Bɔ bɛ̀rɛbaa nɛ 23 - LAWA A BOO SONBORE

Sii zɛnaa ka peperebaa-n boo

¹ «Soɛ boon mɛnɛn bɛ́, ǹ giala ba we-n taãn wa, ka baran bɛn pɛsɛ̃ piɛ̃ li wa. Ka baran soɛ a siére baa, ka n dɔ zɛ̀rɛdɛnaa lɛ wa.

² Bɛ̀ zaman nə́ n lɛ kaa kun sii baraa ganaa, ka baran mɛ kunun ǹ ni wa. Kiri-wɔlen bǎã nɛ, ka baran nyɛ́ɛ baa zaman kiri kɔkɔrɔ-wɔlen man wa.

³ Ka baran boo da ka kaa pàãwɛɛnaa lon kiri wɔ ǹ bǎã-n wa.

⁴ «Bɛ̀ ka kaa kaa zɔ́ɔ a dii lɛ, á papaã, hinlaa a dundun ni, ka kũ ka wo kɔ la.

⁵ Bɛ̀ ka kaa zɔ́ɔ lɛ a dundun yɛ, á nɔmaa a guĩ giulun, á kaa tán nɛ, ka baran kiɛ̃ ka toa walan wa. Ka n dɔ lɛ ka guĩ lɛ zɛnaa kun ni.

⁶ «Ka baran mɛnaa doobaa la kiri wɔ ǹ bǎã-n wa.

⁷ Ka baran n too kɔ soɛ boon ganaa wa. Ka baran zɛ̀rɛbaãnaa hinlaa min pepere dɛ a gã wa. A giala, masɛ a sonbore koe bɛa sii kɛ lɛ miã a zɛnaali la wa.

⁸ Ka baran toa ǹ ka lɛ pii ka min gɔ ǹ mànan nɛ wa. A giala, bɛa mànan kɛn lɛn man, haalɛ min sii-dɔ̃lin yii tiɛ̃ sonbore ganaa, a min peperen sii yɔrɔ-bɔ lɔlɔkɔn.

⁹ «Ka baran fuu nyaa gùli kɛ nɛ giã nɛ ka li wa. Ka dininmaan kɛn lɛn tá gùlibaa sii doɛ̃. A giala, ka n ka goã gùlin lɛa Ezipti gána nɛ.

Susu ǹ lɛ̀ laanka susu ǹ lɛawaa

¹⁰ «Lɛ̀ sɔrɔ gɔ́ɔ̃ nɛ, ka kaa wuru da, ka a màn kuru.

¹¹ Sɛnɛ, lɛ̀ sɔbaabaa ǹ wɔ kɛ li, ka kaa wuru lɛ a màn tumaa toa walan ka lenlen. Kaa gána lɛ a doobaan tá re ǹ màn-bii yii a nɛ. Bɛ̀ ka a gialakun mɛn toa, bɛ á re don mànan wɔ gii biɛ. Ka zɛnaa miɛ̃ ka kaa da nɛ-kɔlen dɔn nɛ.

¹² «Lɛawaa sɔrɔ dɔ gɔ́ɔ̃ nɛ, dí mɛn bɛ́ ka li, ka bɛ nya. Sɛnɛ, lɛawaa sɔbaabaa ǹ wɔ kɛ li, ka n susu. Kaa dii laanka kaa dundun dɔ á re susui yii. Kaa bɛ̀rɛn laanka kaa gùlin dɔn pàã á re wusii a kaa kɔn li.

¹³ «Ma bɛ́ má màn mɛn tumaa pɛ ka nɛ, ka n yiri kɔ bɛ li, ka zɛnaa tɛrɛɛnɛ. Ka baran lawa kɔsɔn nyankɔ wa, min baran ǹ tɔn dinin ma ka lɛ-n wa.

Zɔ́nɔn mɛnɛn doamaa bɛ́-n ka tamaa nɛ

¹⁴ «Lɛ̀ woo lɛ̀, ka zɔ́n sɔɔ zɛnaa, ka masɛ tɔ bɔ nɛ.

¹⁵ Bibinaanɛ: *Yɔ bùbaã buuru zɔ́n nɛ. Lɛawaa sɔbaa gɔ́ɔ̃ nɛ, ka buuru sɔ̃ yɔ bù ná a ba li wa. Bɛ nə n zɛnaa mui bibinaa kɛ nɛ, ka ma bɛ́ ma pɛ ka-n lɔn. A giala, ka n ka soo bɛa mui kɛ lɛ nɛ, ka n bɔ Ezipti gána nɛ. Ka baran da masɛ guguru kɔ ǹ bǎã dɔ nɛ ka ka gɔn kooro-n wa.

¹⁶ «A paabaa ǹ wɔ, ka kaa wuru màn lɛ bibinaa zɔ́n zɛnaa, ka kaa wuru gɔ́ɔ̃ màn-kurii bibinaa nɛ. «A sɔɔbaa ǹ wɔ kəni, kaa-piɛ ǹ zɔ́n kɛ nɛ, ka bɛ zɛnaa lɛ̀ a nya biikoo li, bɛ̀ ka bɛ́ ka kaa wuru màn tumaa kaa piɛ.

¹⁷ Gunyin sɔɔ, lɛ̀ gɔ́ɔ̃ nɛ, kaa giĩn tumaa doamaa nɛ, ka da masɛ Dɛnaa Lawa lɛ yɔrɔ-a.

¹⁸ «Ka baran tɔɔ dɛ *wúlu màn lɛa, ka buuru yoo wole da li, ka kɔ masɛ Lawa la wa. Bɛ̀ ka tɔɔ mɛn dɛ wúlu màn lɛa, ka baran a nyɔɔ toa wasamiɛ̃nɛ a lɛ̀ waa wa.

¹⁹ «Ka da ka wuru màn-kurii bibinaan nɛ, kaa Dɛnaa Lawa a Kion. «Ka baran bòe nɛ siĩ kɔrɛ ǹ dan nyɔ mu li wa.

Lawa a boon Izirayeli nɛnyaanan zii tɔ-wɔ a paǹ li

²⁰ «Ma á re lon a dia dí-a wole diɛ ka nyɛɛnɛ, a ka tamaa zii la, a wo ka nɛ gána kɛ nɛ, ma din ná a yɔrɔ bɔ.

²¹ Ka n dinin kũ, ka ma lɛ si, ka baran ma bɔlɔ tii wa. Ma á re kaa gɔ́ɔ̃-tii sii ma ganaa wa. A giala, bɛa lon a dia dí-a wole kɛ lɛ n dí-nyɛɛ masɛ din tɔ a lɛa.

²² Bɛ̀ ka ma lɛ si, ka maa boo kɛa sii tumaa zɛnaa, man die kaa zɔ́ɔn zɔ́ɔ biɛ, ma ziabaa ǹ ganaa kaa lɛa.

²³ Maa lon a dia dí-a wole lɛ n die ka nyɛɛnaan boe, a wɔ ka-n gána kɛ nɛ, Amɔɔrɔ minin laanka Ɛti minin wɔ lɛa, ka Perɛzi minin ni, Kanaan minin ni, Ivii minin ni ka Zebuzu minin ni. Ma á re bɛa tɔrɔn kɛn lɛn dii, ma ǹ bɔ ka nyɛɛnɛ.

²⁴ Sɛnɛ, ka baran n musin koa tán ǹ dìn yɔrɔ-a, ka ǹ guguru kɔ wa. Ka baran ǹ siin lɛn zɔɔ̃ wa. Ka ǹ dìn yɔyɔrɛ, ka ǹ tíĩn kɛn nɛ.

²⁵ Bɛ̀ ka dí nya kaa Dɛnaa Lawa dinsɔɔ̃ nɛ, ma din kɛ lɛ, ma á re barka we kaa màn-bii ni ka kaa mu ni. Ma á re ka kanbiɛ busu ganaa.

²⁶ Ma a re toɛ lɔ kɔ́n nɔ̀ ziziɛ̃ kaa gána lɛ-n wa. Ǹ kɔn dɔ a re goɛ̃ nɛ-yɛle baãnaa lɛa wa. Ma á re toɛ ǹ belebɔ kanaa.

²⁷ «Ma á re ma din pàã kɛ diɛ ka nyɛɛnɛ. Ka bɛ́ re doe tɔrɔn mɛnɛn tumaa li, ma á re nyɛ́ɛ diɛ bɛn ganaa, ma ǹ lɔlɔkɔn, ka boo la, ka kaa zɔ́ɔn tumaa dɔ̀ɔ̃ koe yɛ, baa sii woe.

²⁸ Ma á re sìnbìrin diɛ ka nyɛɛnɛ, ǹ Ivii minin loo, ǹ nə ǹ bɔ ka nyɛɛnɛ, ka Kanaan minin laanka Ɛti minin ni.

²⁹ Ma á re ǹ tumaa lui lɛ̀ goon, ma ǹ bɔ ka nyɛɛn wa. Màn mɛn bɛ́ toɛ, gána lɛ baran don kooro baa, don màn baraan nə mɔnaa a nɛ, ǹ basaã kɔ ka-n wa.

³⁰ Man die kaa zɔ́ɔn lɛn lui ka nyɛɛnɛ boɛboɛ, yǎa a woe doe ka dinin mɔnaa ganaa, ka gána lɛ si ka giã a nɛ.

³¹ Kaa gána lɛ a golebaa n die boe Sawɛɛ tà kɛ ganaa, a wo Filisiti minin tà gole kɛ yaa, a bɔ Sinayii don kɛ dɔ ganaa, a wo Efrati tà kɛ yaa. Bɛ̀ masɛ gána lɛ a minin kɔ ka la ǹ mɛn waáraa, ka ǹ loo, ka ǹ bɔ ka nyɛɛnɛ,

³² ka baran lɛ kɔ kɔn la wɔ ka ǹ dinin ni wa, ka nyan wɔ ka ǹ dìn ni wa.

³³ Ka nyan toa ka goã kunun ǹ ni kaa gána lɛ-n wa. Màn mɛn bɛ́ toɛ, ǹ baran ka da sii baraa zɛnaa ganaa, ka wɔ masɛ lon wa. Bɛ bie wa, ka tá re ǹ dìn guguru koe, bɛ á re kan biɛ a ka kũ.»