Bɔ bɛ̀rɛbaa nɛ 21 - LAWA A BOO SONBORE

Dí-pɛn mɛnɛn bɛ́ bɛ̀rɛn wɔ paǹ li

¹ Lawa mà sii zɛnaa ǹ gɔn kɔsɔn nə́ ke, a n siĩni a ǹ pɛ Izirayeli nɛnyaanan manɛ:

² «Bɛ̀ ka bɛ̀rɛ pii, á n *Ebrəə min lɛa, a doamaa nɛ a dí nya lɛ̀ sɔrɔ. A sɔbaabaa ǹ wɔ, á boe la, a wo a din gɔn wìi a lɛa, a ná a ba màn kɔ́n sarɛɛ wa.

³ Bɛ̀ a na á daa bɛ̀rɛ lɛ baa a dinsɔɔ̃, a n soe, a wo a dinsɔɔ̃. Bɛ̀ a na á daa ka lɔ nɛ, a lɔ dɔ n soe, a wo kun ni.

⁴ Bɛ̀ a mìinaa na á lɔ kɔ la, yǎa lɔ lɛ nɛnyaanan yɛ la, nɛgiĩn hinlaa nɛlɔn, lɔ lɛ laanka a nɛnyaanan man goɛ̃ ǹ mìinaa nɛ. Bɛ̀rɛ lɛ sɛ n soe a dinsɔɔ̃.

⁵ Sɛnɛ, bɛ̀ bɛ̀rɛ lɛ pɛ mà a mìinaa lɛ á kɔɔ̃nɛ a ganaa, mà a din a lɔ lɛ dɔ laanka a nɛnyaanan tá kɔɔ̃nɛ a ganaa, mà a ba li a soo a wo a din gɔn wìi a lɛa wa,

⁶ a mìinaa lɛ Lawa baa siére lɛa, a bɛ̀rɛ lɛ mɔrɔ a kiɛnlɛ ganaa, hinlaa a kiɛnlɛ gɔn ganaa, a na a too fɔ̃ ka kiɛ nɛ. Bɛ̀rɛ lɛ n dí nyɛɛ nɛ kəni yǎa duduu.

⁷ «Bɛ̀ min dɔ ná a nɛlɔ sã bɛ̀rɛ lɛa, bɛa nɛlɔ lɛ a boe la, a soo ka bɛ̀rɛ gialakunun bɛ́ zɛnɛɛ lɔn wa.

⁸ Bɛ̀ a sii kɔɔ̃n kɔ a mìinaa ganaa, á baa a lɔ lɛa wa, a n toɛ nɛlɔ lɛ di da a nyin giɔ̀mɔ saraa, a si. Zii ba a mìinaa lɛ lon, a nɛlɔ lɛ sã tɔrɔ kɔsɔ min la wa, bɛ bie wa, a sii lɛ zɛnaa a yɔrɔ li wa.

⁹ «Bɛ̀ a n giɛ li a kɔ a nɛgiĩ la dɔn, a n sii tumaa zɛnɛɛ a wɔ paǹ li, ka a bɛ́ zɛnɛɛ a din a nɛlɔn man lɔn.

¹⁰ «Bɛ̀ mìinaa lɛ ga lɔ kɔsɔ li a din wɔ lɛa, a ba màn boe bɛ̀rɛlɔ lɛ a màn-bii lɛ wa, a boe a mɔnaa lɛ wa, a boe ǹ tá kun dɔ lɛ wa.

¹¹ Bɛ̀ mìinaa lɛ bɛa sii sɔɔ kɛ zɛnaa nɛ wa, bɛ̀rɛlɔ lɛ á boe la a soo, a wo a din gɔn wìi a lɛa, a ná a ba wɔrɔ sarɛɛ wa.

Sãn mɛnɛn bɛ́ gɛ̀ dɔlɔ boe

¹² «Bɛ̀ min mɛn min dɛ á gã, a dɔ nə n dii a gã.

¹³ Bɛ tumaa kio, min mɛn lɛ bɛ́ a gɔn da ǹ miã lɛ ganaa á dɛ wa, sɛnɛ, sii lɛ nə́ n baa foobaamala sii lɛa, ma á re bǎã boe ma koa, gɛ̀ kɛ lɛ tɔrɔ dɛle á boe la a baa si, a wo a nɛ.

¹⁴ Sɛnɛ, bɛ̀ min foo busu ǹ miã li, á ga li, á dɛ ka yiri ni, ta bɛa gɛ̀-dɛle kɛ lɛ na á n duru *wúlu bɔ ǹ bǎã nɛ, ǹ bɔ walan ǹ dɛ, a gã.

¹⁵ «Bɛ̀ min nə́ ǹ di dɛ hinlaa ǹ dan dɛ, ǹ bɛa min kɛ lɛ dɛ a gã.

¹⁶ «Bɛ̀ min min koã, á sã hinlaa maǹ nə́ kũ a gɔn, ǹ bɛa min-koãli lɛ dɛ a gã.

¹⁷ «Bɛ̀ min boo baraa da ǹ di ganaa hinlaa ǹ dan ganaa, ǹ bɛa min lɛ dɛ a gã.

¹⁸ «Bɛ̀ minin nə́ zia da, yǎa goon nə ǹ miã dɛ ka kɔlɔ nɛ, hinlaa ka gɔn-munii ni, bɛ̀ ǹ miã lɛ gã wa, sɛnɛ, á waa tán ka busu ni,

¹⁹ bɛ̀ á boe la á yui, á n soe kanaa, a nə́ n doɛ bàlà ganaa, ǹ na a dɛle lɛ toa walan. Sii goon nə ke, a doamaa nɛ, a kɛ lɛ a waa tán lɛ saraa, a na a dagòã bɔ yǎa a kaka koe.

²⁰ «Bɛ̀ min na á bɛ̀rɛgiĩ hinlaa á bɛ̀rɛlɔ dɛ ka dɔ̀rɔ̀ nɛ, yǎa a gã a gɔn, ǹ doamaa nɛ ǹ gɛ̀ dòo bɔ a ganaa.

²¹ Sɛnɛ, bɛ̀ a yii goã koo lɛawaa goon hinlaa lɛawaa paa, gɛ̀-dòo ba n boe wa, a giala, man a gɔn mànan lɛa.

²² «Bɛ̀ minin dɔn man nə́ kɔn kũ, ǹ nə́ n tɔ lɔ nɔnoa nɛ, bɛ̀ a nɔ̀ lɛ ziziɛ̃, baraa ná a n zɛnaa a din ni wa, minin lɛn doamaa nɛ, ǹ màn saraa a kɔnpɛ ka lɔ lɛ zuũ a màn pɛ nɛ. Ǹ saraa sii yɔrɔ-bɔlen yii ni.

²³ Sɛnɛ, bɛ̀ baraa lɔ lɛ dinmaa yɛ, nyin giɔ̀mɔ nə n sarɛɛ ka nyin ni.

²⁴ Yii wɔ n ka yii ni, sɔ wɔ n ka sɔ nɛ, gɔn wɔ n ka gɔn nɛ, gòã wɔ n ka gòã nɛ.

²⁵ Tɛ da min ganaa wɔ n ka tɛ-diɛ nɛ, mà bɔ min ganaa wɔ n ka mà-bɔ nɛ, min dɛ ka gɔn kiri-n wɔ n ka gɔn kiri ni.

²⁶ «Bɛ̀ min na á bɛ̀rɛgiĩ hinlaa á bɛ̀rɛlɔ dɛ, a ná a yii puru, a toa ǹ wo ǹ dinin gɔn wìi a lɛa, bɛ yii lɛ a saraa baa.

²⁷ Ta a bɛ̀rɛ lɛ sɔ nɛ á yiɛ, a n toɛ a wo a din gɔn wìi a lɛa, bɛ na a sɔ lɛ a saraa baa.

²⁸ «Bɛ̀ dii giĩ hinlaa lɔ dɛ ka a bɛn nɛ, yǎa a gã, bɛa dii lɛ nə n dii ka kɔlɔ nɛ yǎa a giɛ̃. Min dɔ baran a siĩ sɔ̃ wa. Sɛnɛ, zɛ̀rɛ ba re goɛ̃ dii lɛ a dɛnaa ganaa wa.

²⁹ Sɛnɛ, bɛ̀ dii lɛ lɛ-mui sii n ka minin dɛ nɛ, ǹ nə́ n gɔn waa ǹ dɛnaa nɛ, a na a ga a walan wa, yǎa dii lɛ min dɛ, dii lɛ nə n dii ka kɔlɔ nɛ, ǹ dɛnaa dinmaa dɔ nə n dii a gã.

³⁰ Bɛ̀ ǹ nə́ pɛ nɛ, mà a n din nyin si, ǹ bɛ́ re màn woo màn pii ni, a n bɛ sarɛɛ a din nyin giɔ̀mɔ lɛa.

³¹ Ta dii lɛ na á nɛginin hinlaa nɛlɔ dɛ á gã, a nə n yɔrɔ boe bɛa gɔn kɛ lɛ la.

³² Bɛ̀ dii lɛ na á bɛ̀rɛgiĩ hinlaa bɛ̀rɛlɔ dɛ, dii lɛ a dɛnaa doamaa nɛ, a wɔrɔ we pɔsɔɔ saraa bɛ̀rɛ lɛ a dɛnaa la. Dii lɛ sɛ nə n dii ka kɔlɔ nɛ.

³³ «Bɛ̀ min tù gɔ́ɔ̃ bɔ, hinlaa á tù fɔ̃, a ná a pii kɔ lɛ wa, bɛ̀ dii hinlaa dundun nə́ n dɔ a nɛ,

³⁴ tùdɛnaa lɛ na a doo sarɛɛ. A n wɔrɔ boe, a tɔɔ gere lɛ giɔ̀mɔ saraa ǹ dɛnaa la. Sɛnɛ, tɔɔ gere lɛ na a wɔ biɛ.

³⁵ «Bɛ̀ min a dii nə́ ǹ miã kɔsɔ wɔ dɛ á gã, maǹ dii yiikoonaa lɛ sɛ siɛ̃, ǹ na a wɔrɔ gii kɔn. Ǹ dii gere lɛ dɔ siĩ gii kɔn.

³⁶ Bɛ̀ á foaãnɛ, mà bɛa dii kɛ lɛ nə ǹ miãn dii lɛlɛ, ǹ dɛnaa dɔ ná a ga a walan wa, a n dii yiikoonaa koe a gere lɛ doo lɛa. A gere lɛ sɛ n goɛ̃ asɛ nɛ.

Tɔɔn koã boo

³⁷ «Bɛ̀ min dii goon koã, hinlaa sère goon, á dɛ hinlaa á sã, a n dii sooro koe dii lɛ doo lɛa, hinlaa sère sii koe sère lɛ doo lɛa.»