Bɔ bɛ̀rɛbaa nɛ 22 - LAWA A BOO SONBORE

¹ «Bɛ̀ ǹ nə́ wurumu dɛ tèlò-n wurumubaa ǹ bǎã nɛ, á gã, a gɛ̀-dòo bɔ banban.

² Sɛnɛ, bɛ̀ sii lɛ na á yɛ wasa yii ni, bɛa gɛ̀-dòo bɔ tan. Bɛ̀ màn ba wurumu lɛ lon, a tá màn lɛ a dɛnaa sarɛɛ-n wa, a dinmaa lɛ nə n siɛ̃, a giɔ̀mɔ bɛa màn lɛ saraa.

³ «A tɔɔ mɛn koã, dii, dundun hinlaa sère, bɛ̀ ǹ nə́ bɛa yiikoonaamaa yɛ a gɔn, a n tɔɔ lɛ koe, a kɔsɔ da la.

Min kɔsɔ a màn ziziɛ̃

⁴ «Bɛ̀ min woo a tɔɔn lɛduə̃, á toa ǹ nə́ ǹ miã kɔsɔ a wuru màn sɔ̃, tɔɔdɛnaa lɛ doamaa nɛ, a ǹ miã lɛ a wuru màn lɛ saraa ka a din a wuru sonbore màn nɛ.

⁵ «Bɛ̀ min tɛ da don ganaa, yǎa bɛa tɛ lɛ nə n da wɔlɔ la, á woo ǹ miã kɔsɔ a wuru màn-kurii kũ, hinlaa á kũ bɛ̀ á tɔn lon, tɛ lɛ a dali doamaa nɛ, a wurudɛnaa lɛ saraa.

⁶ «Bɛ̀ min daa wɔrɔ hinlaa màn sonbore kɔ́n koa ǹ miã li, yǎa wurumu da saa ǹ miã lɛ a kion, bɛ̀ wurumu lɛ yɛ, a n bɛa wɔrɔ hinlaa màn lɛ a laman màn paa sarɛɛ.

⁷ Bɛ̀ ǹ wurumu lɛ yɛ wa, kiondɛnaa lɛ doamaa nɛ, a Lawa baa siére lɛa, a n liɛ mà asɛ nə ǹ miã kɔsɔ a màn lɛ saa wa.

⁸ Bɛ̀ kɔn liere-kɔ yɛ min paa bii, dii lɛa, dundun lɛa, sère, hinlaa mɔnaa lɛa, ka màn tɔrɔ kɔsɔ nɛ, a na á papaã, ǹ nə́ pii a wɔ paǹ li, «a din nə́ ke», min paa kɛ lɛ, ǹ didie n màn lɛ biɛ a din wɔ lɛa, bɛn doamaa nɛ, ǹ da Lawa yɔrɔ-a. Bɛ̀ Lawa zɛ̀rɛ koa ǹ mɛn ganaa, bɛ nə ǹ miã kɔsɔ kɛ sarɛɛ, ka màn lɛ a laman màn paa nɛ.

⁹ «Bɛ̀ min dundun koa ǹ miã kɔsɔ li, hinlaa dii, sère, hinlaa tɔɔ tɔrɔ kɔsɔ, bɛ̀ tɔɔ lɛ gã, hinlaa bɛ̀ á busu da a din ganaa, hinlaa bɛ̀ mɛnaa minin la wolen nə́ kũ, siére ná a yɛ á sii la wa,

¹⁰ bɛa min lɛ nə n liɛ ka Dɛnaa tɔ nɛ, ǹ miã kɔsɔ lɛ yɔrɔ-a, mà asɛ na a màn lɛ saa wa. Tɔɔdɛnaa lɛ n lɛ koe bɛa liɛ lɛ ganaa, min kɛ lɛ dɔ a màn lɛ doo sarɛɛ wa.

¹¹ Sɛnɛ, bɛ̀ maǹ nə́ tɔɔ lɛ koã a li, a na a dòo sarɛɛ ǹ dɛnaa la.

¹² Doo, bɛ̀ don siĩ baraa na á tɔɔ lɛ wɔ̃woɛ̃ kɔn, a n die bɛa wɔ̃woɛ̃-kɔn lɛ nɛ, a nyaa siére sii lɛa. A ba tɔɔ wɔ̃woɛ̃-kɔn lɛ dòo sarɛɛ wa.

¹³ «Bɛ̀ min nə́ ǹ miã kɔsɔ a tɔɔ nyɛnɛ a lon, yǎa tɔɔ lɛ busu da a din ganaa, hinlaa á gã bɛ̀ ǹ dɛnaa lɛ ná a banban, tɔɔ lɛ a nyɛnɛli lɛ doamaa nɛ, a na a dòo saraa.

¹⁴ Bɛ̀ sii lɛ na á n zɛnaa tɔɔ lɛ a dɛnaa yii ni, tɔɔ-nyɛnɛli lɛ a màn kɔ́n sarɛɛ wa. Bɛ̀ a na á tɔɔ lɛ kũ, a n woe dí nyɛɛ nɛ, á sarɛɛ, a n die ka tɔɔ lɛ a dí nya ǹ giɔ̀mɔ nɛ.

Minbuiinin bii siin kɔsɔn

¹⁵ «Bɛ̀ giĩ nɛniɛ giĩ-doɛ̃baã wole kũ, á waa kun ni, a doamaa nɛ a na a gɔn si ǹ giɔ̀mɔ saraa, a baa a lɔ lɛa.

¹⁶ Bɛ̀ nɛniɛ lɛ di nə́ n piã mà a koe la wa, ka bɛ din yii ni, giĩ lɛ n wɔrɔ sarɛɛ, ka ǹ bɛ́ nɛniɛ giĩ-doɛ̃baã wole gɔn si ǹ giɔ̀mɔ sarɛɛ lɔn.

¹⁷ «Ka baran lɔ kɔ́lɔnbaali toa a yii n koo wa.

¹⁸ «Bɛ̀ min mɛn waa kun ka tɔɔ nɛ, ǹ bɛ dɛ a gã.

¹⁹ «Bɛ̀ min wúlu bɔ dì ganaa Dɛnaa goon toto kɛ kio, bɛa dɛnaa doamaa nɛ, a n dɛ a gã.

²⁰ «Ka baran mɛnaa gùli la wa, ka baran fuu nyaa-n wa. A giala, ka dɔn nə́ goã gùlin lɛa Ezipti gána nɛ.

²¹ Ka baran fuu nyaa lɔ giɔɔrɔ kɔ́n nɛ, ka nɛ-toen kɔ́n nɛ wa.

²² Bɛ̀ ka fuu nyaa nɛ, yǎa a n lɛ dɛ masɛ Lawa ganaa, ma á re a lɛ miɛ̃.

²³ Ma foo á re busi ka li, ma ka kɔ ǹ la, ǹ ka dɛ ka gɔya san nɛ, kaa lɔn nə giɔɔrɔn baa, kaa nɛnyaanan nə nɛ-toenən baa.

²⁴ «Bɛ̀ ka giɔ̀mɔ da ka miã doobaa ganaa, ka baran zɛnaa nɛ ka giɔ̀mɔ-dali gialakunun wɔ bɛ́ lɔn wa. Ka baran pɛ mà a da saraa ka là-n wa.

²⁵ Bɛ̀ min ná a dɔnkɛ gole kɔ n la, á màn si, mà asɛ á re n sarɛɛ a tɔn si, ka kɔ la bɛ̀ wasa baa miɛ̃.

²⁶ A giala, bɛ lɛ na a kɔmalɛ goon lɛa, a tá a din gɔ̀nɔn kuĩ ni tèlò-n. Bɛ̀ n kɔ la wa, a n die wɛɛ tán ka wàa nɛ? Bɛ̀ á n lɛ dɛ masɛ ganaa, ma á re a lɛ miɛ̃. A giala, makara-dɔ̃li n ka masɛ Lawa nɛ.

²⁷ «Ka baran sɔ kɔ Lawa ganaa wa. Ka baran boo baraa dɔ da ka tɔrɔ minin nyɛɛnaandɛnaa kɔ́n ganaa wa.

²⁸ «Ka doamaa bie ka goã kio ka masɛ Lawa wɔ gii ni, *belee wɔ paǹ li wa, duvɛ̃ nɛ ka *olivie nyɔɔ nɛ. «Ka kaa nɛgiĩ bibinaan koa masɛ din wɔn lɛa.

²⁹ Ka zɛnaa bɛa yɔrɔ kɛ lɛ la ka kaa diin ni, kaa sèren ne. Ǹ nɛ bibinaa lɛ gɔ̀lɔ̀n lɛa, ka ǹ toɛ kunun ǹ dan nɛ lɛawaa sɔbaa ǹ yɛ kio. A lɛawaa kiwisibaa ǹ wɔ pinaa, ka dɛ *wúlu màn lɛa, ka kɔ masɛ la.

³⁰ «Ka doamaa nɛ ka goã ma din wɔn lɛa. Bɛ̀ don siĩ baraan nə́ tɔɔ mɛn wɔ̃woɛ̃ kɔn don á gã, ka baran bɛ siĩ sɔ̃ wa. Ka zũ ginin la.»