Bɔ bɛ̀rɛbaa nɛ 30 - LAWA A BOO SONBORE

Màn gìĩ kɔɔ̃n tã ǹ bǎã

¹ Dɛnaa Lawa pɛ: «Màn gìĩ kɔɔ̃n tã ǹ bǎã zɛnaa ka kaasia gɔn nɛ.

² A sasabaa goã gùrù yii goon, a pəməbaa goã gùrù yii goon, a gùrùn tumaa die ǹ kɔnpɛ. A wo lon goã gùrù yii paa. A bìbìn nə goã kɔn ka a din ni.

³ Sana yoreen yoreen yo n kaa la. N kaa a lalan la, ka a gùrù sii lɛ a gɔ̀nɔn tumaa nɛ, ka a bìbìn ni. N na a lɛkiri zɛnaa ka sana nɛ, n na a lɛnpɛnɛ nɛ.

⁴ Sana kaaranan zɛnaa a lɛkiri lɛ giulun, a paǹan paanan li, n bɛn zɛnaa a wàãn paanan li, màn mɛn bɛ́ toɛ, ǹ na a gũ ǹ bàlàn kɛn wɔ ǹ nɛ.

⁵ Bɛa bàlàn lɛn zɛnaa ka kaasia gɔn nɛ, n sana yo n kaa ǹ la.

⁶ Mɔnaa mɛn bɛ́ *lɛ kɔ kɔn la ǹ goo lɛ siã, n da bɛ lɛ yɔrɔ-a, masɛ bɛ́ re n diɛ n lɛ bǎã mɛn nɛ.

⁷ Aarɔn die a màn gìĩ kɔɔ̃n kɛ tã bɛ la. Baayɛlɛ, baayɛlɛ, bɛ̀ á daa bolonən lɛn zɛnaa, a bɛa màn lɛ tã.

⁸ Bɛ̀ Aarɔn daa bolonən lɛn lɛ sã wasamiɛ̃n doo, a màn lɛ tã. Bɛ n màn lɛa, màn mɛn doamaa bɛ́, a n tã biikoo tumaa li Dɛnaa yɔrɔ-a yǎa duduu.

⁹ Ka baran màn gìĩ kɔɔ̃n tɔrɔ kooro tã la wa, ka baran *wúlu màn tiɛ̃ wole bɔ la wa, ka baran Lawa gɔ ǹ màn da la wa, ka baran yɔ zuməə a ganaa wa.

¹⁰ Gunyin goon lɛ̀ goon gɔ́ɔ̃ nɛ, Aarɔn die a *gɔ̀ bɔ a ganaa, a na a yoreen kɔ. Bɛ̀ á tɔɔ mɛn dii sii baraan toa ǹ wúlu màn lɛa, a die a bɛ mà lɔ bǎã lɛ a bìbìn kɛn ganaa. Bɛa sii lɛ nə n zɛnaa lɛ̀ woo lɛ̀, yǎa duduu. Màn gìĩ kɔɔ̃n tã ǹ bǎã kɛ lɛ n die goɛ̃ masɛ wɔ lɛa, a n die goɛ̃ bǎã sonbore lɛa.»

Kion sonbore kɛ lɛ a màn-boboe

¹¹ Dɛnaa boo da Muizu ni, á pɛ:

¹² «Bɛ̀ ń Izirayeli nɛnyaanan lɛn nimi, ǹ gogoonmaa na a din nyin giɔ̀mɔ saraa masɛ la, màn mɛn bɛ́ toɛ, sii baraa kɔ́n baran ǹ yɛ minin nimii biikoo lɛ li wa.

¹³ Min gogoonmaa mɛn doamaa bɛ́ ka nimii ni, didie die a wɔrɔgiala garamu sooro kɔ, a kɔnpɛ ka kion sonbore kɛ a màn-boboe a talɛɛ nɛ. Bɛa wɔrɔgiala kɛ n die n boe masɛ wɔ lɛa.

¹⁴ Bɛ n Izirayeli nɛnyaan nimii wole gogoonmaa mìi ni, a kũ lɛ̀ fuədɛnaa ganaa, a wo nyɛɛnaa ǹ yaa, didie n bɛ boe Dɛnaa wɔ lɛa.

¹⁵ Bɛ̀ ǹ tá re bɛa màn lɛ boe Dɛnaa wɔ lɛa, ǹ nyin giɔ̀mɔ lɛa, pàãman wɔ baran kiɛ̃ a lɛ la wa, doobaan dɔn wɔ baran nyaabaa a lɛ ganaa wa.

¹⁶ Bɛ̀ n bɛa wɔrɔ kɛ lɛ tumaa si Izirayeli nɛnyaanan lɛn la ǹ mɛn waáraa, a saa, a goã kɔn yɛ ǹ kion kɛ lɛ a tamaa ǹ màn lɛa. Masɛ á re n yiri koɛ Izirayeli nɛnyaanan nɛ miɛ̃, ma ǹ nyin tamaa.»

Gɔ̀ bɔ ma-a ǹ doo

¹⁷ Dɛnaa boo da Muizu ni, á pɛ:

¹⁸ «Doo kaaraagoon zɛnaa ka zan tã nɛ, a koamala ǹ màn dɔ goã zan tã lɛa. Bɛ zɛnaa a goã mu kũ ǹ màn lɛa, kɔn yɛ ǹ kion lɛ laanka *wúlu bɔ ǹ bǎã kɛ bii ni, n mu kaa a nɛ.

¹⁹ Aarɔn laanka a nɛgiĩn tá re ǹ gɔnɔn laanka ǹ gòãn pii a nɛ.

²⁰ Bɛ̀ ǹ tá re we kɔn yɛ ǹ kion lɛ nɛ, ǹ tá re n zoe ka mu lɛ nɛ, ń giɛ ǹ baran gã wa. Hinlaa bɛ̀ ǹ tá re n mɔrɛ wúlu bɔ ǹ bǎã lɛ ganaa, ǹ nə́ die wúlu màn koe masɛ Dɛnaa la,

²¹ ǹ tá re ǹ gɔnɔn laanka ǹ gòãn pii, ń giɛ ǹ baran gã wa. Bɛ n die goɛ̃ sii lɛa, ǹ doamaa bɛ́ nɛ ǹ sii mɛn zɛnaa, a din ni ka a nɛnyaanan nɛ, yǎa duduu.»

Minin bɔ a koa ǹ nyɔɔ

²² Dɛnaa boo da Muizu-n doo, á pɛ:

²³ – Ga nyɔɔn li, ǹ goã nyɔɔ tɔrɔ sonboren lɛa, màn ná a ba ǹ nyɛɛn nyɔɔ lɛa wa. N ga nyɔɔ tɔrɔn kɛn li: *miíri nyɔɔ gìĩ kɔɔ̃n: bɛa kilo sooro, sinaamono nyɔɔ gìĩ kɔɔ̃n ke: bɛa kilo paa ka talɛɛ, buruu nyɔɔ gìĩ kɔɔ̃n kɛ dɔ: bɛa kilo paa ka talɛɛ,

²⁴ kaasi nyɔɔ kɛ dɔ: bɛa kilo sooro. Màn lɛ tumaa zɔɔ̃, a kɔnpɛ ka Kion sonbore kɛ lɛ a màn-boboe kɛ nɛ. Ga *olivie nyɔɔ tàan yii sɔrɔ dɔ li.

²⁵ Nyɔɔ dí-nyali sonbore bɛa nyɔɔn kɛn lɛn kaa kun, a ǹ lɔlɔkɔn, ǹ nə n baa nyɔɔ sonbore lɛa, minin bɔ a koa taman yii.

²⁶ Ǹ kɔ́n kaa kɔn yɛ ǹ kion lɛ ganaa, ka lɛ kɔ kɔn la ǹ goo kɛ nɛ,

²⁷ ka tabala kɛ laanka a màn bisinin tumaa nɛ. A kaa bolon da ǹ bǎã kɛ ganaa ka a màn bisinin ni. Nyɔɔ kɔ́n kaa màn gìĩ kɔɔ̃n tã ǹ bǎã kɛ ganaa,

²⁸ ka wúlu màn tã ǹ bǎã kɛ laanka a màn bisinin tumaa nɛ. A kaa doo kaaraakɛ laanka a gũ ǹ màn kɛ ganaa.

²⁹ Bɛa mànan kɛn lɛn tumaa koa masɛ wɔn lɛa, ǹ tá re goɛ̃ màn sonbore-sonboren lɛa. Min hinlaa màn mɛn bɛ́ re n loe ǹ ganaa, bɛ á re soɛ̃ màn biɛ.

³⁰ Nyɔɔ kaa Aarɔn laanka a nɛgiĩn dɔn ganaa, n nə ǹ bɔ n nə ǹ koa masɛ wɔn lɛa, màn mɛn bɛ́ toɛ, ǹ masɛ a dí nya.

³¹ A pɛ Izirayeli nɛnyaanan man kɛnɛn: «Kɛ n nyɔɔ sonbore lɛa, minin bɔ a koa ǹ wɔ nɛ, masɛ Dɛnaa wɔ nɛ, a n die goɛ̃ bɛa dí kɛ nyɛɛ yǎa duduu.

³² Min kooro kɔ́n baran saa, a lɔ a din gɔ̀nɔn ganaa wa. Min dɔ baran ǹ miã tɔrɔ zɛnaa lɛn zɔɔ̃ wa, a giala, nyɔɔ sonbore ne. Ǹ doamaa nɛ, ǹ nə n nyɛnaa bɛa màn kɛ lɛ nɛ.

³³ Min mɛn bɛ́ re nyɔɔ kɛ lɛ a zɛnaa lɛn zoɛ̃, a lɔ min kooro ganaa, ǹ tá re bɛa dɛnaa boe, ǹ bɔ ǹ dɔɔ̃nɔn bii.»

Màn gìĩ kɔɔ̃n kɛa zɛnaa

³⁴ Dɛnaa pɛ Muizu ni: «Ga màn gìĩ kɔɔ̃nɔn li: sitoraksi ni ka oniksi ni, galbanumu gìĩ kɔɔ̃n nɛ, ka da yon gìĩ kɔɔ̃n sonbore ne. N die n toa ǹ tumaa kɔnpɛ.

³⁵ N bɛ lɛ tumaa lɔlɔkɔn, ǹ màn gìĩ kɔɔ̃n baa. Nyɔɔ dí-nyalin die ǹ bɛa dí nya doɛ̃, ǹ yìsi kaa li, ǹ toa a yoreen kɔ, a màn sonbore baa.

³⁶ Bɛa màn lɔlɔkɔn kɛ lɛ kɔ́n lɔ, a wùsu baa, n wùsu lɛ a boɛɛn da Goo lɛ yɔrɔ-a, kɔn yɛ ka Lawa nɛ ǹ kion lɛ nɛ, ma bɛ́ re n diɛ n lɛ bǎã mɛn nɛ lɛn. Ka die ka toa ka n nyɛnaa bɛa màn kɛ lɛ nɛ.

³⁷ Màn gìĩ kɔɔ̃n kɛ lɛ, n nə́ die zɛnɛɛ, min kɔ́n baran ǹ miã zɛnaa a din wɔ lɛa wa. Ka toa ka dɔ̃, mà a n koa nɛ masɛ Dɛnaa dinsɔɔ̃ a lɛa.

³⁸ Min mɛn bɛ́ re ǹ miã tɔrɔ zɛnaa lɛn zoɛ̃ a din wɔ lɛa, a na a gìĩ kɔ, ka tá re bɛa dɛnaa boe, ka bɔ ǹ dɔɔ̃nɔn bii.»