ, á wusoo bɛ kio.

¹⁵ Muizu gisĩ kəni, á n bɔ kele lɛ la, ka lɛ kɔ kɔn la ǹ boon kɔlɔ-sɛlɛɛ màn paa lɛ nɛ a gɔn. Boon lɛn man kiɛ̃ nɛ kɔlɔn lɛn gogoonmaa paǹan paanan ganaa.

¹⁶ Lawa din na á kɔlɔn lɛn sɛlɛɛ a dí nya, a din ná a ná a sɛ́wɔ kiɛ̃ ǹ ganaa.

¹⁷ Zozoe bɛ́ á zaman lɛ a lɛ-dɛ wuu ma, á pɛ Muizu ni: «Zia n die goɛ̃ zaman lɛ a giã ǹ bǎã-n dɛ!»

¹⁸ Sɛnɛ, Muizu pɛ: «Haayii! Gɔ̀lɔ̀baa yɛ zia la ǹ lɛ-dɛ bie wa, fɔ̃ zia la ǹ lɛ-dɛ dɔ bie wa. Ma bɛ́ màn mɛn miɛ ke, loe lɛn nɛ.»

¹⁹ Ǹ bɛ́ ǹ nə́ diri giã ǹ bǎã lɛ la, Muizu yii diin nɛ nyín lɛ yɛ, ka zaman lɛ nɛ, bɛ̀ gialaa biɛ. A foo yoo parsiini, á kɔlɔ-sɛlɛɛn lɛn kũ a gɔn, á ǹ zũ, á ǹ yɔyɔrɛ tán kele lɛ genli.

²⁰ Ǹ diin nɛ nyán mɛn lɛ zɛnaa, á bɛ saa, á da tɛ-n, a ná a gialakun kɛ lɔ mɔmɔnɔ, á kaa mu li, á kɔ Izirayeli nɛnyaanan lɛn la ǹ nə́ mi.

²¹ Á tɔ́n nɔ̀n da Aarɔn la: «Zaman kɛ na á wàa zɛnaa n nɛ, ń lɛ kɔ ń sii baraa gole taãn-taãn da ǹ mìi ni?»

²² Aarɔn ná a lɛ si: – Diɛ̃giĩ, ma nə n nyankoe, n foo baran yoo wa. N dinmaa á doɛ̃, mà zaman kɛ lɛ yii á fuu, a sii baraa zɛnaa.

²³ Maǹ nə́ pɛ ma nɛ: «Dìn zɛnaa n kɔ wɔsɛn la, dìn mɛnɛn bɛ́ re wɔ nyɛɛnaan boe, a giala, Muizu mɛn soo wɔ nɛ á wɔ bɔ Ezipti gána nɛ, sii mɛn yɛ, wɔ ba doɛ̃ wa.»

²⁴ Má tɔ́n pɛ ǹ nɛ kəni máa sana n die lon? Ǹ nə́ ǹ waa ǹ toon ne, ǹ nə́ daa ǹ kɔ ma la. Má sana lɛ kaa tɛ-n, á yo, bɛ na á diin nɛ kɛ baa.

Zaman lɛ doamaa bɛ́ ka dɔlɔ mɛn nɛ

²⁵ Muizu yɛ, mà Aarɔn na á toa, zaman lɛ ná a din dùũ sii zɛnaa, a n die ǹ zɔ́ɔn yaa wɔ ǹ ganaa gòã biɛ.

²⁶ Á tɔ́n woo golee giã ǹ bǎã lɛ a kiɛnlɛ-a, á pɛ: «Dɛnaa Lawa wɔn nə da ma li.» Levii tɔrɔ minin tumaa daa n sɔkɔn a li.

²⁷ Á pɛ ǹ nɛ: – Izirayeli a Dɛnaa Lawa lɛ n pii kɛnɛn: «Ka gogoonmaa gɔya sa da ka wàã li, ka n bibiə̃, ka bɔ kionən ne kaa giã ǹ bǎã lɛ nɛ, ka ka dɔɔ̃nɔn dɛ, ka giaáran nɛ, ka miãkɛnɛn nɛ.»

²⁸ Levii tɔrɔ minin lɛn nə́ Muizu lɛ si. Zaman lɛ bii, minbuiin duu sɔɔ (3 000) miã na á gã.

²⁹ Muizu tɔ́n pɛ Levii tɔrɔ minin lɛn man doo: «Pelo, ka lɛ kɔ mà Dɛnaa din na á ka koa a dí a lɛa sonbore. Ka bɛ́ ka zɛnaa dinin, ka kɔ́n nə n nyɛnaa kaa nɛgiĩ hinlaa ka dɔɔ̃ngiĩ dɛ a gã-n wa. Dɛnaa din die a na a barka wɔ ka nɛ pelo.»

Muizu Lawa nyankɔ lɔn mà a Izirayeli a sã toa nɛ

³⁰ A lɛawaa, Muizu pɛ zaman lɛ nɛ: «Ka n ka sii baraa gole taãn-taãn zɛnaa. Sɛnɛ, man die dii kele lɛ la, ma wo Dɛnaa li kanna, kɔntan á re masɛ a nyankɔ sii, a kaa sã toa ka nɛ.»

³¹ Muizu wusoo bɛa yɔrɔ kɛ lɛ la, á woo Dɛnaa li, á pɛ nɛ: «Dɛnaa, kaarɛ! Zaman kɛ na á sii baraa gole taãn-taãn zɛnaa. Maǹ nə́ lawa zɛnaa ka sana nɛ ǹ dinin manɛ.

³² Sɛnɛ kanna, masɛ nə n nyankoe, bɛ̀ ń boe la, n sii baraa gole kɛ toa ǹ nɛ. Dɛnaa, bɛ̀ a ba n zɛnɛɛ miɛ̃ wa, n masɛ tɔ tuturu, n bɔ yiikoonaabaa ǹ sɛ́wɔ kɛ lɛ nɛ, n din kiɛ̃.»

³³ Dɛnaa ná a lɛ si: «Haayii, ma ba n tɔ tuturi wa! Min mɛnɛn nə sã masɛ ganaa, man bɛa dɛnan dininsɔɔ̃nɔn tɔ tuturi, ma bɔ maa sɛ́wɔ nɛ.

³⁴ Kanna kəni, woo! Zaman kɛ lɛ nyɛɛnaan bɔ, ma bǎã mɛn pɛ n nɛ, wo-n walan. Ma din a lon a dia dí-a wole n die tɔ we n nyɛɛnɛ. Sɛnɛ, bɛ̀ ma yoo ǹ mɛn pinaa, ma á re dɔlɔ boe ǹ ganaa ǹ sii baraan lɛa.»

³⁵ Sonbore, Dɛnaa dɔlɔ bɔ zaman lɛ ganaa, ǹ diin nɛ nyín kɛ lɛ a lɛa, ǹ Aarɔn nyankɔ, mà a ǹ mɛn lɛ zɛnaa.