Bɔ bɛ̀rɛbaa nɛ 26 - LAWA A BOO SONBORE

Kion sonbore

¹ «Kion sonbore kɛ sɛ, bɛa dí-nyalin doamaa nɛ, ǹ zɛnaa ka mɔnaa gɔn fù ni, zɛnaa-n ka mɔnaa guguru sonbore ne, foɛ̃-n ka gɛ̀sɛ korebore ne, ka a tã nɛ, ka a tã zenzen ne, ǹ lon màn yiikoonaan nyínin zɛnaa ǹ ganaa nyaǹan lɛa.

² Mɔnaa gɔnɔn lɛn tumaa a sasabaa goã gùrù yii fuəwenkiwisi, ǹ pəməbaa goã gùrù yii sii. Ǹ tumaa a zɔɔ̃ goã goon.

³ Ka mɔnaa gɔnɔn lɛn sooro nimi, ka ǹ kaa kun. Sooro kɔsɔ kɛ dɔ, ka bɛn dɔn nimi, ka ǹ kaa kun.

⁴ Gɛ̀sɛ koreboredɛnaa dɔ mɔnaa gɔn bibinaa sooro kɛ lɛ, ka nimi kɔn lɛkoro ganaa. Kɔsɔ dɔ dɔ mɔnaa gɔnɔn nimi kɔn goon kɛ lɛ a mɔnaa gɔn nyɔɔbaa kɛ lɛ.

⁵ Gɛ̀sɛ pɛnɛ kɔn posooro dɔ mɔnaa gɔn bibinaa lɛ lɛ, n posooro dɔ mɔnaa gɔnɔn nimi kɔn paabaa ǹ wɔ kɛ lɛ dɔ a mɔnaa gɔn nyɔɔbaa kɛ lɛ. N toa gɛ̀sɛn lɛn nə goã kɔn a peperebaa li.

⁶ Kara posooro zɛnaa ka sana nɛ, n mɔnaa gɔnɔn lɛn doa kɔn ka bɛa karan kɛn lɛn nɛ, mɔnaa kion lɛ goã kɔn.

⁷ «Bɛ kio, n bòe ka mɔnaa gɔnɔn zɛnaa, bɛn nə boo la ǹ goã Kion lɛ a kala lɛa. A zɛnaa mɔnaa gɔn fulugoon.

⁸ Ǹ sasabaa goã gùrù yii pɔsɔɔ, ǹ pəməbaa goã gùrù yii sii. Ǹ fulugoonmaa lɛ tumaa a zɔɔ̃ goã goon.

⁹ Mɔnaa gɔnɔn lɛn sooro nimi kɔn, n sɔrɔ kɛ dɔ nimi kɔn. N sɔrɔbaa ǹ wɔ kɛ yiɛ n kaa mɔnaa kion lɛ nyɛɛnaa ǹ kɛ la.

¹⁰ Gɛ̀sɛ pɛnɛ kɔn posooro dɔ mɔnaa gɔn bibinaa kɛ lɛ, mɔnaa gɔnɔn nimi kɔn wɔ a nyɔɔbaa kɛ lɛ. Mɔnaa gɔnɔn nimi kɔn paabaa ǹ wɔ a nyɔɔbaa kɛ lɛ dɔ, n gɛ̀sɛ pɛnɛ kɔn posooro dɔ bɛ dɔ lɛ.

¹¹ Kara posooro zɛnaa ka zan tã nɛ. N bɛa karan kɛn lɛn wɔ gɛ̀sɛ pɛnɛ kɔn-an lɛn nɛ, n mɔnaa kion lɛ kũ ni, a goã kɔn.

¹² Mɔnaa kion lɛ a mɔnaa gɔnɔn lɛn tá re sɔsɔrɔ koe ǹ kiɛ̃, ǹ gialakun nə gisĩ ǹ kaa ǹ dinin li. Ǹ lɛkoro a kiɛ̃ kɔn la tá re kiɛ kion lɛ kio wɔlɔ li.

¹³ Mɔnaa gɔnɔn lɛn sɔsɔrɔbaa dɔ li, gùrù yii goon tá re kiɛ̃ a paǹan paanan li, bɛn tá re gisĩ ǹ kaa Kion lɛ paǹan li, ǹ nə́ n kɔ kion lɛ lɛ.

¹⁴ Mɔnaa Kion lɛ a kɔmalɛ ǹ wɔ zɛnaa ka sère gɔ̀lɔ̀n ki ni, n wɔ màn tã li. A kɔmalɛ ǹ wɔ kɔsɔ dɔ zɛnaa ka don siĩ ki kəkə ne, bɛ goã a lalan.

¹⁵ «Kion lɛ a doa ǹ bàlàn zɛnaa ka kaasia gɔnɔn nɛ. N nə ǹ zumu, bɛn nə Kion lɛ kũ ǹ golee-n lon.

¹⁶ Kion lɛ a doa ǹ bàlà gogoonmaa a sasabaa goã gùrù yii fù, a pəməbaa goã gùrù yii goon ka talɛɛ.

¹⁷ Kion doa ǹ bàlàn lɛn tumaa goã goon. Wɔkɔnlɛ ǹ lɛ màn paa goã ǹ gogoonmaa ganaa, ǹ nə ǹ kaa kɔn para li.

¹⁸ N bɛa Kion doa ǹ bàlàn kɛn lɛn fuə zɛnaa kion lɛ a gusin a lɛ̀gɔn la paǹ ganaa.

¹⁹ N giãmala ǹ màn pusi zɛnaa ka wɔrɔgiala nɛ bɛa Kion doa ǹ bàlà fuə lɛ giulun: giãmala ǹ màn màn papaa bàlà gogoonmaa giulun, ǹ wɔkɔnlɛ ǹ lɛ màn paa lɛ a lɛa.

²⁰ Kion lɛ a paǹ goon kɛ li, dia-n woe gɔsɛ a lɛ̀gɔn la, doa ǹ bàlà fuə goã,

²¹ ka ǹ giãmala ǹ màn pusi kɛ nɛ, zɛnaa-n ka wɔrɔgiala nɛ. Giãmala ǹ màn màn papaa goã bàlà gogoonmaa giulun.

²² Kion lɛ gɔ́ɔ̃ wɔ a paǹ ke, dia-n woe lɛ̀nyɛɛn la, n doa ǹ bàlà sɔrɔ zɛnaa bɛ wɔ lɛa.

²³ N bàlà màn paa dɔ zɛnaa a tɔ-a, kion gɔ́ɔ̃ gùrù wɔkɔnlɛ ǹ wɔn lɛa.

²⁴ Bɛa bàlà màn paa kɛ giala n die goɛ̃ boe-n kɔn sɔnbɔraanɛ. Sɛnɛ, ǹ lɛwɔn wo n wɔ kɔn lɛ lon kaaran bibinaa kɛ nɛ. Bɛn màn paa kɛ wɔ n die n biɛ miɛ̃, maǹ die goɛ̃ ka doa ǹ bàlà kakan bɛ́ lɔn.

²⁵ Doa ǹ bàlà kiwisi n die goɛ̃ kəni, ka ǹ giãmala ǹ mànan kɛn nɛ, zɛnaa-n ka wɔrɔgiala nɛ. Giãmala ǹ màn fulusɔrɔ n die goɛ̃, màn papaa n bàlà gogoonmaa giulun.

²⁶ «Bɛ kio, n kerekaã ǹ bàlàn zɛnaa ka kaasia gɔn nɛ. Sooro goã kion lɛ a paǹ bibinaa kɛa doa ǹ bàlàn wɔn lɛa.

²⁷ Sooro goã kion lɛ a paǹ paabaa ǹ wɔ kɛa doa ǹ bàlàn wɔn lɛa, sooro dɔ goã kion gɔ́ɔ̃ lɛa paǹ kɛ wɔn lɛa, paǹ mɛn bɛ́ dia-n woe lɛ̀nyɛɛn la.

²⁸ Kerekaã ǹ bàlà kɛ goã kion doa ǹ bàlàn lɛn lon laanka tán bii ni. Ǹ zɛnaa miɛ̃, n bɔ kion lɛ lɛ goon ganaa, a wo goon yaa.

²⁹ N sana kaa doa ǹ bàlàn lɛn la, n nə ǹ kaaranan zɛnaa ka sana nɛ, n bii wɔ a kerekaã ǹ bàlàn lɛn wɔ bɛn nɛ, n sana kaa bɛa kerekaã ǹ bàlàn lɛn dɔn la.

³⁰ Màn mɛn nə n pɛ n nɛ kele lɛ la, Kion lɛ dɔ, a kɔnpɛ ka bɛ lɛ nɛ.

³¹ «Bɛ kio, n mɔnaa zɛnaa ka mɔnaa guguru sonbore ne, foɛ̃-n ka gɛ̀sɛ korebore ne, ka a tã nɛ, ka a tã zenzen ne. Ka lon màn yiikoonaan nyínin zɛnaa a ganaa nyaǹan lɛa.

³² Bɛa mɔnaa lɛ lɔɔ kaasia bàlà sii ganaa, sana n kaa nɛ ǹ la, karan nə́ ǹ ganaa sana lɛa, ǹ nə́ doa-n giãmala ǹ màn sii la, zɛnaa-n ka wɔrɔgiala nɛ.

³³ Mɔnaa lɛ da karanan lɛn giulun. «Mɔnaa lɛ kio kəni, *lɛ kɔ kɔn la ǹ goo lɛ da walan. Bɛa mɔnaa kɛ lɛ n die bǎã sonbore kɛ laanka bǎã sonbore sonbore kɛa na kɔn-a ǹ wɔ biɛ.

³⁴ Goo lɛ a lɛpii kɔ lɛ, bǎã sonbore sonbore lɛ nɛ,

³⁵ n tabala lɛ da bǎã sonbore kɛ nɛ, n bolon da ǹ bǎã lɛ dɔ da tabala lɛ yɔrɔ-a. Bolon da ǹ bǎã lɛ goã Kion lɛ a gusin a gùrù ganaa, tabala lɛ sɛ ná a gɔsɛ wɔ ganaa.

³⁶ «Bɛ kio mɔnaa dí-nyali sonboren nə mɔnaa zɛnaa Kion lɛ a kiɛnlɛ wɔ lɛa. Ǹ zɛnaa ka mɔnaa guguru sonbore ne, foɛ̃-n ka gɛ̀sɛ korebore ne, ka a tã nɛ, ka a tã zenzen ne.

³⁷ Bàlà sooro zɛnaa ka kaasia gɔn nɛ. Bɛa mɔnaa kɛ lɛ wɔ lɛa, n sana kaa ǹ la, ǹ karan nə goã sana lɛa, n giãmala ǹ bǎã sooro zɛnaa ǹ wɔn lɛa ka zan tã nɛ.