Bɔ bɛ̀rɛbaa nɛ 20 - LAWA A BOO SONBORE

Lawa a Dí Fù

¹ Lawa tɔ́n boon kɛn tumaa da:

² «Ma din nə Dɛnaa lɛa, n Lawa lɛ nɛ, ma soo n ne, má n bɔ Ezipti gána a bɛ̀rɛbaa nɛ:

³ - N baran Lawa kɔsɔ guguru kɔ masɛ kio wa.

⁴ - N baran màn nyín zɛnaa n bɛ baa n Lawa lɛa wa. A baran lon màn yiikoonaa baa wa, tán wɔ nɛ, ka mu giulun wɔ-n wa.

⁵ N baran n kuməə bɛa lawan kɛn lɛn yɔrɔ-a, n nə ǹ guguru kɔ wa. A giala, masɛ din Dɛnaa, n Lawa lɛ, maa sii á kaka, maa lɛ koe lawa kɔsɔ ganaa wa. Man digolon sã a dɔlɔ boe ǹ nɛnyaanan ganaa, ka ǹ nɔ̀ɔnɔn nɛ, yǎa a woe doe nɔ̀ɔ fulupaa ganaa, bɛ̀ á daa yǎa ǹ ba masɛ narɛ wa.

⁶ Sɛnɛ, man maa bɔlɔgoondɛnaabaa nyɛɛ maa narɛɛ wolen laanka maa dí-pɛn tamaa wolen manɛ, yǎa nɔ̀ɔ duu gigiã.

⁷ - N baran n Dɛnaa Lawa tɔ bíi sii kooron ganaa wa. A giala, masɛ Dɛnaa ba bɛa min kɛ toɛ dɔlɔ baã wa.

⁸ - N *susu ǹ pii tamaa, n bɛ koa a gɔrɔn Lawa a lɛa.

⁹ N dí nya lɛawaa sɔrɔ, n nə n dí tumaa yɔrɔ bɔ.

¹⁰ Sɛnɛ, lɛawaa sɔbaabaa ǹ wɔ pinaa ke, Dɛnaa lɛ, n Lawa lɛa, bɛa susu ǹ pii n ka bɛ nɛ. N din baran dí kɔ́n nya wa, n nɛnyaanan baran nya wa, a giĩdɛnan laanka a lɔdɛnan nɛ, n dí-nyalin ni, a giĩdɛnan laanka a lɔdɛnan nɛ, n tɔɔn baran nya wa, haalɛ gùli mɛn bɛ́ ka li.

¹¹ A giala, lɛawaa sɔrɔ gɔ́ɔ̃ nɛ, Dɛnaa lon laanka tán zɛnaa, ka yìsi mu ni, ka ǹ gɔ́ɔ̃gɔ́ɔ̃ ǹ mànan tumaa nɛ. Sɛnɛ, a na á n susu lɛawaa sɔbaabaa ǹ wɔ pinaa. Bɛ lɛ taman yii ni, Dɛnaa barka wɔ bɛa susu ǹ pii kɛ lɛ nɛ, á baa a din wɔ lɛa.

¹² - N díi laanka n náa guguru kɔ, màn mɛn bɛ́ toɛ, n nyin sasa yɛ gána kɛ nɛ, n Dɛnaa Lawa din kɔ n la.

¹³ - N baran gɛ̀ dɛ wa.

¹⁴ - N baran naarɛbaa zɛnaa wa.

¹⁵ - N baran wurumu baa wa.

¹⁶ - N baran soɛ da min la wa.

¹⁷ - N yii baran bɔ min kɔsɔ gɔn màn kɔ́n li wa. N yii baran bɔ a kion li wa. N yii baran bɔ a lɔ li wa, a baran bɔ a dí-nyali giĩdɛnan laanka lɔdɛnan li wa. N yii baran bɔ a dii li ka a dundun ni wa.»

¹⁸ Izirayeli nɛnyaanan zaman lɛ tumaa na á goã la a ginii kɛ laanka bɛn wuu miɛ̃. Ǹ nə́ la a tɛ-pɛ lɛ dɔ yɛ, ka kele lɛ-n tɛmaa lɛa. Nyɛ́ɛ zaman lɛ kũ, ǹ nə́ golee tiãlɛa.

¹⁹ Ǹ nə́ pɛ Muizu ni: «N din boo da wɔ nɛ, wɔ á re miɛ̃. Lawa baran boo da wɔ-n wa, bɛ bie wa, wɔ á re giɛ̃.»

²⁰ Muizu pɛ zaman lɛ nɛ: «Ka baran nyɛ́ɛ baa wa. A giala, Lawa na á daa n da ka gɔ́ɔ̃ li, màn mɛn bɛ́ toɛ, nyɛ́ɛ baa a din ni goã ka foo ne, ka baran sii baraa dɔ zɛnaa wa.»

²¹ Zaman lɛ golee tiãlɛa, sɛnɛ, Muizu nə́ n mɔrɔ bara kɛ lɛ ganaa, Lawa n giã nɛ a bii.

Wúlu bɔ ǹ bǎã

²² Dɛnaa pɛ Muizu ni: – A pɛ Izirayeli nɛnyaanan lɛn man kɛnɛn: «Ka dinin nə́ yɛ, má n toa lon, má boo da ka nɛ.

²³ Kaa boe la, ka masɛ baa ka lawan kɛn bɛ́ lɔn, ǹ nə́ ǹ zɛnaa ka wɔrɔgiala laanka sana-n wa. Kaa boe la, ka bɛn miãn zɛnaa masɛ genli wa.

²⁴ Ka *wúlu bɔ ǹ bǎã dɔ ka tii ni masɛ wɔ lɛa, ka wúlu mànan dɛ ka ǹ tã la, ka bii kɔɔ̃n kɔ kɔn ka Lawa nɛ ǹ wúlu mànan nɛ. Ka ǹ bɔ, sèren laanka diin ni. Ma bɛ́ re bǎãn mɛnɛn nyɛɛ, ka ma guguru kɔ ǹ nɛ, ma á re die walan, ma barka da ka ganaa.

²⁵ Bɛ̀ ka tá wúlu bɔ ǹ bǎã lɛ doe ka kɔlɔ nɛ masɛ wɔ lɛa, ka baran dɔ ka kɔlɔ sɛlɛɛ-n wa. A giala, bɛ̀ ka sɛlɛ ka kaa sɛ̀miɛ̃ nɛ, ka á re a sonborebaa nyɛɛ.

²⁶ Ka baran banbaran koa maa wúlu bɔ ǹ bǎã lɛ ganaa, ka dii la-n wa, màn mɛn bɛ́ toɛ, ka baran n toa tán, ka dii lon wole lɛa sìi bǎã yɛ wa.»