Bɔ bɛ̀rɛbaa nɛ 28 - LAWA A BOO SONBORE

Wúlu-bɔlen mɔnaan

¹ «Lawa mà Muizu ganaa: N gologiĩ Aarɔn laanka a nɛgiĩn bɔ Izirayeli minin bii, n nə ǹ koa n din li, màn mɛn bɛ́ toɛ, ǹ masɛ a dí nya. Aarɔn din laanka a nɛgiĩn kɛn nɛ: Nadaabu ni ka Abiu ni, Eleyazaara nɛ ka Itamaara nɛ.

² Mɔnaa sonboren zɛnaa ǹ gologiĩ Aarɔn wɔ lɛa, gugurubaa laanka zín sii lɛa.

³ Ma din sii-doɛ̃ kɔ min mɛnɛn la, n dɔ boo da bɛa sii-dɔ̃len kɛn lɛn nɛ. N pɛ ǹ nɛ, ǹ Aarɔn a mɔnaan lɛn zɛnaa, màn mɛn bɛ́ toɛ, Aarɔn lɛ nə n koa a gɔrɔn, a masɛ a dí nya.

⁴ Ǹ bɛ́ re mɔnaan mɛnɛn zɛnɛɛ, bɛn nə́ ke: Tìãbii zéwo ke, ka dí nya ǹ mɔnaa kɛ nɛ, ka dɔnkɛ sasa nɛ, ka dɔnkɛ boɛɛn sonbore ne, nyaǹ ná a ganaa, mìi yii ǹ mɔnaa gɔn nɛ, ka binbin yii ǹ wɔ nɛ. Ǹ doamaa nɛ, ǹ bɛa mɔnaa sonboren kɛn lɛn zɛnaa n din gologiĩ Aarɔn wɔn lɛa, ka a nɛgiĩn ni, màn mɛn bɛ́ toɛ, a masɛ a dí nya.

⁵ Mɔnaa dí-nyalin lɛn nə dí nya ka sana nɛ, ka gɛ̀sɛ korebore ne, ka a tã nɛ, ka a tã zenzen ne, ka mɔnaa guguru sonbore ne.

⁶ «Ǹ dí nya ǹ mɔnaa lɛ sɛ zɛnaa ka mɔnaa guguru sonbore ne, foɛ̃-n ka sana nɛ, ka gɛ̀sɛ korebore ne, ka a tã nɛ, ka a tã zenzen ne, ǹ toa ǹ na a dí nya doɛ̃.

⁷ Yii ǹ biɛ màn paa n die goɛ̃ dí nya ǹ mɔnaa lɛ lɛkoron ganaa, bɛ̀ á n wɔ, a n kũ ka bɛn nɛ.

⁸ Bɛa yii ǹ biɛn kɛn lɛn man die goɛ̃ kɔn ka dí nya ǹ mɔnaa lɛ din ni, zɛnaa-n ka a din màn tɔrɔ goon lɛ nɛ: mɔnaa guguru sonbore ne, foɛ̃-n ka sana nɛ, ka gɛ̀sɛ korebore ne, a tã nɛ, a tã zenzen ne.

⁹ N kɔlɔ sonbore màn paa saa, n Zakɔba a nɛgiĩ fulupaa kɛ tɔ kiɛ̃ ǹ ganaa.

¹⁰ N tɔ lɛ a sɔrɔ kiɛ̃ kɔlɔ lɛ a bibinaa kɛ ganaa, n sɔrɔ gialakun kɛ dɔ kiɛ̃ kɔlɔ lɛ a paabaa ǹ wɔ kɛ dɔ ganaa. Ǹ kiɛ̃ kɔn kio a kɔnpɛ ǹ dinin yɛ kɔn kio kɛ nɛ.

¹¹ N Zakɔba a nɛgiĩn lɛn tɔn kiɛ̃ kɔlɔ màn paa lɛ ganaa, ka kɔlɔ-sɛlɛli bɛ́ a dí nyɛɛ lɔn, n nə n din wɔbaa ǹ wɔ a nyaǹ kiɛ̃ wɔ ǹ ganaa. Bɛ kio, n kɔlɔ màn paa kɛ doa ka sana nɛ.

¹² Bɛa kɔlɔ màn paa kɛ lɛ da dí nya ǹ mɔnaa lɛ a kũ ǹ biɛn kɛn lɛn ganaa. Kɔlɔ màn paa kɛ lɛ n die goɛ̃ yiri gisĩ sii ni ǹ mànan lɛa, Izirayeli nɛnyaanan taman yii. Aarɔn dɔ n die woe ka ǹ tɔn kɛn nɛ Dɛnaa yɔrɔ-a, a mɔnaa kũ ǹ biɛn kɛn ganaa, bɛ n nyɛɛ mà Dɛnaa yiri a re boe ǹ ne duduu wa.

¹³ Kɔlɔn lɛn doa ǹ mànan lɛn zɛnaa ka sana nɛ.

¹⁴ Doo, n fɔlɔbiɛ bɔnboɛɛn màn paa zɛnaa ka sana yoreen yoreen ne, n nə ǹ zɛnaa ka biɛ pɛnɛɛn bɛ́ lɔn, n bɛn lɛn doa kɔlɔn doa ǹ mànan lɛn ganaa.

Tìãbii zéwo

¹⁵ «Bɛ kio kəni, n tìãbii zéwo zɛnaa, Lawa dùũ dɔ̃ ǹ zéwo ke. N dí-nyalin lɛn nə toa ǹ na a dí nya doɛ̃. N zɛnaa ka dí nya ǹ mɔnaa kɛ bɛ́ lɔn. N zɛnaa ka mɔnaa guguru sonbore ne, foɛ̃-n ka sana nɛ, ka gɛ̀sɛ korebore ne, a tã nɛ, a tã zenzen ne.

¹⁶ Bɛ̀ n timəə ń nya, a gùrù sii tumaa kɔnpɛ: a sasabaa goã gùrù yii talɛɛ, a pəməbaa gùrù yii talɛɛ.

^17-20 N kɔlɔ fulupaa sonbore doa a ganaa, kɔlɔ lɛ a gogoonmaa n tɔtɔ ka ǹ miãn nɛ. N nə ǹ kaa kɔn kio zii sii, ziin lɛn nə́ kɔn giulun. N kɔlɔ lɛ a gogoonmaa doa sana la.

²¹ Kɔlɔn lɛn man die kɔn siɛ ka Zakɔba a nɛgiĩn tɔn lɛn nɛ: kɔlɔ fulupaa ka ǹ dɔn tɔn lɛn bɛ́ lɔn. Maǹ die goɛ̃ Izirayeli nɛnyaanan tɔrɔgiala basa fulupaa kɛ a sii nyaa ǹ sii lɛa.

²² «Tìãbii zéwo lɛ ganaa, n biɛ bɔnboɛɛnɛn zɛnaa, dodoe-n kɔn lɛ ka biɛ pɛnɛɛn bɛ́ lɔn. N nə ǹ zɛnaa ka sana yoreen yoreen ne.

²³ Tìãbii zéwo lɛ ganaa doo, n kaaran màn paa zɛnaa ka sana nɛ, n bɛa kaaran màn paa kɛ lɛ doa tìãbii zéwo lɛ-a lon a lɛkoro wɔa gùrù màn paa kɛ ganaa.

²⁴ N bɛa sana biɛ màn paa kɛ lɛ doa sana kaaran màn paa kɛ lɛ ganaa, tìãbii zéwo lɛkoro màn paa kɛ ganaa.

²⁵ N tɔn biɛ màn paa lɛ lɛkoron doa kɔlɔn da ǹ màn màn paa lɛ ganaa. N doa dí nya ǹ mɔnaa kũ ǹ biɛn kɛn lɛn ganaa nyɛɛnɛ.

²⁶ N sana kaaran màn paa kɔsɔn zɛnaa, n nə ǹ doa tìãbii zéwo lɛ a tán a lɛkoro wɔa gùrù màn paa kɛ ganaa, naa-n dí nya ǹ mɔnaa lɛ ganaa.

²⁷ N sana kaaran màn paa kɔsɔn dɔn zɛnaa doo, n bɛn doa dí nya ǹ mɔnaa lɛ a kũ ǹ biɛn kɛn giala ganaa, nyɛɛnɛ, ǹ nimi ǹ bǎã kɛ nɛ. Bɛa kaaranan kɛn man goɛ̃ dí nya ǹ mɔnaa kɛa yii ǹ bǎã lalan.

²⁸ Maǹ die tìãbii zéwo lɛ a kaaranan kɛn yii kɔn ka dí nya ǹ mɔnaa kɛ wɔn nɛ, ka biɛ korebore kɔ́n nɛ. Maǹ die yii ka yɔrɔ kɔ́n nɛ, màn mɛn bɛ́ toɛ, tìãbii zéwo lɛ sɛ goã dí nya ǹ mɔnaa lɛ a wìi biɛ kɛ lalan. Sɛnɛ, a baran n bibiə̃ dí nya ǹ mɔnaa lɛ lalan wa.

²⁹ «Bɛ̀ Aarɔn tá woe bǎã sonbore lɛ nɛ, Izirayeli nɛnyaanan tɔn lɛn man die goɛ̃ bɛa tìãbii zéwo lɛ lalan. Bɛ n yiri gisĩ sii ni ǹ màn lɛa, Dɛnaa yɔrɔ-a biikoo tumaa li.

³⁰ Muizu, Lawa dùũ dɔ̃ ǹ mànan kɛn kaa tìãbii zéwo kɛ nɛ, ǹ goã Aarɔn foobii, n wɔ ǹ nɛ masɛ Dɛnaa yɔrɔ-a. Aarɔn nə die bɛa mànan kɛn lɛn guĩ a foobii, masɛ Dɛnaa yɔrɔ-a biikoo tumaa li, màn mɛn bɛ́ toɛ, a ma dùũ dɔ̃ Izirayeli nɛnyaanan wɔ paǹ li.

Wúlu-bɔlen mɔnaa gialakunun kɛn

³¹ «Bɛ kio, Aarɔn bɛ́ re dɔnkɛ sasa mɛn we dí nya ǹ mɔnaa lɛ giulun, n bɛ tumaa zɛnaa ka gɛ̀sɛ korebore ne.

³² A toa a bii goã foɛ̃ nɛ, mìi wɔ ǹ bǎã lɛa. Mɔnaa-tãli toa a bɛa bii foɛ̃ kɛ lɛ a dí nya doɛ̃, a zɛnaa a na a lɛnpɛnɛ. Bɛa mìi wɔ ǹ bǎã kɛ lɛ nə n nimi a paraa, ń giɛ a baran toɛ̃ wa.

³³ Ka mɔnaa lɛ a tán nɛ wɔlɔ wɔrɔ, ka a lɛnpɛnɛ nɛ. Ka zɛnaa ka da nɛ bɛ́ lɔn, ka gɛ̀sɛ korebore ne, ka a tã nɛ, ka a tã zenzen ne. Ka bɛn zɛnaa ka mɔnaa lɛ lɛnpɛnɛ nɛ. Bɛn lɛn dɔn bii doo, ka sana toolo bɔnboɛɛnɛn kaa ka a lɛnpɛnɛ nɛ.

³⁴ Sana toolo boɛɛn goon, bɛ kio da nɛ nyaǹ goon, bɛ kio doo sana toolo boɛɛn goon. Ka bɛ zɛnaa mɔnaa lɛ lɛ ganaa tán miɛ̃, yǎa ka a lɛnpɛnɛ.

³⁵ Bɛ̀ Aarɔn tá dí nyɛɛ, bɛa mɔnaa lɛ n goɛ̃ a ganaa, bɛ̀ á woe Dɛnaa yɔrɔ-a bǎã sonbore kɛ nɛ, bɛ̀ á soe dɔn n boe a nɛ, toolon kɛn lɛn wuu á die boe. Bɛa yɔrɔ kɛ la, Aarɔn ba re giɛ̃ wa.

³⁶ «Bɛ kio doo, n nyaǹ màn zɛnaa ka sana yoreen yoreen ne, ka da buu bɛ́ lɔn, ń kiɛ̃ a ganaa ka ǹ bɛ́ gòã-kurii diɛ màn ganaa lɔn, mà "Kɛ n Dɛnaa wɔ lɛa."

³⁷ A da biɛ korebore ganaa, bɛ goã mìi yii ǹ mɔnaa gɔn kɛ nyɛɛnaan ganaa.

³⁸ A n goɛ̃ Aarɔn nyanlɛ ganaa, màn mɛn bɛ́ toɛ, Izirayeli nɛnyaanan bɛ́ mànan mɛnɛn tumaa koe Lawa la, ǹ nə́ *gɔ̀ boe ǹ ganaa, Lawa lɛ kɔ bɛa mànan kɛn lɛn ganaa, haalɛ ta maǹ nə́ sã ǹ da Lawa yɔrɔ-a biikoo lɛ li. A n goɛ̃ a nyanlɛ-a biikoo tumaa li, màn mɛn bɛ́ toɛ, bɛa Lawa gɔ ǹ mànan kɛn lɛn nə kɔɔ̃n kɔ Dɛnaa ganaa.

³⁹ «Bɛ dɔ kio doo, Aarɔn a dɔnkɛ boɛɛn kɛ laanka mìi yii ǹ mɔnaa gɔn kɛ zɛnaa ka mɔnaa guguru sonbore ne. N binbin yii ǹ màn dɔ zɛnaa, ka mɔnaa guguru sonbore ne, foɛ̃-n ka gɛ̀sɛ nɛ.

⁴⁰ «N dɔnkɛn zɛnaa Aarɔn a nɛgiĩn lɛn manɛ. N binbin yii ǹ mànan zɛnaa ǹ nɛ, ka bafolon dɔn nɛ, bɛn nə goã gugurubaa laanka zín sii lɛa.

⁴¹ Bɛa mɔnaan kɛn lɛn wɔ n gologiĩ Aarɔn laanka a nɛgiĩn ganaa, n nyɔɔ kaa ǹ mìi ni, n nə ǹ koa ǹ dí lɛ la, n nə ǹ koa masɛ Lawa wɔn lɛa, ǹ tá re masɛ a dí nyɛɛ.

⁴² Bɛ̀rɛ̀n zɛnaa ka mɔnaa guguru sonbore ne, a saa ǹ bɔsɔ̃ ganaa, a wo ǹ gìsin yaa. Ǹ zɛnaa, n nə ǹ sìi duru ni.

⁴³ Aarɔn laanka a nɛgiĩn tá re bɛn we, bɛ̀ ǹ tá re we kɔn yɛ ka Lawa nɛ ǹ Kion kɛ nɛ ǹ mɛn waáraa, hinlaa bɛ̀ ǹ tá re n mɔrɛ *wúlu bɔ ǹ bǎã kɛ ganaa, ǹ wúlu bɔ kion sonbore kɛ nɛ. Maǹ die zɛnɛɛ miɛ̃, màn mɛn bɛ́ toɛ, ǹ baran sã, ǹ gã kooro wa. Kɛ n sii zɛnaa ǹ gɔn lɛa Aarɔn mìi ni, ka a kio nɛnyaanan nɛ, a ba n bɔyɛɛ doɛ̃ wa.»